Piin Ni Pilibthir E—bang Nib Ga’fan Ko Ulung Rodad Ni Gadad E Pi Walag Ni Kristiano

“Piin ni kan yungrad nga lan e naun rok Jehovah . . . e bayra mon’og iyan. Ma bay ku ur mon’oggad i yan nge taw nga nap’an ni ke manna’ lolugrad.”​—Psalm 92:13, 14, NW.

1. Uw rogon u wan’ e girdi’ e piin ni kar pilibthirgad?

URNGIN e pi tapigpig rok Jehovah nib yul’yul’ nib muun ngay e piin ni kar pilibthirgad e yad ba t’uf rok. Machane, rogon ni yibe sananag ni kan ta’ ni fan ko nam nu Meriken, ma gubin e duw e ke chuchugur ko baley e million riy ni ke pilibthir e yibe gafgownagrad ma kan pagrad. Thin ni aram rogon ni kan wereg nib ko pi nam u ga’ngin yang e fayleng e be dag ni pi magawon nem ni nguun gafgownag e piin ni kar pilibthirgad e ke mang magawon ko fayleng ni polo’. Ma lik’ngin e re n’ey e aram e n’en ni yog reb e ulung ni bochan ni “ke wer e lem u fithik’ boor e girdi’ . . . ni piin pilibthir e ke m’ay fan e yafas rorad, ma dakuriy ban’en ni yad ba fel’ ngay ma ri yad ma taga’ nga daken e ayuw rok boch e girdi’.”

2. (a) Uw rogon u wan’ Jehovah e pi tapigpig rok nib yul’yul’ ni kar pilibthirgad? (b) Mang e be yog ko Psalm 92:12-15 nrayog ni nge pi’ e athamgil nga lanin’uy?

² Pi tapigpig rok Jehovah nib yul’yul’ ni kar pilibthirgad e baga’fan u wan’. Ma tiyan’ nga “rarogon lanin’dad”​—ni aram e rarogodad ko tirok Got—​ma der ma tiyan’ ko tin dabiyog ni nge rin’ e dowef rodad. (2 Korinth 4:16) U lan e Thin rok, ni fare Bible, ma gad ra guy e thin ni baaray ni be micheg ban’en ma be pi’ e athamgil nga lanin’uy ni gaar: “Be’ nib mat’aw e ra mon’og ni bod fare gek’iy ni palm; ma ra ga’ ni bod fare cedar u Lebanon. Piin ni kan yungrad nga lan e naun rok Jehovah, u lan fare yoror rok Got rodad, e bay ra mon’ogad i yan. Ma bay kuur mon’oggad i yan nge taw nga nap’an ni ke manna’ lolugrad, mi yad par nib sugsug mab fel’ rogorad, ni ngar weliyed ni Jehovah e ba mat’aw.” (Psalm 92:12-15, NW) Ngan weliy e pi verse ney ma ra dag bang ko n’en nib ga’fan ni gimed ni kam pilibthirgad e rayog ni ngam rin’ed ni fan ko ulung ko Kristiano ni yad walag.

“Ngan Mon’og u Nap’an ni Ke Manna’ Lolugey”

3. (a) Mang fan ni piin nib mat’aw e kan taareb rogonnagrad ko gek’iy ni palm? (b) Uw rogon ni nge mon’og e piin pilibthir ‘u nap’an ni ke manna’ lolugrad’?

³ Ke taareb rogonnag fare psalmist e piin nib mat’aw ko gek’iy ni palm ni ‘kan yung nga lan fare yoror rok Got rodad.’ Be par ni yad “ma mon’og u nap’an ni ra manna’ lolugrad.” Reb e version e rayog ni ngan bieg ni gaar: “Nap’an ni kar pilibthirgad ma ku ka ma yib wom’engirad.” (Tanakh) Gur gathi riyul’ ni ireray e lem ni be pi’ e athamgil nga lanin’uy? Fapi gek’iy ni palm nib fel’ yaan mab k’iy e yima guy u lan e yoror ko pi binaw u nap’an e Bible. Fapi gek’iy ni palm e baga’ fan ni gathi kemus ni bochan ni yima fanay ni fan ni ngan fal’eg yaan ban’en, ya ku bochan ni boor wom’engin, ni boch riy e ke pag raay e duw ma be par ni ku ma yib wom’engin.a Ga ra par nib mudugil u lan e liyor nib riyul’, maku rayog ni “nge par ni nge yib wom’engin ko maruwel nib fel’.”​—Kolose 1:10.

4, 5. (a) Mang wom’engin nib ga’ fan nib t’uf ni nge yib ko Kristiano? (b) Mu dag boch e Thin nu Bible ni be weliy murung’agen e piin pilibthir ni kar yognaged “wom’engin dap’e lugunrad.”

⁴ Be athapeg Jehovah ni pi Kristiano e “nge yognag wom’engin dap’e l’ugunrad”​—ni aram e thin ni ka nog ni fan ni nga nog e sorok ngak nge tin nib m’agan’ ngay. (Hebrews 13:15) Gur ni kam pilibthir e ba m’ag ngom e re n’ey fa? Ri arrogon.

⁵ Ba’ u lan e Bible e piin ni kar pilibthirgad ni dar rusgad ni nguur machibnaged fithingan Jehovah nge tin nib m’agan ngay. Ke pag “medlip i ragag” e duw rok Moses u nap’an ni ke pi’ Jehovah e maruwel ngak ni nge mang profet rok nge ani owchen. (Psalm 90:10; Exodus 4:10-17) Yugu aram rogon ni ke pilibthir Daniel ni profet mi i par ni der rus ni nge machibnag e gagiyeg rok Jehovah ni th’abi tolang. Sogonapan 90 e duw rok Daniel u nap’an ni ke pining Belshazzar ni nge weliy fan fare yol nib mith u dow e rungrung. (Daniel, guruy 5) Ma uw rogon John ni apostal ni ke pilibthir? Nap’an ni ke chuchugur ni nge m’ay e pigpig rok u fithik’ e yul’yul’, min kalbusnag u Patmos ni bochi donguch “ya bochan ke weliy murung’agen Got nge Jesus.” (Revelation 1:9) Baga’ ni ra yib ngan’um boor e girdi’ u Bible ni keb “wom’engin dap’e lungurad” u nap’an ni kar pilibthirgad.​—1 Samuel 8:1, 10; 12:2; 1 Kings 14:4, 5; Luke 1:7, 67-79; 2:22-32.

6. Uw rogon ni ke fanay Jehovah e “piin pumoon ni kar pilibthirgad” ngar yiiynaged ban’en e ngiyal’ ney ni tin tomren e rran?

⁶ Ke yog Peter ni apostal ni be fanay e thin rok Joel ni profet ni be’ ni Hebrew ni gaar: “‘Ke gaar Got, Baaray e n’en ni bay gu rin’ ko tin tomren e rran: Bay gu puog fare Kan ni Thothup rog nga daken urngin e girdi’ [mab muun ngay e “piin ni pumoon ni kar pilibthirgad”]; . . . e bay ur yiiygad.’” (Acts 2:17, 18; Joel 2:28) Maku arrogon e ngiyal’ ney ni tin tomren e rran, ma fanay Jehovah e piin ni kar pilibthirgad ni yad bang ko piin ni kan dugliyrad nge piin ni yad bang ko fare “yugu boch e saf” ngar wereged e tin nib m’agan’ ngay. (John 10:16) Boch i yad e kar yognaged wom’engin Gil’ilungun u lan boor e duw u fithik’ e yul’yul’.

7. Mu weliy ko uw rogon ma pi pilibthir e yad be ulul i yognag wom’engin Gil’ilungun nyugu aram rogon ni ke war gelngirad.

⁷ Mu lemnag Sonia, ni ke mang tamachib ko Gil’ilungun ni polo’ e tayim rok ko 1941. Yugu aram rogon nib gafgow ko m’ar nib n’uw nap’an nib mo’maw’ ni nge gol, ma be fil e Bible ngak e girdi’ u tabinaw rok. Me yog Sonia ni gaar, “Ngan machibnag fare thin nib fel’ e bang ko yafas rog. Tin riyul’ riy ireray e yafas rog. Dabug ni nggu tal.” Dawori n’uw nap’an kafram, ma Sonia nge walagen ni ppin, ni Olive fithingan, e yow be machibnag e thin nu Bible ni murung’agen e athap ngak Janet, ni cha’ nem e bay e m’ar rok nib ubchiya ni kar mada’gad u lan e singgil u hospital ni yima sonnag e girdi’ riy. Chitiningin Janet, ni be’ nib yul’yul’ ko Catholic, e kari gin ko t’ufeg ni kan dag ko bitir rok ni ppin me adag ni ngan fil e Bible ngak me mon’og e chiney. Rayog ni ngam fanay e ngiyal’ ni aram rogon ngam yognag wom’engin Gil’ilungun?

8. Uw rogon ma Caleb ni ke pilibthir e ke dag ni be pagan’ ngak Jehovah, ma uw rogon ni nge fol e piin Kristiano ni kar pilibthirgad riy?

⁸ Ngan athamgil ni ngan ulul ko maruwel ni ngan wereg e machib ko Gil’ilungun ni yugu demtrug ni bay e magawon ya kan pilibthir, ma piin ni Kristiano ni kar pilibthirgad e yad be lek luwan ay Caleb ni be’ nu Israel nib yul’yul’, ni ir fa cha’ ni ke un ngak Moses nga daken e ted u lan aningeg i ragag e duw. Ke 79 e duw rok Caleb u nap’an ni ke th’ab fare Lul’ ni Jordan nge yan nga lan fare Binaw ni kan Micheg. Tomren ni ke un ko cham ni tay e pi salthaw nu Israel u lan nel’ e duw ma kar gelgad, rayog ni nge gaman u wan’ e n’en ni ke rin’ ma dabki rin’ ban’en. Machane de yodor, ya der rus ni nge ning reb e maruwel nib mo’maw’ ni nge cham ko “pi mach nib ga’ ma kan yororiy” u lan e binaw nu Judah ni boor e burey riy, ma aram e binaw ni fapi Anakim e yad ma par riy, ni girdi’ nib gagang’. U daken e ayuw rok Jehovah, e tulufrad Caleb, ni bod e n’en ni ke micheg Jehovah.” (Joshua 14:9-14; 15:13, 14) Mu pagan’um ni Jehovah e bay u ba’ rom, ni bod ni immoy u ba’ rok Caleb, ni ga be ulul ni nguum yognag wom’engin Gil’ilungun u nap’an ni kam pilibthir. Ma faan ga ra par nib yul’yul’, ma ra pi’ ngom e binaw u lan fa bin nib biech e fayleng ni ke micheg.​—Isaiah 40:29-31; 2 Peter 3:13.

“Ur Pared nib Sugsug mab Fel’rogorad”

9, 10. Uw rogon ma Kristiano ni kar pilibthirgad e nge par nib gel e michan’ rorad mu ur pared ni yad ba gel ko tirok Got?

⁹ I yon’ fare psalmist e tang ni be weliy murung’agen e pi tapigpig rok Jehovah ni kar pilibthirgad ni ri ma yib wom’engirad ni gaar: “Be’ nib mat’aw e ra yib wom’engin ni bod e n’en ni ma rin’ e gek’iy ni palm; ma ra ga’ ni bod fare cedar u Lebanon. Ra par ni yad be mon’og u nap’an ni ke manna’ lolugrad, ma ur pared ni yad ba sugsug mab fel’ rogorad.”​—Psalm 92:12, 14.

¹⁰ Uw rogon ma rayog ni nguum par ni gab pasig ko tirok Got nyugu aram rogon ni kam pilibthir? Fan ni fare gek’iy ni palm e ma par nib fel’ yaan e bochan ni ma par ko gin ni bay e ran riy nib fel’ urngin. Maku, rayog ni ngam fek e ran ni aram e thin riyul’ u Bible nfaanra ngam fil e Thin rok Got ma ngam chag ngak e ulung rok. (Psalm 1:1-3; Jeremiah 17:7, 8) Baga’ fam u wan’ e pi walag ya ga be par ni gab pasig ko tirok Got. Mu lemnag ko uw rogon ni m’ug ni rib riyul’ e re n’ey ko n’en ni rin’ Jehoiada ni fare prist nib tolang ni ke pilibthir.

11, 12. (a) Mang e n’en ni rin’ Jehoiada u lan e chepin Gil’ilungun Judah? (b) Ma uw rogon ni i fanay Jehoiada gelngin ni nge m’oneg e tin riyul’ e liyor?

¹¹ Sana ke pag raay e duw rok Jehoiada u nap’an ni ke gagiyeg Queen Athaliah u Judah u fithik’ e towasar ma bochan e re n’en nem me li’ ngem’ e pi bitir ko bitir rok. Mang e rayog ni nge rin’ Jehoiada ni be’ ni ke pilibthir? U lan nel’ e duw ma ir nge ppin rok e kar mithagew e en ni kemus ir e bay rogon ni nge mang pilung ni ka ba’ ni Jehoash u lan fare tempel. Ngemu’, me rin’ ban’en ni yira gin ngay, ya i tay Jehoiada Jehoash ni medlip e duw rok nge mang pilung me tay chilen ni ngan li’ Athaliah ngem’.​—2 Chronicles 22:10-12; 23:1-3, 15, 21.

¹² Jehoiada ni ir e be ayuweg fare pilung, e i fanay gelngin ni nge m’oneg e bin riyul’ e liyor. Me “fal’eg reb e m’ag u thilin nge urngin e girdi’ nge fare pilung ni ngar ululgad ni yad e girdi’ rok Jehovah.” U daken e thin rok Jehoiada, me buthug e girdi’ fare naun rok Baal ni fare got ni googsur min chuweg fapi altar, nge liyos, nge prist. Maku daken e fonow rok Jehoiada ni i sulweg Jehoash boch e maruwel u lan fare tempel min fal’eg e tin ke kireb riy ni ireray e n’en nrib ga’fan. “Me ulul Jehoash i rin’ e tin nib mat’aw u p’eowchen Jehovah ni polo’ e yafas rok ni Jehoida ni fare prist e be fil ngak.” (2 Chronicles 23:11, 16-19, NW; 24:11-14; 2 Kings 12:2) Nap’an ni yim’ Johoiada ko ngiyal’ ni ke 130 e duw rok, min k’eyag ko taliw ni fan ko pilung ya bochan “ke rin’ e tin nib fel’ ni fan nga Israel nge fa bin riyul’ e Got nge naun rok.”​—2 Chronicles 24:15,16.

13. Uw rogon ma pi Kristiano ni kar pilibthirgad e ngar ‘rin’ed e tin nib fel’ ni fan ku Got nge naun rok’?

¹³ Sana bochan e m’ar ara boch e magawon ma dabiyog ni ngam rin’ boor ban’en ni ngam m’oneg e bin riyul’ e liyor. Yugu demtrug ni aram rogon e magawon rom, ma ku rayog ni ngam rin’ e ‘tin nib fel’ ni fan ko Got nib riyul’ nge naun rok.’ Rayog ni ngam dag e t’ufeg rom ni fan ko naun rok Jehovah nib spiritual ni ga be un ko muulung ma ga ma un ko tin yima rin’ riy ma ngam un ko machib u mit e tabinaw i yan ko ngiyal’ ni rayog. Ra ngam dag ni ga ma fol ko fonow u lan e Bible ma ga ma ayuweg “fare tapigpig nib yul’yul’ mab gonop” nge fare ulung u fithik’ e yul’yul’ e ra gelnag e piin Kristiano ni yad walag. (Matthew 24:45-47) Maku rayog ni ngam pi’ e athamgil ko pi walag “ni ngar t’ufeged yad ma ngar rin’ed e tin nib fel’.” (Hebrews 10:24, 25, NW; Filemon 8, 9) Ma rayog ni ngam mang taw’ath ngak boch e girdi’ ni faanra ngam fol ko fonow rok Paul ni apostal ni gaar: “Piin ni pumoon ni kar pilibthirgad e ngam ngongolgad nrogon, ma ngam lemgad nib fel’ rogon, mab gel [“ba pasig,” An American Translation] e michan’, nge t’ufeg, nge kadan’ romed. Maku arrogon e piin ni ppin ni kar pilibthirgad ni yad ma tay fan e girdi’, ma dar ma t’ar e thin nga daken e girdi’, ma dar ma unum e wain ni boor, ma yad e sensey ko tin nib fel’.”​—Titus 2:2-4.

14. Mang e rayog ni nge rin’ e piin ni piilal ni ma lekag e ulung ni Kristiano ni kar pigpiggad nib n’uw nap’an ngar m’oneged e tin riyul’ e liyor?

¹⁴ Kam pigpig ni gur reb e piilal ko ulung u lan boor e duw? “Ngam mu fanay e gonop ni kam kunuy u lan boor e duw ndariy e lem nib siin u fithik’,” ireray e fonow ni pi’ reb e piilal ko ulung nib n’uw nap’an. “Mu pi’ e maruwel ngak yugu boch e girdi’, ma ngam fil ngak boch e girdi’ ni baadag e tin ni ga manang . . . Ngam mu nang e salap rok boch e girdi’. Ngam gelnag ma ngam ayuweg e re salap rok nem. Mu fal’eg rogon ni fan ko gabul nge langlath.” (Deuteronomy 3:27, 28, NW) Lem rom ni riyul’ ni ga baadag ni ngam ayuweg fare maruwel ko Gil’ilungun ni be mon’og i yan e ra yibnag boor e taw’ath ngak boch e girdi’ u lan e ulung ko Kristiano ni gadad walag.

“U Mu Weliy ni Jehovah e Ba Yal’uw”

15. Uw rogon ma pi Kristiano ni kar pilibthirgad e nga “rogned ni Jehovah e ba yal’uw”?

¹⁵ Pi Tapigpig rok Got ni kar pilibthirgad e yad ba felfelan’ ni ngara rin’ed e maruwel rorad ngar “weliyed ni Jehovah e ba mat’aw.” Faanra gur reb e Kristiano ni kam pilibthir, ma thin ni ga ma yog nge ngongol rom e ra dag ni ‘Jehovah e Ir e War rom, ni dariy e tin nde mat’aw rok.’ (Psalm 92:15) Fare gek’iy ni palm e mich riy ni dabi non ma be dag e pi felngin ni th’abi fel’ rok e En Ta Sunmiy. Machane ke pi’ Jehovah ngom e taw’ath ni ngam weliy murung’agen ngak e piin ni ke fel’ e liyor nib riyul’ u wan’rad. (Deuteronomy 32:7; Psalm 71:17, 18; Joel 1:2, 3) Mang fan ni baga’ fan e re n’ey?

16. Mang e n’en u Bible ni be dag feni ga’ fan ni ‘ngau nog ni Jehovah e ba yal’uw’?

¹⁶ Nap’an ni ke “pilibthir” Joshua ni en ma yog e thin rok piyu Israel, me “pining yu Israel ni urngin, ni piin ni piilal nge pilung nge tapuf oloboch nge piin tolang,” me puguran ngorad ni Got e ba yal’uw u rogon ni ke rin’ ban’en ngorad. I yog ni gaar: “Dariy reb e thin u fithik’ urngin bug e thin nib fel’ ni ke yog Jehovah ni Got romed ngomed ni ke aw nib m’ay fan. Urngin ni ke riyul’ ni fan ngomed.” (Joshua 23:1, 2, 14, NW) U lan ba ngiyal’ ni ba’ n’umngin nap’an, ma pi thin ney e ke gelnag e girdi’ ko n’en ni kar dugliyed u wan’rad ni ngaur yul’yul’gad ngay. Machane, tomren ni ke yim’ Joshua, “me sum reb e mfen . . . ni dar nanged Jehovah ara n’en ni rin’ ni fan ngak yu Israel. Ma pifak yu Israel e kar rin’ed e tin nib kireb u p’eowchen Jehovah kar pigpiggad nga boch e kan ni ka nog e Baal ngorad.”​—Judges 2:8-11, NW.

17. Uw rogon ni ma rin’ Jehovah ban’en ngak e girdi’ rok e ngiyal’ ney?

¹⁷ Yul’yul’ rok e ulung ko Kristiano e ngiyal’ n’ey e de tor nga daken e thin ni ma weliy e pi tapigpig rok Got ni kar pilibthirgad. Yugu aram rogon, michan’ rodad ku Jehovah nge tin ni ke micheg e ke gel u nap’an ni kad rung’aged e thin u murung’agen e tin ni rin’ ni be dag “feni sorok” ni ke rin’ ni fan ko girdi’ rok ko ngiyal’ ney ni tin tomren e rran. (Judges 2:7; 2 Peter 1:16-19) Faanra kam chag ko ulung rok Jehovah u lan boor e duw, ma rayog ni nge yib ngan’um ba ngiyal’ ni rib buchuw e pi tamachib ko Gil’ilungun u binaw rom ara nam ara nap’an ni fare maruwel ni ngan wereg e machib e yibe togopuluw ngay nrib gel. Tomren ni yan e tayim, ma kam guy ni ke chuweg Jehovah boch e magawon me ‘gurgurnag’ e mon’og ko Gil’ilungun. (Isaiah 54:17; 60:22) Kam guy ko uw rogon ni kan tamilangnag e thin riyul’ u Bible ma kam guy ni yibe ulul ni buchuw ma buchuw ni yibe chuweg e kireb ko ulung rok Got ko gin ni rayog ni ngan guy nga owchey. (Proverbs 4:18; Isaiah 60:17) Ga be pi e athamgil nga laniyan’ e girdi’ ni ga be weliy ngorad murung’agen e tin ni kam guy nib peth ko tin nib mat’aw ni rin’ Jehovah fa? Ma angin ni ra yib riy e ra pi’ e athamgil nga lanin’uy me gelnag e pi walag ni Kristiano!

18. (a) Mog felngin nra par nib n’uw nap’an ni ‘nga nog ngak boch e girdi’ ni Jehovah e ba mat’aw.’ (b) Uw rogon ni kam guy nga owchem ni Jehovah e ba mat’aw?

¹⁸ Ma uw rogon e pi tayim ni ke ayuwegem Jehovah u fithik’ e t’ufeg me pow’iy e yafas rom? (Psalm 37:25; Matthew 6:33; 1 Peter 5:7) Kafram ma Martha ni reb e walag ni ppin ni ke pilibthir e ma pi e athamgil nga laniyan’ e girdi’ ni be yog ni gaar: “Demtrug ko mang e ra buch, ma dabmu pag Jehovah. Bayi gelnagem.” Re fonow nem e baga’ angin ngak Tolmina, ni bagayad e piin ni ke fil Martha e Bible ngorad min taufenag u nap’an ni kafin ni tabab e pi duw ko 1960. Ke yib ban’en ngan’ Tolmina me yog ni gaar, “Nap’an ni yim’ e pumoon rog ma ke kireban’ug nrib gel, machane pi thin nem e ke ayuwegeg ni dabgu pag reb e muulung. Ma riyul’ ni ke gelnageg Jehovah ni dabgu tal.” Maku ke fonownag Tolmina ni aram rogon boor e girdi’ ni ma fil e Bible ngorad u lan boor e duw. Tin riyul’ riy, rayog ni ngarim gelnag e michan’ rok pi walagem ni ga be pi’ e athamgil nga lanin’rad ma ga be puguran ngorad e tin ni ke rin’ Jehovah nib yal’uw.

Baga’fan u Wan’ Jehovah e Piin Pilibthir nib Yul’yul’

19, 20. (a) Uw rogon u wan’ Jehovah e maruwel ni ma ta’ e pi tapigpig rok ni kar pilibthirgad? (b) Mang e yira weliy ko bin migid e article?

¹⁹ Fayleng e ngiyal’ ney, ni yimanang ni girdi’ riy e ma dariyfannag e girdi’, ma gathi ri yad ma lemnag rarogon e piin pilibthir. (2 Timothy 3:1, 2) Nap’an ni yib e pilibthir ngan’ e girdi’, ma baga’ nbochan e pi n’en ni kar rin’ed kakrom​—ni aram miti mang girdi’ e yad kakrom, ko bin ni ngan lemnag ko yad ba miti mang girdi’ e chiney. N’en nib thil riy, e Bible e be yog ni gaar: “Yi Got e gathi de mat’aw ni nge pagtalin e maruwel romed nge t’ufeg ni kam daged nga fithingan, ya kam pigpig ngak e piin ni yad ba thothup ma ki gimed be pigpig ngorad.” (Hebrews 6:10) Riyul’, ma yib ngan’ Jehovah Got e n’en ni kam rin’ u fithik’ e yul’yul’. Machane kub ga’ fam u wan’ nbochan ga be ulul ko pigpig ngak. Arrogon, ma changar ngak e piin pilibthir nib yul’yul’ ni ma yib wom’engirad, ma yad ba fel’ ko tirok Got, ma yad e Kristiano nib pasig​—ni yad e mich riy nib fas ni ba’ gelngin.​—Filippi 4:13.

²⁰ Ga be changar ko piin pilibthir u fithik’ e pi walagdad ni Kristiano ni bod Jehovah? Faanra aram rogon, ma ra k’aringem ni ngam dag e t’ufeg ni fan ngorad. (1 John 3:18) Bin migid e article e ra weliy murung’agen boch e kanawo’ ni ngan dag e re t’ufeg nem ni ngan ayuwegrad ko tin nib t’uf rorad.

[Footnote]

Mang Boch e Fulweg Rom?

• Uw rogon ni ma “yib wom’engin” e pi pilibthir?

• Mang fan ni pasig ko tirok Got ni ma dag e pi pilibthir ni Kristiano e ban’en nib tolang puluwon?

• Uw rogon ma pi pilibthir e ngar “weliyed ni Jehovah e ba mat’aw”?

• Mang fan ni baga’ fan u wan’ Jehovah e piin ni kar pigpiggad ngak nib n’uw nap’an?

[Picture on page 8]

Piin ni pilibthir e ma yibnag wom’engin Gil’ilungun nib ga’fan

[Picture on page 10]

Pasig ko tirok Got ni ma dag e pi pilibthir e ban’en nib tolang puluwon