Rogon ni Ngan Gelnag e Mabgol Rom

AYUGU mu lemnag ba naun ni kan digey ke kireb. Machaw riy e be fathyath, ma ke magothgoth e chig riy, maku e ri tay tooben ni kan pag ke mak’pan. Rib gagiyal, ni re naun ney e ke magothgoth ni bochan e nifeng nib gel ko tin baaram e duw ni ke yan, ma ke gafgow ni bochan ni kan digey. Ere ngan buthug nge chuw fa? De t’uf ni ngan rin’. Faanra def riy u but’ e kab gel ma kenggin e kab mudugil, ma fare naun e ku rayog ni nga kun ngongliy.

Ere rarogon ere naun nem e be puguran e mabgol rom ngom fa? U lan boch e duw, ma nifeng nib gel, ni rogon ni nga nog, e sana ke kirebnag rogon e tha’ u thilmew e mabgol rom. Sana bigimew ara gimew l’agruw e kam dariyfannagew e mabgol romew. Rayog ni ngam lem ni bod rogon Sandy. Tomuren 15 e duw ni ke mabgol, me gaar: “Dariy ban’en nib taareban’mow ngay kemus ni mabgol e kugu tew. Ma de gaman ni aram rogon.”

Yugu ra ke taw e mabgol rom ko giney, ma yugu dab mu gur ngam micheg ni thingari wer e mabgol rom. Baga’, ni ku rayog ni ngan fulweg e mabgol rom nga rogon. Boor ban’en riy e ra yan u rogon e n’en ni kam michegew u thilmew e ani mabgol rom. N’en ni kan micheg e rayog ni ayuweg reb e mabgol nge par nib mudugil ko ngiyal’ ni keb e skeng. Machane mang maaram e kan micheg? Ma uw rogon ni ra ayuwegem fare Bible nge gelnigem?

Micheg e Ba Mu un Ngay e Tin Kan Ta’ ni Ngan Rin’

Ngan micheg ban’en e be yip’ ni kam tem ngay ni ngam rin’ fare nen. Yu ngiyal’ ma re bugithin nem e yima fanay ngab ban’en ni gathi girdi’ ni bod rogon e n’en kan micheg ni fan ko siyobay.

Yugu aram rogon ma mabgol e gathi ban’en ko siyobay, ma fare n’en ni kan micheg ni kan tay e ba mu un ngay ni dabisiy ni nga mu rin’ e maruwel rom ni kam micheg ni ngam rin’. I gur nge ani mabgol rom e dabisiy ni kam michegew u mit Got, nge boch e girdi’ ni ngam pirew u taabang ni yugu demtrug e tin ni ra buch. I yog Jesus ni gaar: “Cha’ ni sunmiy e [pumoon nge ppin] aram ko tabolngin e ngongliyrow ni pumoon nge ppin ni gaar, ‘Bochan ni fan ere n’eney e be’ nib moon e ra digey e chitamangin nge chitiningin me chag ngak leengin.’” Miki puthuy Jesus ngay ni: “N’en ni ke chagiy Got nga taabang e dabni pag be’ nge dareg.” (Matthew 19:4-6, NW) Nap’an ni ra yib e magawon, ma aram, e gur nge ani mabgol rom e thingar mu gelgow i ta’ fan fare n’en ni kam micheg.a I yog reb i leengiy ni gaar: “Fin tomuren ni kugu talgow i lemnag ni ngagu dargow e ir e ba fel’ ma fin aram e fel’ thilmow i yan.”

Machane ka boor ban’en ni ka ba’, ko n’en kan micheg, gathi kemus ni n’en kan nog ni ngan rin’. Mang e n’en ni kub mu un ngay?

Maruwel u Taabang

N’en kan micheg ko mabgol e gathi aram e fa gali yabgol e dariy ba ngiyal’ ni nge dabki taareban’row. Nap’an ni ra yib e magawon, ma thingar ni lemnag ni ngan gur ngan yaluweg fare n’en. Rogon figirngiy nge leengiy, e yog Jesus ni gaar: “Ma aram e gathi ka yow ba l’agruw, ya kar taab dowefgow.”

Mang e be yip’ fan ni kam “taab dowefgow” e ani mabgol rom? Fare apostal ni Paul e yoloy ni “figirngiy e thingari t’uf pi leengirad rorad ni bod rogon dowrad.” (Efesus 5:28, 29) Bang riy e, aram e, faanra kam “taab dowefgow” ma aram e ngar u mu lemnag e tin nib fel’ ko ani mabgol rom ni bod rogon ni ga ra rin’ ngom.

Yu wu’ e mabgol ni dar falfalan’gad e yad be par u taabang ni bochan e bitir ara salpiy. Aram rogon nib fel’ ni pi mabgol ney e ke yog ni par, ma ngam lemniged ni n’en ni gimed be nameg e tha’ u thilmed u fithik’ e t’ufeg, gathi ba tha’ ni kemus ni nguun par u taabang.

Ngongol ni De Siin

Ba wu’ e mabgol nib fel’, e yow l’agruw ni yow ma pag lanin’row. Uw rogon ni ga ra rin’ ni aram rogon? Gathi ngam par ni ga be fithem ko, ‘Mang e ra fel’ rogog riy ko re tha’ ney?’ ya ngam fithem ko, ‘Mang e rayog ni nga gu rin’ ni nge fel’ e mabgol rog?’ Ma ga fal’eg i yarmiy u lanin’um e pi n’en u mu rin’ fare wik ni ke yan. Uw n’umgin nap’an mu kum rin’ ban’en nib gol ni fan ni nge fel’ rogon ani mabgol rom riy? Nap’an ni ra non e ani mabgol rom ya baadag ni nge non, ga ma motoyil​—ni ku yugu ra damura lemnag ni thingar mu rin’ ni aram rogon? Uw urngin ban’en ni kam un ngay ni baadag e ani mabgol rom me gur e gathi ri baadag?

Ngongol ni ngam-​pag ngam gafgow ni bochan ni nge fel’ ku be’ e ra gelnag e mabgol rom ya be m’ug nib ga’ fan u wan’um ma ga baadag ni nge dabi kireb.

Ngan Lemnag ni Nge Par e Mabgol nib N’uw Nap’an

Jehovah Got e rib ga’ fan e yul’yul’ u wan’. Riyul’, ya fare Bible e gaar: “Be’ nib yul’yul’ e gur [Jehovah] e ga ra yul’yul’ ngak.” (2 Samuel 22:26, NW) Par nib yul’yul’ ku Got e ba t’uf ni ngan yul’yul’ nga rogon e mabgol ni yarmiy.​—Genesis 2:24.

Faanra gur nge ani mabgol rom e gimew ba yul’yul’ ngomew, ma gimew ra pirieg e falfalan’ ko par romew u taabang ni dab mu dargow. Nap’an ni ga ra lemnag oren e pul, duw, nge boor e duw nga m’on, ma ka ga be guymew u taabang.

Rofen ni magpa’ rom, ma ga dugliy ban’en ngak ba girdi’ nib fas​—ani mabgol rom. Re n’eney e thingari yib angin ni rib gel nga rogon ni ga be lem nge ga be ngongol e chiney ni gur be’ ni gab mabgol. Gathi ke taareban’um ngay ni thingar mu par ko ani mabgol rom ni gathi kemus ni bochan ni kari mich u wan’um e tin ba thothup ko mabgol ya ku bochan nib t’uf rom e ani kam mabgolgow?

[Footnote]

[Box/Picture on page 5]

N’en ni Yima Micheg ko mabgol, e Ba Muun Ngay . . .

● N’en kan ta’ ni ngan rin’ “N’en kam micheg, mu pi’ puluwon. Kab fel’ ni dabmu micheg ban’en ko bin ngam micheg ma dabmu pi’ puluwon.”​—Eklesiastes 5:4, 5, NW.

● Maruwel u taabang “L’agruw e kab fel’ ko taareb . . . Ya faanra aw bagayow nga but’, ma ra ayuweg bagayow nge sak’iy.”​—Eklesiastes 4:9, 10, NW.

● Ngan gafgow ni bochan e nge fel’ rogon be’ “Ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

● Lem ni nge par nib n’uw nap’an e mabgol “T’ufeg . . . e ma guman’nigey u urngin ban’en.”​—1 Korinth 13:4, 7.