“Got E T’ufeg”

“En nde t’uf Got rok e be’ nde nang Got, ni bochan Got e t’ufeg.”​—1 JOHN 4:8, NW.

1-3. (a) Mang e be yog e Bible u murung’agen felngin Jehovah ni t’ufeg, ma mang fan nib thil e re thin ney? (b) Mang fan ni be yog e Bible ni “Got e t’ufeg”?

URNGIN e pi felngin Jehovah e dabiyog ni ngan taareb rogonnag nga ban’en, ya ba flont ma rib fel’. Machane n’en ni ri yibaadag u fithik’ urngin e pi felngin Jehovah e t’ufeg. Dariy reb u fithik’ e pi felngin ney nib gel ni ra chugurnagdad ngak Jehovah ni bod rogon e t’ufeg rok. Bay e felfelan’ riy, ya t’ufeg e ku ir fare felngin nrib gagiyel. Uw rogon ni gad ra nang ni aram rogon?

² Fare Bible e bay ban’en ni be yog u murung’agen e t’ufeg ni ri der yog u boch fapi felngin Jehovah nib lingagil. Thin nu Bible e der yog ni Got e gelngiy ara Got e mat’aw ara Got e gonop. Bay e pi felngin nem rok ma ri ir tabolngin fa dalip i felngin. Machane, murung’agen e t’ufeg e ka ban’en ni be yog ko 1 John 4:8 nib toar fan ni gaar: “Got e t’ufeg.” Arrogon, rib sug Jehovah ko t’ufeg. Ran weliy fan ni polo’, ma rayog ni ngad lemnaged ni: Gelngin Jehovah e ir e ma ayuweg ni nge rin’ ban’en. Ma felngin ni mat’aw nge gonop e ma pow’iy e ngongol rok. Machane, t’ufeg rok Jehovah e ma k’aring ni nge rin’ ban’en. Ma t’ufeg rok e ma m’ug ni gubin ngiyal’ ni ma fanay tin baaram e felngin.

³ Baga’ ni yima yog ni Jehovah e ir be’ ni ri ma dag e t’ufeg. Arfan ni, faanra gad baadag ni ngad filed murung’agen e t’ufeg, ma thingarda filed murung’agen Jehovah. Ere, gad ra fl’eg i yaliy boch ban’en u murung’agen e t’ufeg rok Jehovah ma dabiyog ni ngan taarebnag nga ban’en.

Bin Th’abi Gel e T’ufeg ni Kan Dag

4, 5. (a) Mang e bin th’abi gel e t’ufeg ni kan dag u nap’an chepin e girdi’ ni polo’? (b) Mang fan ni rayog ni nga dogned ni Jehovah nge Fak e yow ba taareb nbochan e m’ag ko t’ufeg nib gel ni tabab kakrom?

⁴ I dag Jehovah e t’ufeg u boor e kanawo’, machane bay reb ni kab th’abi gel nga yugu boch. Mang e re n’ey? Ireray fare n’en ni ke l’og Fak ni nge gafgow me yim’ ni fan ngodad. Rayog ni nga dogned u fithik’ e pagan’ ni ireray e bin th’abi gel e t’ufeg ni kan dag u polo’ i chepin e girdi’. Mang fan ni rayog ni nga dogned ni aram rogon?

⁵ Fare Bible e be pining e “bin nganni ko urngin ban’en ni kan sunmiy” ngak Jesus. (Kolose 1:15, NW) Mu lemnag​—ni Fak Jehovah e immoy nib m’on ndawori sum fare palpalthib. Ere uw n’umngin nap’an ni en Chitamangiy nge Fak e ur parew u taabang? Boch e piin scientist e yad be sananag ni fare palpalthib e ke par u lan 13 bilyon e duw. Machane, demtrug ko riyul’ ni aram rogon fa danga’, ma pi duw ney e kab ngoch ni ra ngan taareb rogonnag ko yafas rok Fak Jehovah ni bin nganni! Mang e i rin’ u lan e pi duw nem? En Fak e ke pigpig ngak e Chitamangin u fithik’ e felfelan’ ni “be’ nib salap i maruweliy ban’en.” (Proverbs 8:30; John 1:3) Jehovah nge Fak e kar maruwelgow u taabang ni ur sunmiyew urngin ban’en. Uw feni rib gel e felfelan’ ni ur tew! Ere mini’ arodad, e rayog rok ni ngari nang fan gelngin e t’ufeg ni bay u thilrow u lan e re tayim ni rib n’uw nap’an nem? Ba tamilang, ni Jehovah Got nge Fak e kar taarebgow u daken gelngin e bin th’abi gel e t’ufeg ni kan t’ufeg ni kakrom i yib.

6. Nap’an ni ke un Jesus ko taufe, ma mang e ke yog Jehovah ni be dag ko uw rogon Fak u wan’?

⁶ Yugu aram rogon, ma ke l’og Jehovah Fak nga fayleng ni ngan gargelnag ni reb e bitir nib girdi’. Ra ngan rin’ ban’en ni aram rogon ma be yip’ fan ni ra pag guyey e duw, ma dabiyog rok Jehovah ni nge chag ngak Fak nib t’uf rok u tharmiy. Fan nib pag feni gel rogon ni baadag ni nge nang rogon Jesus mi i par u tharmiy nga i yaliy u nap’an ni be ilal i yan me mang be’ nib flont. Sogonapan 30 e duw rok Jesus, me un ko taufe. Re ngiyal’ nem me non fare Matam u tharmiy ni gaar: “Ereray Fakag nib t’uf rog ni kari fel’an’ug ngak.” (Matthew 3:17) Nap’an ni ke guy e Chitamangin ni ke rin’ Jesus u fithik’ e yul’yul’ urngin ban’en ni kan yiiynag u murung’agen, nge urngin ban’en ni kan tay chilen ngak ni nge rin’, ma mmutrug ni kari felfelan’!​—John 5:36; 17:4.

7, 8. (a) Mang gafgow ni keb ngak Jesus ko Nisan 14, 33 C.E., ma mang e ke rin’ e re n’em ngak e Chitamangin u tharmiy? (b) Mang fan ni ke pag Jehovah ni nge gafgow Fak me yim’?

⁷ Machane, mang e ke thamiy Jehovah ko Nisan 14, 33 C.E., u nap’an ni kan yognag Jesus ma piin ni kar damumuwgad e kar koled? Ma nap’an e yibe moningnag, min thuw nga owchen, ma yibe tuguy? Ma nap’an ni yibe toy, ma uni rasey keru’ ni gel? Ma nap’an ni kan tining nga lang ni kan richibiy pa’ nge ay, nga baley e gek’iy ma girdi’ e yad be moningnag? Mang e ke thamiy fare Matam u nap’an ni guy Fak nib t’uf rok ni be yor ngak nbochan e gafgow ko amith nib gel? Mang e ke thamiy Jehovah ko ngiyal’ ni chuw e pogofan rok ni, ireray e yay ni som’mon ni daki moy Fak ni ka nap’an kan tababnag i sunmeg urngin ban’en?​—Matthew 26:14-16, 46, 47, 56, 59, 67; 27:26, 38-44, 46; John 19:1.

⁸ Bochan ni Jehovah e bay e thamtham rok, ma amith ara kireban’ ni keb ngak ni bochan ni ke yim’ Fak e dabiyog ni ngad weliyed ko thin. N’en ni rayog ni nga nog e murung’agen e n’en ni ke k’aring Jehovah me pag ni nge buch e binem. Mang fan ni ke pag fare Matam ni nge thamiy e amith ni aram rogon? Jehovah e be dag ban’en ngodad ni yira ngat ngay ni bay ko John 3:16​—ni aram ba verse nu Bible ni rib ga’fan ma aram fan ni kan nog ni fare Gospel nrib achichig. Ma be gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan ni nge urngin e piin ni be maruweliy e michan’ rorad ngak e aram e dabkur m’ad, ya rayog ni nge yog e yafas ndariy n’umngin nap’an ngorad.” Ere n’en ni ke k’aring Got e t’ufeg. Dariy e t’ufeg ni kab gel ngay ni kan dag ni aram rogon.

Uw Rogon ni Ke Micheg Jehovah Ban’en Ngodad

9. Mang e baadag Satan ni nge mich u wan’dad u murung’agen e lem rok Jehovah ni fan ngodad, machane mang e ke micheg Jehovah ngodad?

⁹ Machane, ra m’ug reb e deer ni gaar: Gadad ba t’uf rok Got ni be’ nge be’ fa? Sana ra puluw u wan’ boch e girdi’ fare lem ni girdi’ ni urngin e yad ba t’uf rok Got ni rogon ni yog ko John 3:16. Machane, tin riyul’ riy e yad be lemnag ni, ‘Got e dabiyog ni nge t’ufegeg ni goo gag.’ Riyul’ ni ri be maruweliy Satan ni fare Moonyan’ ni nge mich u wan’dad ni dariy e t’ufeg rok Jehovah ngodad ma dariy fadad u wan’. Ma reb e pa’, e yugu demtrug ko uw feni kireb pangidad ma ri dariyfadad nrogon ni gad be lemnag, me micheg Jehovah ngodad ni ra reb e pi tapigpig rok nib yul’yul’ ma baga’ fan u wan’.

10, 11. Uw rogon ni fare fanathin rok Jesus murung’agen e arche’ nib achichig ni sparrow fithingan e be dag ni baga’ fadad u owchen Jehovah?

¹⁰ Baaray rogoy, mu lemnag e thin rok Jesus ni bay ko Matthew 10:29-31. Be fanathinnag felngin e pi gachalpen, me yog Jesus ni gaar: “Rayog ni ngan chuw’iy l’agruw chi arche’ ni sparrow fithingan nga ba salpiy nrow; machane dariy taa bagayad nra mul nga but’ nde nang e Chitamangidad. Mus nga piyan lolugmed ni ke m’ay i theeg. Ere dab mu tamdaggad; ya ka ba ga’ famed ngak fa nochi arche’ ni sparrow fithingan!” Mu lemnag ko mang fan e pi thin nem ngak e piin ni yad be motoyil ngak Jesus ko fa bin som’mon e chibog.

¹¹ U nap’an Jesus ma fa nochi arche’ ni sparrow e yima pi’ ni chuway ni nge mang thu’mag ni ir e th’abi sobut’ puluwon. Reb e salpiy nrow nib sobut’ e rayog ni ngan chuw’iy l’agruw e sparrow ngay. Machane tomur riy i yog Jesus, rogon ni yog ko Luke 12:6, 7, (NW) nfaanra pi’ be’ l’agruw e salpiy nrow, ma rayog ni nge fek’ gathi aningeg e sparrow, ya lal. Fare arche’ ni kan uneg ngay e gowa dariy puluwon. Sana pi arche’ nem e dariy fan u wan’ e girdi’, machane uw rogorad u wan’ e en Ta Sunmiy? I yog Jesus ni gaar: “Machane dariy taa bagayad [ni mus ko fare arche’ ni kan uneg ngay] ni ke pag Got talin.” Bochan e re tamilangan’ nem ma rayog ni ngad nanged fan e tin ni yog Jesus. Bochan ni baga’ fan reb e sparrow u wan’ Jehovah, ere ri kab ga’ fan reb e girdi’ u wan’! Rogon ni yog Jesus, e manang Jehovah urngin ban’en u murung’agdad. Tin riyul’ riy, e piyan lolugdad ni gubin e ke m’ay i theeg!

12. Mang fan ni ba mudugil u wan’dad ni ba yul’yul’ Jesus u nap’an ni ke weliy ni piyan lolugdad e ke m’ay i theeg?

¹² Sana boch e girdi’ e yad ra lemnag ni i non Jesus u roy ni i ga’nag i yog. Machane, mu lemnag murung’agen e fas ko yam’. Ri manangdad Jehovah ma aram e rayog rok ni nge sunmiydad biyay! Ri baga’ fadad u wan’ ma arfan ni ri manang urngin ban’en u murung’agdad, mab muun ngay e tin ka nog e genetic code ngay ni rib mo’maw’ ni ngan nang fan nge urngin ban’en ni ke mit nga lolugdad nge tin ni ke buch ko yafas rodad. Nge piyan lolugdad​—ni baga’ ni kan theeg ni ra be’ ma sogonapan bay 100,000 gaf piyan lolugen—​reb e maruwel eram nib mom ni ra ngan taarebnag. Thin rok Jesus e ke micheg ngodad nib fel’ rogon ni ri ma lemnag Jehovah rogodad ni be’ nge be’!

13. Uw rogon ma n’en ni buch rok Jehoshaphat ni Pilung e be dag ni ma gay Jehovah e tin nib fel’ rodad nyugu aram rogon ni daworda flontgad?

¹³ Fare Bible e be dag ngodad ku reb e ban’en ni be micheg ngodad rogon e t’ufeg rok Jehovah. Ra gay ma ra chaariy e tin nib fel’ ni bay rodad. Ni bod ni, ga ra fal’eg i lemnag murung’agen Jehoshaphat ni fare pilung nib fel’. Nap’an ni ke rin’ fare pilung e ngongol nib kireb, ma profet rok Jehovah e ke yog ngak ni gaar: “Bochan e re n’en ney ma ke damumuw Jehovah ngom.” Ireray e n’en ni ra pug lanin’uy! Machane de mus e thin rok Jehovah u rom. Me ulul ngay ni gaar: “Machane, bay boch ban’en nib fel’ ni kan pirieg rom.” (2 Kronicles 19:1-3, NW) Ere damumuw rok Jehovah nib mat’aw e de upunguy owchen ni nge guy e “tin nib fel’” u murung’agen Jehoshaphat. Gathi ban’en ni ra gelnagdad ni ngad nanged ni Got rodad e ma gay e tin nib fel’ rodad nyugu aram rogon ni daworda flontgad?

Reb e Got ni “Ri Ma N’agfan”

14. Nap’an ni gad ra denen, ma mang lem nib tomal e rayog nib ngodad, machane uw rogon ni nge fel’ rogodad ko tin ma rin’ Jehovah ni ma n’agfan e denen rodad?

¹⁴ Ngiyal’ ni kad denengad, ma ra kireban’dad, me mulan’dad, me yib e tamra’ ngodad, nge lem ni ba kireb e rodad ni kad rin’ed e tin kireb e rayog ni nge k’aringdad ngada lemnaged ni dakuriy rogodad ni ngad pigpiggad ngak Jehovah. Machane, dabmu pagtalin ni Jehovah e “ri ma n’ag fan e kireb.” (Psalm 86:5, NW) Arrogon, faanra ngada pied keru’dad ko denen rodad ma ngad athamgilgad ni dabkuuda rin’ed e pi n’em biyay, ma rayog ni nge n’ag Jehovah fan e denen rodad. Mu lemnag ko uw rogon ni be weliy e Bible murung’agen e t’ufeg rok Jehovah ni yira ngat ngay.

15. Uw feni palog ni ma orelnag Jehovah e denen rodad nga orel?

¹⁵ David ni psalmist e i fanay e thin nib tamilang ni nge weliy murung’agen e kanawo’ ni ma n’ag Jehovah fan e kireb riy: “Rogon feni palog e ngek ko ngal, e ku aram feni palog nra orelnagdad ko denen rodad.” (Italics ours; Psalm 103:12, The Amplified Bible) Uw feni palog e ngek ko ngal? Reb i rogon e ngek e gubin ngiyal’ ni ir e yima lemnag nib th’abi palog ko ngal; ma gali yangi n’ey e dabiyog ni nge gak. Reb e scholar e ke yog ni re bugithin ney e be yip’ fan ni “gin th’abi palog; gin ni rib palog nrayog ni ngad susunnaged.” Thin rok David ni kan thagthagnag e ke yog ngodad ni nap’an ni ra n’ag Jehovah fan e kireb, me tay e denen rodad ko gin ni rib palog ngo orel rodad ni rayog ni ngad susunnaged.

16. Nap’an ni ke n’ag Jehovah fan e denen rodad, ma mang fan ni ra mudugil lanin’dad ni kad biechgad u owchen?

¹⁶ Kaam guy rogon ni ngam chuweg raen ban’en ni ke aw nga bangi mad nib war ramaen? Sana yugu aram rogon ni kam maruweliy nib elmirin, ma ku rayog ni ngan guy. Mu ta’ fanam i yan ko uw rogon ni i weliy Jehovah murung’agen gelngin ni n’ag fan e kireb ni gaar: “Denen ni kam lukgad ngay e rib gagiyel nib ramaen row, machane bay gu maluknagmed ngam biechgad ni bod feni biech e ayis ni ma mul u lang nga but’; Denen ni kam lukgad ngay e ra yan i par nrib gagiyel ni bod ramaen e row nrib gel e row riy, machane gimed ra par ni kam wechwechgad ni bod feni wechwech bunuen e saf.” (Isaiah 1:18) Fare bugithin ni “scarlet” e be yip’ fan e rowrow nib gal raen.a Ma fare “crimson” e reb e pi ramaen nib rowrow nem nib lumor ni yima fanay ko ngan achey ban’en. Ri dabiyog ni ngad chuweged e alit ko denen rodad ni goo gadad. Yugu aram rogon, ma rayog rok Jehovah ni nge chuweg e denen ni bod ramaen e scarlet nge crimson ma ra biechnag ni bod e ayis ni ke mul u lang ara bunuen e saf ni dan achey. Ere nap’an ni ra n’ag Jehovah fan e denen rodad, ma dab kuuda lemniged ni ka ba’ aban e re denen rodad nem u n’umngin nap’an e yafas rodad.

17. Mang e be yip’ fan e thin ni baaray ni ma n’ag Jehovah fan e denen rodad nga fiti keru’?

¹⁷ U lan reb e tang ni be pining e magar ni ma pug laniyan’uy ni Hezekiah e ke fal’eg u tomren ni ke gol u reb e m’ar ni chugur ni nge yim’ riy, me yog ngak Jehovah ni gaar: “Kam n’ag nga fiti keruum urngin e denen rog.” (Isaiah 38:17, NW) Kan dag u roy ni ke fek Jehovah e denen rok reb e tadenen ni ke kalngan’ me n’ag nga fiti keru’ ni aram e gin ni dabiyog ni Nge guy riy ma dabki lemnag. Rogon ni yog reb e babyor, ni kenggin e pi thin ney e rayog ni nge lunguy: “Kam gagiyegnag ni [denen rog] e gowa dagu rin’.” Gathi ireray e thin ni ra fal’eg lanin’uy?

18. Uw rogon ni dag Mikah ni profet ni nap’an ni ke n’ag Jehovah fan e denen rodad, ma Be chuweg e denen rodad dariy n’umngin nap’an?

¹⁸ U reb ni kan micheg ni ngan sulweg ban’en nga rogon, me Mikah ni reb e profet e ke weliy murung’agen e michan’ rok ni ra n’ag Jehovah fan e kireb ko girdi’ rok ni kar kalgad ngan’rad ni gaar: “Somol, dakuriy yugu reb e kan nga bayang ni bod gur; kam n’ag fan e denen rok e tin ke magay ko girdi’ rom. . . Ma bay mut’mut’ nga but’ e pi denen ni kug ngongliyed, ma ga pi’ nge yan i par nga t’ay e rigur.” (Mikah 7:18, 19) Mu susunnag ko mang e be yip’ fan e pi thin nem ngak e girdi’ ni immoy u nap’an e Bible. Ku rayog ni ngan fek biyay ban’en ni kan n’ag “nga maday ni rib toar”? Ere thin rok Mikah e be dag ni nap’an ni ra n’ag Jehovah fan e denen rodad, me chuweg ndariy n’umngin nap’an.

“Sumunguy nge Wurengan’ ni Ma Dag e Got Rodad”

19, 20. (a) Mang fan fare thin ni Hebrew ni kan thiliyeg ni “ngan dag e runguy” ara “ngan runguyey”? (b) Uw rogon ni be fanay e Bible e runguy rok e matin ngak e bitir rok ni fan ni ngan skulnagdad u murung’agen e wurengan’ rok Jehovah?

¹⁹ Wurengan’ e ku ir bang ko t’ufeg rok Jehovah. Be mang e wurengan’? U lan e Bible, ma wurengan’ nge runguy e ba chuchugur fan. Boch e thin ni Hebrew nge Greek e be dag fan e wurengan’. Ni bod ni, fare thin ni Hebrew ni ra·chamʹ e baga’ ni kan thiliyeg ni “ngan dag e runguy” ara “ngan runguyey.” Re bugithin ney ni Hebrew, ni be fanay Jehovah ni fan ngak, e bay rogon ko fare bugithin ni fan ko “tafen e bitir u meyal” ma rayog ni nga nog ni “wurengan’ ni ma dag e chitiningiy.”

²⁰ Ma fanay e Bible e runguy rok e matin ngak e bitir rok ni fan ni nge skulnagdad u murung’agen e wurengan rok Jehovah. Isaiah 49:15 e be gaar: “Gur rayog rok be’ ni ppin ni nge pagtalin fak ni kabran, ma dabi dag nib wurengan [ra·chamʹ] ngak fak ni kabran? Arrogon, rayog ni ngar paged talin, machane gag e dabgu pag talmed.” (The Amplified Bible) Mo’maw’ ni ngan susunnag ni reb e matin e ra pagtalin ni nge duruiy ma nge ayuweg fak ni ka ma unum e thuth. Tin riyul’ riy, e fare tir ni kabran e dariy ban’en ni rayog ni nge rin’; rran nge nep’ mab t’uf rok e bitir e ayuw ko chitingin. Machane, ba kireban’, ya matin ni ma pag e bitir e ban’en ni ke ta buch, ya baga’ ni gad bay e chiney ko tayim nib “mo’maw’.” (2 Timothy 3:1, 3) “Machane,” be yog Jehovah ni gaar, “gag e dabgu pagtalmed.” Wurengan’ nib sumunguy ni bay rok Jehovah ni fan ko pi tapigpig rok e kab gel ko runguy ni ma dag e girdi’ ni rayog ni ngad susunnaged​—ni aram e wurengan’ ni bay rok reb e matin ni fan nga fak ni kabran.

21, 22. Mang e ke buch rok piyu Israel u Egypt kakrom, ma mang e ke rin’ Jehovah nbochan ni ur yorgad?

²¹ Uw rogon ni ma dag Jehovah nib wurengan’, ni bod rogon e gallabthir ni ma t’ufegey? Re felngin ney e rayog ni ngan guy nib tamilang u rogon ni i ayuweg piyu Israel kakrom. U tomren e bin 16 e chibog B.C.E., ma bokum milyon e girdi’ ni piyu Israel e kar manged sib u Egypt, ni un gafgownagrad. (Exodus 1:11, 14) Bochan e gafgow ni keb ngorad, ma kar ninged e ayuw ngak Jehovah. Ma mang e ke rin’ fare Got nib wurengan’?

²² I runguyrad Jehovah. Me yog ni gaar: “Ku guy nga rogon ni yibe gafgownag e girdi’ rog u Egypt: kug rung’ag lamrad . . . rib tamilangan’ug u gelngin e gafgow ni yad be tay.” (Exodus 3:7) Mo’maw’ rok Jehovah nfaanra ke guy ni keb e gafgow ngak e girdi’ rok me rung’ag ni yad be yor ni baga’ lamrad ma dabi runguyrad. Jehovah e ir e Got ni ri ma lemnag rogon e girdi’. Re felngin ney e rib peth ko wurengan’. Machane, gathi ke mus ni ke thamiy Jehovah e magawon ko girdi’ rok; ya ke rin’ ban’en ni fan ngorad. Isaiah 63:9 e be gaar: “Bochan e t’ufeg rok ngorad nge wurengan’ me chuw’iyrad.” I ayuweg piyu Israel ngar chuwgad u Egypt u daken “pa’ nib gel gelngin”. (Deuteronomy 4:34) Ma tomur riy, me pi’ ngorad e ggan u fithik’ e maangang me fekrad ko binaw rorad nib yong’ol.

23. (a) Uw rogon ma thin rok fare psalmist e be micheg ngodad ni Jehovah e ri ma lemnagdad ni tataabe’? (b) Mang boch e kanawo’ ni ma ayuwegdad Jehovah riy?

²³ Gathi kemus ni ke dag Jehovah nib wurengan’ ngak e girdi’ rok ni yad reb e ulung. Got rodad ni ma t’ufegey e ri ma lemnagdad ni be’ nge be’. Ri manang urngin e gafgow ni gad be tay. Fare psalmist e ke yog ni gaar: “I Somol e ma matanagiy e piin ni yad mmat’aw, ma ma motoyil ngorad ko tin yad ma wenignag ngak. I Somol e ba chugur ngak e piin ni ke mulan’rad; ma piin ni ke math e liyeb ngorad e ma chuwegrad u fithik’ e tin ni ke yib ngorad ni kar gafgowgad riy.” (Psalm 34:15, 18) Uw rogon ni ma ayuwegdad Jehovah ni be’ nge be’? Dabi chuweg likngin e gafgow ni keb ngodad. Machane ke fal’eg boor ban’en ni fan ngak e piin ni ra ning e ayuw ngak. Thin rok e be pi’ e ayuw ni riyul’ ni baga’ angin. U lan e ulung, ma be pi’ Jehovah e piin ni ma ayuweg e ulung ni kar ilalgad ko tirok Got, ni pi cha’ nem e yad be athamgil ni ngar ayuweged yugu boch e girdi’ mar daged e wurengan’ rok Got. (James 5:14, 15) Bochan Jehovah e ir be’ ni “Ta rung’ag e meybil,” ma pi’ “fare Kan ni Thothup rok ngak e piin be ning ngak.” (Psalm 65:2; Luke 11:13) Urngin e pi n’en ney e be dag e “wurengan’ nib sumunguy ni Got rodad e ma dag.”​—Luke 1:78, NW.

24. Mang e ga ra fulweg ngak Jehovah nbochan e t’ufeg rok?

²⁴ Gathi be k’aring e felfelan’ ni ngan fal’eg i lemang e t’ufeg rok e Chitamangidad nu tharmiy? Fare article ni ke yan, e ke puguran ngodad ni ke dag Jehovah felngin ni gelngin, nge mat’aw, nge gonop u fithik’ e t’ufeg ni nge fal’eg rogodad riy. Ma lan e re article ney, e kad guyed ni Jehovah e ir e ke dag e t’ufeg rok ngak e girdi’​—ma fan ngodad ni be’ nge be’—​u kanawo’ nrib fel’. Chiney, ra bagadad ma thingari fith ko, ‘Mang e nggu rin’ nbochan e t’ufeg ni i dag Jehovah?’ Yibe athapeg ni ngam dag ni ga be t’ufeg u polo’ i gum’irchaem, ngu polo’ i lanin’um, ngu polo’ i yafas rom, nge gelngim. (Mark 12:29, 30) Yibe athapeg ni yafas rom u gubin e rran e ra dag e lem rom ni ri ga baadag ni ngam chugur ngak Jehovah. Ma yibe athapeg ni Jehovah Got, ni ir e t’ufeg, e ngari chugur ngom​—ndariy n’umngin nap’an!​—James 4:8.

[Footnote]

Ka Ga Manang?

• Uw rogon ni gad ra nang ni t’ufeg e aram felngin Jehovah ni bin th’abi gagiyel?

• Mang fan ni rayog ni nga dogned ni tin ni rin’ Jehovah ni ke l’og Fak ni nge gafgow me yim’ e aram e t’ufeg ni bin nth’abi gel ni kan rin’?

• Uw rogon ni ke micheg Jehovah ni gadad ba t’uf rok ni be’ nge be’?

• Mang boch e kanawo’ nib tamilang ni be weliy e Bible ni ma n’ag Jehovah fan ban’en u wan’?

[Picture on page 15]

“Ke pi’ . . . Got Fak ni kari maagirag rok”

[Picture on page 16]

“Kab tolang pulwomed ngak boor e arche’ ni sparrow fithingan”

[Credit Line]

© J. Heidecker/VIREO

[Picture on page 18]

Runguy rok e matin ngak e bitir rok e ra skulnagdad nga rogon ni ma lemnagdad Jehovah