Ma Yororiy Jehovah E Piin Ni Ma Sonnag Ni Nge Ayuwegrad

“Gelngin nib t’uf e girdi’ rom nge fanam yul’yul’ e bay i yororiyeg ni gubin ngiyal’.”​—PSALM 40:11.

1. Mang e ke wenignag David ni Pilung ngak Jehovah, ma uw rogon ni kan pi’ ngak e chiney e n’en ni ke ning?

DAVID ni pilung nu Israel kakrom e kari “sonnag Somol ni nge ayuweg” me yog ni ke motoyil Jehovah [ngak] “me rung’ag laman ni be wenig ngak ni [nge] ayuweg.” (Psalms 40:1) Boor yay ni ke guy ko uw rogon ni ke yororiy Jehovah e piin nib t’uf rorad. Ere, rayog rok David ni nge ning ngak Jehovah ni nge yororiy ni gubin ngiyal’. David ni kan ta’ ni ir bang ko piin ni pumoon nge ppin nib yul’yul’ ni kan micheg ni nge yog ngorad e “fas ko yam’ nib fel’,” David e chiney e bay u wan’ Jehovah ni bagayad e piin ni nge yog ngorad e re taw’ath nem. (Hebrews 11:32-35) Ere athap rok ko gabul nge langlath e rib mudugil. Fithingan e kan yoloy nga “babyor” rok Jehovah.”​—Malaki 3:16.

2. Uw rogon ni be ayuwegdad e Thin nu Bible ni ngada nanged fan rogon ni ke yororiydad Jehovah?

² Yugu aram rogon ni piin nib yul’yul’ ni bay ko Hebrews guruy 11 e ur moyed u m’on ni yib Jesus nga fayleng, e ur ngongolgad nrogon nib puluw ko tin ni ke fil ngak e girdi’ ni gaar: “En nra t’uf rok e birok e pogofan e ra thay rok, ma en nra dabuy e birok e pogofan ko biney e tamilang e ra par rok ni fan ko yafas ndariy n’umngin nap’an.” (John 12:25) Ere, ba tamilang nrogon ni ke yororiy Jehovah e girdi’ e gathi be yip’ fan ni dab ki yib e gafgow nge togopuluw ngorad. Re n’ey e be yip’ fan ni yibe yororiyrad ko tirok Got ni nge yog ni ngauda pared ni gad ba fel’ u wan’ Got.

3. Mang e mich riy ni bay rodad ni ke yororiy Jehovah Jesus Kristus, ma mang angin ni yib?

³ Ma yib ngak Jesus e togopuluw nib gel ma yima yog e thin nib kireb ngak, ma tomur riy ma pi toogor rok e ke yog rorad ni ngar li’ed ngem’ u reb e kanawo’ nrib gel e kireb riy nge amith. Yugu aram rogon, ma re n’ey e gathi ba togopuluw ko n’en ni ke micheg Got ni nge yororiy fare Messiah. (Isaiah 42:1-6) Fas ko yam’ ni tay ko bin dalip e rran u tomren ni ke yim’ nrib gel e gafgow riy e be dag ni ke rung’ag Jehovah laman ni be ning e ayuw ngak—​ni bod ni ke rung’ag laman David​—me pi’ ngak Jesus gelngin ni ngi i par nib yul’yul’ ngak. (Matthew 26:39) Ere bochan ni kan yororiy Jesus ni aram rogon, me yog ngak e yafas u tharmiy ni dab ki yim’ biid, ma bokum milyon e girdi’ ni kar maruweliyed e michan’ rorad ko fare biyul ke yog ngorad e yafas ni manemus.

4. Mang e n’en ni kan micheg ngak e Kristiano ni kan dugliyrad nge fare “yugu boch e saf”?

⁴ Rayog ni ngad pagedan’dad nib m’agan’ Jehovah ngay ma rayog rok ni nge yororiy e pi tapigpig rok e chiney ni bod rogon ni rin’ u nap’an David nge Jesus. (James 1:17) Tin ni ka ba’ ni pi walagen Jesus ni kan dugliyrad ni ka yad buchuw e ka yad bay u fayleng e rayog ni ngara pagedan’rad ko tin ni ke micheg Jehovah ngorad ni gaar: “Be chaariy e pi tow’ath nem u tharmiy ni fan ngomed ko gin ndabiyog ni nge wod riy ara kireb fe kaday. Pi flaab nem e gimed e fanmed, ni gimed e piin ni ke thapegmed Got ngak u daken gelngin ngu daken e michan’ romed ngak, ma gimed be sonnag e gin ni ngam thapgad ngay, ni kan ngongliy rogon kan ta’ ni ngan dag ko ngiyal’ ni nge mus e rran riy.” (1 Peter 1:4, 5) Fare ulung ko “yugu boch e saf,” ni yafas u fayleng e athap rorad, e ku yad ra pagan’rad ngak Got nge tin ni ke micheg u daken fare psalmist ara ta ma tang ni gaar: “Gimed e piin ni kam pared nib yul’yul’ ngak Jehovah, e ngam t’ufeged. Piin nib yul’yul’ e ma yororiyrad Jehovah.”​—John 10:16; Psalm 31:23.

Kan Yororiy e Tha’ u Thilrad Got

5, 6. (a) Uw rogon ni kan yororiy e girdi’ rok Got e ngiyal’ ney? (b) Mang e tha’ u thilin e piin ni kan dugliyrad nge Jehovah, ma uw rogon e piin ni yad be athapeg e yafas u fayleng?

⁵ Ngiyal’ ney, e ke yarmiy Jehovah rogon ni ngan yororiy e michan’ ko girdi’ rok. Yugu aram rogon ni de yororiyrad ko togopuluw ara magawon nge gafgow nib gel ni ma yib ngorad, ma ke pi’ e athamgil nga lanin’rad nib t’uf ni ngan ayuweg e tha’ u thilrad Got nib fel’. Fare def ni ke ayuwegrad ngar gelnaged e tha’ u thilrad Got e aram e michan’ rorad ko biyul’ ni Got e ke pi’ u fithik’ e t’ufeg. Boch e pi Kristiano ney nib yul’yul’ e kan dugliyrad ko kan ni thothup ni ngar uned ngak Kristus ngar gagiyegad u tharmiy. Ka nog ni yad ba mat’aw ni pi fak Got, mab puluw ngorad e pi thin ney ni gaar: “I chuwegdad ni dab kuuda pared u fithik’ e lomur me fekdad ngad pared u tan fare gil’ilungun rok Fak nib t’uf rok, ni bochan e biyul ni pi’ ma kan chuwegdad ni dab kuuda pared ni sib, min n’ag fan e denen rodad.”​—Kolose 1:13, 14, NW.

⁶ Bokum milyon e Kristiano nib yul’yul’ e kari pagan’rad ni ku ra fel’ rogorad ko biyul ni ke pi’ Got. Rayog ni ngada bieged ni gaar: “Yi mus ngak e en ni fak e Girdi’ ma de yib nga fayleng ni ngan pigpig ngak; yi yib ni nge pigpig me pi’ e pogofan rok nge biyuliy e girdi’ ni pire’ ngay.” (Mark 10:45) Pi Kristiano nem e yad be sonnag ni ngar uned ko “flaab rok pi fak Got.” (Roma 8:21) Ku ngiyal’ nem, ma yad be ayuweg e tha’ u thilrad Got ni ri yad be athamgil ni ngar gelnaged e re tha’ nem.

7. Uw rogon ni ma yororiy Jehovah e girdi’ rok e ngiyal’ ney ni ngar pared nib fel’ rogorad ko tirok Got?

⁷ Reb e kanawo’ ni i yororiy Jehovah e girdi’ rok riy ngar pared nib fel’ rogorad ko tirok Got e aram e kan yarmiy ni nguun skulnagrad i yan. Re n’ey e ra ayuwegrad ni ngari tamilang e tin riyul’ u wan’rad. Maku ma pow’iyey Jehovah i yan u daken e Thin rok, nge ulung rok, nge kan ni thothup rok. U daken e thin ni ma yog e “tapigpig nib yul’yul’ mab gonop,” ma girdi’ rok Got u fayleng ni ga’ngin e ke par ni yad bod reb e tabinaw. Ma fare tapigpig nib yul’yul’ mab gonop e ma ayuwegrad ko tirok Got ban’en ma faanra t’uf maku yad ra ayuwegrad ko tin nib t’uf ko dowef rok girdien fare tabinaw ko pi tapigpig rok Jehovah​—ni demtrug ko kun nam ara rarogorad​—Matthew 24:45.

8. Mang pagan’ e ke tay Jehovah ngak e piin nib yul’yul’, ni be micheg ngorad e mang?

⁸ Bod rogon ni de yororiy Jehovah downgin Jesus ko cham ni tay e pi toogor rok ngak, maku arrogon ni der Ma yororiy e pi Kristiano ni aram rogon e ngiyal’ ney. Machane gathi be yip’ fan ni ke damumuw Jehovah ngorad. Ri gathi aram rogon. Tin riyul’ riy, e be tamilangnag ni kari pagan’ ngorad ni ngar ayuweged ko fare magawon ara issue ni sum u palpalthib. (Job 1:8-12; Proverbs 27:11) Ri dabi pag Jehovah e piin nib yul’yul’ ngak, “Yi Somol e ba t’uf rok e tin nib mat’aw, ma der ma pag e piin ni yad ba yul’yul’ ngak’ ni aram girdien; ma yoror rorad ni gubin ngiyal’.”​—Psalms 37:28.

Kan Yororiy ko T’ufeg ni Yul’yul’ nge Tin Riyul’

9, 10. (a) Uw rogon ma tin riyul’ rok Jehovah e ma yororiy e girdi’ rok? (b) Uw rogon ni be dag e Bible ni ma yororiy Jehovah e girdi’ rok nib yul’yul’ u daken e t’ufeg rok nib yul’yul’?

⁹ U lan e meybil rok ni bay ko Psalm 40, me ning David ngak Jehovah ni nge yororiy u daken e t’ufeg rok nib yul’yul’. Feni riyul’ Jehovah nge t’ufeg rok ko tin nib mat’aw ban’en e ba t’uf ni nge weliy nib tamilang ko mang e pi motochiyel rok. Piin ni ma fol ko pi motochiyel ney e yira rororiyrad nib gel ko pi kireban’, nge marus, nge pi magawon ni ma yib ngak e piin ni kar dariy fannaged e pi n’em. Reb riy, e rayog ni ngad yororiyed gadad nge pi girdi’ nib t’uf rodad ko pi magawon ni ma amithnag lanin’dad ni faanra ngad siyeged e falay ni kireb ma dab da unumed e alkul nib pag rogon, nge ngongol ni darngal, nge ba yafas ni rib maangach. Ma mus ko piin ni kar paloggad ko kanawo’ rok Jehovah nib riyul’​—ni bod ni i rin’ David yu ngiyal’—​ma rayog ni nge pagan’rad ni Got e ka be par ni “ir e ma mith u tan pa’” e piin ni kar denengad mar kalgadngan’rad. Pi cha’ nem e rayog ni ngar tolulgad u fithik’ e felfelan’ ni nge lungurad: “Bay mu chuwegneg u fithik’ e gafgow ni ke yib ngog.” (Psalms 32:7) Ireray e thin ni ri ma dag e t’ufeg rok Got nib yul’yul’!

¹⁰ Maku reb ni be dag e t’ufeg nib yul’yul’ rok Got e i ginang e pi tapigpig rok ni ngar pared nib dar ko fayleng nib kireb, ni ke chuchugur ni ngan gothey. Rayog ni ngada bieged e thin ni gaar: “Dabi t’uf romed e tin ni ba’ u roy u fayleng ara n’en nib mil fan nga fayleng. Faanra t’uf romed e tin ni bay u fayleng, ma aram e de t’uf e en ni Chitamangiy romed. Gubin ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en u roy u fayleng nri ma uf e girdi’ ngay​—dariy reb e pi n’ey ni yib rok e en ni Chitamangiy: ya urngin me yib rok e fayleng.” Ra ngan fol ko pi thin ney ni be ginangey, ma rayog ni ngad yororiyed e yafas rodad ni manemus, ya re thin nu Bible ney e be ulul ngay ni gaar: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 John 2:15-17.

Kan Yororiy u Daken Gelngin e Lem, nge Nang Fan, nge Gonop

11, 12. Mu weliy ko uw rogon ni gelngin i lemnag ban’en, nge gelngin i nang fan ban’en, nge gonop e ra yororiydad.

¹¹ Piin ni yad be athapeg ni ngar fel’gad u wan’ Got, ma Solomon ni fak David e kan thagthagnag ni nge yoloy ni gaar: “Gelngin i lemnag ban’en e be matanageyem, ma gelngin i nang fan ban’en e be yororiyem.” Miki ta’ chilen ni gaar: “Mu pag ni nge yog e gonop ngom . . . Dab mu digey, ma ra matanageyem. Mu t’ufeg, me yororiyem.”​—Proverbs 2:11, NW; 4:5, 6.

¹² Gad be maruweliy gelngidad i lemnag ban’en ni faan gad ra fal’eg i lemnag e n’en ni gad ra fil ko Thin rok Got. Ngan fal’eg i lemnag ban’en e ra ayuwegdad ma rayog ni nge gel gelngidad i nang fan ban’en ma aram e rayog ni ngada ted nib m’on ko yafas rodad e tin baga’ fan. Re n’en ney e baga’ fan, ya sana bochan e n’en ni buch rodad ma oren i gadad e manang ni ra sum e magawon u nap’an ni girdi’ e ka ra ted e tin ni de ga’ fan nib m’on ko yafas rorad ni sana dar lemnaged ara lem rorad. Fayleng rok Satan e be wawliydad ni ngad adaged e chugum, nge gilbuguwan, nge gelngiy, ma Jehovah e ma pi’ e athamgil nga lanin’dad ni ngaud tedan’dad ko tin ni bay rogon ko liyor rodad ngak Got. Ba tabinaw ni de yog ni ngar ted nib m’on e tirok Got ban’en ko tin nu fayleng e ra wagay, ma ra kireb thilrad, ma tin ni yad be nameg ko tirok Got e ra war. Ma angin ni ra yib riy, e ra gafgow be’ ma ke mus ni nge riyul’ ngak e thin ni yog Jesus ni gaar: “Be mang e ra fel’ rogon be’ riy ni faanra yog ngak e re fayleng n’ey ni polo’, machane me thay e bin riyul’ e yafas u pa’?” (Mark 8:36) Gonop e be yog ni ngada folgad ko fonow rok Jesus ni gaar: “Ere ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.”​—Matthew 6:33.

Riya’ ko Goo Gur e Ga Be Lemnagem

13, 14. Mang e be yip’ fan ni be’ e kemus ni ir e be lemnag ir, ma mang fan ni de gonop ni ngan yodor?

¹³ Girdi’ e baga’ ni yad ma lemnag rarogorad, mab puluw e re n’ey. Machane, faanra tin ni be yim’ be’ ni bochan e ke mang tin ni rib ga’ fan ko yafas rok, ma ra yib e magawon riy. Ere, rogon ni ngan ayuweg ni nge par nib fel’ thildad Jehovah, ma ke fonownagdad ni ngad siyeged e lem ni kemus ni goo gadad e gad be lemnagdad. Re thin ney e be yip’ fan be’ ni “ke mus ni be magafan’ ko tin ni be yim’ nbochan, nge tin nib t’uf rok, ara tin ni baadag.” Gur gathi boor e girdi’ e chiney ni aram rogon? Baga’ fan, Bible e be yiiynag ni “tin tomren e rran” ko fayleng rok Satan nib kireb, e “girdi’ e kemus ni yad e yad be lemnagrad.”​—2 Timothy 3:1, 2.

¹⁴ Piin Kristiano e yad manang nib gonop ni ngan fol ko motochiyel u lan e Bible ni ngaun tiyan’uy ngak boch e girdi’, min dag e t’ufeg ngorad ni bod rogon ni ma t’ufeg be’ downgin. (Luke 10:27; Filippi 2:4) Sana oren e girdi’ e ma lemnag ni de puluw e re n’ey, machane baga’ fan e re n’ey ni fan ni nge fel’ rogon e mabgol rodad, ma ra fel’ e tha’ u thilin girdien e tabinaw, nge rogon ni ngeb e felfelan’ nga fithik’ e girdi’ ni yad fager. Ere, bin riyul’ e tapigpig rok Jehovah e thingari dabi pag ni lem ni fel’ ngak ni nge gagiyegnag e yafas rok ma nge n’ag e tin nrib ga’ fan ni ngan rin’. Bin som’mon ma bin nib ga’ fan, e be yip’ fan e maruwel ni bay rogon ko liyor ni ma tay ni fan ku Jehovah, ni fare Got ni be liyor ngak.

15, 16. (a) Girdi’ ni kemus ni ir e be lemnag ir e ra aw ko mang, nrogon ni dag mini’? (b) Tin riyul’ riy, mang e ra rin’ be’ nfaanra papey ni nge turguy e kireb nga daken boch e girdi’?

¹⁵ Ani kemus ni ir e be lemnag ir e rayog ni aw ni nge lemnag ni ir e ba mat’aw, ma bochan e re n’ey ma rayog ni aw ni dabki rung’ag e thin rok yugu boch e girdi’, ma ma rin’ ban’en ni dan pi’ mat’awon. Ba puluw ni yog e Bible ni gaar: “Ga be turguy e kireb nga daken be’ u fithik’ e lem nib kireb? Demtrug ko gur mini’, ma dakuriy e tawey rom. Ya ga ra turguy e kireb nga daken boch e girdi’ u fithik’ e lem nib kireb, ma ka ga be rin’ e pi n’en ni yad be rin’, ma aram e gur e ka ga be turguy e gechig rom.” (Roma 2:1; 14:4, 10) Pi tayugang ko teliw u nap’an Jesus e kari mich u wan’rad ni yad ba mat’aw arfan ni kar lemnaged ni bay rogorad ni ngar gathibthibnaged e tin ni ke rin’ Jesus nge pi gachalpen. Bochan e re n’em, ma kar ted ni yad e pi tapuf oloboch. Bochan ni dar guyed e oloboch rorad, ma aram e kar turguyed e kireb nga dakenrad.

¹⁶ Judas, ni gachalpen Jesus ni yognag, e ke pag ni nge mang be’ ni ma turguy e kireb nga daken boch e girdi’. Ba’ biyay u Bethany u nap’an ni Maria ni walagen Lazarus, e ke puog e florida nga daken Jesus, me togopuluw Judas nib gel. Me dag e damumuw rok me yog ni gaar: “Mang fan ndan pi’ e re florida nem ni chuway’ ndalip mir’ay e dollar puluwon mi ni wereg u pa’ e piin ni gafgow?” Machane thin nu Bible e be ulul ngay i weliy ni gaar: “I yog e re bugithin ney ni gathi bochan e ba t’uf e piin ni yad ba gafgow rok, machane bochan e ir be’ nib moro’ro’; ya ir e ma fek tafen e salpiy rorad ma ma iring boch e salpiy riy.” (John 12:1-6) Dab da boded Judas ara pi tayugang ko teliw, nib papey ni ma turguy e kireb nga daken boch e girdi’, ya yira turguy e kireb nga dakenrad ni bochan.

17. Mu weliy e riya’ ni bay riy ni ngan ufanthin ara pagan’ be’ ngak nib pag rogon.

¹⁷ Ba kireban’, ya boch e Kristiano kakrom, e yugu aram rogon ni gathi yad ba moro’ro’ ni bod Judas, ma kar manged e girdi’ nib tolangan’. Me yol James ni fan ngorad ni gaar: “Machane chiney e ke tolangan’med gimed be yog ni gimed e soromed.” Miki ulul ngay ni gaar: “Urngin e pi n’ir ni gimed be yog ni gimed e soromed riy e ba kireb.” (James 4:16) Ngan uf ko pi n’en ni kada rin’ed ara boch e maruwel ni fan ko pigpig ku Jehovah e ba kireb. (Proverbs 14:16) Ra yib ngan’dad e n’en ni buch rok Peter ni apostal, ni ba’ biyay ni kari pagan’ ngak me uf ni gaar: “Ra pagem e pi cha’ney ni yad gubin, mi gag e ri dab gu pagem! . . . Mus ni faanra nggu un ngom ko yam’, ma ri dab gog nda gu nangem.” Tin riyul’ riy, e dariy ban’en u murung’agdad ni rayog ni ngad ufgad ngay. Urngin ban’en ni bay rodad e ke yog ngodad ni kemus ni bochan e t’ufeg nib yul’yul’ rok Jehovah. Ngan lemnag e re n’ey ma ra palognagdad ko ngongol nib ufanthin.​—Matthew 26:33-35, 69-75.

18. Uw rogon u wan’ Jehovah e lem nib tolang?

¹⁸ “Ufanthin e bay u m’on ko ngan mul nib gel, ma tolangan’ e bay u m’on ko ngan dol’ nga but’,” ka nog ngodad ni aram rogon. Mang fan? Ke fulweg Jehovah taban ni gaar: “Fanenikag . . . e tolangan’.” (Proverbs 8:13; 16:18, NW) Arfan ni ke damumuw Jehovah ngak fare “pilung nu Assyria ni gum’irchaen e ma dariyfanang e girdi’ ma ma tolangnag ir mab tolangan’.” (Isaiah 10:12, NW) Me gechignag Jehovah fare pilung. Dabki n’uw nap’an ma fayleng rok Satan ni polo’, nib muun ngay e pi tayugang riy nib ufanthin ma yad ma tolangnagrad, ni piin ni rayog ni ngan guyrad nge tin dabiyog ni ngan guyrad, e ki yira gechignagrad. Yibe athapeg ni ndabda folwokgad ko ngongol rok e pi toogor rok Jehovah nib gelan’rad!

19. Mang e n’en ni girdi’ rok Got e yad ma uf ngay machane ka yad be par nib sobut’an’rad?

¹⁹ Tin riyul’ e Kristiano e ri bay fan ni ngar ufgad ko taw’ath ni yad e tapigpig rok Jehovah. (Jeremiah 9:24) Maku, ri bay fan ni ngar pared nib sobut’an’rad. Mang fan? Ya bochan ni “ke denen urngin e girdi’, kar pired ni yad mmal’af rok Got ke mul e flaab rok u pa’rad.” (Roma 3:23) Ere fan ni ngada yororiyed gadad ni gadad e pi tapigpig rok Jehovah, ma thingari par e lem rodad ni bod Paul, ya ke yog ni “Kristus Jesus e yib nga ray nga fayleng ni nge thapeg e pi tadenen ngak Got,” Me ulul ngay ni gaar: “Me gag e th’abi kireb u fithik’rad.”​—1 Timothy 1:15.

20. Uw rogon ni ma yororiy Jehovah e girdi’ rok e ngiyal’ ney, ma uw rogon ni nge ayuwegrad ko gabul nge langlath?

²⁰ Bochan ni girdi’ rok Jehovah e yad ba felfelan’ ni yad be tay e tin ni yad baadag nga tomur nge yog ni ngar ted e tin ni baadag Got nga m’on, ma ke pagan’dad ni ra ulul Jehovah ni nge yororiyrad ko tirok Got. Maku rayog ni ngada pagedan’dad u nap’an ni ra yib fare gafgow nib ga’, ma ra yororiy Jehovah e girdi’ rok ko tirok ban’en nge dowrad. U nap’an ni nga ranod nga lan fa bin nib biech e fayleng, ma rayog ni nga rogned e thin nib ga’ lamrad ni gaar: “Am sap! Ireray e Got rodad. Gad ma pagan’dad ngak, ma ra ayuwegdad. I ir Jehovah. Gad be pagan’dad ngak. Gad ra felfelan’ ko ayuw ni ra pi’ ngodad.”​—Isaiah 25:9, NW.

Ka Ga Manang?

• Uw rogon ni kan yororiy David ni Pilung nge Jesus Kristus?

• Uw rogon ni yibe yororiy e girdi’ rok Got e ngiyal’ ney?

• Mang fan ni thingar da siyeged ni goo gadad e gad be lemnagdad?

• Mang fan ni rayog ni ngada ufgad ma ka gad ba sobut’an’?

[Pictures on page 17]

Uw rogon ni yororiy Jehovah David nge Jesus?

[Pictures on page 19]

Uw rogon ni yibe yororiy e girdi’ rok Got e ngiyal’ ney ko tirok ban’en?

[Pictures on page 20]

Yugu aram rogon ni gad be uf ni gadad be pigpig ku Jehovah, ma thingar da pared nib sobut’an’dad