Nguum Machibnag E Thin Rok Got Ni Dabmu Rus

“Mman, mu yiiy ngak e girdi’ rog.”​—AMOS 7:15, NW.

1, 2. Mini’ Amos, ma mang e be dag e Bible u murung’agen?

NAP’AN ni be un reb e mich rok Jehovah ko machib, me chuchugur ngak reb e prist. Me tolul fare prist ni gaar: ‘Dabkum machib! Mu chuw u roy!’ Mang e ke rin’ fare mich? Ke fol ko thin ni ka nog ngak, fa ki ulul ni nge machibnag e Thin rok Got ni de rus? Rayog ni ngam nang e fulweg riy ya i yoloy fare mich e tin ni buch rok nga reb e babyor ni kan tunguy fithingan ngay. Ireray fare babyor u Bible ni Amos fithingan. Machane, u m’on ni ngada filed murung’agen e n’en ni buch u nap’an ni ke sabaliy fare prist, ma ngada fal’eged i yaliy boch ban’en u murung’agen Amos.

² Mini’ Amos? Wuin e immoy ma ma par u uw? Gad ra pirieg e fulweg ko pi deer ney ko Amos 1:1, ya rayog ni ngad bieged ni gaar: “Pi thin ney e thin rok Amos, ni ir reb e tagafaliy e saf ko binaw nu Tekoa, . . . ko fa ngiyal’ nem ni Uzziah e pilung nu Judah mi Jeroboam, ni be’ nib moon ni fak Joash e pilung nu Israel.” Amos e ir be’ nu Judah. Kan gargeleg u Tekoa, ni ragag e mile palongin ko yimuch u Jerusalem. I par u nap’an ni ke chuchugur ni nge m’ay e bin mereb e chibog B.C.E. ko ngiyal’ ni Uzziah ni pilung e be gagiyeg u Judah ma Jeroboam II e ir e pilung ko fa ragag nem e ganong nu Israel. Amos e ir be’ ni tagafaliy e saf. Tin riyul’ riy, Amos 7:14 e be yog ni gathi kemus ni ma “gafaliy e gamanman” ya ku “ma ayuweg yungi woldug ni gek’iy ni fig.” Ere nap’an e mukun woldug e bay e maruwel rok nib thil. Ma kuruf wom’engin e fig. Yima rin’ e re maruwel n’ey ni fan ni nge lol wom’engin e fig nib papey. Rib gel e magar riy.

“Mman, Ngam Yiiy”

3. Gad ra fil murung’agen Amos ma uw rogon ni nge ayuwegdad u nap’an ni gad be thamiy ni dariy rogodad ni ngada uned ko machib?

³ I yog Amos nib tamilang ni gaar: “Gathi gag ba profet, ma gathi gag fak reb e profet.” (Amos 7:14, NW) Gathi ba profet e chitamangin ma dan skulnag nge mang reb e profet. Machane, u fithik’ urngin e girdi’ nu Judah, me mel’eg Jehovah Amos ni nge rin’ e maruwel Rok. Ngiyal’ nem, ma de mel’eg Got e pilung nib gel gelngin, ara ba prist nib llowan’, ara pilung ni rib fel’ rogon. Re n’ey e be fil ngodad ban’en nib fel’ u wan’uy. Sana yibe lemnag ni gadad e girdi’ nib sobut’ ara dad uned ko skul nib tolang. Machane ra k’aring e re ne’m ni ngad lemnaged ni dariy rogodad ni ngad machibnaged e Thin rok Got fa? Ri danga’! Rayog rok Jehovah ni nge fal’eg rogodad ni ngada machibnaged e thin rok​—ni mus ko binaw nib mo’maw’. Bochan ni ireray e n’en ni rin’ Jehovah ngak Amos, maku ra mang fonow ngak urngin e girdi’ ni baadag ni ngar machibnaged e thin rok Got ni dabra rusgad ni faan yad ra lemnag e tin ke rin’ e re profet nem.

4. Mang fan ni mo’maw’ rok Amos ni nge yiiy u Israel?

⁴ I motochiyelnag Jehovah ngak Amos ni gaar: “Mman, ngam yiiy ngak e girdi’ rog ni yu Israel.” (Amos 7:15, NW) Re maruwel nem e ba mo’maw’. Ngiyal’ nem, ma fa ragag nem e ganong nu Israel e bay e gapas, nge pagan’ rorad, ma ke fel’ rogorad. Boor i yad e bay e ‘naun rok ni fan ko garbeb’ nge ‘naun ni fan ko ngal’an e gawel, ni gathi naun ni kan ngongliy ko rengnga ni but’, ya “malang nib tolang puluwon.” Boch i yad e bay e chugum rok ni kan ta’ nguwelen e elefant ngay ma ma unum e wain ko “yungi milay’ ko grapes nib fel’ yaan.” (Amos 3:15; 5:11) Bochan e re n’ey, ma boor e girdi’ ni dariy fan e machib u wan’rad. Tin riyul’ riy, e fare binaw ni i machibnag Amos e sana ba chugur rogon ko binaw ni be machib boch i gadad riy e ngiyal’ ney.

5. Mang boch ban’en ni de mat’aw ni ke rin’ boch piyu Israel?

⁵ De kireb ni nge yog boch e chugum ngak piyu Israel. Machane, boch i yad e kar yoornaged e chugum rorad u fithik’ e sasalap. Piin ni ba fel’ rogorad e kar “sasaliyebnaged e piin nib sobut’” ma “kar magawonnaged e piin nib gafgow.” (Amos 4:1, NW) Piin tafol chuway’ nib gel gelngirad, nge tapuf oloboch, nge fapi prist e kar maruwelgad u taabang ni fan ni ngar iringed ban’en rok e piin nib gafgow. Ngada sulod ko ngiyal’ i nem ngada guyed e n’en ni i rin’ e pi pumoon nem.

Kan Th’ab e Motochiyel rok Got

6. Uw rogon ma piyu Israel ni tafol chuway’ e kar sasaliyebnaged yugu boch e girdi’?

⁶ Som’mon e nga darod ko gin ni yima pi’ ni chuway’ boch ban’en riy. Piin ni tafolchuway’ e kar “achichignaged e ephah” ma kar “ga’naged e shekel,” maku yad ma pi’ ni chuway’ e grain nib “tagan’”. (Amos 8:5, 6) Piin tafolchuway’ e ma sasaliyebnag e girdi’ u daken e thabthabel nib kireb, ma rib tolang puluwon, ma pi n’en yad ma pi’ ni chuway’ e de fel’. Tomren ni kar feked urngin ban’en rok e piin nib gafgow me aw ni ri dakuriy ban’en rorad, ma thingara pied yad ni chuway’ ngar manged sib. Bin migid ngay, e piin tafolchuway’ e ra chuw’iyed yad ni “chi puluwon l’agruw raba’ e sus.” (Amos 8:6) Aygum lemnag! Pi cha’nem ni tafolchuway’ nib chogow e kar ted ni puluwon piyu Israel ni walagrad e bod rogon puluwon e sus! Rib tagan’ e n’en ni ka ra rin’ed ngak e piin nib gafgow, ma kar th’abed e Motochiyel rok Got ni rib gel! Yugu aram rogon, ma pi tafol chuway’ nem e yad ma fol ko tin yima rin’ u nap’an e “sabbath.” (Amos 8:5) Arrogon, yad ma tiyan’rad ko teliw machane kemus ni thin.

7. Mang e ke k’aring piyu Israel ni ngar th’abed e motochiyel rok Got?

⁷ Uw rogon ma piin tafolchuway’ e dan gechignagrad nib bochan kar th’abed e Motochiyel rok Got, ni be yog ni gaar: “Thingar mu t’ufeg e girdi’ ni bod gur”? (Leviticus 19:18, NW) Dan gechignagrad ya bochan ni piin ni ma ayuweg ni nge fol e girdi’ ko fare Motochiyel​—ni aram e piin tapuf oloboch—​e ku kar uned ko re ngongol nem nib kireb. Garog ko fare mach, ni eram e gin ni yima pithig e oloboch riy ni bay rogon ko motochiyel, e piin tapuf oloboch e ur ‘feked e chugum ni be pi’ e girdi’ ni nge dabni gechignagrad ma yad ma dariy fannag e girdi’ nib gafgow.’ Piin tapuf oloboch e dar ayuweged e piin nib gafgow, ya tin kar rin’ed e kar n’iged yad nbochan e chugum ni kan pi’ ngorad. (Amos 5:10, 12) Ere ku arrogon e piin tapuf oloboch ni kar dariy fannaged e Motochiyel rok Got.

8. Mang ngongol ko fapi prist nib kireb e kar feked owcherad riy?

⁸ Ngiyal’ n’em, e mang e n’en ni i rin’ fapi prist nu Israel? Rogon ni ngan nang e fulweg riy, e gad ra chel ngad lemnaged e ngongol rorad u yu yang. Mu guy uw feni gel e denen ni piin ni prist e kar paged ni “ngan rin’ u lan e naun ko pi got rorad”! U daken Amos, me yog Got ni gaar: “Be’ nge chitamangin e taareb e ppin ni sib ni yow ma moleg, ni aram e kar dariyfanniged fithingag nib thothup.” (Amos 2:7, 8) Aygum lemnag! Be’ nib moon nge chitamangin ni yow e girdi’ nu Israel e kar molegew reb e ppin u tempel ni ma chuway’ ngak. Ma piin ni prist nib kireb e kar feked owcherad ko re ngongol ni darngal nem!​—Leviticus 19:29; Deuteronomy 5:18; 23:17.

9, 10. Mang Motochiyel rok Got ni ke th’ab piyu Israel, ma uw rogon ni ngada taareb rogonnaged ko ngiyal’ ney?

⁹ I weliy murung’agen yugu reb e denen nib kireb, me yog Jehovah ni gaar: “Yad ma mol nga daken e yungi mad ni kar laged ni mich ko malfith ni kan tay ngorad u tooben e pi altar; ma wain rok e piin kan bakkingnagrad e yad be unum ko naun ko pi got rorad.” (Amos 2:8, NW) Arrogon, fapi prist nge yugu girdi’ e ku kar dariyfannaged fare motochiyel ni bay ko Exodus 22:26, 27, ni be yog ni ba mad ni kan lag ni mich ko malfith e susun ni ngan sulweg u m’on ni dawori nep’. Tin kar rin’ed, e kar fanayed e re n’ey ngar ted nga daken e chiya rorad u nap’an ni yad be mur ma yad be unum ni fan ko pi got ni googsur. Ma salpiy ni kar feked ko girdi’ nib gafgow, e kar chuw’iyed e wain riy ngar unumed u nap’an e madenom ko teliw rorad ni googsur. Uw feni palog ni kar sorgad nga bang kar digeyed fare kanawo’ ko liyor nib machalbog!

¹⁰ Piyu Israel e dara tamra’gad ni kar th’abed fa gal motochiyel nth’abi ga’ ni bang ko fare Motochiyel​—ni aram e ngaura t’ufeged Jehovah ma ura t’ufeged e girdi’. Ere ke l’og Got Amos ni ngari fonownagrad nib gel nbochan ni kar daged ni da kura yul’yul’gad. Ngiyal’ ney, ma pi nam nu fayleng, nib muun ngay e Kristiano ni googsur, e be m’ug ni bay e magawon rorad ni bod rogon e magawon rok piyu Israel kakrom nib kireb. Yugu aram rogon ni boch e girdi’ e kar mon’oggad, ma boor e girdi’ e kar gafgowgad ya dariy e salpiy rorad ma ke kireban’rad nib gel nbochan e ngongol ni rib kireb ni de yul’yul’ ni ma rin’ e pi ga’ ko tafol chuway’, politics, nge teliw ni googsur. Machane ma runguy Jehovah e piin nib gafgow ma ke pigan’rad ni ngar gayed Got. Ere, ke pi’ e maruwel ngak e pi tapigpig rok e ngiyal’ ney ni ngar rin’ed e maruwel ni bod e n’en ni rin’ Amos​—ni aram e ngan machibnag e thin Rok ni dabni rus.

11. Mang e gad ra fil ko tin ni rin’ Amos?

¹¹ Bochan ni ba chugur rogon e maruwel rodad ko tin ni rin’ Amos, ma ra fel’ rogodad riy ni ngada weliyed e tin ni ke rin’. Tin riyul’ riy, e be dag Amos ngodad (1) e n’en ni thingarda machibnaged, (2) nge uw rogon ni ngada machibgad, (3) nge mang fan ni piin tatogopuluw e dabiyog ni ngar taleged e maruwel rodad ni ngan wereg e machib. Ngada weliyed e pi’ n’en ney ni reb nge reb.

Uw Rogon ni Ngada Folwokgad rok Amos

12, 13. Uw rogon ni dag Jehovah ni ke damumuw ngak piyu Israel, ma mang e kara rin’ed?

¹² Gadad e Pi Mich Rok Jehovah, e kad tayedan’dad ko maruwel ko Kristiano ni ngan machibnag Gil’ilungun nge ngan pingeg e girdi’ ngar manged pi gachalpen Jesus. (Matthew 28:19, 20; Mark 13:10) Yugu aram rogon, maku ngada machibnaged e thin rok Got ni be ginangey, ni bod ni ke machibnag Amos ni bayi pufthinnag Jehovah e piin nib kireb. Ni bod ni, Amos 4:6-11 e be dag ni Jehovah e ke sul u daken biyay nge biyay ni ke dabuy daken piyu Israel. Me gagiyegnag ni nge “dabi gaman e flowa,” ni fan ko girdi’ miki tay “ndaki aw e n’uw [ngorad],” me gechignagrad u daken “gelngin e yal’ nib gel nge misilpig,” me pi’ e “m’ar nib papey ni ma af ko girdi’.” Gur pi n’en ney e ke k’aring piyu Israel ngar kalgadngan’rad? I yog Got ni gaar, “Dam sulod ngog”. Tin riyul’ riy, e ke n’ag piyu Israel Jehovah biyay nge biyay.

¹³ I gechignag Jehovah piyu Israel ni dar kalgadngan’rad. Machane, som’mon, kan ginangrad u daken reb e yiiy. Ba puluw ko re n’ey, i yog Got ni gaar: “Jehovah ni ir e Somol ni Th’abi Tolang e dabi rin’ ban’en nfaanra dawori yog e n’en nib mith rok ngak e pi profet ni tapigpig rok.” (Amos 3:7, NW) I yog Got ngak Noah ni be yib e tayim ni ngan tharey e fayleng ko ran me yog ngak ni nge ginang e girdi’. Maku, ke yog Jehovah ngak Amos ni nge pi’ e bin tomur e thin nge ginang e girdi’. Bay e kireban’ riy, ya i dariy fannag piyu Israel e re thin nem ni yib rok Got ma dar rin’ed e tin nib t’uf ni ngar rin’ed.

14. Mang e n’en nib chuchugur rogon u thilin e ngiyal’ ni immoy Amos nge re tayim rodad ney?

¹⁴ Dariy e maruwar riy ni bay ban’en nib taareb rogon u thilin e tayim rok Amos nge tiney e rran. I yiiy Jesus Kristus ni boor e gafgow nib gel e ra buch u nap’an ni ra yib e tomur. Maku ke yog ni bayni wereg e machib u fayleng ni ga’ngin. (Matthew 24:3-14) Machane, bod u nap’an Amos, girdi’ e ngiyal’ ney e baga’ ni ma dariy fannag fare pow nge fare thin ko Gil’ilungun. Tin ra buch rok e pi cha’nem e ba taareb rogon wenegan ko n’en ni i buch rok piyu Israel ni dar kalgad ngan’rad. Me ginangrad Jehovah ni gaar: “Mu fal’eged rogomed ngam sabaliyed e Got romed.” (Amos 4:12, NW) Kar sabaliyed Got ya kari pufthinnagrad Got u nap’an ni pi salthaw nu Assyria e ra gelgad ngorad. Ngiyal’ ney, ma re fayleng nib kireb ney e ra ‘sabaliy Got’ u nap’an Armageddon. (Revelation 16:14, 16) Machane, nap’an ni ka be ulul Jehovah ko gum’an’ rok, ma nguuda fonownaged boor e girdi’ ni be yan u rogon ni rayog rodad: “Ngam fal’eged i gay Jehovah, mu um pired ni gimed ba fas.”​—Amos 5:6, NW.

Yibe Mada’nag e Togopuluw ni Bod e N’en ni Rin’ Amos

15-17. (a) Mini’ Amaziah, ma mang e ke rin’ nbochan e thin ni ke machibnag Amos? (b) Mang e thin ni ke yog Amaziah nib togopuluw ngak Amos?

¹⁵ Gathi kemus ni n’en ni gad ma machibnag e rayog ni nguuda folwokgad rok Amos riy ya kub muun ngay ko uw rogon ni ngada wereged e machib. Kan tamilangnag e re n’em ko guruy ni 7, ni ke weliy ngodad murung’agen e prist ni kan weliy ko tabolngin ko re article ney. Cha’ nem e “Amaziah ni fare prist nu Bethel.” (Amos 7:10) Fare mach nu Bethel e eram e gin ri ma rin’ piyu Israel boch ban’en riy ni fan ko teliw rorad ni apostate, nib muun ngay e ta’ fan ko fak e garbaw. Ere Amaziah e ba priest ko fare teliw ko fare Nam. Mang e ke rin’ u nap’an ni ke rung’ag e thin ni yog Amos ni be machib ni der rus?

¹⁶ I yog Amaziah ngak Amos ni gaar: “O gur be’ ni kemus ni ma susunnag ban’en, mmil, i yan ko binaw nu Judah, nguum koy e flowa u rom, muum yiiy u rom. Machane thingar dabkum yiiy u Bethel, ya bochan ni ir fare tagil’ e liyor ko en pilung ma ir e naun u reb e am.” (Amos 7:12, 13, NW) Tin riyul’ riy, e yog Amaziah ni gaar: ‘Mman ngam sul nga tabinaw rom! Bay e teliw romad.’ Miki guy rogon ni nge k’aring e am ni nge taleg e maruwel rok Amos, me yog ngak Jeroboam II ni pilung ni gaar: “Faanem i Amos e be makathnigem ngak e girdi’ nu Israel.” (Amos 7:10) Arrogon, ke yog Amaziah ni Amos e ba sasalap! Me yog ngak fare pilung ni gaar: “Ireray e n’en ni yog Amos ni gaar, ‘Bayi nli’ Jeroboam ko sayden; ma girdi’ nu Israel, e ba mudugil ni bay chuwegrad ko binaw rorad ngan fekrad nga bang.’ ”​—Amos 7:11, NW.

¹⁷ U fithik’ e pi thin nem, i yog Amaziah dalip ban’en ni ra soreg be’ nga bang. I yog ni gaar: “Ireray e n’en ni yog Amos.” Machane, dawori yog Amos ni ir e yib e yiiy rok. Gubin ngiyal’ ni ma yog ni gaar: “Ireray e n’en ni ke yog Jehovah ni gaar.” (Amos 1:3, NW) Maku ke yog ni Amos e ke yog e thin ni gaar: “Bayi yim’ Jeroboam ko sayden.” Machane, i yiiy Amos ko Amos 7:9 (NW) ni gaar: “I gag [Jehovah] e nggu sak’iy nib togopuluw ngak fare naun rok Jeroboam ni gu be fek e sayden.” I yiiynag Got reb e gafgow ni aram rogon ni bayi yib ko “naun” rok Jeroboam, ni aram e piin ni owchen. Maku, ke yog Amaziah ni i yiiy Amos ni gaar: ‘Mmutrug ni bayni pi’ piyu Israel nga bang ni kalbus.’ Machane ki yiiy Amos ni be’ nu Israel ni ra sul ngak Got e yira taw’athnag. Ba tamilang, ni i fanay Amaziah e thin ni boch e de riyul’ ni be athamgil ni ngan ta’ e motochiyel ni nge taleg e maruwel rok Amos.

18. Mang e tin nib chuchugur rogon ko pi n’en ni ke rin’ Amaziah nge pi n’en ni ma fanay e pi tayugang ko teliw e ngiyal’ ney?

¹⁸ Kam guy ban’en nib taareb rogon u thilin e kanawo’ ni i fanay Amaziah nge tin ni ma fanay e piin ni ma togopuluw ko girdi’ rok Jehovah e ngiyal’ n’ey? Ni bod ni kan guy rogon ni ngan th’ab gulungan Amos, e re boch e prist, nge bishop, nge fapi patriarchs ko ngiyal’ ney ni ngar taleged e maruwel ko pi tapigpig rok Jehovah ni ngan wereg e machib. I yog Amaziah ni ke sasaliyebnagey Amos ma gathi riyul’ e re n’em. Ngiyal’ ney, e boch e girdi’ nib tolang e liw rorad e ku ka rogned ni Pi Mich Rok Jehovah e yad e girdi’ ni ma magawonnag e nam. Ni bod Amaziah ni ke ning e ayuw ngak fare pilung ni nge ayuweg ngar togopuluwgow ngak Amos, ere pi tayugang ko teliw e baga’ ni yad ma ning e ayuw ngak girdien e am ni fan ni ngar togopuluwgad ko Pi Mich Rok Jehovah.

Girdi’ ni Tatogopuluw e Dabiyog ni Ngar Taleged e Maruwel ni Ngan Wereg e Machib

19, 20. Mang e ke rin’ Amos ko togopuluw ni ke ta’ Amaziah?

¹⁹ Mang e ke rin’ Amos ko togopuluw ni ta’ Amaziah? Som’mon, i fith Amos fare prist ni gaar: “Ga be yog ni: ‘Thingar dabgu yiiy nib togopuluw ngak piyu Israel’?” De tuntun fare profet rok Got nder rus ni nge yog e thin ni mmutrug ni dabun Amaziah ni nge rungaag. (Amos 7:16, 17) Der rus Amos. Ban’en ni rib fel’ ni ngada folgad riy! Gad ra weliy e thin rok Got, ma dabda togopuluwgad ngak, e Got rodad, ni mus u lan e binaw ni girdi’ riy e ma ngongol ni bod Amaziah ni yad be k’aring boch e girdi’ ngar togopuluwgad nib gel. Ngad boded Amos, nguuda ululgad ni nga dogned e thin ni gaar: “Ireray e n’en ni yog Jehovah.” Ma piin tatogopuluw e dabiyog ni ngar taleged e maruwel rodad ni ngan wereg e machib, ya “pa’ Jehovah” e bay rodad.​—Acts 11:19-21.

²⁰ Susun e nge nang Amaziah ni thin ni yog e ra aw nib m’ay fan. I weliy Amos ko mang fan ni dariy be’ u fayleng nrayog ni nge th’ab gulungan​—ma eram e bin dalip ban’en ni gad ra weliy. Rogon ni yog ko Amos 3:3-8, (NW) i fanay Amos boch e deer nge fanathin ni nge dag ni urngin ban’en ni ma buch e bay tapgin. Ngemu’ i puluwnag e thin ni baaray ni gaar: “Ra bay ba layon ni be tolul! Mini’ e dabi rus? Jehovah ni Somol rodad ni Th’abi Tolang e ir e ke yog! Mini’ e dabi yiiy?” Fan e pi thin nem, e yog Amos ngak e girdi’ ni be motoyil ngak ni gaar: ‘Ni bod ni dabiyog ni ngam siyeg ni ngam rus u nap’an ni kam rung’ag ba layon ni be tolul, ere ku dabiyog ni nggu tal i machibnag e thin rok Got, ya bochan ni kug rung’ag ni ke motochiyelnag Jehovah ni ngan rin’ ni aram rogon.’ Madgun Got, ara tayfan nib gel ni fan ku Jehovah, e ke k’aring Amos ni nge non ni dabi rus.

21. Mang e gad ra rin’ ko thin ni ke motochiyelnag Got ni ngada machibnaged fare thin nib fel’?

²¹ Maku arrogodad ni kad rung’aged ni ke motochiyelnag Jehovah ni ngan machib. Mang e gad ra rin’? Ni bod Amos nge pi gachalpen Jesus kakrom, u daken e ayuw rok Jehovah e gad ra weliy e thin Rok ni dabda rusgad. (Acts 4:23-31) Togopuluw ni keb ni bochan ni piin tatogopuluw e ke k’aringey nge girdi’ ni ma dariyfan nagdad u nap’an ni gad be machibnagrad e dabi th’ab gulungdad. Ngan dag e pasig ni bod Amos, e ke k’aring e Pi Mich Rok Jehovah u fayleng ni ga’ngin ni ngar ululgad i wereg e thin nib fel’ ni dar rusgad. Ke milfan ngodad ni ngad ginanged e girdi’ ko pufthin rok Jehovah ni be yib. Re pufthin nem e ba muun ngay e mang? Re deer nem e yira pi’ e fulweg riy ko bin migid e article.

Uw Rogon ni Ngam Pi’ e Fulweg?

• Uw rarogon e girdi’ u nap’an ni be lebuguy Amos e maruwel ni ke pi’ Got ngak?

• Mang e thingarda machibnaged, ni bod Amos?

• U fithik’ mang lem e thingarda rin’ed e maruwel rodad riy ni ngan wereg e machib?

• Mang fan ni piin tatogopuluw e dabiyog ni ngar taleged e maruwel rodad ni ngan wereg e machib?

[Picture on page 6]

I mel’eg Got Amos, ni be’ ni ma ayuweg e fig, ni fan ni nge rin’ e maruwel Rok

[Pictures on page 9]

Bod Amos, ni ga be machibnag e thin rok Jehovah ni dab mu rus fa?