Ga Ra Par ni Gab Yul’yul’?

“Gu ra par ni gub yul’yul’ nge mada’ ko ngiyal’ ni ku gum’!”​—JOB 27:5, NW.

1, 2. (a) Mang maruwel e ba t’uf ni ngad rin’ed? (b) Mang deer e gad ra weliy?

AM SUSUNNAG ni ga be sap nga yaan ba naun ma ri ga baadag yaan. Ka rim felfelan’ ngay mag par nguum lemnag fel’ngin nra yib ngom nge tabinaw rom. Machane, faanra dab mu toy ngam par ngay ma sana ra m’ay fan e n’en ni um lemnag ngay ko som’on.

² Bod e yul’yul’ nrayog ni ngad lemnaged ni ban’en nib ga’ fan. Machane faanra kemus ni ngaud lemnaged ma dab da maruweliyed maku ra yan i aw nib m’ay fan. Taareb rogon ko ngan toy ba naun. Ngaun lemnag rogon ni ngan ngongliy e gathi rib ga’ angin nfaanra dab ni athamgiliy ngan maruweliy. (Luke 14:28, 29) Ku arrogon nra ngad pired ni gad ba yul’yul’ ma kub t’uf ni ngad athamgilgad ma aram e ra yib angin. Ere ngad weliyed e dalip i deer ni baaray: Uw rogon ni ngad manged e girdi’ nib yul’yul’? Uw rogon ni ngad pired ni gad e Kristiano nib yul’yul’? Faanra daki yul’yul’ be’ ma mang e rayog ni ngan rin’?

Uw Rogon ni Ngad Manged e Girdi’ nib Yul’yul’?

3, 4. (a) Mang boch e kanawo’ ni ma ayuwegdad Jehovah riy ngad maruweliyed e yul’yul’? (b) Uw rogon ni ngad maruweliyed e yul’yul’ ni bod rogon ni rin’ Jesus?

³ Kad filed ko fa binem e thin ni ke pagdad Jehovah ni ngad dugliyed ko gad ra mang e girdi’ nib yul’yul’ fa danga’. Machane gad ba felfelan’ ngay ya gathi kaygi digeydad ni gad rodad e ngad dugliyed. Ke fil rogon ngodad ni ngad maruweliyed e re fel’ngin ney ma ki pi’ gelngin nib thothup ni nge ayuwegdad ngad folgad ko thin rok. (Luke 11:13, NW) Ku ma ayuweg e liyor rok e piin ni yad be athamgil ni ngaur pired ni yad ba yul’yul’.​—Prov. 2:7.

⁴ Uw rogon ni ke fil Jehovah ngodad ni ngad pired ni gad ba yul’yul’? Aram e ke pi’ Jesus ni Fak keb nga fayleng. I par Jesus ni “be fol rok Got nge yan i mada’ ko ngiyal’ ni yim’ riy.” (Fil. 2:8) Gubin ngiyal’ ni i par ni be fol ko Chitamangin ni yugu aram rogon nib mo’maw’. I gaar ngak Jehovah: “Gathi tin nib m’agan’ug ngay e ngam rin’, ya tin nib m’agan’um ngay.” (Luke 22:42) Ere nge bagadad me fith ir, ‘Ku aram rogog ni gub yul’yul’?’ Faanra ba puluw fan ni ga be fol ma aram e rayog ni ngam par ni gab yul’yul’. Mu lemnag yu ngiyal’ u nap’an e yafas nrib t’uf ni ngan fol.

5, 6. (a) Uw rogon ni ke dag David feni ga’ fan ni ngad pired ni gad ba yul’yul’ ni ki mada’ ko ngiyal’ ndariy be’ ni be guydad? (b) Mang boch ban’en ni ma mo’maw’nag ko Kristiano ni ngar pired ni yad ba yul’yul’ ko ngiyal’ ndariy be’ ni be guyrad?

⁵ Ba t’uf ni ngad folgad rok Jehovah ni ki mada’ ko ngiyal’ nder guydad be’. Ke nang David feni ga’ fan ni nge par nib yul’yul’ ni ki mada’ ko ngiyal’ ndariy be’ ni be guy. (Mu beeg e Psalm 101:2.) David e ba pilung ere gubin ngiyal’ ma be guy e girdi’. Dariy e maruwar riy ni yu ngiyal’ ma bokum biyu’ e girdi’ ni be guy. (Mu taarebnag ko Psalm 26:12.) Bochan ni ir e pilung ma rib ga’ fan ni nge par nib yul’yul’ ko yu ngiyal’ i n’em ya nge dag e kanawo’ nib fel’ ni nge folwok e girdi’ rok riy. (Deut. 17:18, 19) Machane, manang David nthingari par nib yul’yul’ ni ki mada’ ko ngiyal’ ni bay u naun rok ndariy be’ ni be guy. Ere uw rogodad?

⁶ Thin rok David u Psalm 101:3 e be gaar: “Dariy biid nrayog ni gu k’adan’ug ko n’en nib kireb.” Ngiyal’ ney e boor e kanawo’ nrayog ni ngad guyed e tin nib kireb riy, nib ga’ ni ngiyal’ ndariy be’ ni be guydad. Reb e aram e Internet. Ke momnag ni ngan guy yaan e ngongol ni puwlag. Machane, faan gad ra rin’ e re n’ey, ma gur, gad be fol ku Got ni ir e thagthagnag fapi thin ni yoloy David? Rib kireb ni ngaud yaliyed yaan e ngongol ni puwlag ya ra sunmiy e ar’ar nib kireb u lanin’dad me alitnag e nangan’ rodad me kirebnag e mabgol rodad ma ra m’aynagfadad.​—Prov. 4:23; 2 Kor. 7:1; 1 Thess. 4:3-5.

7. Mang thin nu Bible e ra ayuwegdad ngad pired ni gad ba yul’yul’ u nap’an ndariy be’ ni be guydad?

⁷ Ma guy Jehovah e pi tapigpig rok ma manang e n’en ni yad ma rin’ ni bochan e yad ba t’uf rok. (Mu beeg e Psalm 11:4.) Rra felfelan’ Jehovah nfaanra guyem ni ga be athamgil ndab mu denen! Faanra um rin’ ni aram rogon, ma ga be fol ko thin rok Jesus ko Matthew 5:28. Ere, mu dugliy u wan’um ndab mu yaliy yaan ban’en nra waliyem ko kireb. Dab mu pag e yul’yul’ rom ni bochan e ngam yaliy ara ngam beeg murung’agen e ngongol ni puwlag.

8, 9. (a) Mang magawon e yib ngak Daniel nge fa dalip i pagel ni Hebrew nib l’ag rogon ko yul’yul’ rorad? (b) Uw rogon ni be felfelan’nag e piin fel’ yangaren ni Kristiano Jehovah nge piin taareb e michan’ rorad e ngiyal’ ney?

⁸ Ku rayog ni ngad pired ni gad ba yul’yul’ ngak Jehovah u nap’an ni gad bay u fithik’ e piin nde michan’rad. Mu lemnag Daniel nge fa dalip i pagel ni Hebrew nfaan ni kolrad ngan fekrad nga Babylon. Ma nap’an nni fekrad ngaram nga fithik’ e girdi’ ni gathi ri yad manang Jehovah min towasariyrad ni ngar ked e ggan nib togopuluw ko Motochiyel rok Got. Rib mom ni ngar lemnaged ndariy ban’en nib kireb riy. Ya demoy e gallabthir rorad nge yugu boch e girdi’ nib ilal nge prist ni yad ra guy e n’en ni yad be rin’. Ere mini’ e ra nang? Jehovah e ra nang. Ere kar pired nib mudugil kar folgad rok Jehovah ni yugu aram rogon nib gel e towasar ni keb ngorad.​—Dan. 1:3-9.

⁹ Ku taareb rogon e n’en ni ma rin’ e Pi Mich Rok Jehovah nib fel’ yangaren u ga’ngin yang u fayleng ni yad ma fol ko motochiyel rok Got ma yad be siyeg e towasar ko pi taab yangar rorad. Ere gimed e piin fel’ yangaren, gimed ra siyeg e langad, falay ni kireb, cham, yaba’, ngongol ndarngal, nge ku boch e ngongol ni kireb ma aram e gimed be fol ku Jehovah ma gimed be par ni gimed ba yul’yul’ ngak. Ga ra rin’ e pi n’ey ma gur e ra yib angin ngom ma ga ra felfelan’nag Jehovah nge piin taareb e michan’ romed!​—Ps. 110:3.

10. (a) Mang lem nde puluw u murung’agen e ngongol ndarngal e ke k’aring boch e fel’ yangaren kar denengad? (b) Faanra gad ba yul’yul’, uw rogon nra ayuwegdad ngad pired ni gad ba palog ko ngongol ndarngal?

¹⁰ Kub fel’ ni ngad folgad ko ngiyal’ ni gad be un ngak be’ ni gathi gad taab raba’ i yuw. Gad manang ni be yog e Thin Rok Got nib kireb e ngongol ndarngal. Machane, ba mom ni nge dab kum yul’yul’ mag un ko kireb ni yibe rin’ u toobem i yan. Boch e fel’ yangaren e kar l’aggad nga boch e ngongol nde yalen ni bod ngongolen e par ko pumoon nge ppin ni yima fanay l’uguney nge chigiyey nge paay ya yad be lemnag nde kireb ya gathi aram e “ngongol ndarngal.” Pi fel’ yangaren ney e kar paged talin ma boch i yad e ma darifannag e thin nu Bible ni murung’agen e ngongol ndarngal ni kub muun urngin e pi ngongol ney ngay nrayog ni ngan tharbog be’ ni bochan.a N’en nib gel e kireb riy e darur yul’yul’gad. Bochan ni gad be guy rogon ni ngad pired ni gad ba yul’yul’, ere dab da gayed e toway nga dogned nib fel’ e n’en ni gad be rin’ ya dariy ko motochiyel u lan e Bible. Dab da guyed rogon ni ngad chugurgad i yan ko gin ni gad ra denen riy ni gad be lemnag nfaan gad ra rin’ ma dabi gechignagdad e piin piilal. Maku dab ud pared ni gad be lemnag e gechig ni yira tay ngodad ya ngad lemnaged e n’en ni ngad rin’ed ma gad felfelan’nag Jehovah nge n’en ndab da rin’ed nra kirebnag laniyan’. Ere ngad paloggad ko denen ma dab da “ngongliyed e ngongol ko darngal.” (1 Kor. 6:18) Faan gad ra fol ko pi n’ey ma aram e gad be dag ni gad e girdi’ nib yul’yul’.

Uw Rogon ni Ngad Pired ni Gad Ba Yul’yul’?

11. Mang fan ni ga ra yul’yul’ taab yay mab ga’ angin? Mu susunnag.

¹¹ Gad ma gelnag e yul’yul’ rodad nfaanra ud folgad ko motochiyel rok Got mu ud k’adedan’dad ko kireb. Taab yay ni ngam fol e ga ra lemnag ndariy angin. Machane ra um fol i yan ma aram e be m’ug ni gab yul’yul’. Ra ngan susunnag ma bod rogon taab yang i rengnga. Taabang e gowa dariy angin. Machane faanra mu kunuy nga taabang nge yoor ma rayog ni ngam ubung me yog reb e naun riy. Ere faan gad ra ulul ngad folgad ma aram e ra ud pired ni gad ba yul’yul’.​—Luke 16:10.

12. Uw rogon ni ngad folwokgad ku David ngad pired ni gad ba yul’yul’ u nap’an ni yibe gafgownagdad nge nap’an ni yibe rin’ e ngongol nde mat’aw ngodad?

¹² Rra m’ug ni gad ba yul’yul’ nfaanra ud k’adedan’dad u fithik’ e magawon nge gafgow ni yima tay ngodad nge ngongol nde mat’aw. Mu lemnag e n’en ni buch ku David. Nap’an ni kab pagel mi i k’adan’ ko gafgow ni i tay Saul ni pilung ngak nsusun e ir e nge par ni owchen e gagiyeg rok Jehovah. Ngiyal’ nem e daki fel’ Saul u wan’ Jehovah mi i par ni be awan’ ngak David ni bochan e manang nib fel’ David u wan’ Jehovah. Machane yugu aram rogon ma ki par ni be gagiyeg mi i l’og e salthaw rok ni ngar lied David. I pag Jehovah ni nge buch e re n’ey u lan in e duw. Ere ke damumuw David ku Got me lemnag ndariy fan ni nge k’adan’? Danga’. Ere nap’an ni mab e kanawo’ ngak ni nge li’ Saul ma de rin’ ya manang ni Got e ke dugliy. Ere i par ni be tayfan.

13. Uw rogon ni ngad pired ni gad ba yul’yul’ u nap’an ni ke rin’ be’ ban’en ni ke kirebnag lanin’dad?

¹³ Uw feni rib gel gelngin e ngongol nib fel’ ni dag David ngodad e ngiyal’ ney! Gad gubin u lan e ulung ndawor da flontgad, ere rayog ni ngad rin’ed ban’en ngak be’ nib kireb ara i rin’ be’ ban’en nib kireb ngodad ara dab kud yul’yul’gad. Gad ba tow’ath ya gad bay u ba ngiyal’ ndabkiyog ni ngan kirebnag e ulung rok Jehovah. (Isa. 54:17) Ere, mang e ngad rin’ed u nap’an ni ke rin’ reb i walagdad ban’en ni ke kirebnag lanin’dad? Faan gad ra fulweg taban ngak ma ra magawonnag e yul’yul’ rodad ku Got. Ngongol rok boch e girdi’ e thingar dabi mang toway ngodad ndab kud pigpiggad ku Got. (Ps. 119:165) Ya faan gad ra k’adan’ u fithik’ e skeng ma ra ayuwegdad ni ngad pired ni gad ba yul’yul’.

14. Faanra ba yul’yul’ be’ ma ra uw rogon u wan’ e pi n’en ni be thil u lan e ulung?

¹⁴ Ku rayog ni ngad pired ni gad ba yul’yul’ ngak Jehovah nfaanra dab ud sapgad nga thibngin ban’en nde puluw u lanin’dad. Dariy ba ngiyal’ ni ke tow’athnag Jehovah e girdi’ rok ni bod e ngiyal’ ney ma kari gagiyel e bin riyul’ e liyor u ga’ngin e fayleng. (Isa. 2:2-4) Ere nap’an nra thil boch e yaram u lan e ulung ara kan thilyeg rogon i weliy boch ban’en ko babyor rodad ma thingar da folgad riy. Gad ba felfelan’ ya gad be guy ni thin rok Got e ri ka be tamilang i yan. (Prov. 4:18) Faanra ba mo’maw’ ni ngad nanged fan ni ke thil ban’en ma ngad meybilgad ku Jehovah ni nge ayuwegdad ngad nanged fan. Yugu aram rogon, ma ka gad be par ni gad ba yul’yul’.

Daki Yul’yul’ Be’ Ma Mang e Rayog ni Ngan Rin’?

15. Mini’ e rayog ni nge kirebnag e yul’yul’ rom?

¹⁵ Gathi ba ga’ fan ere deer ney? Ya kad filed faram ko fa binem e thin nrib ga’ fan e yul’yul’. Faanra dab da yul’yul’gad ma dabi fel’ e tha’ u thildad Jehovah maku dariy e athap rodad. Dab mu pagtalin ni kari mus ni taabe’ e rayog ni nge kirebnag e yul’yul’ rom. Cha’nem e aram e gur. Rib tamilang e re n’ey u wan’ Job aram fan ni gaar: “Gu ra par ni gub yul’yul’ nge mada’ ko ngiyal’ ni ku gum’!” (Job 27:5, NW) Faanra aram rogon e lem rom ni ga baadag ni ngam par ni gab chugur ku Jehovah, ma dab mu kirebnag e yul’yul’ rom.​—Jas. 4:8.

16, 17. (a) Mang e dabi rin’ be’ nfaanra ke denen? (b) Mang e ba mat’aw ni nge rin’?

¹⁶ Ka bay boch e girdi’ nder yog ni ngar pired ni yad ba yul’yul’. Kakrom u nap’an e pi apostal e immoy boch e Kristiano ni ur ngongliyed bogi denen nib ubchiya’. Faanra ke buch rom ni aram rogon, aram e dakuriy e athap rom? Gathi ri aram rogon. Ere mang e rayog ni ngan rin’? U m’on ni ngad weliyed e re n’em ma som’on e ngad weliyed ko mang e dabin rin’. Yu ngiyal’ ma boch e girdi’ e yad ma mithag e kireb rorad ko gallabthir rorad ara girdi’ u lan e ulung fa piin piilal. Machane dab da paged talin e thin nu Bible ni gaar: “Dabi fel’ rogon e yafos rom ni faanra ga be guy rogon ni ngam mithag e pi denen rom. Mu puwofaynag ma ga pithig paam riy; me wurngan’ Got ngom.” (Prov. 28:13) Boch e girdi’ e ma dake be pigpig ku Jehovah ma be rin’ e kireb nib mith. Be’ ni be ngongol ni aray rogon e daki yul’yul’. De m’agan’ Jehovah ko pigpig ni be tay e piin ni yad be mithag e kireb rorad. Ri ma fanenikay e mit ney e ngongol.​—Prov. 21:27; Isa. 1:11-16.

¹⁷ Ba tamilang ni be yog e Bible nfaanra ke nang be’ ni ke rin’ reb e denen nib ubchiya’ ma nge yan i ning e ayuw ko piin piilal ni Kristiano. Ke tay Jehovah e piin piilal ni ngar ayuweged e piin ni kar wargad ko tirok ban’en. (Mu beeg e James 5:14.) Dab mu rus ni yira fonownagem ya ra ayuwegem ni ngam gel bayay ko tirok Got ban’en. Ni bod nfaanra manang be’ nib t’uf ni ngan tafalaynag e m’ar rok ma gur, ra digey ni bochan e dabun e amith riy fa ra pag ngan tafalaynag?​—Heb. 12:11.

18, 19. (a) Uw rogon ni dag David nrayog ni ngki sul be’ ni ke denen ngki yul’yul’ bayay? (b) Mang e kam dugliy ni ngam rin’ ni fan ko yul’yul’ rom?

¹⁸ Rayog ni ngki sul be’ ni ke denen ngki yul’yul’ bayay? Mu lemnag bayay e n’en ni buch ku David. Immoy ba ngiyal’ ni ngongliy reb e denen nib ubchiya’. I chogownag e ppin ku be’ nge un ngak ko ngongol ndarngal me makathnag e pumoon rok ni ngan li’ ngem’. Ba mo’maw’ ni ngan lemnag ni David e ir be’ nib yul’yul’ e ngiyal’ nem ni ke denen. Ere dakuriy e athap rok? Danga’. Kan fonownag ya aram e n’en nib t’uf ni ngan rin’ ngak. Machane, faani kalngan’ miki runguy Jehovah bayay. Ke fol ko fonow ni kan pi’ ngak miki sul bayay ngi i par ni be yul’yul’ ku Got. N’en ni rin’ David e ba puluw ko fare thin u Proverbs 24:16 ni gaar: “Demtrug urngin yay nra paraw e girdi’ ni yul’yul’ ma gubin yay ma ku yad ra sak’iy.” Mang angin e n’en ni rin’ David? Mu lemnag e n’en ni yog Jehovah ngak Solomon u murung’agen David u tomren ni ke yim’. (Mu beeg e 1 Kings 9:4.) I lemnag Got David ni be’ nib yul’yul’. Ere, rayog ni nge chuweg Jehovah thibngin e denen ni ke rin’ e piin ni yad ra kalngan’rad.​—Isa. 1:18.

¹⁹ Ra um fol rok Got u fithik’ e t’ufeg ma ga ra par ni gur be’ ni gab yul’yul’. Mu athamgil nguum par ni gab yul’yul’. Ma faanra kam denen, mag kalngan’um. Rib ga’ fan e yul’yul’ rodad. Manga yigi bagadad me fol ko n’en ni yog David ni gaar: “Ma gag, e tin ni bfel’ e gu ma rin’.”​—Ps. 26:11.

[Footnote]

Uw Rogon ni Ga Ra Fulweg?

• Uw rogon ni ngam mang be’ nib yul’yul’?

• Mang boch e kanawo’ ni ngam par riy ni gab yul’yul’?

• Faanra ke denen be’ ma uw rogon ni ngki sul ngki yul’yul’ bayay?

[Box on page 20]

‘RIB FEL’ E N’EN NI KE RIN’’

Be’ nib pin ni ke diyen ni nga lal e pul e yog e pi thin nem ni bochan e gol nge yul’yul’ ni dag be’ ngak. Immoy u bang ni yima pi’ e coffee riy ni chuway’, ma in e awa nga tomren ni ke chuw u rom me nang ni ke n’ag e saifu rok u rom. L’agruw biyu’ e dolla ni ba’ ko re saifu rok nem, mab ga’ nder ma fek e salpiy ni aram urngin. Boch nga ngaray riy me yog ngak reb i girdien e shimbung ni gaar: “Karug gin ma ke kireban’ug ko n’en ke buch.” Machane me pirieg ba rugod fare saifu ma ka chingiyal’ nem me gay e en ni fen ma de pirieg, ere fek fare saifu nga tafen e polis. Ma aram min gay e gin ni ma par fare pin ni fen fare saifu riy. Me gaar e re pin nem: “Rib fel’ e n’en ni ke rin’.” Mang fan nri gay fare pin ni pirieg fare saifu rogon ni nge sulweg fare salpiy? Rogon ni yog e shimbung e bochan ni ir reb e Pi Mich Rok Jehovah, me ke “dugliy u wan’ ni nge par nib yul’yul’ ko re teliw nem ni ilal riy.”

[Picture on page 21]

Rayog ni nge par e piin fel’ yangaren ni yad ba yul’yul’ u nap’an ni keb e skeng ngorad

[Picture on page 22]

Immoy ba ngiyal’ ndaki yul’yul’ David machane me kalngan’ miki sul nga rogon