Ngan Yan U Kanawoen E Lem Ni Rib Yul’yul’

“Me gag, e bay u gu wan u fithik’ e lem rog ni rib yul’yul’.”​—PSALM 26:11, NW.

1, 2. (a) Mang fan ni lem rok e girdi’ nrib yul’yul’ e bang nib ga’fan ko fare deer ara magawon ni ke sum u murung’agen e gagiyeg rok Got ni th’abi tolang? (b) Uw rogon ma tin kan sunmiy nib llowan’ e be dag ni yad be ta’ tanggin e gagiyeg rok Jehovah ni th’abi tolang?

NAP’AN ni togopuluw Satan u lan fare milay’ nu Eden, me sunmiy fare magawon u palpalthib nib t’uf ni ngan pithig ko riyul’ ni bay mat’awon Got ni nge gagiyegnag e tin Ke sunmiy fa danga’. Tomur riy, me yog ni girdi’ e ma pigpig ku Got ni kemus ni faanra bay ban’en ni nge yog ngorad riy. (Job 1:9-11; 2:4) Ere, lem rok e girdi’ ni rib yul’yul’ e ke mang bang nib ga’fan ko fare deer ni ke sum ko bay mat’awon Jehovah ni nge gagiyeg fa danga’.

² Yugu aram rogon ni liw rok Got ni th’abi tolang e ra par ni yugu de mutrug ko tin ke sunmiy e ra par e lem rorad ni rib yul’yul’ fa dangay, girdi’ nge pi engel ni pi fak Got e rayog ni ngara daged ko mang e kar dugliyed ni ngar pared riy ko re magawon ney. Uw rogon? Ngara mel’eged ko nga ranod u kanawoen e lem ni rib yul’yul’ fa danga’. Ere, ran pufthinnagey ni ri ra yan u rogon feni rib yul’yul’ e lem ku be’ nge be’.

3. (a) Mang e baadag Job nge David ni nge yaliy Jehovah ma nge pufthinnag? (b) Mang e pi deer ni sum u murung’agen e lem ni rib yul’yul’?

³ I yog Job u fithik’ e pagan’ ni gaar: “[Jehovah] e nge thabthabelnigeg me Got e ra nang e lem rog ni rib yul’yul’.” (Job 31:6, NW) Lem ni rib yul’yul’ e ir e ke ning David ni pilung nu Israel kakrom ni nge yaliy Jehovah rok u nap’an ni meybil ni gaar: “O Jehovah, mu pufthinnageg, ya gag rog e gu be yan ni lem rog e rib yul’yul’, ma ke pagan’ug ngak Jehovah, ni nge ayuwegeg ni dab gu yoyowol.” (Psalm 26:1, NW) Uw feni rib ga’ fan ni ngauda lem gad ni rib yul’yul’! Machane be mang e lem nrib yul’yul’, ma mang e be yip’ fan ni nguun yan u kanawoen? Mang e ra ayuwegdad ni nguuda pared ni gad be yan u kanawoen e lem ni rib yul’yul’?

‘Kuugu Wan u Fithik’ e Lem Rog ni Rib Yul’yul’’

4. Be mang e lem ni rib yul’yul’?

⁴ Lem nrib yul’yul’ e be yip’ fan e rib yal’uw, ma dariy thibngin, mab mat’aw, ma dariy kirebun. Machane, lem nrib yul’yul’ e gathi kemus ni ngan rin’ e tin nib mat’aw. Aram e ngongol nib fel’ ara pigpig ku Got u polo’ i gum’irchaey. I tay Satan ni immoy ban’en nib kireb ni ke k’aring Job u nap’an ni yog ngak Got ni gaar: “Ra nge thil, ma wenig ngom, ngam k’iyag paam, ngam magawonnag nge mada’ ko yil rok [Job] nge ufin mag guy ni ra yog nga owchem e thin nib togopuluw ngom.” (Job 2:5, NW) Gathi kemus ni ngongol nib puluw e ba t’uf riy, ya lem nrib yul’yul’ e kub t’uf ko n’en nib puluw ni ra k’aring e gum’ircha’.

5. Mang e be dag ni de t’uf ni ngada flontgad ni som’mon ni fan ni nge par ni bay e lem rodad nrib yul’yul’?

⁵ Machane, de t’uf ni nge flont be’ ma rayog ni nge par e lem rok nrib yul’yul’. De flont David ni Pilung ma boor yay ni ke denen nib ubchiya u nap’an e yafas rok. Machane, be weliy e Bible murung’agen ni reb e pumoon ni ki yan “ni bay e lem nib yul’yul’ u gum’irchaen.” (1 Kings 9:4) Mang fan? Ya bochan ni ba t’uf Jehovah rok David. Ke pi’ gum’irchaen ni polo’ ngak Got. Ke m’agan’ ngay ni nge yog e denen rok, me fol ko fonow, ma ke yal’uweg kanawoen. Tin riyul’ riy, e kan guy e lem rok David nrib yul’yul’ ko pigpig nge t’ufeg rok ni polo’ i gum’irchaen ngak e Got rok, ni Jehovah.​—Deuteronomy 6:5, 6.

6, 7. Ngan yan u kanawoen e lem nrib yul’yul’ ma ba muun ngay e mang?

⁶ Lem nib yul’yul’ e gathi kemus ni yima fanay nga taa ban’en ni ma rin’ e girdi’, ni bod e pigpig ko teliw ni fan ku Got. Ya ba muun ngay woen e yafas rodad ni polo’. I “yan” David nib yul’yul’. “Fare bugithin ni ‘yan’ e be yip’ fan ‘yan ko yafas’ ara ‘rogon kanawoen e yafas,’ ” rogon ni yog e The New Interpreter’s Bible. Be weliy murung’agen e piin ni dariy “thibngirad u kanawo’rad,” me yon’ fare psalmist e tang ni gaar: “Nge felan’ e piin ni ma fol ko thin rok [Got] ni be puguran; ya yad ma fal’eg i gay Got u polo’ i gum’ircharad. Tin riyul’ riy e dar ma rin’ed e tin de mat’aw. Kar ranod u kanawoen.” (Psalm 119:1-3, NW) Lem nib yul’yul’ e ba t’uf ni nguun gay rogon ni ngan rin’ e tin nib m’agan’ Got ngay min lek kanawoen.

⁷ Ngan yan u fithik’ e lem ni rib yul’yul’ e ba t’uf ni nguun yul’yul’ ku Got, ni yugu aram rogon ni bay e magawon. Gad ra k’adan’dad u fithik’ e pi skeng, ma gad par nib mudugil nyugu demtrug ni kad magawongad, ara ngad togopuluwgad ko tin nu fayleng nib kireb ni be wawliydad, me gagiyel e yul’yul’ rodad. Gad be ‘felfelan’nag gum’irchaen Jehovah’ ya rayog ni nge pi’ e fulweg ngak e en ni be moningnag. (Proverbs 27:11) Ere bay tapgin nib fel’, ni rayog ni ngada dugliyed ni bod rogon e n’en ni yog Job ni gaar: “Nge mada’ ko ngiyal’ ni ku gum’ ma dabgu chuweg e lem rog nrib yul’yul’!” (Job 27:5, NW) Fare Psalm ni 26 e be dag ko mang e n’en ni ra ayuwegdad ma rayog ni nguu darod u kanawoen e lem rodad ni rib yul’yul’.

“Mu Biechnag e Buoy Rog nge Gum’irchaeg”

8. Mang e gad ra fil ko n’en ni rin’ David ni ke wenignag ngak Jehovah ni nge yaliy e buoy rok nge gum’irchaen?

⁸ I meybil David ni gaar: “O Jehovah mu yaliyeg, ma ngam skenageg; mmachalbognag e buoy rog nge gum’irchaeg.” (Psalm 26:2, NW) Fapi buoy e bay u fithik’ i dowey. Fapi buoy e be yip’ fan e lem rok be’ nib toar nge emotion. Ma fare gum’ircha’ e rarogon be’ nga fithik’​—ni aram e pug laniyan’, nge lem rok, nge gelngin i nang fan ban’en. Nap’an ni ke ning David ngak Jehovah ni nge fal’eg i yaliy, e aram ke yibilay ni nge fal’eg i yaliy e lem rok nib toar.

9. Mang e kanawo’ e ma biechnag Jehovah e buoy rodad nge gum’irchdad riy?

⁹ I wenig David ni ngan machalbognag e buoy rok nge gum’irchaen. Uw rogon ni nge biechnag Jehovah lanin’dad? I tang David ni gaar: “Nggu pining e sorok ngak Jehovah, ni be fonownigeg. Riyul’, ni nnep’ ma pi buoy rog e be fonownigeg.” (Psalm 16:7, NW) Mang fan e re n’em? Be yip’ fan ni fonow rok Got e ke taw ko gin ni rib toar ko lem rok David me par u rom, ni be yal’uweg e lem rok nge emotion. Ere ku rayog ni nge par rodad nfaanra ngada fal’eged i lemnag e fonow ni keb ngodad u daken e Thin rok Got, nge ulung rok ma gad pag nge par u fithik’dad. Ngan meybil ngak Jehovah u gubin ngiyal’ ni nge biechnagdad u kanawo’ ni aram rogon e ra ayuwegdad ni nga darod u fithik’ e lem ni rib yul’yul’.

‘T’ufeg Rom nib Yul’yul e Bay u P’eowcheg’

10. Mang e ke ayuweg David ni nge yan u fithik’ e tin riyul’ rok Got?

¹⁰ “T’ufeg rom nib yul’yul’ e bay u p’eowcheg,” me ulul David ngay ni gaar, “mu u gu wan u fithik’ e tin riyul’ rom.” (Psalm 26:3, NW) Ri manang David e t’ufeg nib yul’yul’ rok Got, ma kari fal’eg i lemnag e pi’ nem. “Lanin’ug, mu pining e sorok ngak Jehovah,” i yon’ ni tang, “ma dabmu pagtalin urngin ban’en ni ke rin’.” Be lemnag reb u fithik e “pi n’en ni rin’ Got” me ulul David ngay ni gaar: “Ra pufthinnag Somol e girdi’ ma ma fol ngak e piin ni yibe gafgownagrad nge pi’ ngorad mat’awrad. Ke weliy ngak Moses e tin ke finey ni nge rin’, me gagiyegnag e girdi’ nu Israel ngar guyed e maangang ni ngongliy.” (Psalm 103:2, 6, 7) Sana be lemnag David piyu Israel u rogon ni ke sasaliyebnagrad piyu Egypt u nap’an Moses. Faanra aram rogon, ma bochan ni ke fal’eg David i lemnag rogon ni ke weliy Jehovah kanawoen ni ke ayuweg e girdi’ e baga’ ni ke bit nga gum’irchaen me gelnag e tin ke dugliy u laniyan’ ni nge yan u fithik’ e tin riyul’ rok Got.

11. Mang e ra ayuwegdad ni nguu darod u kanawoen e lem ni rib yul’yul’?

¹¹ Gad ra fil e Thin rok Got ni gubin ngiyal’ ma uda fal’eged i lemnag e n’en ni kad filed e ku ra ayuwegdad ni nga darod u kanawoen e lem nrib yul’yul. Reb riy, e gad ra lemnag ni ke mil Josef rok leengin Potiphar ni ke wawliy ni ngar parew e ba mudugil ni ra pi’ e athamgil nga lanin’dad ni ngada milgad nfaanra yib e magawon ngodad ni aram rogon u tabon e maruwel rodad, ara skul, ara demtrug bang. (Genesis 39:7-12) Ma uw rogon nfaanra yibe wawliy lanin’dad ni rayog ni ngari yoor e chugum rodad ara rayog ni nge gilbuguwdad u fayleng. Ba’ fare n’en ni rin’ Moses, ni n’ag e flaab nu Egypt. (Hebrews 11:24-26) Nguuda lemnaged e k’adan’ ni ta’ Job e ba mutrug ni ra ayuwegdad ni nge gelnag e tin kada dugliyed u lanin’dad ni nguuda pared riy nib yul’yul’ ku Jehovah nyugu ra bay e m’ar nge gafgow. (James 5:11) Ma uw rogon ni faanra ke yib e togopuluw nge gafgow ngodad? Gadra fal’eg i lemnag e n’en ni buch rok Daniel u lan tafen e layon ma ra pi’ e athamgil nga lanin’dad!​—Daniel 6:16-22.

“Dagu Par u Fithik’ e Girdi’ ni Ma Lifith L’igin’”

12, 13. Mit ni ngan e chag e ngad paloggad riy?

¹² Be weliy murung’agen yugu reb e ban’en ni ke gelnag e lem rok ni rib yul’yul’, e yog David ni gaar: “Dagu par u fithik’ e piin yad ma lifith l’igin’rad; nge piin ni ma mithag ko yad ba diin ma dagur yan nga fithik’rad. Kug fanenikay e ulung ko girdi’ nib kireb e ngongol rorad, ma dagur chag ngak e girdi’ nib kireb.” (Psalm 26:4, 5, NW) De par David u fithik’ e girdi’ nib kireb. Kari fanenikay ni nge chag ngak e girdi’ nib kireb.

¹³ Ma uw rogon gadad? Darud chaggad ngak e girdi’ ni ma lifith l’igin’ u daken e tin ni yima dag ko television, nge videos, nge kachido, nge Internet sites, ara boch ban’en? Gad ma palog rok e piin ni ma mithag ko yad ba diin? Boch e girdi’ u skul ara tabon e maruwel ni be dake baadag ni ngar manged fager rodad ni be nameg ni ngar bannaged gadad. Gur riyul’ ni gad baadag ni nge mang fager rodad e piin ni dar ma yul’yul’ ku Got? Yugu aram rogon ni yad be yog ni yad ba yul’yul’, maku piin ni apostates e sana yad ra mithag e n’en ni yad be nameg ni ngar taleged gadad riy ko pigpig ku Jehovah. Ma uw rogon ni faanra bay boch e girdi’ u lan e ulung ko Kristiano ni l’agruw mit e par ni ma par riy? Maku yad be mithag ko yad ba diin. Jayson, ni chiney e ke mang reb e ministerial servant, ma immoy e fager rok ni aram rogon u nap’an ni kab pagel. Weliy murung’agrad, ni gaar: “Reb e rran me yog bagayad ngog ni gaar: ‘Dariy fan e n’en gad ra rin’ e chiney ya nap’an nra yib fare m’ag nib biech ma gadra yim’. Dabda nanged e tin ni de yog rodad ni ngad uned ngay.’ Re thin nem ni ke yog e bod ni ke pugeg. Dabug ni nggum’ u nap’an ni ra yib fare m’ag nib biech.” U fithik’ e gonop me tal Jayson i chag ngak e pi cha’nem. “Dab mpaged gimed nga ni bannagmed, i ginangey Paul ni apostal. “Nchag ngak e girdi’ nib kireb me kireb pangiy nib fel’.” (1 Korinth 15:33) Rib ga’ fan ni dabda chaggad ngak e girdi’ nib kireb!

‘Nggu Weliy ngak e Girdi’ Urngin e Maruwel Rom ni Yira Ngat Ngay’

14, 15. Uw rogon ma rayog ni “nguu darod ni gad be liyeg e altar rok [Jehovah]”?

¹⁴ Me ulul David ngay ni gaar: “Nggu luknag paag ni gu be par ni dagur bucheg ban’en, ma nggu wan ngu ug liyeg e altar rom, O Jehovah.” Mang fan? “Fan ni ngan rung’ag nib tamilang lamag ni gu be pining e magar ngom, ma nggu weliy ngak e girdi’ urngin e maruwel rom ni yira ngat ngay.” (Psalm 26:6, 7, NW) Baadag David ni nge par nib klin ko ngongol rok ni fan ni nge yog ni nge liyor ngak Jehovah ma nge weliy ngak e girdi’ e pigpig rok ku Got.

¹⁵ Urngin ban’en nib peth ko liyor nib riyul’ ko fare tabernacle me taaboch riy ma tempel e “yaan e pi n’en ni bay u tharmiy.” (Hebrews 8:5; 9:23) Fare altar e be dag yaan e tin nib m’agan’ Jehovah ngay rogon ni nge fel’ u wan’uy fare maligach rok Jesus Kristus ni fan ni biyuliy e girdi’. (Hebrews 10:5-10) Gad be luknag pa’dad ni darud bucheged ban’en ma “gad yan ngad liyeged e altar rok [Jehovah]’ ni gad be maruweliy e michan’ rodad ko re maligach nem.​—John 3:16-18.

16. Uw rogon ni nge fel’ rogodad riy u nap’an ni gad ra weliy ngak e girdi’ murung’agen e maruwel rok Got ni yira ngat ngay?

¹⁶ Gad ra fal’eg i lemnag murung’agen urngin ban’en ni ke rin’ fare maligach, ma gathi ke sug gum’irchadad ko felfelan’ ni gad be pining e magar ku Jehovah nge fak ni kari maagirag rok? Ere, gad be pining e magar u lan gum’irchadad e ngada weliyed ngak yugu boch e girdi’ e maruwel rok Got ni yira ngat ngay​—ni ka nap’an ni ke sunmiy e girdi’ u lan fare milay’ nu Eden nge mada’ ko ngiyal’ ni kan sulweg urngin ban’en nga rogon ko fa bin nib biech e fayleng rok Got. (Genesis 2:7; Acts 3:21) Mab mudugil ni fare maruwel ni ngan wereg e thin ko Gil’ilungun min pingeg e girdi’ ngar manged pi gachalpen e ra ayuwegdad ko tirok Got! (Matthew 24:14; 28:19, 20) Gad ra tiyan’dad ko re maruwel ney ma ra ayuwegdad ni nge par nib tamilang e athap rodad boch nga ram, ma ra par nib gel e michan’ rodad ko tin ni ke micheg Got ngodad, ma t’ufeg rodad ni fan ku Jehovah nge ngak e girdi’ e ra par nib fas.

“Bat’uf Rog e Naun Rom ko Gini Yima Par Riy”

17, 18. Susun uw rogon u wan’dad e muulung ko Kristiano?

¹⁷ Fare tabernacle, nge altar riy ni yima tay e maligach nga daken, e ir e gin ni yima liyor ngak Jehovah riy u Israel. I weliy murung’agen e felfelan’ rok ko re gin’en nem, ni meybil David ni gaar: “Jehovah, ba t’uf rog e naun rom ni gin yima par riy nge fare gin’en ni be galgal ramaem riy.”​—Psalm 26:8, NW.

¹⁸ Gur gad baadag ni ngada muulunggad ko gin ni rayog ni ngada filed murung’agen Jehovah riy? Urngin e Kingdom Hall ni yima fil e tirok Got ban’en riy e aram e gin ni fan ko liyor nib riyul’ ni ma yan e girdi’ ngay. Maku, bay e pi convention rodad, nge circuit assembly, nge special assembly day. N’en ni ma “puguran” Jehovah ngodad e yima weliy ko pi muulung ni aram rogon. Faanra “kari t’uf rodad e pi muulung nem,” ma ri gad baadag ni nguuda uned ngay ma ri gad ma tiyan’dad ngay u nap’an ni gad bay u rom. (Psalm 119:167) Ri ma pi’ e athamgil nga lanin’dad ni ngad chaggad ngak e pi walagdad ni yad baadag ni ngar ayuweged gadad ma yad ma ayuwegdad ni nguuda pared u kanawoen e lem ni rib yul’yul’!​—Hebrews 10:24, 25.

‘Dab Mu Thang e Pogofan Rog’

19. Mang denen e dabun David ni ngan pirieg ni be un ngay?

¹⁹ Bochan nri manang David wenegan ni ke digey be’ kanawoen e tin riyul’, me wenignag ni gaar: “Dab mu thang e pogofan rog nib muun ngak e piin tadenen, maku dabmu thang e yafas rog nib muun ngak e piin ni kar denengad ni bochan e racha’, ni pa’rad e ke sug ko ngongol nib puwlag, ma pa’rad ni ba’ ni mat’aw e ma pi’ e salpiy ni fan ko sasalap.” (Psalm 26:9, 10, NW) Dabun David ni ngan matheeg ngak nib muun ko piin ni ma un ko ngongol nib puwlag ara ma pi’ e salpiy ni fan ni ngar siyeged e gechig.

20, 21. Mang e ra pow’iydad ngada awgad nga kanawoen e girdi’ ni de t’uf Got rorad?

²⁰ Ngiyal’ ney e ke yoor i yoor u fayleng e ngongol ni darngal. Television, nge magazines, nge kachido ni be m’oneg e ngongol nib kireb ni aram e​—“ngongol ni darngal; nge ngongol ni golong, nge ngongol puwlag.” (Galatia 5:19, footnote) Boch e girdi’ e kar manged sib ko pornography, ni baga’ ni ma pow’iyey ko ngongol ni darngal. Piin ni fel’ yangaren e mom ni nge gel ngorad e ngongol ni aram rogon. U lan boch e binaw, e madil ni ma tay e ppin nge pumoon e kab yalen, ma ri ma lemnag e piin ni fel’ yangaren ni thingara uned ngay. Boor e pumoon ni bay e fager rorad ni ppin nge ppin ni bay e fager rorad ni pumoon ni yugu aram rogon ni dawori taw nga nap’an nib fel’ ni ngar uned ko mabgol. Rogon ni ngar lebguyed e arar rorad e yad be un ko ngongol ni darngal ni be gel i yan u fithik’rad, ma aram e dabi n’uw nap’an ma ra uned ko darngal nge ni mada’ ko par ko pin nge pumoon.

²¹ Piin ni kar ilalgad e ku rayog ni nge gel ngorad e arar nib kireb. Fol chuway’ ni yima rin’ u fithik’ e sasalap nge lem ni baadag ni nge dugliy ban’en ni bay e lem nib siin u fithik’ e aram e pow ni ke war e lem ni rib yul’yul’. Ngan fol ko ngongolen e fayleng e kemus ni ra fekdad nga orel rok Jehovah. Ngada ‘fanenikayed e tin nib kireb, me t’uf rodad e tin nib fel’’ ma nguu darod u kanawoen e lem ni rib yul’yul’.​—Amos 5:15.

“O Mu Biyuliyeg Ma Ga Runguyeg”

22-24. (a) Mang e tin tomur e thin ko Psalm 26 ni be pi’ e athamgil nga lanin’uy? (b) Mang wup e yira weliy ko bin migid e article?

²² I museg David i weliy laniyan’ ku Got, me yog ni gaar: “Me gag, e nggu wan u fithik’ e lem rog ni rib yul’yul’. O mu biyuliyeg ma ga runguyeg. Mab mudugil ni gu ra sak’iy ko gin nib tagapas; ma u fithik’ e piin ni yad be muulung e nggu pining e sorok riy ngak Jehovah.” (Psalm 26:11, 12, NW) Laniyan’ David ni ke dugliy ni nge par nib yul’yul’ e kub muun ngay ni ke wenig ni ngan biyuliy. Ri be pi’ e athamgil nga lanin’uy! Yugu demtrug ni gadad e tadenen, ma ra ayuwegdad Jehovah ni faanra ke mudugil lanin’dad ni nguu darod u kanawoen e lem nrib yul’yul’.

²³ Yibe athapeg ni kanawoen e yafas rodad e ra dag ni gad be tayfan mab ga’ fan u wan’dad e gagiyeg rok Got ni th’abi tolang u urngin yang ko yafas rodad. Ra bagadad ma rayog ni nge ning ngak Jehovah u fithik’ e meybil ni nge yaliy ma nge biechnag e lem rodad nib toar nge thamtham rodad. Rayog ni ngada ted e tin riyul’ rok nga p’eowchedad ni gubin ngiyal’ ni gad be fil e Thin rok nib gel. Ere, dabda chaggad ngak e girdi’ nib kireb machane ngada pininged e sorok ngak Jehovah u fithik’ e girdi’ ni yad be muulung. Manga yugu da pasig gad i un ko maruwel ni ngan machibnag e thin ko Gil’ilungun ma ngan pingeg e girdi’ ngar manged pi gachalpen, ma dabda paged e fayleng ni nge kirebnag thildad Got nib ga’ fan. Rogon ni gad be rin’ e tin th’abi fel’ rodad e nguu darod u kanawoen e lem ni rib yul’yul’, ma rayog ni ngada pagedan’dad ni ra runguydad Jehovah.

²⁴ Bochan rogon e lem ni rib yul’yul’ e ba l’ag ngay urngin yang ko yafas, ma thingarda kol ayuwgad ko fare wup nrayog ni nge yim’ e girdi’ riy ni aram e​—ngan unum e alkul nib pag rogon. Ireray e n’en ni yira weliy ko bin migid e article.

Ka Ga Manang?

• Mang fan ni tin ni kan sunmiy nib llowan’ e ba mat’aw ni ngan pufthinnagrad u daken e lem rorad nrib yul’yul’?

• Mang e lem ni rib yul’yul’, ma ngan yan riy e ba muun ngay e mang?

• Rogon ni rayog ni nguu darod u kanawoen e lem nrib yul’yul’ ma mang e ra ayuwegdad riy?

• Rogon ni yira par ni bay e lem rodad nrib yul’yul’, ma mang e riya’ ni thingarda kol ayuwgad riy ma mang e ngad siyeged?

[Picture on page 22]

Ga ma ning ngak Jehovah ni gubin ngiyal’ ni nge yaliy e lem rom nib toar?

[Picture on page 22]

Ga be ta’ e t’ufeg nib yul’yul’ ni dag Jehovah u pe’owchem?

[Pictures on page 24]

Gadra par nib yul’yul’ u fithik’ e skeng ma ra felfelan’nag gum’irchaen Jehovah

[Pictures on page 25]

Ga be fanay e tin ni ke pi’ Jehovah ngom ni ra ayuwegem ni ngam man u kanawoen e lem nrib yul’yul’?