Piin Kristiano E Ra Bagayad Mab T’uf Rok Bagayad

“Gadad gubin nib mil fadad ngak be’.”​—EFESUS 4:25, NW.

1. Mang e ke yog reb e encyclopedia u murung’agen downgin e girdi’?

DOWNGIN e girdi’ e kan sunmiy ni yira ngat ngay! Fare babyor ni The World Book Encyclopedia e yog ni gaar: “Girdi’ e ma yog yu ngiyal’ ni downgin e girdi’ e bod ba masin​—ni fa bin th’abi fel’ e masin ni kan chamiy. Riyul’ ni downgin e girdi’ e gathi masin. Machane rayog ni ngan taareb rogonnag nga reb e masin u boor e kanawo’. Ni bod e masin, ni kan ngongliy kenggin ma bay boor yang riy. Urngin yang ko downgin e girdi’, e bod bang u reb e masin, ni bay e maruwel ni ma rin’. Machane urngin yang ni be maruwel u taabang ma aram e fare dowef ara fare masin e rayog ni nge maruwel nib fel’ rogon.”

2. Mang e kanawo’ ni downgin e girdi’ nge fare ulung ni Kristiano e taareb rogon.?

² Arrogon, downgin e girdi’ e boor yang, ma ra bayang ma be pi’ ban’en nib t’uf. Dariy reb e nguchey, nge muscle, ara yu yang ni kan ngongliy ndariy fan. Maku arrogon, urngin e Kristiano u lan e ulung ni ra be’ ma be pi’ e ayuw ni nge fel’ rogon be’ ko tirok Got. (1 Korinth 12:14-26) Yugu aram rogon ma ra be’ u lan e ulung ma susun dabi lemnag ni ir e kab tolang ngak yugu boch e girdi’, ma ku susun dabi lemnag ni ir be’ ndariyfan.​—Roma 12:3.

3. Uw rogon ni dag ko Efesus 4:25 ni piin Kristiano e ba t’uf ni ngara ayuweged yad?

³ Ni bod urngin yang u downgin e girdi’ ni yad be maruwel nra bayang ma be ayuweg bayang, maku arrogon e piin Kristiano nra bagayad mab t’uf ni nge ayuweg bagayad. Paul ni apostal e ke yog ngak reb e walag ni kan dugliy ko kan ni thothup ni gaar: “Chiney ni kam paged e tin de riyul’, e nge bigimed ma nge yog e tin riyul’ ngak e en buguli yoror rok, ya bochan ra bagadad ma ba milfan ngak bagadad.” (Efesus 4:25, NW) Bochan ‘nra bagayad ma be ayuweg bagayad,’ ma arfan ni piin ni yad bang ko fare Israel nib spiritual e yad ma puruy u fithik’ e yul’yul’ ma ra bagayad ma ri be ayuweg bagayad ni aram​—“fare downgin Kristus.” Arrogon, ra bagayad ma ba milfan ngak bagayad. (Efesus 4:11-13) Piin Kristiano nib yul’yul’ ma ri ma pi’ e ayuw ngak yugu boch e girdi’ ni athap rorad e yad ra par u fayleng ni yad be chag ngorad u fithik’ e falfalan’.

4. Mang kanawo’ ni rayog ni ngan ayuweg e piin kefin ra tababgad ko pigpig ku Got?

⁴ Gubin e duw, ma bokum biyu’ e girdi’ ni ma un ko taufe ni yad be athapeg ni ngar pared u paradis u fayleng. Ma boch e girdi’ u lan e ulung e be ayuwegrad u fithik’ e falfalan’ ni ngar “ilalgad ko tirok Got.” (Hebrews 6:1-3, NW) Re ayuw ney e ba muun ngay ni ngan pi’ e fulweg ko deer u murung’agen e thin nu Bible ara ayuw u nap’an ni yibe machib. Rayog ni ngad pied e ayuw ngak e piin ni kefin ra uned ko taufe u daken e ngongol nib fel’ ni aram e ngada uned ko muulung ko Kristiano ni gubin ngiyal’. Nap’an ni keb e gafgow ngorad, ma ku rayog ni ngada pied e athamgil nga lanin’rad ara ngad fal’eged lanin’rad. (1 Thessalonika 5:14, 15) Thingarda gayed e kanawo’ ni ngad ayuweged yugu boch e girdi’ ni nguur “folgad ko tin riyul’.” (3 John 4) Demtrug ko gadad e piin kab pagal ara kad pillibthirgad, ni kefin da folgad ko tin riyul’ ara kad folgad riy u lan boor e duw, ma rayog ni ngad ayuweged e pi walag ngar mon’ogad ko tirok Got​—ma rib t’uf ni nguuda ayuweged yad.

Kar Pied e Ayuw ni Rib T’uf

5. Uw rogon ni kari ayuweg Aquila nge Priscilla Paul?

⁵ Piin Kristiano ni yu wu’ i mabgol e ba muun ngay e piin ni kar felfelan’gad ni kar ayuweged pi walagrad. Ni bod, Aquila nge Priscilla (Priska) ni leengin, e kar ayuwegew Paul. Kar piningew ni nge par u tabinaw rorow, kar maruwelgad u taabang ni ur ngongliyed e tent, ma kar ayuwegew Paul ngar ubunged fare ulung nib biech u Korinth. (Acts 18:1-4) Rogon ni dan weliy nib tamilang, ma kar pagew fan e pogofan rorow ni bochan Paul. Yow ma par u Roma u nap’an ni ke yog Paul ngak e piin Kristiano u rom ni gaar: “Nge felan’ Got ngak Priska nge Aquila, ni yow e ur unew ngog nguug pigpiggad ngak Kristus Jesus, nra pagew fan e pogofan rorow ni bochag. Kar magargow - ni gathi ke mus ni gag e gu be pining e magar ngorow, ya ku er rogon urngin e galesiya rok e piin ni gathi yad piyu Israel.” (Roma 16:3, 4) Ni bod Aquila nge Priscilla, ma boch e Kristiano e ka ra ubunged fapi ulung ma kar ayuweged e pi walagrad u boch e kanawo’ nib thilthil, ni yu ngiyal’ e ma par e yafas rorad u thatharen e riya’ ni fan ni ngar ayuweged yugu boch e tapigpig rok Got ni ri magawonnagrad ara li’rad e piin tatogopuluw ngar m’ad.

6. Mang ayuw e kan pi’ ngak Apollos?

⁶ Aquila nge Priscilla e ku kara ayuwegew Apollos ni reb e Kristiano nib cheg ko welthin, ni be fil ngak e piin ni ma par u Efesus murung’agen Jesus Kristus. Ngiyal’ nem, ma tin manang Apollos e ke mus ni murung’agen e taufe ni ke rin’ John ni be yip’ fan ni ngan kalngan’uy ko denen nib togopuluw ko fare m’ag ko Motochiyel. Bochan ni ke nang Aquila nge Priscilla nib t’uf rok Apollos boch e ayuw, ma aram e kar “weliyew ngak murung’agen Kanawoen Got nib puluw.” Baga’ ni ka ra weliyew ngak ni taufe ko Kristiano e ba l’ag ngay ni ngan lithagey nga fithik’ e ran me yib e kan ni thothup nga dakeney. Kari fol Apollos ko tin ni ke fil. Tomur riy u Achaia “ma ri ba ga’ e ayuw ni pi’ ngak e piin ni ke mich Jesus u wun’rad u daken e runguy nge ayuw rok Got ngorad. Mi yad ma luagthin piyu Israel u fithik’ e girdi’ ni yoor nib elmerin me gel ngorad, ni aram e be micheg ngorad u lan fare babyor nib thothup ni Jesus e ir fare Messiah.” (Acts 18:24-28) Thin ni ma yog e pi tapigpig ni walagdad e baga’ nra ayuwegdad ni ngari tamilang e thin rok Got u wan’dad. Maku arrogon u roy, nib t’uf ni nguuda ayuweged gadad.

Ngan Pi’ Boch e Chugum ni Ayuw

7. Mang e i rin’ piyu Filippi u nap’an ni pi walagrad ni Kristiano e ba t’uf rorad e ayuw ko chugum?

⁷ Girdi’ u lan e ulung ni Kristiano u Filippi e rib t’uf Paul rorad mar pied boch e chugum ngak u nap’an ni be par u Thessalonika. (Filippi 4:15, 16) Ngiyal’ nib t’uf e ayuw ko chugum rok e pi walag u Jerusalem, ma piyu Filippi e kar daged nib ma’gan’rad ngay ni ngar pied boch ban’en ni mus ko tin ni dabiyog rorad. Kari pining Paul e magar nbochan e ngongol nib fel’ ni ke dag pi walagen ni pumoon nge ppin ngak u Filippi me weliy murung’agrad ni kar daged e ngongol nib fel’ ma aram e n’en nib fel’ ni nge fol yugu boch e girdi’ ni ke michan’rad riy.​—2 Korinth 8:1-6.

8. Mang lem ni dag Epafroditus?

⁸ Nap’an ni kan kalbusnag Paul, ma piyu Filippi e gathi kemus ni kar pied ngak boch e chugum ni taw’ath ya ku kar l’oged Epafroditus. I yog Paul ni gaar, “Yi pag fan e pogofan rok [Epafroditus] nge chugur ni ngem’ ni fan ko maruwel rok Kristus, ni bochan e nge ayuwegeg ko n’en ndabiyog ni ngam ayuweged gag riy.” (Filippi 2:25-30; 4:18) Da nog ngodad murung’agen Epafroditus ko ir reb e piilal fa ministerial servant. Yugu aram rogon, ma ir reb e Kristiano ni ri ma pag fan ir ma ri ma pi’ e ayuw, ma rib t’uf rok Paul e ayuw rok. Bay be’ u lan e ulung romed ni bod Epafroditus?

Ri ‘Baga’ e Ayuw’ ni Yad Ma Pi’

9. Mang e n’en nrayog ni ngad guyed ko tin ni dag Aristarchus?

⁹ Pi walag ni pumoon nge ppin ni ri ma dag e t’ufeg rorad, ni bod Aquila, nge Priscilla, nge Epafroditus, e ri yibe tayfan u lan e ulung ndemtrug ko uw. Boch e girdi’ u fithik’ e pi walagdad e sana ri taareb rogorad nga reb e Kristiano ko fa bin som’mon e chibog ni Aristarchus fithingan. Cha’ nem nge yugu boch e girdi’ e “ri baga’ e ayuw” ni yad ma pi’, ni sana ri yad ma fal’eg lanin’uy ma ma pi’ e ayuw ko tin ni ri ma fanay e girdi’. (Kolose 4:10, 11) Bochan ni ayuweg Aristarchus Paul, me m’ug ni ir e fager nib riyul’ u nap’an ni rib t’uf e ayuw rok. Ir fa mit i girdi’ ni ka nog murung’agen u Proverbs 17:17 (NW) ni gaar: “Reb e tafager nib riyul’ e ma dag e t’ufeg ni gubin ngiyal’, ma reb e walag e kan gargelnag ni fan ko ngiyal’ ni keb e gafgow.” Gathi gad gubin e ba t’uf ni ngad athamgilgad ni ngad manged girdi’ ni ‘baga’ e ayuw’ ni gad ma pi’ ngak e pi walagdad ni Kristiano? Ni baga’ ni gad ra pi’ e ayuw ngak e piin ni keb e gafgow ngorad nib gel.

10. Mang e n’en ni dag Peter ni fan ngak e piin piilal ni Kristiano?

¹⁰ Piin ni piilal ni Kristiano e thingara pied e ayuw nib gel ngak e pi walag ni Kristiano ni pumoon nge ppin. I yog Kristus ngak Peter ni apostal ni gaar: “Thingar mpi’ e gel nga laniyan’ pi walagem.” (Luke 22:32) I rin’ Peter ban’en ni aram rogon ya bochan e dag felngin nib gel ni bod ba war, nib ga’ u tomren ni kan faseg Jesus ko yam’. Gimed e piin piilal, ri ngam athamgilgad ni ngam rin’ed e tin ni aram rogon ni ngam mu gelnaged pi walagmed nib m’agan’med ngay u fithik’ e sumunguy, ya ba t’uf rorad e ayuw romed.​—Acts 20:28-30; 1 Peter 5:2, 3.

11. Gad ra lemnag e lem rok Timothy ma uw rogon ni nge fel’ rogodad riy?

¹¹ Timothy ni ma un ngak Paul ko milekag e reb e piilal ni ri ma lemnag yugu boch e Kristiano. Yugu aram rogon ni immoy mit e m’ar rok Timothy, me dag e michan’ rok nrib mudugil me mel’eg ni nge mang ‘sib rok Paul ni fan ni ngan m’oneg fare thin nib fel’.’ Arfan ni fare apostal e rayog rok ni nge yog ngak piyu Filippi ni gaar: “Dariy yugu be’ ni ma lem ni taareb rogon ko cha’ nem ni ri ma lemnag ni nge rin’ boch ban’en ni fan ngomed.” (Filippi 2:20, 22, NW; 1 Timothy 5:23; 2 Timothy 1:5) Gad ra dag e lem ni bod Timothy ma gad mang taw’ath ngak e piin ni ku yad be pigpig ku Jehovah. Riyul’, thingarda kadedan’dad ko tin ni gad ba meewar riy nge boch e skeng nib thilthil ni ma yib ngodad, machane ku rayog rodad ni ngad daged ma thingarda daged e michan’ nib gel nge runguy ni fan ngak e pi walagdad ni pumoon nge ppin u lan e ulung. Nguuda lemnaged ni gubin ngiyal’ nib t’uf rorad e ayuw rodad.

Fapi Ppin ni Yad Ma Lemnag Yugu Boch e Girdi’

12. Mang e gad ra fil ko tin ni rin’ Dorkas?

¹² Reb u fithik’ fapi ppin ni ri ma lemnag yugu boch e girdi’ e Dorkas. Nap’an ni yim’, ma fapi gachalpen e kar pininged Peter ma kar feked nga reb e singgil ko thal ni lang. Mu rom e “urngin fapi ppin ni ke yim’ figirngiyrad nra muulunggad ngak ni kar cholngobiyed, ni yad be yor ma yad be dag ngak yu wu’ i kenggin e mad nge yu wu’ i wuru’ e mad ni ngongliy Dorkas ko ngiyal’ ni baaram ni kab fos.” Kan faseg Dorkas ko yam’ ma dariy e maruwar riy ni ka be dag e ‘ngongol nib fel’ ma ma pi’ e taw’ath u fithik’ e runguy.’ U lan e ulung ni Kristiano e ngiyal’ ney, ma bay boch e ppin ni bod rogon Dorkas ni ku ma fal’eg e mad ara yugu boch ban’en ni fan ko piin nib t’uf rorad e ayuw. Riyul’, ni n’en th’abi ga’fan ko maruwel rorad nib fel’ e bay rogon ko nguun m’oneg Gil’ilungun nge nguun fil ban’en ngak e girdi’ me mang gachalpen.​—Acts 9:36-42; Matthew 6:33; 28:19, 20.

13. Uw rogon ni dag Lydia ni ri ma lemnag pi walagen ni Kristiano?

¹³ Reb e ppin ni bay madgun Got u wan’ ni Lydia fithingan e ma lemnag yugu boch e girdi’. Ir be’ nu Thyatira, ma ma par u Filippi u nap’an ni i machib Paul u rom ni gonapan 50 C.E. Lydia e sana reb e Jewish proselyte, machane sana kemus ni buchuw e girdi’ ni piyu Jew u Filippi ma dariy tafen e muulung u rom. Cha’ nem nge yugu boch e ppin nib yul’yul’ e kar muulunggad u taabang u tooben ba lul’ u nap’an ni be machibnag fare apostal e thin nib fel’ ngorad. Chep nu Bible e be yog ni gaar: “Me tamilangnag Somol laniyan’ [Lydia] ni nge uthum tel ko n’en ni be weliy Paul. Ma aram min taufenag e re ppin nem nge girdi’ nu tabinaw rok. Me yog ngomad ni nggu warod nga tabinaw rok ni gaar, ‘Ngam bad ngam pired u tabinaw rog, ni faanra ke mutrug u wun’med ni ke mich u wun’ug Somol.’ Me wenig ngomad ni nggu warod.” (Acts 16:12-15) Bochan ni baadag Lydia ni nge rin’ e tin nib fel’ ni fan ngak yugu boch e girdi’, me yog rok ni nge towasariy Paul nge boch e girdi’ ni be un ngak ni ngar pared rok. Ri gad ba falfalan’ u nap’an ni ra dag reb e Kristiano nib gol ma ba tarunguyey e ngongol ni aram rogon ko ngiyal’ ney!​—Roma 12:13; 1 Peter 4:9.

Piin ni Fel’ Yangaren Kub T’uf Romad e Ayuw Romed

14. Uw rogon ni ayuweg Jesus Kristus e piin bitir?

¹⁴ Jesus Kristus ni Fak Got nib gol ma ba tarunguyey e ir e ke tababnag fare ulung ni Kristiano. De rus e girdi’ ni ngar chugurgad ngak ya ir be’ ni ma t’ufegey ma ma runguyey. Ba biyay u nap’an ni tabab boch e girdi’ ni ngar feked e bitir rorad i yib ngak Jesus, me guy rogon fapi gachalpen ngar tulufed yad. Machane i yog Jesus ngorad ni gaar: “Mpaged e pi bitir nir ngar bad ngog! Dabmu taleged yad, ya gagiyeg rok Got e fan ngak e piin ni bod e pi bitir ney! Mu ted fanmed i yan ko re bugithin ney! En ndabi bodnag ir bochi tir nge pag ir nga pa’ Got nge mang Got e i gagiyegnag e dabiyog nra yan ko gin nsuwon Got.” (Mark 10:13-15) Rogon ni nge yog ngodad e pi flaab ko Gil’ilungun, ma aram thingarda boded e bitir nib sobut’an’rad mab mom ni ngan fil ban’en ngorad. Me dag Jesus e t’ufeg rok ngak e piin bitir me tay pa’ nga dakenrad me yog boch e thin nib fel’ ni fan ngorad. (Mark 10:16) Me gimed ni ki gimed ba pagel e chiney ke uw rogomed? Nge mudugil lanin’med ni gimed ba t’uf rok girdien e ulung ma rib t’uf e ayuw romed rorad.

15. Mang chep u murung’agen e yafas rok Jesus ni bay ko Luke 2:40-52, mang e n’en ni rin’ nib fel’ ni nge fol e piin bitir riy?

¹⁵ Nap’an ni kab bitir Jesus, me dag nib t’uf Got rok nge Thin rok. Ngiyal’ ni ke gaman 12 e duw rok, ma ir nge galabthir rok, i Joseph nge Maria, e kar milekaggad kar chuwgad u Nazareth ni binaw rorad nga ranod nga Jerusalem ni ngara madenomnaged fare Paluk’af. Nap’an ni kar sulod, me naab e galabthir rok ni de moy Jesus u fithik’ e girdi’ ni yad be milekag u taabang. Tomur riy e ka ra piriegew ni be par nga but’ u lan reb e singgil u tempel, ni be motoyil ngak e pi tamachib ni piyu Jew ma be fith boch e deer ngorad. Bochan ni ke gin Joseph nge Maria ya dar nangew ko u uw e rayog ni ngar piriegew riy, e yog Jesus ngorow ni gaar: “Da mu nangew nthingar gub gu par nga naun rok e Chitamag?” Me un ko galabthir rok kar sulod nga tabinaw rorad, me i par u tan pa’row, ma be yoor i yan e gonop rok maku be ga’. (Luke 2:40-52) Rib fel’ e n’en ni rin’ Jesus ni piin bitir rodad e ngar folwokgad riy! thingara folgad ko galabthir rorad ma ra adaged ni ngar filed murung’agen e tirok Got.​—Deuteronomy 5:16; Efesus 6:1-3.

16. (a) Mang ni ke tolul boch e pagal u nap’an ni be machib Jesus u tempel? (b) Mang maruwel e kan pi’ ngak e piin bitir ni Kristiano e ngiyal’ ney?

¹⁶ Gur ni ka gab pagal, e sana kam machibnag murung’agen Jehovah u skul nge machib u mit e tabinaw i yan ni ga be un ko galabthir rom. (Isaiah 43:10-12; Acts 20:20, 21) Nap’an ni be machib Jesus ma be golnag e girdi’ nib m’ar u tempel nde n’uw nap’an u m’on ni nge yim’, ma boch e pagal e kar tolulgad ni gaar: “Gamad be meybil, Fak David mu ayuwegmad!” Bochan e re n’ey ma kari damumuw e piin tolang ko prist nge scribe kar gun’gun’gad ni be lungurad: “Ga be rung’ag e n’en ni yad be yog fa danga’?” “Gu be rung’ag,” me fulweg Jesus ni aram rogon. Me ulul ngay ni gaar, “Dawor mpoyed fa gin’em u lan e babyor nib thothup? Ya be gaar, Kam fil ngak e bitir nge bitir ni kabran ni ngar pininged e sorok nib fel’ rogon?” (Matthew 21:15-17) Gimed e piin fel’ yangaren u lan e ulung e ba mab e kanawo’ ngomed ni ngam pininged e sorok ngak Got nge Fak ni taareb rogon ko pi bitir nem. Gamad baadag mab t’uf romad e ayuw romed ngad maruwelgad u taabang ni gadad e pi tamachib ko Gil’ilungun.

Nap’an ni Kari Yib e Gafgow nib Gel

17, 18. (a) Mang fan ni ke yarmiy Paul boch e girdi’ ni ngar kunuyed boch e chugum ni fan ko piin Kristiano u Judea? (b) Bochan e ayuw ni kan pi’ ngak piyu Juda ni ke michan’rad ma mang angin ni ke yib ngak e Kristiano ni piyu Jew nge piin gathi yad piyu Jew?

¹⁷ Demtrug rarogodad, ma t’ufeg e ra k’aringdad ni ngad ayuweged pi walagdad ni Kristiano nib t’uf rorad e ayuw. (John 13:34, 35; James 2:14-17) T’ufeg rok Paul ni fan ko pi walagen u lan e ulung ni pumoon nge ppin u Judea e ke k’aring ni nge yarmiy boch e girdi’ ni ngar pied e ayuw ko pi ulung u Achaia, nge Galatia, nge Macedonia, nge fare binaw nu Asia ni fan ngorad. Togopuluw, nge girdi’ ni kar wageygad, nge uyungol ni keb ngak pi gachalpen u Jerusalem e sana ireray fan ni yog Paul murung’agen e “gafgow” nge “ngan fek e chugum [rorad] u fithik’ e yargel.” (Hebrews 10:32-34; Acts 11:27–12:1) Ere ir e ke ayuweg ngan kunuy boch e ayuw ni fan ko piin Kristiano nib gafgow u Judea.​—1 Korinth 16:1-3; 2 Korinth 8:1-4, 13-15; 9:1, 2, 7.

¹⁸ Ayuw ni kan pi’ ni fan ngak e piin nib thothup u Judea e be micheg ni bay e t’ufeg u thilin piyu Jew nge piin gathi yad piyu Jew ni yad e pi tapigpig rok Jehovah. Tin baaray e Kristiano ni gathi yad piyu Israel e ka ra pied boch e ayuw ngak e pi walagrad u Judea ma ku ke ayuwegrad ni ngar daged ni yad be pining e magar ngorad nbochan e tirok Got ni kar pied ngorad. Ere, kar ayuweged yad ko chugum nge tirok Got ban’en. (Roma 15:26, 27) Ayuw ni fan ko pi walag e ngiyal’ ney e ku yima pi’ ni gathi fithik’ e towasar ya t’ufeg e ma k’aring. (Mark 12:28-31) Maku ba t’uf ni ngada ayuweged gadad ma aram rayog ni ngan wereg ban’en ni nge taareb urngin ‘ma cha’ ni buchuw e kunuy e de pag feni lich e tin ni ba’ rok.’​—2 Korinth 8:15.

19, 20. Mu dag e n’en ni buch ni be dag rogon ni ma pi’ e girdi’ rok Jehovah e ayuw u nap’an ni keb e gafgow nib gel.

¹⁹ Bochan gad manang ni Kristiano e ba t’uf ni nguuda ayuweged gadad, ma aram gad ma pi’ e ayuw ngak e pi walagdad ni pumoon nge ppin ni ku ke michan’rad. Ni bod ni, amu lemnag e n’en ni buch u nap’an ni keb e yoko’ nib gel nge landslide nga El Salvador ko ngiyal’ ni kefin ni tabab e duw ni 2001. Reb e report e ke yog ni gaar: “Pi walag e ka ranod kar wereged e ayuw nga urngin yang u El Salvador. Yu ulung i walag ni kar bad u Guatemala, nge Meriken, nge Canada ni fan ni ngar pied e ayuw. . . . Ke pag 500 e naun nge 3 e Kingdom Hall nib fel’ yaan e kan toy nib papey. Kan dag e ngongol nib fel’ ngak e girdi’ nbochan e maruwel nib gel nge ayuw ni ke pi’ e pi walag ni ri yad ma pag farad.”

²⁰ Reb e report ni yib u South Africa e gaar: “Ran ni kaygi yoor ma be yan nib gel e ke kirebnag boor yang u Mozambique miki magawonnag e pi walagdad ni Kristiano u rom. Fare tochuch rodad u Mozambique e ke yarmiy ni ngan ayuwegrad u gubin e tin nib t’uf rorad. Machane kar weniggad ni nggu pied e mad ni ke kaday ngak e pi walag nib t’uf e ayuw rorad. Kug kunuyed boch e mad ma ke sug reb e container ni 40-foot ga’ngin ni fan ngak e pi walagdad u Mozambique.” Arrogon, kub t’uf ni ngad ayuweged gadad u kanawo’en ni aram rogon.

21. Mang e yira weliy ko bin migid e article?

²¹ Rogon ni kan weliy kafram boch, urngin yang ko dowdad e baga’ fan. Mab mudugil ni ku aram rogon u lan e ulung ni Kristiano. Ra bagayad mab t’uf ni nge ayuweg bagayad. Makub t’uf ni nguura pigpiggad ku Got ni ke taareban’rad. Ma bin migid e article e ra weliy boch ban’en ni ke ayuwegrad kar rin’ed ban’en ni aram rogon.

Uw Rogon ni Ngam Pi’ e Fulweg?

• Mang e n’en ni ba taareb rogon u thilin downgin e girdi’ nge fare ulung ni Kristiano?

• Mang e ma rin’ fapi Kristiano kakrom u nap’an ni ra t’uf e ayuw rok pi walagrad?

• Mang boch e thin nu Bible ni be dag ni fapi Kristiano e ba t’uf e ayuw rorad ma kad ayuweged yad?

[Picture on page 10]

Ri ma lemnag Aquila nge Priscilla yugu boch e girdi’

[Pictures on page 12]

Girdi’ rok Jehovah e ra bagayad ma ma ayuweg bagayad nge yugu boch e girdi’ u nap’an ni keb e gafgow ngorad