Mu Filed Ban’en Rok e Pi Profet​—Amos

1. Mang fan ni n’en ni ke rin’ Amos e rayog ni nge pi’ e athamgil nga lanin’dad?

¹ Bay ba ngiyal’ ni ka am lemnag nde bung rogom ni ngam machibnag be’ ni bochan nde tolang e skul rom? Faanra aram rogon, ma n’en ni ke rin’ Amos e rayog ni nge pi’ e athamgil nga lanin’um. Ir be’ nib ta chugol saf, ma bay yu ngiyal’ ni ma un i fal’eg e milay’, machane Jehovah e ke pag Amos ni nge machibnag e thin nib ga’ fan. (Amos 1:1; 7:14, 15) Ngiyal’ ney e ku ma fanay Jehovah e piin nde tolang e skul rorad mab sobut’ lanin’rad ni ngar rin’ed e re maruwel ney. (1 Kor. 1:27-29) Mang boch ban’en ni ku bay rogon ko machib ni gad ma tay nrayog ni ngad filed rok Amos ni profet?

2. Nap’an ni gad be machib, ma mang fan ndab da rusgad u nap’an nra yib e togopuluw ngodad?

² Mu Par ni Gab Mudugil u Nap’an ni Yibe Gafgownigem: Amaziah e ir reb e prist ko fa ragag i ganong ko lel’uch u Israel ni ma meybil ko liyos ni bod yaan e garbaw. Nap’an ni rung’ag e machib rok Amos me non u fithik’ e damumuw ni gaar: ‘Mman ngam sul nga tabinaw rom! Ya bay e teliw romad!’ (Amos 7:12, 13) Me thilyeg Amaziah fan fare yiiy ni weliy Amos ngak Jeroboam ni Pilung, ya nge yag ni ngan taleg fare maruwel ni be rin’ Amos. (Amos 7:7-11) Machane de rus Amos. Ngiyal’ ney, e ku bay boch e tayugang’ ko teliw ni yad ma ning e ayuw ngak girdien e am, ya nge yag ni ngar gafgownaged e girdi’ rok Jehovah. Machane, ke micheg Jehovah ngodad ndariy ba talin e cham nrayog ni nge talegdad.​—Isa. 54:17.

3. Mang l’agruw ban’en ni gad ma machibnag e ngiyal’ ney?

³ Ngan Weliy Murung’agen e Pufthin Rok Got nge Pi Flaab ni Bay Yib: Yugu aram rogon ni ke yiiynag Amos e n’en ni yira rin’ ngak fa ragag i ganong nu Israel, ma bin tomur e babyor ni yoloy e bay rogon ko tin ni ke micheg Jehovah ni aram e ra sulweg e girdi’ rok nga rogon me flaabnagrad. (Amos 9:13-15) Ku arrogodad ni gad ma weliy murung’agen e “chirofen ni bay ni pufthinnag e girdi’,” machane re thin ney e kemus ni bang ko fare ‘thin nib fel’’ ni thingar da machibnaged ngak e girdi’. (2 Pet. 3:7; Matt. 24:14) Nap’an nra thang Jehovah owchen e piin kireb u nap’an e Armageddon ma ra mab e kanawo’ ni nge paradis e fayleng.​—Ps. 37:34.

4. Mang e be micheg nrayog ni ngad lebguyed e tin nib m’agan’ Jehovah ngay?

⁴ Machib ni yibe tay ni yibe weliy murung’agen Gil’ilungun Got u lan e re fayleng ney ni ke sug ko girdi’ ni yad ma togopuluw e ra skengnag e yul’yul’ rodad ngak Jehovah nge rogon ni kad dugliyed ni ngad rin’ed e tin nib m’agan’ ngay. (John 15:19) Machane, ke mudugil lanin’dad nra pi’ Jehovah e tin nib t’uf rodad nge yag ni ngad lebguyed e tin nib m’agan’ ngay ni bod rogon ni rin’ ngak Amos.​—2 Kor. 3:5.