Deer ko Piin Ma Bieg

Fare pin i Maria ni dawori nang e pumoon ni de flont dariy e kireb riy ni ke diyennag Jesus?

Rogon “nni gargeleg Jesus,” fare yiiy ni kan yoloy e gaar: “Nap’an fare ngiyal’ i n’em ni Maria ni chitingin e ni dugliy ni ngar mabgolgow Joseph, me pirieg ni ke diyen ni bochan fare kan ni thothup u m’on ni ra pirew nga taabang.” (Matthew 1:18) Rib ba mudugil, ni kan ni thothup rok Got e bay rogon ko fare diyen ni tay Maria.

Me ere, uw rogon Maria? Birok e egg cell, ara ovum e bay ban’en rogon ko fare diyen ni tay? Rogon e n’en ni micheg Got ngak Abraham, Isak, Jakob, Judah, nge David ni Pilung​—pi chitamangin Maria ko som’mon i yib—​ni fare tir ni bay ni gargeleg e rriyul’ ni be’ ni ra yib ko re umi girdi’ nem. (Genesis 22:18; 26:24; 28:10-14; 49:10; 2 Samuel 7:16) Ere ku uw rogon ma fare tir ni gargeleg Maria e rriyul’ ni ir e bay mat’awun ko fapi n’en ni ke micheg Got? Ya thingari mang ba pagal ni riyul’ ni fak.​—Luke 3:23-34.

I m’ug e engel rok Jehovah ngak Maria ni dawori nang e pumoon, me gaar: “Maria, dabmu tamdag, yi Got e kari tow’athnagem. Bay mu diyen ngam gargelnag bochi pagel, ma ngam tunguy fithingan ni Jesus.” (Luke 1:30, 31) Faanra nge sum e bitir u meyal ma ba t’uf ni nge ngal’ fare egg cell. Ba mudugil, ni Jehovah Got e ir e maruweliy ere egg cell nem u yal rok Maria nge ngal’, i ngongliy ere n’eney ni ngal’uweg e yafas rok fak ni kari maagirag ko birok e kan e giyow nga fayleng.​—Galatia 4:4.

Rayog ni ngan diyennag ba bitir ni aray rogon ni be’ nib pin ni de flont ma rayog ni nge flont fare tir me par ni dariy e denen u fithik’ i downgin? Uw rogon yalen ni ma maruwel ban’en me abuweg gosgoson ni faanra chagil e flont nge de flont? Mu lemnag ni fare kan ni thothup e ir e ni l’og ni nge abuweg gelngin fare yafas ni ba flont u fak Got ma aram me sum fare tir. Re n’eney e chuweg urngin e n’en ni de flont ko fare egg cell rok Maria, ma aram me sunmiy reb e rarogon e gene ni ba flont ko ngiyal’ ni tabab.

Yugu demtrug rogon, ma rayog ni nge michan’dad ngay ni rogon e maruwel ko kan ni thothup rok Got ko re ngiyal’ nem e micheg ni ke fel’ rogon e tini ke m’ag uwan’ Got. Fare engel ni Gabriel e fal’eg i weliy ngak Maria ni gaar: “Fare kan ni thothup e bay yib ngom, me yib i par gelngin Got ngom. Erera’ fan nre tir nem nib thothup e bay ni pining ni Fak Got.” (Luke 1:35) Arrogon, kan ni thothup rok Got e ngongliy ban’en, ni bod, bangi ban’en ni be ayuweg be yororiy ni nge dariy ban’en ni de flont ara ba kireb gelngin ni rayog ni nge kirebnag fare tir u meyal ko ngiyal’ ni be sum i yan nga m’on.

Rib tamilang, ni Chitamangin Jesus u tharmiy e ir e ke pi’ e yafas rok nib girdi’ nib flont, ma gathi girdi’. Jehovah e “fal’eg rogon ba dowef” ni fen, me Jesus​—u nap’an ni kan parnag i yan nga m’on—​ma rriyul’ ni “dariy ban’en rok nib alit, ma de peth ko piin ni ta denen.”​—Hebrews 7:26; 10:5.

[Picture on page 31]

“Bay mu diyen ngam gargeleg bochi pagel”