Thin Nib Fel’ Ni Fan Ngak Girdien Urngin E Nam

“Gimed ra weliy murung’ageg . . . nge yan i mada’ ko yungi n’en ni yan i mus e fayleng ngay.”​—ACTS 1:8.

1. Mang e thingar da tedan’dad ngay ni gad e pi tamachib ni gad ma fil e Bible ngak e girdi’, ma mang fan?

BA SENSEY ni ba salap e ra tayan’ ko n’en ni ra fil ngak girdien e skul maku ra tayan’ nga rogon ni be fil. Maku arrogodad ni gad ma fil e machib ko Bible ngak e girdi’. Gad ma tayan’dad ko machib ni gad ma fil ngak e girdi’ maku gad ma tayan’dad nga rogon ni gad ma fil. Der ma thil fare machib ni morngaagen Gil’ilungun Got, machane gad ma thilthilyeg e kanawo’ ni gad ra fanay ni ngada machibnaged e re thin nem. Mang fan? Ya nge taw fare machib ngak boor e girdi’.

2. Mini’ e gad be folwok rok u nap’an ni gad ra thilthilyeg kanawoen e machib rodad?

² Nap’an ni gad ma thilthilyeg rogon ni gad ma machib ma gad be folwok rok e pi tapigpig rok Got kakrom. Amu lemnag e n’en ni rin’ apostal Paul. Be gaar: “Nap’an ni gu be maruwel u fithik’ piyu Israel e gu par ni gu bod be’ u Israel ni fan e nggu yognagrad ngak Kristus . . . Ma faanra gu be par u fithik’ e piin nib meewar mu gu meewarnigeg, ni fan e nggu yognagrad ngak Kristus. Ere kug mang urngin mit e girdi’ ngak urngin mit e girdi’, ni fan e nggu yognag boch i yad ngak Kristus u rogon e re mit i kanawo’ nrayog riy.” (1 Korinth 9:19-23) Bay angin e machib ni tay Paul ni bochan e ke thilthilyeg e kanawo’ ni ke machib riy. Maku arrogodad ni bay angin e machib ni gad ra tay ni faan gad ra thilyeg kanawoen e machib rodad nge m’ag ngak e ani be motoyil ngodad.

“Nge Mada’ ko Yungi N’en ni Mus e Fayleng Ngay”

3. (a) Mang e magawon rodad ni gad be machibnag e girdi’? (b) Uw rogon ni ke lebug e thin u Isaiah 45:22 e ngiyal’ ney?

³ Reb e magawon rok e piin ni yad be machibnag fare thin nib fel’ e kari ga’ yang ni ngar machibgad riy​—“ya ga’ngin yang e fayleng.” (Matthew 24:14) U lan e re raay e duw ney e kari athamgil e pi tapigpig rok Jehovah ni nge taw fare thin nib fel’ nga boor e nam. Mang angin e athamgil ni kar ted? Ke garer fare thin nib fel’ nga ga’ngin yang e fayleng. U tobolngin e pi duw ko 1900 e ke mus ni buchuuw e nam ni i machib e Pi Mich Rok Jehovah riy, machane chiney e be machib e Pi Mich Rok Jehovah u lan 235 e nam! Riyul’ ni ke taw fare thin nib fel’ ni morngaagen Gil’ilungun ko “yungi n’en ni mus e fayleng ngay.”​—Isaiah 45:22, NW.

4, 5. (a) Chon mini’ e baga’ e ayuw ni kar pied ya nge garer fare thin nib fel’? (b) Mang e be yog boch e ofis rodad u morngaagen e piin ni kar bad u boch e nam ni ngar machibgad u yugu boch e nam?

⁴ Mang fan ni ke mon’og e machib? Boor fan. Kan skulnag e missionary u Watchtower Bible School of Gilead ma ke pag 20,000 e girdi’ ni kan skulnag ko fare Ministerial Training School. Ma ri baga’ e ayuw ni yib ko pi skul nem. Maku boor e Mich Rok Jehovah ni kar chuwgad ko binaw rorad ma ranod nga yugu boch e nam nib t’uf e ayuw riy. Ma kar rin’ed ni yad e kar pied puluwon e pi magawon rorad. Pi Kristiano ney ni kar paged farad​—ni piin ni pumoon nge piin ni ppin, nge piin nib fel’ yangaren nge piin ni pilibthir, nge piin nib mabgol nge piin ni dawor ra mabgolgad—​yad gubin e kar wereged fare machib ni morngaagen Gil’ilungun Got u fayleng i yan. (Psalm 110:3; Roma 10:18) Ma yima tay fan e pi girdi’ nem. Ngada bieged boch e thin ni yib ko ofis rodad u morngaagen e piin ni kar paged taferad ya ngar pied e ayuw ko gini ba t’uf e ayuw riy.

⁵ “Pi Mich Rok Jehovah ney e yad ma gagiyegnag e machib u boch e binaw nib palog, mi yad tababnag boch e ulung nib biech, ma yad ma ayuweg pi walagdad ni nge gel e michan’ rorad.” (Thin rok yu Ecuador) “Faan manga chuw urngin e girdi’ rodad ni kar bad u yugu boch e nam, ma ra magawon e pi ulung rodad. Ri gamad ba taw’ath ni bocherad.” (Thin rok yu Dominican Republic) “Boor e ulung rodad ni ppin e boor riy yu ngiyal’ ma ma yan urngin nge mada’ ko medlip i ragag e pasent ko ulung rodad. (Psalm 68:11) Boor i yad ni dawori n’uw nap’rad ko machib, machane ke yib boch e pioneer ni ppin u yugu boch e binaw ni kar ayuweged e pi ppin ney ni ngar machibgad. Gamad ba taw’ath ni bochan e pi ppin ney ni kar bad u yugu boch e nam!” (Ba nam u Eastern Europe) Me gur, kam lemnag ni ngam machib u yugu reb e nam, fa?​—Acts 16:9, 10.

“Ragag e Pumoon ni Ra Bad u Urngin Miti Thin”

6. Uw rogon ni tamilangnag Zekariah 8:23 e magawon ni bay rodad ni ngad wereged e machib ni bochan e boor miti thin?

⁶ Ku reb e magawon e ke yoor mit e thin u fayleng. I yog e Thin Rok Got ni gaar: “Ra taw ko re ngiyal’ i n’em ma ragag e pumoon u urngin miti thin ko pi nam e yad ra kol e mad rok reb e moon ni be’ nu Jew nra lungurad, ‘Gamad ra un ngomed, ya kug rung’aged ni bay Got romed.’” (Zekariah 8:23, NW) Ngiyal’ ney ma fa ragag i pumoon e be yip’ fan fare ulung ni baga’ ni be weliy e Revelation 7:9 morngaagen. Mu tay fanam iyan riy ni yog Zekariah ni “fa ragag i pumoon” e ra bad u “urngin miti thin ko pi nam.” Kada guyed ni ke lebug e re thin ko profet ney, fa? Kada guyed.

7. Mang boch e thin ni be dag ni girdi’ “u urngin mit e thin” e kar rung’aged fare thin nib fel’?

⁷ Ba aray boch e thin: Wugem e duw faram ma kan fl’eg e pi babyor rodad ni 90 mit e thin. Chiney e ke mun boch ngay ke taw ko 400 mit e thin. “Fare tapigpig nib yul’yul’ mab gonop” e kari athamgil ni nge yog e babyor ngak e girdi’ ni mus ko pi nam ni ri buchuuw e girdi’ riy. (Matthew 24:45) Bay e pi babyor rodad nthin nu Greenland (ni 47,000 e girdi’ ni manang e re thin nem), Belau (ni 15,000 e girdi’ ni manang e re thin nem), nge Waab (ni ba lich ko 7,000 e girdi’ ni manang e re thin nem).

“Ba Mab ni Baga’” ni Ke Mab Nga Boch e Maruwel nib Biech

8, 9. Mang e ke buch me mab e “mab ni baga’” ngodad, ma mang e rin’ bokum biyu’ e Mich Rok Jehovah?

⁸ Ngiyal’ ney ma gathi thingar da chuwgad ko nam rodad nga darod nga yugu boch e nam ni fan e ngada machibnaged e girdi’ nu yugu boch e nam. Ngiyal’ ney ma bokum million e girdi’ ni kar chuwgad ko nam rorad ka ranod nga yugu boch e nam ni bay e maruwel riy me yoor e girdi’ nu bang ko pi nam nem ni yad ma yog e thin u yugu boch e nam. Susun, u Paris u France e yima yog e thin ni 100 mit. U Toronto u Canada e yima yog e thin ni 125 mit; mu London u England e bay 300 mit e thin riy! U lan e pi nam nem e ke mab e “mab ni baga’” ni ngan machibnag e girdi’ ko urngin e nam.​—1 Korinth 16:9.

⁹ Bokum biyu’ e Mich Rok Jehovah e yad be fil e thin u yugu boch e nam ni bochan e ngar ayuweged e pi girdi’ nem. Yad mmagawon riy, machane kab gel e felfelan’ rorad ko magawon ni yad be ayuweg e girdi’ nu yugu boch e nam ni ngar filed e machib ni bay ko Thin Rok Got. In e duw faram ma gonapan 40 e pasent ko urngin e girdi’ ni kan taufenag ko district convention u reb e nam u Western Europe e ra bad u yugu reb e nam.

10. Gur, uw rogon ni kam maruweliy fare ke babyor ni Good News for People of All Nations? (Ku mu guy fare thin ni “Pi N’en ni Bay ko fare Ke Babyor ni Good News for People of All Nations” ni bay ko page 16.)

¹⁰ Riyul’ ni dabiyog rodad ni gad gubin ni ngada filed e thin nu yugu reb e nam. Machane rayog ni ngada ayuweged e girdi’ u yugu boch e nam ni gad be fanay fare ke babyor ni Good News for People of All Nations,a bay e machib ko re ke babyor nem ni boor mit e thin. (John 4:37) Ga ma maruweliy e re ke babyor nem u nap’an ni ga ma machib, fa?

Faanra Dabi Motoyil e Girdi’

11. Mang yugu reb e magawon u boch e binaw?

¹¹ Be suruy Satan e girdi’ nu fayleng, ere bay reb e magawon rodad​—gathi ri yi ba adag e machib u boch e binaw. Ma gathi kada gingad ngay, ya i yog Jesus ni ra arrogon e fayleng e ngiyal’ ney. I weliy Jesus morngaagen e ngiyal’ rodad ney ni gaar: “Ma aram gelngin ni bayi wer ko girdi’ e tin nib kireb ni aram e rogon nib t’uf be’ rok be’ e bayi meewar.” (Matthew 24:12) Ke riyul’ e re thin nem ya gathi rib mich Got u wan’ boor e girdi’ ma gathi ri yima tay fan e Bible. (2 Peter 3:3, 4) Ere u yu yang e fayleng e ri buchuuw e girdi’ ni kar manged pi gachalpen Kristus. Machane gathi be yip’ fan ni dariy fan e maruwel rok e pi walagdad ni Kristiano ni yad ba yul’yul’ ni yad be machib u boch e binaw ni gathi ri yi ba adag e machib riy. (Hebrews 6:10) Mang fan? Amu lemnag e pi thin ni ba aray.

12. Mang l’agruw i fan ni gad ma machibnag e girdi’?

¹² Fare Gospel ni yoloy Matthew e ma tamilangnag l’agruw fan ni gad ma machib. Reb riy e “ngada ayuweged e girdi’ ko urngin e nam ngar manged pi gachalpen Jesus.” (Matthew 28:19) Ma bin l’agruw riy e nge urngin e girdi’ “me nang.” (Matthew 24:14) Baga’ fan e gali thin ney machane ba gagiyel e bin ni l’agruw. Mang fan?

13, 14. (a) Mang bang ko fare pow ni ba gagiyel u nap’an e wub rok Kristus? (b) Mang e dab da paged talin u nap’an ni gad ra machib u boch e binaw ni gathi ri yi ba adag e machib rodad riy?

¹³ I yoloy Matthew e deer ni fith e pi apostal ngak Jesus ni lungurad: “Mog ngomad ko wuin e ra yib urngin fapi n’en ni ka mog, nge n’en nra yib ni nge dag ni ke taw ko ngiyal’ ni bay mub riy nge ngiyal’ ni tomren e fayleng.” (Matthew 24:3) Me fulweg Jesus e deer rorad me yog ni bang ko re pow nem ni ra gagiyel e aram e machib ni yira tay u ga’ngin yang e fayleng. Be weliy ni ngan ayuweg e girdi’ ni ngar manged pi gachalpen, fa? Danga’. I gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Ere ke tamilangnag Jesus ni bang ko re pow nem ni ba gagiyel e aram e machib ni yira tay ni yibe wereg fare thin nib fel’ u morngaagen Gil’ilungun Got.

¹⁴ Ere nap’an ni gad be machibnag fare thin nib fel’ ni morngaagen Gil’ilungun Got e “ke rung’ag e girdi’,” ni yugu aram rogon ni de yog rodad ni ngada ayuweged e pi girdi’ ney ni ngar manged pi gachalpen Jesus. Yugu demutrug ko ra motoyil e girdi’ fa danga’, yad manang e n’en ni gad be rin’, ma aram e ke lebug e thin rok Jesus. (Isaiah 52:7; Revelation 14:6, 7) Be’ nib fel’ yangaren ni Jordy fithingan ni be’ nu Western Europe e ke gaar: “Gu ma felfelan’ ya gu manang ni ke fanayeg Jehovah ni fan e nge lebug fare thin u Matthew 24:14.” (2 Korinth 2:15-17) Dabi siy ni ku arrogon lanin’um.

Faan Yira Togopuluw ko Machib Rodad

15. (a) Mang e i yog Jesus ngak pi gachalpen? (b) Mang e ma ayuwegdad ni nguuda machibgad ni yugu aram rogon ni yima togopuluw?

¹⁵ Yugu reb e magawon ko machib ni gad be tay ni gad be wereg fare thin nib fel’ u morngaagen Gil’ilungun Got e yima togopuluw ko machib. I ginang Jesus pi gachalpen ni gaar: “Ma urngin e girdi’ ni bay ra fanenikayed gimed ni bochag.” (Matthew 24:9) Yima fanenikay pi gachalpen Jesus e ngiyal’ ney ma yima togopuluw ngorad ma yima gafgownagrad ni bod rogon ni un rin’ ngak e tin som’mon e Kristiano. (Acts 5:17, 18, 40; 2 Timothy 3:12; Revelation 12:12, 17) U boch e binaw e ke tay e am riy ni dabiyog ni ngan machib. Machane tin riyul’ e Kristiano ko pi nam nem e yad ma fol rok Got mi yad machibnag fare thin nib fel’ u morngaagen Gil’ilungun Got. (Amos 3:8; Acts 5:29; 1 Peter 2:21) Mang e ke ayuweg urngin e Pi Mich Rok Jehovah ni nguur machibgad u fayleng iyan? Ke gelnagrad Jehovah u daken e kan ni thothup rok.​—Zekariah 4:6; Efesus 3:16; 2 Timothy 4:17.

16. Uw rogon ni tamilangnag Jesus ni bay rogon e kan ni thothup nge fare maruwel ni ngan machibnag e girdi’?

¹⁶ I tamilangnag Jesus ni bay rogon e kan ni thothup rok Got nge maruwel rodad ni gad ma machib ni faani gaar ngak pi gachalpen: “Machane bay yib gelngimed ko ngiyal’ ni bay yib fare Kan ni Thothup riy nga dakenmed, ma aram mi gimed weliy murung’ageg . . . nge yan i mada’ ko yungi n’en ni yan i mus e fayleng ngay.” (Acts 1:8; Revelation 22:17) Mu tay fanam iyan riy ko re thin ko Bible nem ko mang e ra buch ko som’mon me buch e bin migid. Ya som’mon me yib e kan ni thothup nga daken pi gachalpen Jesus nge mu’ mi yad machib u fayleng iyan. Bochan e ayuw ni yib rok e kan ni thothup rok Got e ke yog gelngirad ni ngar athamgilgad ni ngar “machibnaged e pi nam.” (Matthew 24:13, 14; Isaiah 61:1, 2) Ere bpuluw fare thin ni “Taayuw” ni i pining Jesus ngak fare kan ni thothup. (John 15:26) I yog Jesus ni fare kan ni thothup rok Got e ra skulnag pi gachalpen ma ra pow’iyrad.​—John 14:16, 26; 16:13.

17. Uw rogon ni ma ayuwegdad e kan ni thothup u nap’an nra gel e togopuluw ni yib ngodad?

¹⁷ Mang boch e kanawo’ ni ma ayuwegdad e kan ni thothup rok Got riy u nap’an ni yib e togopuluw nib gel ko fare thin nib fel’ ni yibe machibnag? Ma gelnagdad e kan ni thothup, me togopuluw ngak e piin ni yad be gafgownagdad. Ke m’ug ni arrogon ko n’en ni buch rok Saul ni Pilung.

Ke Togopuluw e Kan ni Thothup rok Got

18. (a) Uw rogon ni ke thil Saul me kireb iyan? (b) Mang boch ban’en ni rin’ Saul ya nge gafgownag David?

¹⁸ Saul e ir e bin som’mon e pilung nu Israel ma som’mon ko tobolngin ma ir ba pilung nib fel’, machane boch nga tomren ma de fol rok Jehovah. (1 Samuel 10:1, 24; 11:14, 15; 15:17-23) Ma aram e de ayuweg e kan ni thothup rok Got fare pilung. I gel e dumumuw rok Saul ngak David ya kan duguliy David ni nge mang e bin ni migid e pilung ma fare kan ni thothup e ke ayuweg David. (1 Samuel 16:1, 13, 14) Gowa ba mom ni ngan cham ngak David. Ya ke mus ni ba talin e musik e bay rok David ma bay e sarey rok Saul. Ere reb e rran ni be chubeg David tatalin e musik rok, “me gaar Saul u wan’, “Nggu richibiy ko rungrung,” me pag fare sarey ngak ni l’agruw yay; me pilo’ David riy.” (1 Samuel 18:10, 11) Boch nga tomren, me fol Saul rok Jonathan ni fak, ma Jonathan nge David e yow fager, me micheg Saul ni gaar: “Gu micheg nga fithingan Jehovah ni dab kun li’ David ngem’.” Machane “ke guy Saul rogon ni nge rugoy fare sarey ngak David nge richibiy ko rungrung.” Machane “me pilo’ David riy me yan i rog fare sarey ko rungrung.” Me mil David rok Saul, me l’ol’og Saul David. Ngiyal’ nem e ke togopuluw e kan ni thothup rok Got ngak Saul. Uw rogon?​—1 Samuel 19:6, 10.

19. Uw rogon ni matanagiy e kan ni thothup David?

¹⁹ I mil David me yan ngak Samuel ni profet, machane i l’og Saul e pi salthaw rok ni ngar koled. Ma nap’an ni taw e pi salthaw ko gini be mith David riy, “me yib i ying e kan ni thothup rok Got ngak fapi pumoon ni ke l’ograd Saul, ma ku er rogon yad nra tababgad i weliy e yiiy.” Ke gel e kan ni thothup rok Got ngorad mar paged talin fan ni yad be lek David. Ka l’agruw yay ni l’og Saul e girdi’ ni ngar sulweged David, machane taareb e n’en ni buch rorad. Tomur riy, me yan Saul ngak David, machane dabiyog rok Saul ni nge togopuluw ko kan ni thothup rok Got. Ma fare kan ni thothup e ke taleg Saul “ni polo’ reb e rran nge reb e nep’”​—me yog rok David ni nge mil rok.​—1 Samuel 19:20-24.

20. Mang e gad be fil ko fare thin u morngaagen e togopuluw ni tay Saul ngak David?

²⁰ Re thin ney u morngaagen Saul nge David e ma fil ban’en ni ma gelnag lanin’dad: Dabiyog rok e piin ni yad ma togopuluw ngak e pi tapigpig rok Got ni nge m’ag e tin ni yad be lemnag ni faanra togopuluw e kan ni thothup rok Got ngorad. (Psalm 46:11; 125:2) M’agan’ Jehovah ngay ni nge pilung David u Israel. Dariy be’ nrayog rok ni nge thilyeg e n’en nib m’agan’ Got ngay. Ngiyal’ ney e ke turguy Jehovah ni “re thin rok Got ney nib fel’ ni murung’agen e gagiyeg rok Got e bay ni machibnag.” Dariy be’ nrayog rok ni nge taleg e re machib nem.​—Acts 5:40, 42.

21. (a) Mang e ma rin’ boch e girdi’ ni yad ma togopuluw ngodad? (b) Mang e ke pagan’dad ngay?

²¹ Pi tayugang’ ko pi yurba’ i teliw nge pi am e yad ma fanay e sasalap nge bugel ni yad be guy rogon ni ngar taleged e machib rodad. Machane, ra ayuweg Jehovah e girdi’ rok e ngiyal’ ney, ni bod rogon ni i ayuweg David nge michan’ rok. (Malaki 3:6) Ere taareban’dad David, ni ri pagan’dad ni be lungudad: “Kug pagan’ug ngak Got. Dab gu tamdag. Mang e rayog ni nge rin’ e girdi’ ngog?” (Psalm 56:11, NW; 121:1-8; Roma 8:31) Nge ayuwegdad Jehovah, ni nguuda gelgad ko pi n’en nra magawonnag e maruwel ni ke pi’ Got ngodad ni ngada machibnaged fare thin nib fel’ u morngaagen Gil’ilungun Got ngak e girdi’ ko pi nam.

[Footnote]

Ka Ga Manang?

• Mang fan ni gad ma thilthilyeg kanawoen e machib rodad?

• Ke mab e “mab ni baga’” ko mang?

• Mang angin e machib rodad, ko pi binaw ni gathi ri yi ba adag e machib rodad riy?

• Mang fan ndabiyog rok e piin ni tatogopuluw ni ngar taleged e machib?

[Box/Picture on page 16]

Yu Yang Fare Ke Babyor ni Good News for People of All Nations

Bay e machib ni kan yoloy u lan taareb e page u lan fare ke babyor ni Good News for People of All Nations ma kan pilyeg e re machib nem nga 92 miti thin. Nap’an nra bieg e ani be motoyil ko machib rom e re machib nem ma gowa ga be non ngak.

U lan e bin som’mon e page ko re ke babyor nem e bay ba map ara yaan e pi nam nu fayleng riy. Ngam dag e re map ney ya nge fel’ thilmew e ani ga be machibnag. Rayog ni ngam dag fare nam ni gimew be par riy ma ga fith e nam rok. Aram rogon nrayog ni nge non faanem ngom me fel’ e thin romew.

U tobolngin e re ke babyor nem e be yog kanawoen ni ngada machibnaged e girdi’ ni ma thin u yugu reb e nam ni dada nanged e thin riy. Mu fl’eg i bieg e re thin nem ma ga fol nga kanawoen.

U tobolngin e re ke babyor nem e bay riy urngin miti thin ko fare ke babyor nge fare yol ni be yip’ fan fare thin. Re n’en ney e ra ayuwegem ni ngam nang ko mang thin e bay u lan e pi babyor rodad nfl’eg u boor miti thin.

[Picture]

Ga be maruweliy e re ke babyor ney u nap’an ni ga ma machib, fa?

[Pictures on page 13]

Ke pag 400 miti thin ni bay e pi babyor rodad ni ma weliy fan e Bible

GHANA

LAPLAND (ara SWEDEN)

PHILIPPINES

[Pictures on page 14, 15]

Rayog ni ngam ayuweg e machib ko gini ba t’uf e ayuw riy, fa?

ECUADOR

DOMINICAN REPUBLIC