Pagan’uy u lan ba Fayleng nde Flont

“DAGUR rin’ e tin nib fel’ ni ir e gub adag ni nggu rin’, machane gu be rin’ e tin nib kireb ni ir e dabug ni nggu rin’.” Aram rogom fa? Ra felan’um ni ngam nang ni ku aram rogon apostal Paul; ma ir be’ nib lingagil ko yul’yul’ ni i tay ni ir e Kristiano. Ere gathi ba math keru’ e re n’ey ko fa binem e thin ni yog? U lan e babyor ni ke yoloy ngak e pi Kristiano u Roma me tamilangnag Pauul fare magawon: “Faanra gu rin’ e n’en ndabug ni nggu rin’, ma aram e gathi ku gag e cha’ ni be rin’ ya denen in be par u fithik’ag e ir e be rin’.” Be mang denen e be weliy morngaagen, ma uw rogon ni ke gel ngay ni aram e ke par nib yul’yul’?​—Roma 7:19, 20.

Tin som’on e thin ni ke yoloy Paul e gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng ni bochan e urngin e girdi’ ni ngongliy e denen.” Facha’ nem ni “taabe’” e aram Adam. (Roma 5:12, 14) Denen ku Adam​—ni aram e denen ko fa bin som’on e pumoon ni Adam​—e ir tapgin thibngin e girdi’ ni bay u fithik’rad ma aram fan nib mo’maw ni ngar pared nib yul’yul’.

Kan nog “bin som’on e denen” ko re n’em faram ma rogon ni weliy Paul u morngaagen e gathi ri ba adag e girdi’ ko ngiyal’ ney ya boor e girdi’ e de mich u wan’rad fare thin ko Bible u morngaagen rogon ni kan sunumiy urngin ban’en ya ke mich u wan’rad e evolution. Be’ ni ke weliy u morngaagen e thin ko Roma 5:12-14 e ke gaar: “Piin ni scholar e kar n’aged e pi thin nem.” Machane raay e duw faram ma piin ni ma weliy u morngaagen e Bible e ur rogned ni “nap’an ni denen Adam . . . me kirebnag e denen urngin pi fak nge wenegan riy.”a

Ngiyal’ Nsom’on Ndan Yul’yul’

Boor e girdi’ ko ngiyal’ ney e de mich Adam u wan’rad ni ir e bin som’on e pumoon, maku arrogon Satan ni Moonyan’ ni yima yog ni bogi yat.b Machane yog Jesus Kristus ni cha’ ney e “dariy ba ngiyal’ ni ke yib nga ba’ rok e tin riyul’,” ya de par nib yul’yul’. (John 8:44) Ma Satan e ir e n’igin Adam nge ppin rok ni Efa ni ngar togopulugow ku Jehovah ma dar parew nib yul’yul’ ngak u fithik’ e skeng.​—Genesis 3:1-19.

Gad gubin e dabad rok Adam, me ere goo ke af e denen rok ngodad. Solomon ni be’ nib gonop e gaar: “Dariy be’ u fayleng nib mat’aw ma yigoo tin nib fel’ ban’en e ma rin’ ma de denen.” (Eklesiastes 7:20) Machane rayog ko urngin e girdi’ ni ngan pagan’iy ngorad. Uw rogon rayog? Ya de t’uf ni nge flont be’ ni nge par nib yul’yul’.

Yul’yul’​—Taw’ath Riy

Ra fel’ lanin’uy ni ngan par nib yul’yul’. Ma faanra rayog ni nge pagan’ Got ku be’ ma rayog e taw’ath ni dabi mus biid ngak. Ngiyal’ ney ma bay fare “ulung ni baga’” ko piin ni ma liyor u fithik’ e riyul’ ni yibe fl’eg rogorad ni ngar uned nga reb e fayleng nib biech mab gapas, mi yad par ndariy n’umngin nap’an. (Revelation 7:9) Thingarni par nib yul’yul’ ko gafarig nge liyor, ni yugu aram rogon e pi magawon ni bay ko re m’ag ney nge pi n’en ni ma rin’ Satan. Nge mich u wan’um ni rayog ni ngam gel ngay ya ra pi’ Jehovah gelngim!​—Filippi 4:13.

Ke weliy David u mornaagen e ngiyal’ ney nge ngiyal’ nga m’on me fl’eg lanin’dad faani pining e magar ku Jehovah u fithik’ e meybil ni gaar: “Ma bochan ni kug par nib yul’yul’ ngom ma aram e kam ayuwegeg ma kam tayeg u p’eowchem ndariy n’umngin nap’an. Nga nog e sorok ngak Jehovah . . . Amen nge Amen.”​—Psalm 41:12, 13.

[Boch e Thin nra Tamilangnag Murung’agen]