Mu Tay Jehovah Ni Nge Mang Pagan’ Rom

“Gur e l’agan rog, O Jehovah ni Somol ni Th’abi Tolang, me gur e pagan’ rog ko ngiyal’ ni ku gub pagal.”​—PSALM 71:5, NW.

1. Mang e magawon nib gel ni ke sabliy fare pagal ni ma gafaliy e saf i David?

FARE pumoon ni Goliath fithingan e ke pag mereb e fit n’umngin. Dabni gin ngay ni urngin e salthaw nu Israel ni yad be un ko mahl e kar rusgad ni ngar sabaliyed! U lan boor e wik, ni urngin e kakadbul nge nep’, ma fare giant ni be’ nu Philistine ni Goliath fithingan e ke par be kakring e pi salthaw nu Israel, ni be yog ni ngar l’oged be’ nib yargel ni rayog rok ngeb ngar chamgow. Me tomur riy, min rin, ma gathi be’ nib salthaw, ya ri bochi pagal. David ni reb e pagal ni ta chugul saf e kari gel e achichig u yaan u charen e cha’ nem ni toogor rok. Tin riyul’ riy, e kab tomal talin e cham rok Goliath ku David! Yugu aram rogon, me sabaliy fare pagal fare giant me mang be’ nib gilbuguwan miki mang be’ ni yimanang ni der ma rus.​—1 Samuel 17:1-51.

2, 3. (a) Mang fan ni ke sabaliy David Goliath nrib pagan’? (b) Mang l’agruw ban’en e gad ra weliy ma aram e ra mang Jehovah e fager rodad?

² Mang e ke ayuweg David nge mang be’ ni der ma rus? Mu lemnag boch e thin nib gagiyel ni David e ke yoloy ko tin tomuren e pi duw ko yafas rok ni gaar: “I gur e l’agan’ rog, O Jehovah ni Somol ni Th’abi Tolang, me gur e pagan’ rog ko ngiyal’ ni ku gub pagal.” (Psalm 71:5, NW) Arrogon, nap’an ni kab pagal David, ma kari pagan’ ngak Jehovah. Me sabaliy Goliath, me gaar: “Kam fek e sayden ni yima rugoy nge sarey ni yima yin’, machane gag e ku gub ngom u fithingan Somol ni Gubin Ma Rayog Rok, ni ir e Got rok e salthaw nu Israel ni ga be dariyfannagrad.” (1 Samuel 17:45) Goliath e kari pagan’ nga feni gel gelgnin nge talin e cham rok, me David e ke pagan’ ngak Jehovah. Bochan ni Somol ni ir e Th’abi Tolang u palpalthib e bay u ba’ rok, ma mang fan ni nge rus ngak be’ ni kemus nib girdi’, ni yugu demtrug ga’ngin nge feni yoor e talin e cham rok?

³ Nap’an ni ga be beeg murung’agen David, ma ga ma athapeg ni nge gel boch e pagan’ rom ngak Jehovah fa? Baga’ ni boor i gadad e ma rin’ ni aram rogon. Ere ngada fal’eged i yaliy l’agruw ban’en nfaan rayog ni ngad rin’ed ma rayog ni ngad ted Jehovah nge mang pagan’ rodad. Som’mon, e ba t’uf ni nguuda gagiyegnaged e n’en ni ma sasagaalnag e re pagan’ ney. Bin l’agruw, e ba t’uf ni ngad filed ko ri mang e tin nib l’ag ngay ni ngan pagan’uy ngak Jehovah.

Ngan Gel ko Pin’en ni Yug Ma Magawonnag e Pagan’ Ngak Jehovah

4, 5. Mang fan ni boor e girdi’ e kar pirieged nib mo’maw’ ni nge pagan’rad ngak Got?

⁴ Mang e ma sagaalnag e girdi’ ni ngar pagedan’rad ngak Got? Gubin ngiyal’, ni boch e girdi’ e ke balyangan’rad ko mang fan ni ma buch e tin nib kireb. Boor e girdi’ e kan fil ngorad ni keb e gafgow ni bochan Got. Nap’an ni ra yib e riya’ nib gel, ma pi tayugang ko teliw e ma yog ni Got e ke “fek” fa pi cha’ ni kar m’ad ni ngar uned ngak nga tharmiy. Maku, boor e pi tayugang ko teliw e kar machibnaged ni kab kakrom ma ke m’ay i dugliy rok Got urngin ban’en ni ra buch​—mab muun ngay urngin ban’en ni ma buch nge tin kireb ni yima rin’—​ni ma buch ko re fayleng ney. Rib mo’maw ni ngan pagan’uy ngak reb e Got ni aram rogon ni dariy e runguy rok. Satan, ni ir e be upunguy e lem ko piin de michan’rad, e ri baadag ni nge mon’og urngin e “machib rok e pi moonyan’” ni aram rogon.​—1 Timothy 4:1; 2 Korinth 4:4.

⁵ Baadag Satan ni nge dabki pagan’ e girdi’ ngak Jehovah. Re toogor rok Got nem e dabun ni ngad nanged ko ri mang tapgin ni ma yib e gafgow ngodad. Ma faanra gad manang e thin nu Bible ni be dag ko mangfan ni ma yib e gafgow ngodad, ma baadag Satan ni ngad paged talin e re n’em. Arfan, nib fel’ ni ngad weliyed biyay nge biyay dalip ban’en ni ma k’aring e gafgow ko fayleng. Ra ngad yodoromgad, ma gad be micheg nga gum’ircha’dad ni gathi Jehovah e ma k’aring e magawon ko yafas rodad.​—Filippi 1:9, 10.

6. Uw rogon ni be weliy e 1 Peter 5:8 u murung’agen taareb i tapgin ni be gafgow e girdi’?

⁶ Reb i tapgin ni ma yib e gafgow ngak e girdi’ e bochan baadag Satan ni nge kirebnag e pigpig ni ma ta’ e pi tapigpig rok Jehovah ni yad ba yul’yul’. I guy rogon ni nge kirebnag e yul’yul’ rok Job. De gel Satan ngak Job, machane de tal. Bochan ir e pilung ko re fayleng ney, ma be athamgil ni nge “longuy” e pi tapigpig rok Jehovah nib yul’yul’. (1 Peter 5:8) Ma ra bagadad ma ba muun ngay! Baadag Satan ni ngad talgad ko pigpig ku Jehovah. Ma arfan, ni gubin ngiyal’ ni ma k’aring e togopuluw. Yugu aram rogon ni ba amith e pi gafgow nem, ma bay fan nib fel’ ni ngad k’adedan’dad. Gad ra rin’ e n’en ni aram rogon, ma gad be ayuweg ni nge tamilang ni Satan e ma ban ma ra falfalan’ Jehovah. (Job 2:4; Proverbs 27:11) Bochan ni ma gelnagdad Jehovah ni ngad k’adedan’dad ko togopuluw, ma ra gel iyan e pagan’ rodad ngak.​—Psalm 9:9, 10.

7. Galatia 6:7 e be ayuwegdad ni ngad guyed ko mang tapgin e gafgow?

⁷ Bin l’agruw i fan ni ma yib e gafgow e yira pirieg ko re kenggin e motochiyel ney ni gaar: “Ra be’ ma mit i n’en ni yung e ir e ra t’ar wom’engin.” (Galatia 6:7) Yu ngiyal’ e ma oloboch e girdi’ u rogon ni yad ma duguliy ban’en ni bod ni kar yunged e awoch nib kireb ma ra t’ared wom’engin nib kireb ni aram e mit i gafgow nib ngorad. Sana kar duguliyed ni ngar koled e yap’ ko karro ni dar ma tiyan’rad ngay, mi yad maadad. Boor e girdi’ ni kar duguliyed ni ngar thoyed e tamagow, me yib e m’ar ko gum’ircha’ ngorad ara m’ar ko worrum ni cancer. Ma piin ni kar dugliyed ni ngar uned ko ngongol ni darngal ma baga’ ni ra gafgowgad ni bochan ni ke kireb thilin e girdi’ u tabinaw, ma ra m’ay e ta’fan, ma ra yib e m’ar ni aram e m’ar nbochan e ngongol ni darngal, ma yira diyen ni dan lemnag. Sana ra lemnag e girdi’ ni Got e ke pi’ ngorad e gafgow, machane tin riyul’ riy e kar gafgowgad ni bochan yad e kar dugliyed ban’en nib kireb.​—Proverbs 19:3.

8. Rogon ni yog ko Eklesiastes 9:11, ma mang fan ni ma yib e gafgow ngak e girdi’?

⁸ Bin dalip i fan ni ma yib e gafgow e kan weliy ko Eklesiastes 9:11, NW: “Kug sul ni nggu guy u tan e yal’ ma gu pirieg ni fare sagreng e gathi fan ko girdi’ en be machareg, ma fare mahl e gathi fan ko girdi’ nib yargel, ma ggan e gathi fan ko girdi’ nib gonop, ma chugum e gathi fan ko girdi’ nib llowan’, ma ku taw’ath e gathi fan ko girdi’ ni bay e tamilangan’ rorad; ya bochan ngal’an nge n’en ni dan lemnag e bayi buch rorad ni yad gubin.” Yu ngiyal’, ma girdi’ e kemus ni bay ko gin nge ngal’an nra buch e tin kireb riy. Demtrug ko ka gad ba gel ara ka gad ba meewar, ma gafgow nge yam’ ni dan lemnag e rayog ni nge buch rodad ndemtrug ko mini’ nge ngal’an. Ni bod ni, napan Jesus me puth reb e wulyang u Jerusalem me li’ 18 e girdi’. I dag Jesus ni de gechignagrad Got nbochan e tin kireb ni kar rin’ed u m’on riy. (Luke 13:4) Danga’, gathi bochan Jehovah me yib e pi gafgow nem ngorad.

9. Mang e de nang boor e girdi’ fan u muurung’agen e gafgow?

⁹ Baga’ fan ni ngan nang fan boch ban’en ni ma k’aring e gafgow. Machane, bay bang riy ni mo’maw’ ni nge nang boor e girdi’ fan. Ma re n’en ney e aram: Mangfan ni ma pag Jehovah Got ni ngeb e gafgow?

Mang Fan ni Ma Pag Jehovah ni Nge Yib e Gafgow?

10, 11. (a) Rogon ni yog ko Roma 8:19-22, mang e ke buch rok “urngin ban’en ni kan sunmiy”? (b) Uw rogon ni gad ra nang ko mini’ e ke tay urngin ban’en ni kan sunmiy nga tan pa’ e wod?

¹⁰ Thin ni bang ko babyor rok Paul ni apostal ni fan ko piyu Roma e be tamilangnag e re kenggin ney. I yoloy Paul ni gaar: “Urngin e pi n’en ni sunumiy Got e ri yad be sonnag e chirofen ni bayi flaabnag Got pi fak. Ya tin ni sunumeg Got e turguy Got ni nge m’ay fan, ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’, ni aram e reb e rran e bay ra pired ni gathi yad e sib rok e wod, mi yad un ko flaab rok pi fak Got. Gadad manang ni urngin e tin ni ke sunmiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney.”​—Roma 8:19-22.

¹¹ Rogon ni ngan nang fan e kenggin e pi verse, e ba t’uf ni ngad gayed e fulweg ko boch e deer nib ga’ fan. Ni bod ni, Mini’ e ke tay e tin ni kan sunmiy nga tan pa’ e wod? Boch e tamachib ko pi yurba’ i teliw e ka rogned ni Satan; ma boch e girdi’ e ma yog ni Adam. Machane dariy bagayow ni ke yodor. Mang fan? Bochan en ni ke tay e tin ni kan sunmeg nga tan pa’ e wod e ke rin’ ni “bay e athap rorad” riy. Arrogon, be ognag e athap ngak e piin nib yul’yul’ ni “reb e rran e bay ra pired ni gathi yad e sib rok e wod.” Adam nge Satan e dariy bagayow nrayog ni nge ognag e athap ni aram rogon. Kemus ni Jehovah e rayog rok. Ere, ba tamilang, ni ir e ke tay e tin kan sunmiy nga tan pa’ e wod.

12. Mang maruwar e ke sum ko mini’ e pi cha’ ni kan nog “urngin ban’en ni kan sunmiy” ngorad, ma uw rogon ni ngan fulweg e re deer ney?

¹² Machane, mang fan e “tin ni kan sunmiy ni gubin” ni be weliy u roy? Boch e girdi’ e ma yog ni “tin ni kan sunmiy ni gubin” e be yip’ fan e fayleng ni polo, nib muun ngay e gamanman nge woldug. Machane fapi gamanman nge woldug e yad be athapeg ni bay ra manged “pi fak Got me chuwegrad u tan pa’ e wod”? Danga’. (2 Peter 2:12) Ere, “tin kan sunmiy ni gubin” e kemus ni be yip’ fan e girdi’. Ireray e tin ni kan sunmiy ni ke af ngorad e denen nge yam’ ni bochan e togopuluw ni buch u Eden ma rib t’uf ni nge yog e athap ngorad.​—Roma 5:12.

13. Mang e ke rin’ fare togopuluw ni kan tay u Eden ngak e

¹³ Ri mang, wenegen ni yib ngak e girdi’ nbochan e re togopuluw nem? I fanay Paul bochuw e thin ni nge weliy murung’agen ni aram e: kan tay nga tan pa’ e wod.a Rogon ni yog reb e babyor, re bugithin ney e be weliy murung’agen ni “ban’en ni dariyfan ya der ma maruwel nrogon ni kan ngongliy.” Girdi’ e kan sunmiy ni fan ni nguur pared nib fas ni manemus, ngar maruwelgad u taabang, ni reb e tabinaw nib flont ma ke taareban’rad nguura ayuweged e paradis u fayleng. Machane, yafas rorad e ba ngoch, ma ba amith, ma baga’ ni par ndariy e felfelan’ riy. Rogon ni yog Job e, “pumoon’, ni ppin e gargeleg, ma ba ngoch nap’an e yafas rok ma rib sug ko wagey.” (Job 14:1) Ri dariyfan!

14, 15. (a) Mang e mich riy ni rayog ni ngad guyed nib mat’aw rogon ni ke pufthinnag Jehovah e girdi’? (b) Mang fan ni yog Paul ni kan ta’ e tin kan sunmiy nga tan pa’ e wod “ni gathi lem rorad”?

¹⁴ Chiney e kad tawgad ko deer ni rib ga’ fan: Mang fan ni “fare Tapufthin ko fayleng ni polo’” e ke tay e girdi’ u tan e re par ney nib amith, mab kankanan’? (Genesis 18:25) Ba mat’aw ni nge rin’ ban’en ni aram rogon? Mu lemnag ko mang e i rin’ e gallabthir rodad ni som’mon. Ngiyal’ nra togopuluw ku Got, mi yow par u ba’ rok Satan, ni ir e i yibnag e togopuluw nib gel ko gagiyeg rok Jehovah nth’abi tolang. U daken e ngongol rorow, ma kara ayuwegew fare thin ni yibe yog ni ra fel’ e par ko girdi’ nyugu aram rogon ni dabi ayuwegrad Jehovah, ni ngar gagiyegnaged yad u tan e ayuw ko fare kan nib kireb. Nap’an ni ke pufthinnag Jehovah e piin tatogopuluw, ma riyul’ ni ke pi’ ngorad e tin kar ninged. I pag e girdi’ ni nge gagiyegnag ir u tan gelngin Satan. U tan fapi magawon, ma ka bay ban’en ni kab fel’ ni ngan rin’ ko tin ni baaray ni ngan ta’ e girdi’ nga tan pa’ e wod machane bay e athap rorad?

¹⁵ Riyul’, ni gathi “lem rok” e tin kan sunmeg. Kan gargelnagdad ni gadad e sib rok e denen nge wod ndariy ban’en ni ngan rin’ ngay. Machane bochan e runguy rok Jehovah me pag Adam nge Efa ngar parew nib fas ko pi duw ni ka ba’ ko yafas rorow nge yog e bitir ngorow. Yugu aram rogon ni gadad, ni gadad e piin ni owcherow, e kad manged sib rok e wod nge denen nge yam’, ma rayog ni ngad rin’ed e tin ni de rin’ Adam nge Efa. Rayog ni ngad motoyilgad ngak Jehovah ma gad fil ni gagiyeg rok nth’abi tolang e ba mat’aw mab flont, ma gagiyeg rok e girdi’ nib dar ku Jehovah e kemus ni ma yibnag e amith, nge kankanan’, mab m’ay fan. (Jeremiah 10:23; Revelation 4:11) Ma gelngin Satan e kemus ni be ubchiya’nag e kireb. Chepin e girdi’ e be micheg ni pi thin ney e rriyul’.​—Eklesiastes 8:9.

16. (a) Mang fan ni rayog ni nge dugil lanin’dad ni gathi bochan Jehovah ma keb e gafgow ni gad be guy e chiney u fayleng? (b) Mang athap e ke pi’ Jehovah u fithik’ e t’ufeg ngak e girdi’ nib yul’yul’?

¹⁶ Ba tamilang, ni Jehovah ri bay fan ni nge tay e girdi’ nga tan pa’ e wod. Machane, be yip’ fan ni wod nge gafgow ni be magawonnagdad ni be’ nge be’ e ke yib nbochan Jehovah? Amu lemnag reb e tapuf oloboch nib mat’aw ni ke pufthinnag be’ ni ke oloboch. Facha’ ni ke oloboch e rayog ni ngari un ko gafgow u nap’an ni be pi’ puluwon e tin ni ke rin’, machane ba mat’aw ni nge yog ni fare tapuf oloboch e ir tapgin e gafgow ni keb ngak? Ri danga’! Maku, Jehovah e gathi ir e yib rok e tin kireb. James 1:13 e be yog ni gaar: “Ya dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’.” Maku dabda paged talin, ni ke turguy Jehovah e re pufthin n’ey ni “fan ko athap.” I yarmiy ban’en u fithik’ e t’ufeg ni fan ko piin yad ba yul’yul’ ni pi fak Adam nge Efa ni ngar guyed tomuren ni nge m’ay fan e wod mi yad felfelan’ nga “reb e rran ni bay ra pired ni gathi yad e sib rok e wod mi yad un ko flaab rok pifak Got.” Dariy n’umngin nap’an ma girdi’ nib yul’yul’ e dabki kireban’rad ya tin kan sunmiy ni urngin e dabki sul biyay nga tan pa’ e wod. Rogon nib mat’aw Jehovah ni ma rin’ ban’en e be micheg ni ri bay rogon ni nge par ni ir e en th’abi tolang ni gubin ngiyal’.​—Isaiah 25:8.

17. Mang e ra rin’ ngodad ni gad ra sul nga daken tapgin ni keb e gafgow ko fayleng e chiney?

¹⁷ Gad ra sul nga daken fan e pi likngin e gafgow ney ni yib ko girdi’, ma gad ra guy tapgin ni fan ni ngad dogned ni keb e tin nib kireb nbochan Jehovah ara nge war e pagan’ rodad ngak? N’en nib thil riy, e n’en ni kad filed e ke pi’ ngodad fan ma nge puluw u wan’dad e thin rok Moses ni gaar: “Fare war e rib flont, rogon ni ma rin’ ban’en, ma urngin e kanawo‘ rok e ba yal’uw. Reb e Got nib yul’yul’, ma der ma rin’ e tin ni de yal’uw; ye ir e en nib mat’aw mab yal’uw.” (Deuteronomy 32:4, NW) Gad ra fal’eg i lemnag e pi n’en ney, ma tin ni kad nanged u murung’agen e ra par nib tamilang u wan’dad ni gubin ngiyal’. Ma aram, e nap’an ni gad ra mada’nag boch e skeng, ma gad togopuluw ko maruwel rok Satan ni ma ta’ e maruwar nga lanin’dad. Machane, uw rogon fa bin l’agruw ban’en ni kan weliy u murung’agen ko tabolngin? Mang e ba muun ngay ni nge pagan’uy ngak Jehovah?

Mang e Be Yip’ Fan ni Nge Pagan’uy Ngak Jehovah

18, 19. Mang boch e thin nu Bible ni be pi’ e athamgil nga lanin’dad ni ngad pagedan’dad ngak Jehovah, machane murung’agen e re n’ey ma mang e be lemnag boch e girdi’ ni de puluw?

¹⁸ Thin Rok Got e be fonownagdad ni be gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin mat’aw e kanawo’.” (Proverbs 3:5, 6) Ireray e thin nib fel’, ni be micheg ban’en. Mutrug ni dariy be’ u palpalth’ib ni yima pagan’uy ngak ni kab fel’ ko Chitamangidad nu tharmiy nib t’uf rodad. Machane, yugu aram rogon mab mom ni ngan beeg e pi thin ney u Proverbs, ma sana mmomaw’ ni ngaun rin’.

¹⁹ Boor e girdi’ e kar olobochgad u rogon ni yad be lemnag ko mang e be yip’ fan ni ngan pagan’uy ngak Jehovah. Boch e girdi’ e yad be lemnag ni re pagan’ nem e kemus ni lem, nib mit e felfelan’ ni yigoo ma sum u lan e gum’ircha’. Boch e girdi’ e gowa ke michan’rad ni ngan pagan’uy ngak Got e be yip’ fan ni gad be athapeg ni nga i yororiydad ko urngin e gafgow ni keb ngodad, me pithig urngin e magawon rodad, me ayuwegdad ko urngin e skeng ni ma yib ni gubin e rran nrogon ni gad be athapeg​—ma ra yib nib papey! Machane lem ni aram rogon e dariy e mich riy. Pagan’ e gathi kemus ni lem, gathi ban’en ni de riyul’. Ma piin ni kar ilalgad boch, e yad be lemnag ni pagan’ e ba muun ngay e tin baaray ni nge duguliy be’ ban’en ni lem rok, ma ke lemnag nib fel’ rogon u m’on.

20, 21. Mang e ba muun ngay ni ngan pagan’uy ngak Jehovah? Mu susunnag rogon.

²⁰ Mu lemnag biyay ko mang e be yog ko Proverbs 3:5. Be dag u roy e thil u thilin e pagan’ ngak Jehovah nge ngad torgad ko tin ni gad manang, ma biney e be micheg ni dabiyog ni ngad rin’ed ni l’agruw. Gur be yip’ fan e re n’ey ni dabiyog ni ngad fanayed gelngin e lem rodad fa? Danga’, ya bochan ni Jehovah, ir e ke pi’ gelngidad ni aram rogon, e be athapeg ni ngad fanayed ni ngada pigpiggad ngak. (Roma 12:1) Machane mang e gad be taga’ ngay, ara ngada torgad nga daken? Faanra dabi puluw e lem rodad ko lem rok Jehovah, ma gad be fol ko birok e gonop​—ni rogon nib fel’ e re gonop rok nem ni dabi chuchugur ko gonop rodad fa? (Isaiah 55:8, 9) Ra ngan pagan’uy ngak Jehovah e be yip’ fan ni ngad paged e lem rok nge pow’iy e lem rodad.

²¹ Ngan susunnag rogon: Mu lemnag reb e bitir nib achichig ni be par u tomur ko karro, ma gallabthir rok e yow bay u m’on. Chitamangin e ir e be kol e yap’. Nap’an ni yib e magawon u ngalan’ e milekag​—ni bod ni ke maruwaran’row ko kanawo’ ni yad be yan riy ara magawon ya de fel’ e yafang ara de fel’ e kanawo’—​Mang e ra rin’ e bitir ni ma fol, ma ma pagan’ ngorow? Gur nge tolul ko chiya u tomur ko karro nge yog ko chitamangin e n’en nge rin’ ko fare karro? Ra maruwaran’ ara togopuluw ko gallabthir rok nfaanra ngarognew ngak ni nge m’ag e seat belt rok? Danga’, ra pagan’ ngak e gallabthir rok nrogon ni ngara pithigew e re magawon nem, ni yugu aram rogon ndawora flontgow. Jehovah e ir e Chitamangidad nib flont. Gathi ba puluw ni ngada pagedan’dad ngak u polo’ e lem rodad, ni baga’ ni nap’an ni kad mada’naged e magawon nib mo’maw?​—Isaiah 30:21.

22, 23. (a) Mang fan ni ngada pagedan’dad ngak Jehovah u nap’an ni keb boch e magawon ngodad, ma uw rogon ni rayog ni ngad rin’ed e re n’ey? (b) Mang e yira weliy ko bin migid e article?

²² Machane, Proverbs 3:6 e be dag ni susun ni ngad ‘lemnaged Somol u fithik’ urngin ban’en ni gad be rin’,’ ni gathi nap’an ni gad ra mada’nag e magawon nib mo’maw’. Ere rogon ni gad ma dugliy ban’en ko yafas rodad ni gubin e rran e susun ni nge dag e pagan’ rodad ngak Jehovah. Nap’an ni ra sum e magawon, ma susun dabi mulan’dad, ma dabi wagey lanin’dad, ara ngada togopuluwgad ko ayuw ni nge pi’ Jehovah ni nge pow’iydad ko kanawo’ nth’abi fel’ rogon ni ngan pithig e pi magawon. Thingarda lemnaged ni nap’an ni ra yib fapi skeng ngodad ma kan bing e kanawo’ ni ngada daged ni gad be tay fan e gagiyeg rok Jehovah nth’abi tolang, ma ra ayuweg i micheg ni Satan e ba malulfith ligin, ma ra gelnag ni ngaun fol nge yugu boch e felngin ni ra felfelan’nag Jehovah.​—Hebrews 5:7, 8.

²³ Rayog ni ngada daged e pagan’ rodad ngak Jehovah ndemtrug e n’en ni be magawonnagdad. Rayog ni ngada rin’ed e n’en ni aram rogon u nap’an e meybil rodad nge rogon ni gad be sap ko Thin Rok Jehovah nge ulung rok ni nge pow’iydad. Machane, uw rogon ni ngada daged ni gad be pagan’ ngak Jehovah nrogon nib tamilang u nap’an ni gad ra mada’nag e pi magawon ni ma sum ko fayleng e ngiyal’ ney? Bin migid e article rodad e ra weliy e re kenggin nem.

[Footnote]

Uw Rogon ni Ngam Pi’ e Fulweg?

• Uw rogon ni dag David ni ke tay Jehovah nge mang pagan’ rok?

• Mang dalip ban’en ni be k’aring e magawon ko girdi’, ma mang fan nib fel’ ni ngan ta’ e tayim ni ngan sul nga daken?

• Mang e thin ni yog Jehovah ni fan ko girdi’, ma mang fan nib yal’uw e re n’em?

• Mang e ba muun ngay ni ngan pagan’uy ngak Jehovah?

[Pictures on page 22]

I tay David Jehovah nge mang pagan’ rok

[Picture on page 24]

I dag Jesus ni gathi bochan Jehovah ni ke puth reb e wulyang u Jerusalem