Mang Fan ni Ngam Par ni Gab Yul’yul’?

“A Jehovah mu pufthinnag, . . . rogon e yul’yul’ rog ngom.”​—PS. 7:8, NW.

1, 2. Mang boch ban’en nib ga’ ni ma buch nrayog ni nge magawonnag e yul’yul’ rok reb e Kristiano?

MU LEMNAG e dalip i n’en ni baaray nib thilthil: Keb boch e taab yangar rok reb e pagel ngak u skul, yad be towasariy ni nge un ko langad. Gur, ra un ngorad fa ra yan nge chuw? Ma be’ ni figirngiy e keb boch i chon e tabinaw rok ra pininged ni nge un ngorad ko chingaw. Manang nfaanra un ngorad ma dabiyog ni nge taleg ir ndabi chingnag. Ere gur, ra un ngorad fa ra siyeg? Ma reb e ppin ni Kristiano ni yad be sabethin boch e walag e thil e sabethin rorad nge yan nga boch ban’en nib kireb u murung’agen yugu reb e walag nib pin u lan e ulung. Gur, ra un i weliy e re n’ey, fa ra gay rogon nge thilyeg e n’en ni yad be weliy?

² Yugu aram rogon nib thilthil e n’en ni ke buch, machane bay ban’en riy nib taareb. Gubin mab muun ngay rogon ni nge par reb e Kristiano nib yul’yul’. Ga ma lemnag rogon ni ngam par ni gab yul’yul’ u nap’an ni ke magafan’um ngu nap’an ni ke t’uf ban’en rom ngu nap’an ni ga be nameg boch ban’en, fa? N’en ni ma lemnag e girdi’ ni gubin e rran e milay’ rorad nge chugum ni be tolang puluwon nge gin ni ngar pired riy nge m’ar rorad. Rayog ni par ni goo pi n’ey e gad be lemnag. Machane, mang e n’en nri ir e ba ga’ fan u wan’ Jehovah u nap’an ni be fal’eg i yaliy gum’irchadad? (Ps. 139:23, 24) Aram e yul’yul’ rodad.

3. Mang e ke pag Jehovah ni gadad e ngad dugliyed, ma mang e migid ni gad ra fil ko pi thin ney?

³ Jehovah, ni en Ma Pi’ “urngin e tin nib fel’ . . . nge urngin e tow’ath nrib manigil,” e boor ban’en ni ke pi’ ngodad. (Jas. 1:17) Ke magar, ya ke tow’athnagdad ke pi’ e dowef rodad nge lanin’dad nge ku boch ban’en. (1 Kor. 4:7) Machane, der ma towasariydad Jehovah ni ngad yul’yul’gad ngak. Ya ma pagdad ni ngad dugliyed ko gad ra maruweliy e re fel’ngin ney fa danga’. (Deut. 30:19) Ere ba t’uf ni ngad fal’eged i yaliy ko mang e yul’yul’. Ku gad ra weliy dalip i fan nrib ga’ fan e re fel’ngin ney.

Mang e Yul’yul’?

4. (a) Mang e ba muun ko yul’yul’? (b) Mang e gad ra fil ko motochiyel rok Jehovah ni murung’agen e gamanman ni yima pi’ ni maligach?

⁴ Boor e girdi’ ni gathi rib tamilang fan e yul’yul’ u wan’rad. Bod girdien e am. Yad ra uf nga farad yul’yul’ ma bod ni yad be yog ndab ra bangad. Ba ga’ fan e re fel’ngin nem machane gathi kemus fan e yul’yul’. Yul’yul’ e kan fanay u Bible nib muun ngay e ngongol nib fel’. Fare bugithin nu Hebrew ni bay rogon ko “yul’yul’” e yib u bbugithin ni be yip’ fan ban’en nib fel’ ara dariy thibngin. Reb ko gal bugithin ney e kan fanay ni fan ko maligach ni yima ognag ku Jehovah. Ra nge fel’ reb e maligach u wan’ Jehovah, ma thingari ni pi’ ngak ndariy thibngin. (Mu beeg e Levitikus 22:19, 20.) Dabi m’agan’ Jehovah ko piin ndab ra folgad ko re n’ey mar ognaged e gamanman ni maligach nib marwoth ara ba m’ar ara ba malmit.​—Mal. 1:6-8.

5, 6. (a) Mang e be dag nib ga’ ni gad baadag ban’en ndariy thibngin? (b) Gur, ba t’uf ni nge flont e girdi’ mfin nra pired nib yul’yul’ ndariy thibngirad? Mu weliy.

⁵ Fare n’en ni ngan gay ban’en ndariy thibngin e ban’en ni kiy ma rin’. Bod ni kam man nga kantin ni ngam chuw’iy ba ke babyor. Ma nap’an e mman mu fek nim pithig, ma dariy boch riy ma aram mag sulweg ko gin nim fek riy. Ku bod be’ nib ppin ni be yan u dap’e l’ay ni be feng e girdan’. Kari gin ya boor mit mab fel’ yaan, ere nap’an nra guy reb me lumel nga but’ nge fal’eg i yaliy. Ere bin ngan e ra feng? Ba mudugil ni tin nib polo’ ma dariy bang riy nib kireb. Ere, ku taareb rogon ku Got ni be gay e piin ni yad ba yul’yul’ ngak u polo’ i gum’ircharad.​—Matt. 22:37.

⁶ Machane, sana gara lemnag nib t’uf ni nge flont be’ mfini par nib yul’yul’. Bochan ni gad e tadenen ndawor da flontgad, ma rayog ni ngad lemnaged ni gad bod fa ke babyor ndariy boch riy ara fare girdan’ nib pil bang riy. Bay yu ngiyal’ ni ga ma lem ni aram rogon, fa? Dab mu pagtalin ni Jehovah e der lemnag ni ngad flontgad nge taareb rogodad ngak. Der lemnag ni ngad rin’ed e tin dabiyog rodad.a (Ps. 103:14; Jas. 3:2) Machane, baadag ni ngaud pired ni gad ba yul’yul’. Ere gur, bay e thil u thilin e ngan flont nge ngan par ni yib yul’yul’? Ba’. Ra ngan susunnag, ma baaray rogon: Bod ba pagel ni bay ba rugod ni ngar mabgolgow nri baadag. Ra nge lemnag ni nge par fare pin nib flont, mab balyang. Ya kab fel’ ni nge lemnag ni nge par ni goo ir e adag ko fare pin. Taareb rogon ku Jehovah nib ‘Got ndabun yugu reb e kan ni nge tagenging ngak.’ (Ex. 20:5) Gathi be lemnag ni ngad flontgad u gubin ban’en, ya baadag ni goo ir e ngad pigpiggad ngak ma gad t’ufeg u polo’ i gum’irchadad.

7, 8. (a) Uw rogon ni par Jesus nib yul’yul’ nrayog ni ngad folwokgad rok? (b) Ri mang e be yip’ fan e yul’yul’ nrogon nib puluw ko Bible?

⁷ Sana ra yib ngan’dad e fulweg rok Jesus u nap’an ni fith be’ ngak ko bin ngan e motochiyel e th’abi ga’ fan. (Mu beeg e Mark 12:28-30.) Gathi kemus ni pi’ Jesus e fulweg ko re deer nem ya ku aram e n’en ni ma rin’. Ir e ke dag e bin th’abi fel’ e kanawo’ nrayog ni ngad folwokgad riy u rogon ni ngad t’ufeged Jehovah u polo’ i lanin’dad nge gum’irchadad nge lem rodad nge gelngidad. I m’ug ko ngongol rok ni yul’yul’ e gathi kemus ni nga u nog nga l’uguney ya ngki m’ug ko ngongol. Faanra ngad pired ni gad ba yul’yul’ mab t’uf ni ngad folwokgad ku Jesus.​—1 Pet. 2:21.

⁸ Baaray fan ni ngad pired ni gad ba yul’yul’ nrogon nib puluw ko Bible: Fan e ngad pigpiggad u polo’ i gum’irchadad ngak Jehovah Got, ma ku gad par nib yul’yul’ ko n’en nib m’agan’ ngay. Ngad pired ni gad ba yul’yul’ e be yip’ fan ni ngaud gayed rogon ni ngad yul’yul’gad ngak Jehovah Got ni gubin ngiyal’. Tin nib ga’ fan u wan’ e ngki ga’ fan u wan’dad. Ngad guyed dalip i fan nrib ga’ fan e re n’ey.

1. Yul’yul’ Rodad nge fare Deer u Murung’agen Mat’awun Jehovah ko Gagiyeg

9. Uw rogon ni bay rogon e yul’yul’ rodad ko deer ni ke sum u murung’agen e en ni bay mat’awun ni nge gagiyeg u palpalth’ib?

⁹ Mat’awun e gagiyeg rok Jehovah e der taga’ ko yul’yul’ rodad. Gagiyeg rok e ba yal’uw mab mat’aw ma dabi mus. Ra par ni aram rogon ndabi thil ndemtrug e n’en nra yog be’ ara rin’. Machane, kan togopuluw ko gagiyeg rok Got u tharmiy ngu fayleng. Ere ba t’uf ni ngan tamilangnag u p’eowchen gubin e girdi’ ngar nanged ni gagiyeg rok Got e ba mat’aw mab yal’uw mab gel e t’ufeg riy. Gad e Pi Mich Rok Jehovah e ri gad baadag ni ngad weliyed murung’agen mat’awun e gagiyeg rok ngak e piin ni yad baadag ni ngar motoyilgad ngay. Ere, uw rogon ni nga i m’ug ko ngongol rodad ni gad be tayfan mat’awun e gagiyeg rok Jehovah? Uw rogon ni ngad daged ni kad mel’eged Jehovah ni nge Gagiyegnagdad? Aram e ngaud pired ni gad ba yul’yul’.

10. Mang e ke yog Satan u murung’agen e yul’yul’ ni be tay e girdi’, ma uw rogon ni ga baadag ni ngam fulweg ngak?

¹⁰ Mu lemnag rogon nib l’ag e yul’yul’ rom ko re n’ey. Kari micheg Satan ndariy be’ nra fol ko gagiyeg rok Got, maku dariy be’ nra pigpig ngak Got u fithik’ e t’ufeg ndariy e lem ni fel’ ngak riy. I non ngak Jehovah u fithik’ e engel ni ke muulung ni pire’ ni pire’ ni gaar: “Be’ nib girdi’ e ra pag urngin ban’en ni fan e nge ayuweg e pogofan rok.” (Job 2:4) Re n’ey ni yog Satan e gathi kemus ni goo Job e ba sor fan ngak ya kub muun gubin e girdi’ ngay. Ke yog e Bible ni Satan e “faanem ni ma egnag pi walagdad.” (Rev. 12:10) Ma moningnag Jehovah ni be gay rogon ni nge micheg ndabiyog ni nge par gubin e Kristiano ni yad ba yul’yul’, ni gab muun ngay. Be yog Satan ni gad ra digey Jehovah ni fan e ngad ayuweged e pogofan rodad. Uw rogon u wan’um e pi thin nem ni ka nog nib togopuluw ngom? Gathi ga ra gay rogon ni ngam micheg ni be ban Satan? Rayog ni ngam rin’ nfaanra mu par ni gab yul’yul’.

11, 12. (a) Mang boch ban’en ni be dag ni pi n’en ni gad ma mel’eg u gubin e rran e bay rogon ko yul’yul’ rodad? (b) Mang fan ni gad ba tow’ath ni bochan ni gad ba yul’yul’?

¹¹ Fare deer ni ke sum u murung’agen e yul’yul’ ni ga be tay e ke ga’nag fan e ngongol rom nge pi n’en ni ga ma mel’eg u gubin e rran. Mu sul ngam lemnag fa dalip i girdi’ ni kad weliyed murung’agrad aram ko tabolngin. Uw rogon ni yad ra par ni yad ba yul’yul’? Fare pagel e keb boch e taab yangar rok ngak u skul yad be towasariy ni nge un ko langad. Machane me yib ngan’ fare thin nu Bible ni gaar: “Pi tafager rog ni gimed ba t’uf rog, urngin e pi thin ney e ke yog Got nra rin’ ngodad! Ere ngad pithiged gadad u urngin ban’en ni ma alitnag e dowef nge lanin’uy, ma ngad gayed rogon ni ngad pired ni gadad ba thothup, ni aram e nguud pired ni ba’ madgun Got u wan’dad.” (2 Kor. 7:1) Ere yan nge chuw. Faen ni figirngiy ni keb boch i chon e tabinaw rok ra pininged ni nge un ngorad ko chingaw e rayog ni nge un, machane keb ngan’ fare thin u Proverbs 20:1, BT ni gaar: “Ra pag oren e rrum nim unum me ga’ lamam me balyang ngongolem. De fel’ ni ngan chingnag.” Ere, ke siyeg ni nge un ngorad. Ma fare pin ni yad be sabethin boch e walag me rung’ag boch ban’en nib kireb ni kan weliy u murung’agen be’ e par nde non ya keb ngan’ fare fonow ni gaar: “Nge bagadad me yan nga laniyan’ walagen ni girdien Kristus ni fan ngak faanem, ya nge ayuweg nge gel e michan’ rok ngak Somol.” (Rom. 15:2) Faanra ki tay tanggin e pi thin nem ma dabi pi’ e athamgil ngan laniyan’ boch e girdi’. Ma ra kirebnag thin walagen u lan e ulung, maku dabi felfelan’nag Jehovah. Ere ke gagiyegnag bolowthen me thilyeg e n’en ni yibe weliy.

¹² Ra bagayad e pi Kristiano nem ma ke dag ko ngongol rok ni ke gaar: ‘Jehovah e Pilung rog. Nggu gay rogon ni nggu rin’ e n’en nib m’agan’ ngay.’ Ga ma guy rogon ni ngam rin’ e n’en nib m’agan’ Jehovah ngay ko ngiyal’ ni ga be dugliy ban’en, fa? Faanra aram rogon e n’en ni ga ma rin’, ma aram e ga be fol ko thin ni kan yoloy u Proverbs 27:11, BT ni gaar: “Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.” Gad ba tow’ath ni bochan e rayog ni ngad felfelan’naged Got! Rib ga’ angin ni faan gad ra par ni gad ba yul’yul’?

2. Ra Pufthinnagdad Jehovah u Rogon e Yul’yul’ Rodad

13. Uw rogon ni ke m’ug ko thin ku Job nge David ni ma pufthinnag Jehovah rogon e yul’yul’ rodad ngak?

¹³ Kad nanged ni yul’yul’ e ra ayuwegdad ni ngad micheged ni gagiyeg ku Jehovah e ir ba mat’aw ya aram e n’en nra pufthinnagdad riy. Rib tamilang u wan’ Job e re n’ey. (Mu beeg e Job 31:6.) Manang Job ni ma ‘thabthabelnag’ Got e yul’yul’ rodad ni nge guy ko ka gad be yul’yul’ fa danga’. I gaar David: “Jehovah e ra pufthinnag urngin e girdi’. A Jehovah mu pufthinnag rogon e ngongol rog nge yul’yul’ rog ngom. . . . Ma skengnag Got e gum’ircha’ nge buoy ko girdi’.” (Ps. 7:8, 9, NW) Gad manang nrayog rok Got ni nge guy e n’en ni bay u fithik’ i lanin’dad ni aram e “gum’ircha’ nge buoy” ni be yip’ fan ban’en. Ere ba t’uf ni ngad nanged e n’en ni be yaliy. Rogon ni ke yog David faram e ra pufthinnag Jehovah rogon e yul’yul’ rodad.

14. Mang fan ndab da lemnag ndabiyog ni ngad yul’yul’gad ni bochan e dad flontgad?

¹⁴ Am lemnag Jehovah ni be fal’eg i yaliy gum’irchaen e girdi’ nu fayleng e ngiyal’ ney nib pag bokum bilyon oren. (1 Kron. 28:9) Ga be lemnag, ma gubin ngiyal’ nra pirieg be’ ni be par nib yul’yul’? Danga’! Machane, dab da lemnaged ni bochan ndawor da flontgad ma dabiyog ni ngad yul’yul’gad. Yugu aram rogon ndawor da flontgad ma rayog ni nge pagan’dad ni gad be par nib yul’yul’ u p’eowchen Jehovah ni bod David nge Job. Dab mu pagtalin ni gathi nga fin da flontgad mfini yog nda pired ni gad ba yul’yul’. Kari mus nri dalip e girdi’ nib flont ni ur med u fayleng, ma l’agruw i yad e de yog ni ngar pirew nib yul’yul’, ni aram Adam nge Efa. Machane, bokum milyon e girdi’ ndar flontgad e ke yog rorad ni ngar pired nib yul’yul’. Ere ku rayog rom.

3. Ba ga’ Fan e Yul’yul’ ko Athap Rodad

15. Uw rogon ni dag David nrib ga’ fan e yul’yul’ ko athap rodad ko gabul nge langlath?

¹⁵ Ba ga’ fan e yul’yul’ ko athap rodad ko gabul nge langlath ni bochan e aram e n’en nra pufthinnagdad Jehovah riy. Manang David nriyul’ e re n’ey. (Mu beeg e Psalm 41:12.) Rib ga’ fan u wan’ e athap rok ni nge par nib fel’ u wan’ Got ndariy n’umngin nap’an. Athap ku David e nge ulul e tha’ nib fel’ u thilrow Jehovah ndariy n’umngin nap’an ni bod e athap ko tin riyul’ e Kristiano e ngiyal’ ney. Manang David nrogon me lebug e athap rok e nge par nib yul’yul’. Ere ku arrogodad, faan gad ra par ni gad ba yul’yul’ ma ra ayuwegdad Jehovah mi i pow’iydad ma be tow’athnagdad.

16, 17. (a) Mang fan ni ngad pired ni gad ba yul’yul’? (b) Mang deer e gad ra weliy ko bin migid e thin?

¹⁶ Athap e rib ga’ fan ko felfelan’ rodad e ngiyal’ ney. Rayog ni nge pi’ e felfelan’ ngodad nge yog ndarod u fithik’ e magawon. Maku rayog ni nge ayuweg e lem rodad. Dab mu pagtalin ni ke taarebnag e Bible e athap rodad ngab urwach. (1 Thess. 5:8) Ra ayuwegdad ni nge dabi taareban’dad e girdi’ nu fayleng ndariy e athap rorad ni bod e urwach ni ma ayuweg lolugen e salthaw. Ba m’ay fan e yafas nfaanra dariy e athap riy. Ere ba t’uf ni ngad fal’eged i yaliydad nge rogon e athap rodad nib peth ko yul’yul’. Dab mu pagtalin nfaan ga ra par nib yul’yul’, ma aram e ga be micheg nib mat’aw e gagiyeg ku Jehovah ma ga be ayuweg e athap rom ko gabul nge langlath. Manga yugum par ni gab yul’yul’ ni gubin ngiyal’!

¹⁷ Bochan nrib ga’ fan e yul’yul’ ma bay boch e deer nib t’uf ni ngan weliy. Uw rogon ni ngad maruweliyed e yul’yul’? Uw rogon ni ngad pired ni gad ba yul’yul’? Ma faanra daki yul’yul’ be’ ma mange rayog ni ngan rin’? Gubin e pi deer ney ni gad ra weliy ko bin migid e thin.

[Footnote]

Uw Rogon ni Ga Ra Fulweg?

• Mang e yul’yul’?

• Uw rogon ni bay rogon e yul’yul’ rodad ko fare deer ni ke sum ko en ni bay mat’awun ni nge gagiyeg u palpalth’ib?

• Uw rogon nib ga’ fan e yul’yul’ ko athap rodad?