“Lamrad E Wer Nga Urngin Yang U Daken E Fayleng”

“Mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare kan ni thothup.”​—Matthew 28:19.

1, 2. (a) Mang maruwel ni pi’ Jesus ngak pi gachalpen? (b) Mang fan ni rayog rok e tin somm’on e Kristiano ni nge yoor e maruwel rorad?

DE N’UW nap’an u m’on ni yan Jesus nga tharmiy me duguliy pi gachalpen ni ngar rin’ed ban’en. I yog ngorad ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy, nge Fak nge fare kan ni thothup.” (Matthew 28:19) Ri ba ga’ e re maruwel nem!

² Amu lemnag! Nap’an Pentecost ko duw ni 33 C.E. kan puog e kan ni thothup nga daken 120 i gachalpen Jesus mi yad fol ko fare motochiyel ni pi’ Jesus ngorad ma kar weliyed ngak yugu boch e girdi’ ni Jesus e ir fare Messiah ni yibe sonnag ma ra yib e yafas u daken Jesus. (Acts 2:1-36) Ra diin ni nge yog rok re ulung nib achig nem ni ngar machibnaged “girdien urngin e nam”? Dabiyog rok e girdi’ machane “Got e urngin ban’en ma rayog rok.” (Matthew 19:26) Kan ni thothup rok Jehovah e ke ayuweg e tin somm’on e Kristiano maku yad ba pasig. (Zechariah 4:6; 2 Timothy 4:2) Ere u lan in e duw ma rayog rok apostal Paul ni nge yog ni ke taw fare thin nib fel’ “ngak urngin e girdi’ nu fayleng.”​—Kolose 1:23.

3. Mang fan ni daki gagiyel e “woldug ni wheat” ni be yip’ fan e pi Kristiano?

³ U lan e bin somm’on e chibog e ke garer e bin riyul’ e liyor ngak Got. Machane, i yog Jesus u m’on riy ni ra taw nga ba ngiyal’ ni ra yung Satan awochngin e “pan” ma dab kun poy e “woldug ni wheat” ni be yip’ fan e tin riyul’ e Kristiano ma ra par ni aram rogon ni bokum miriay e duw nge mada’ ko ngiyal’ ni ngan kunuy e woldug. Ke lebug e re thin nem u tomren ni yim’ e pi apostal.​—Matthew 13:24-39.

Ngiyal’ Ney E Ke Yoor E Girdi’ Iyan Ni Papey

4, 5. Ka nap’an e duw ni 1919, mang maruwel ni ke un e pi Kristiano ni kan duguliyrad ko kan ni thothup ngay, ma mang fan nib mo’maw’ e maruwel rorad?

⁴ Nap’an fare duw ni 1919 ke taw nga nap’an ni ngan kunuy e wheat ni be yip’ fan e tin riyul’ e Kristiano ngan daregrad ko fapi pan. Manang e pi Kristiano ni kan duguliyrad ko kan ni thothup ni nguun fol ko fare motochiyel ni ke pi’ Jesus. Kari mich u wan’rad ni yad be par ko “tin tomren e rran” ma yad manang fare thin ni yog Jesus ni gaar: “Ma re Thin Rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma ara mfini’ taw nga tomren e fayleng.” (2 Timothy 3:1; Matthew 24:14) Arrogon, yad manang ni ka bay boor e maruwel ni ngan rin’.

⁵ Machane, mo’maw’ e maruwel rok e pi Kristiano nem ni bod rogon nib gel e maruwel rok pi gachalpen Jesus ko duw ni 33 C.E. Ya ke mus ni yad in biyu’ e girdi’ ni yad ma par u lan in e nam. Ra diin mi yad machibnag fare thin nib fel’ u “gubin yang u fayleng”? Mu tay fanam iyan riy ni ke mun urngin e girdi’ nu fayleng ni 300 million yay urngin e girdi’ u nap’an Caesar, ya gonapan 2 billion e girdi’ u tomren e bin somm’on e mahl ko fayleng. Maku ra yoor iyan e girdi’ nu fayleng u lan e bin 20 e chibog.

6. Uw fene mon’og e fare thin nib fel’ ni yibe machibnag u nap’an e pi duw ko 1930?

⁶ Machane, ke tabab e pi tapigpig rok Jehovah ni kan duguliyrad ko kan ni thothup ni ngar rin’ed e maruwel rorad ni ke pagan’rad ngak Jehovah ma gelngin Got e ke ayuwegrad ni bod rogon ni i ayuweg pi walagrad ko bin somm’on e chibog. Nap’an e pi duw ko 1930 ma gonapan 56,000 e girdi’ e be machibnag fare thin nib fel’ u lan 115 e nam. Ngiyal’ nem e boor e maruwel ni ke m’ay machane ka bay e maruwel ni baga’.

7. (a) Mang maruwel nib biech ma baga’ ni ke pirieg e pi Kristiano ni kan duguliyrad ko kan ni thothup ko duw ni 1935? (b) Uw fene mon’og e machib e chiney ni bochan e ayuw rok fa “yugu boch e saf”?

⁷ Ngiyal’ nem e ke tamilang u wan’rad fare machib u morngaagen fare “ulung ni baga’” ko Revelation 7:9 ma kar nanged ni ra gel boch e maruwel rorad machane kur nanged ni ra yog boch e girdi’ ni ra ayuwegrad ko maruwel. Thingari ni kunuy u fithik’ “urngin e nam nge ganong nge girdi’ nge gubin mit e thin” ba ulung ni baga’ ni dan nang urngirad ni yad “yugu boch e saf” ni yad ma athapeg ni ngar pared u fayleng. (John 10:16) Pi girdi’ ney e ra “pigpiggad ngak Got ni rran nge nep’.” (Revelation 7:15) Yad ra pi’ e ayuw ni ngan wereg e machib ma ngan fil e machib ngak e girdi’. (Isaiah 61:5) Ke falfalan’ e pi Kristiano ni kan duguliyrad ko kan ni thothup ni kar guyed bokum i ragag e biyu’ ma bokum million e girdi’ ni kar uned e wereg fare thin nib fel’. Nap’an fare duw ni 2003 ma bay 6,429,351 e girdi’ ni be machibnag fare thin​—ma baga’ ni yad girdien fare ulung ni baga’.a Pi Kristiano ni kan duguliyrad ko kan ni thothup e yad ma tay fan e ayuw rok yugu boch e saf, ma piin ni yugu boch e saf e ma tay fan e taw’ath ni bay rorad ni ngar ayuweged pi walagrad ni kan duguliyrad ko kan ni thothup.​—Matthew 25:34-40.

8. Mang e rin’ e Pi Mich Rok Jehovah u nap’an ni ke gel e togopuluw u nap’an e bin l’agruw e mahl ko fayleng?

⁸ Nap’an ni ke gagiyel e piin ni yad be yip’ fan e woldug ni wheat me mahl Satan ngorad. (Revelation 12:17) Ma mang e rin’ Satan u nap’an ni m’ug fare ulung ni baga’? Kari gel e cham ni tay! Kari tamilang ni ir tapgin e togopuluw ngak e piin ni ma liyor ngak Got u nap’an e bin l’agruw e mahl ko fayleng, fa? U lan ruw raba’ fare mahl ko fayleng e kan gafgownag e pi Kristiano. Boor e pi walagdad ni pumoon nge ppin ni kar gafgowgad nib gel e skeng rorad ma boch i yad e kan li’rad ni bochan e michan’ rorad. Machane taareb lanin’rad e ani yoloy e psalm ni gaar: “Gu ra un ngak Got ni nggu n’uf e thin rok. Ke pagan’ug ngak Got; ere dab gu tamdag. Mang e rayog ni nge rin’ e girdi’ ngog?” (Psalm 56:4; Matthew 10:28) Gelngin Jehovah e ke gelnag e pi Kristiano ni kan duguliyrad ko kan ni thothup miki ayuweg fa yugu boch e saf, ma kar pared u taabang ni yad mmudugil. (2 Korinth 4:7) Wenegan e re ayuw nem e “ke yoor pi gachalpen Jesus iyan.” (Acts 6:7) Immoy 72,475 e Kristiano nib yul’yul’ ni yad be machib u nap’an ni tabab e mahl ko duw ni 1939. Ma nap’an fare duw ni 1945 e immoy 156,299 e Pi Mich Rok Jehovah ni ur pied e report ni yad be wereg fare thin nib fel’ machane ka bay boor e girdi’ ni de yog ni ngar pied e report ni bochan fare togopuluw. Kari war Satan!

9. Mang skul ni biech ni kan tababnag u nap’an e World War II?

⁹ Ba tamilang ni de maruwaran’ e pi tapigpig rok Jehovah ni ra lebug fare maruwel ni ngan wereg e machib ni yugu aram rogon ni ke wagey e fayleng ni bochan e bin l’agruw e mahl ko fayleng. Danga’ ya nap’an fare duw ni 1943 u nap’an ni kari gel e mahl e ka nog ni ngan tababnag l’agruw e skul. Reb e re skul nem e ir fare Theocratic Ministry School ni kan tay u lan gubin e ulung ni fan e ngan skulnag urngin e Mich Rok Jehovah ni ngar machibgad ma ngar ayuweged yugu boch e girdi’ ni ngar manged pi gachalpen Jesus. Bin l’agruw e skul e ir fare Watchtower Bible School of Gilead ni fan e ngan skulnag e missionary ni ngar tababnaged e machib u yugu boch e nam ni gathi nam rorad. Arrogon, nap’an ni m’ay e mahl, ke m’ay i fl’eg e tin riyul’ e Kristiano rogorad ni nge gel e machib rorad.

10. Uw rogon ni ke m’ug nib pasig e girdi’ rok Jehovah ko duw ni 2003?

¹⁰ Ma rib fel’ e maruwel rorad! Kan skulnag urngin e girdi’​—ni piin ni gilibthir ara piin nib fel’ yangaren, ara gallabthir nge bitir, ni mus ngak e piin nib m’ar e kan skulnagrad u lan fare Theocratic Ministry School ma kar uned i fol ko motochiyel rok Jesus ma ka yad be rin’. (Psalm 148:12, 13; Joel 2:28, 29) U lan fare duw ni 2003 e ke un 825,185 e girdi’ ko pioneer u gubin e pul ara reb e pul. U lan e re duw nem e ke gaman 1,234,796,477 e awa ni ke weliy e Pi Mich Rok Jehovah e thin nib fel’ u morngaagen Gil’ilungun Got. Dabi siy ni ke falfalan’ Jehovah ni bochan e ba pasig e girdi’ rok!

U Lan Yugu Boch E Nam

11, 12. Mang boch e thin ni be tamilangnag nib fel’ e maruwel rok e pi missionary?

¹¹ Rib fel’ e machib ni ke tay e piin ni kar uned ko skul u Gilead u lan in e duw ma fin n’ey e kub fel’ e machib ni tay e piin ni kar uned ko Ministerial Training School. Nap’an ni yan e missionary nga Brazil ko duw ni 1945 e ke lich ko 400 e piin ni be wereg e machib. Pi missionary nem nge yugu boch e missionary e kar maruwelgad u taabang rok e girdi’ rodad u Brazil ma ke flaabnagrad Jehovah. Ke falfalan’ e piin ni kar uned ko machib u Brazil kakrom ni kar guyed 607,362 e girdi’ ni yad be wereg e machib ko duw ni 2003!

¹² Amu lemnag yu Sapan. Gonapan raay e girdi’ ni be machibnag Gil’ilungun Got ko re nam nem u m’on ko bin l’agruw e mahl ko fayleng. Nap’an fare mahl e ke gel e togopuluw ma kar lichgad ere tomren e mahl ma ke mus ni in e Mich Rok Jehovah ni ka yad ba fas ara kab fas e michan’ rorad. (Proverbs 14:32) Kari falfalan’ e pi cha’ ney ni yad ba yul’yul’ u nap’an ni yib 13 e missionary ni kar skulgad u Gilead, ma de n’uw nap’an ma kari t’uf e pi walagrad nu Sapan u wan’ e pi missionary nem. Ke pag 50 e duw nga tomren, u lan fare duw ni 2003 ma bay 217,508 e girdi’ ni be wereg e machib u Sapan! Kari flaabnag Jehovah e girdi’ rok ko re nam nem. Maku arrogon e report ni yib u yugu boch e nam. Ke gel e ayuw rok e piin ni ke yog rorad ni ngar ranod nga boch e nam ni gathi nam rorad ni fan e nge wer fare thin nib fel’, ma nap’an fare duw ni 2003 e yibe rung’ag e machib u lan 235 e nam, ara donguch ara binaw u fayleng iyan. Arrogon, ke yib fare ulung ni baga’ u “gubin e nam nu fayleng.”

“U Gubin E Ganong, Nge Girdi’ Nge Miti Thin”

13, 14. Uw rogon ni dag Jehovah ni baga’ fan ni ngan machibnag fare thin nib fel’ “u gubin miti thin”?

¹³ Bin somm’on e maang’ang ni fl’eg pi gachalpen Jesus u tomren ni kan duguliyrad ko kan ni thothup ko Pentecost ko 33 C.E. e aram e kar nonad nthin ko yugu boch e nam ni yad be welthin ngak e girdi’ ni kar muulunggad. Sana urngin e piin ni kar rung’aged pi gachalpen Jesus e yad manang e thin nu Greek ya manang e pi nam e re thin nem. Ma pi cha’nem e yad e “piin ni ma tiyan’rad ko Motochiyel” ere sana rayog rorad ni ngar nanged fan e thin nu Hebrew u lan e tempel. Machane kar gin gad ngay ni kar rung’aged fare thin nib fel’ ko thin ko nam ni bay e tabinaw rorad riy.​—Acts 2:5, 7-12.

¹⁴ Ku arrogon e ngiyal’ ney ni yima machib u boor miti thin. I yog e profet ni ra yib fare ulung ni baga’ u urngin e nam maku yad ra yib u urngin e “ganong nge girdi’ nge urngin miti thin.” Ku arrogon e thin rok Jehovah u daken Zechariah ni profet ni gaar: “Ra yib ragag e moon u urngin e thin ko pi nam mi yad kol tabanggin e mad rok reb e moon ni ir e Jew me lungurad ngak, “Gamad ra un ngomed ya kug rung’aged ni bay Got romed.’ ” (Zechariah 8:23) Yugu aram rogon ni dakuriy e taw’ath rok e kan ni thothup rok e Pi Mich Rok Jehovah ni ngar nonad nthin u yugu reb e nam ni dar filed e thin riy, machane yad manang ni baga’ fan ni ngan machibnag e girdi’ ko thin rorad.

15, 16. Mang e rin’ e pi missionary nge yugu boch e girdi’ ya ngan machibnag e girdi’ ko thin rorad?

¹⁵ Chiney e ke nang e girdi’ ni yoor e thin ni bod e thin nu Meriken ara thin nu France ara thin nu Spanish. Machane piin ni kar paged e binaw rorad kar ranod nga yugu boch e nam e kar guyed rogon ni ngar filed e thin ko fare nam ni fan e nge yog rok e “piin ni ke mel’egrad Got ni nge yog e yafos ndariy n’umngin nap’an ngorad” ni ngar filed fare thin nib fel’. (Acts 13:48) Mo’maw’ ni ngan rin’. Ba t’uf rok e pi walagdad nu Tuvalu ni reb e donguch ko gi day ney reb e babyor nthin ko nam rorad, ere ke un reb e missionary ko re maruwel nem. Dariy e dictionary ara jibiki nthin nu Tuvalu ere ke yoloy fare missionary urngin yu bugithin nu Tuvalu. De n’uw nap’an ma kan pilyeg fare ke babyor ni Rayog Ni Ngam Par Nib Fas Ni Manemus U Faylengb nthin nu Tuvalu. Nap’an ni taw e pi missionary nga Curacao, ma dariy e babyor ni be weliy e Bible nthin rorad ma dariy e dictionary ara jibiki nthin ko re nam nem ni aram e thin nu Papiamento. Ku yibe maluag thin u rogon ni ngan yoloy e thin ko re nam nem. Machane l’agruw e duw u tomren ni taw e pi missionary e ngaram ma kan yoloy bochi babyor ara tract ko re thin nem. Chiney e kan ngongliy e Wulyang Ntagil’ E Damit ko re thin nem ni ir reb fa 133 e thin ni kan yoloy e Watchtower riy ma yad ma ngongliy u taab ngiyal’ ni kan ngongliy nthin nu Meriken.

¹⁶ De yog rok e tin somm’on e missionary u Angola ni ngar pirieged be’ nu Angola ni Mich Rok Jehovah ni nge ayuwegrad ni ngar pilyeged e thin. Maku dariy boch e thin ko re nam nem ni bod fare bugithin ni “flont.” Be gaar reb e missionary: “Ke ayuwegeg boch e sensey ni yad be fil e Bible ni nggu pilyeg e thin. Gathi ri yad manang e machib ere thingar gu par nga but’ rorad nggu micheg nib puluw e thin ni gamad be pilyeg.” Machane kan pilyeg fare tract ni Life in a New World nga boch e thin ko nam nu Angola. Chiney e kan ngongliy fare Watchtower nthin nu Umbundu ni reb e thin ko re nam nem ma yibe ngongliy u taab ngiyal’ ko fare Watchtower nthin nu Meriken.

17, 18. Mang boch e maruwel nib gel ni yad be tay u Mexico nge boch e nam?

¹⁷ U Mexico e yima non nthin nu Spanish. Machane u m’on ni yan e Spanish nga Mexico ma boor miti thin ko re nam nem ma ka yibe non ko boch e pi thin nem. Ere chiney e kan ngongliy boch e babyor rok e Pi Mich Rok Jehovah ko medlip i thin nu Mexico maku bay ko Mexican Sign Language ni aram rogon ni ma fanathin nga pa’ e piin ni yad biling. Fare Kingdom Ministry nthin nu Maya e aram e bin somm’on e babyor nfl’eg nthin ko American Indian ni yima fl’eg ko yu pul. Ma bay in biyu’ e Maya, nge Aztec nge yugu boch e tin kakrom e girdi’ nu Mexico u fithik’ fa 572,530 e girdi’ ni be wereg e machib u Mexico.

¹⁸ Ngiyal’ ney e bokum million e girdi’ ni kar chuwgad ko nam rorad kar milgad nga yugu boch e nam ni bochan e mahl ara yad be gay e maruwel. Ere u boch e nam e ke yoor girdien yugu boch e nam riy. Ke un i ayuweg e Pi Mich Rok Jehovah e pi girdi’ nem. U Italy e bay e ulung ni ma non nthin ko 22 e nam ni gathi Italy. Kan yarmiy 70 e skul ni be fil 14 miti thin nib muun Italian Sign Language ngay ni aram e thin rok e piin nib biling ni yima fanathin nga paay, ma kan yarmiy e pi skul ney ni fan e ngan ayuweg pi walagdad ni ngar machibnaged e girdi’ ni ma thin u yugu boch e nam. Maku aram e n’en ni be rin’ e Pi Mich Rok Jehovah u yugu boch e nam ni yad be athamgil ni ngar machibnaged e girdi’ nu yugu boch e nam. Arrogon, bochan e ayuw rok Jehovah e be yib ba ulung ni baga’ u fithik’ e pi nam nib boor miti thin riy.

“Urngin Yang U Daken E Fayleng”

19, 20. Mang thin rok Paul ni be lebug e ngiyal’ ney? Mu weliy.

¹⁹ U nap’an e bin somm’on e chibog, i yog apostal Paul ni gaar: “Gur riyul’ ndar rung’aged e re thin rok Got nem? Rrung’aged​—ni bod ni be yog e babyor nib thothup ni be gaar: “Lamrad e wer nga urngin yang u daken e fayleng.” (Roma 10:18) Riyul’ e re thin nem ko bin somm’on e chibog, ma kub riyul’ e ngiyal’ ney! Bokum million e girdi​—ni sana dakuriy biyay ni ka nap’an e girdi’ ni aram fene yoor—​ni yad be gaar: “Gubin ngiyal’ ni bay ug pining e magar ngak Somol; ma bay ug pining e sorok ngak ndab gu tal.”​—Psalm 34:1.

²⁰ Ma gathi ba sagaal fare maruwel. Ka be mun urngin e girdi’ ni yad be wereg morngaagen Gil’ilungun Got. Ka be yoor iyan e tayim ni yibe fanay ni yibe wereg e machib. Bokum million e return visit ni yad be tay ma bokum miriay biyu’ e Bible study ni yad be fil. Ma ka yibe pirieg e piin ni ba adag e machib. Fa binem e duw e ke un 16,907,622 e girdi’ ko Puguran ko yam ni tay Jesus ma dariy biyay ni aram urngin. Ba tamilang ni ka bay boor ban’en ni ngan rin’. Nguuda folwokgad rok e pi walagdad ni yad ba yul’yul’ u fithik’ e togopuluw nib gel. Ma ngada pasiggad ni bod urngin e pi walagdad ni ka nap’an e duw ko 1919 ni kar magargad ko pigpig ngak Jehovah. Ma gad gubin e ngad dogned e thin rok e ani yoloy e psalm ni gaar: “Gimed urngin e pi n’en nib fos e ngam piniged e sorok ngak Somol! Nguun pining e sorok ngak Somol!”​—Psalm 150:6.

[Footnotes]

Rayog Ni Ngam Weliy Fan?

• Mang maruwel ni ke un e pi walagdad ngay ko duw ni 1919, ma mang fan nib gel e re maruwel nem?

• Kan kunuy chon mini’ ya ngar ayuweged i wereg e machib?

• Mang boch ban’en ni ke rin’ e pi missionary nge yugu boch e girdi’ ni kar machibgad u yugu boch e nam ni gathi nam rorad?

• Mang boch ban’en ni be micheg ni be flaabnag Jehovah e maruwel rok e girdi’ rok e ngiyal’ ney?

[Chart on page 24-27]

2003 SERVICE YEAR REPORT KO MICH RO K JEHOVAH’S U GA’NGIN YANG E FAYLENG

(See bound volume)

[Pictures on page 20, 21]

De maruwaran’ e pi Kristiano ni ran machibnag fare thin nib fel’ ni yugu aram rogon ni ke wagey e fayleng ni bochan e bin l’agruw e mahl ko fayleng

[Credit Line]

Donmach ni ke chub: sasing ko U.S. Navy; tin ni ka bay e sasing: U.S. Coast Guard

[Picture on page 22, 23]

Ke yib fare ulung ni baga’ u fithik’ urngin e ganong nge urngin miti thin