Nap’an Nra Chuw Be’ nib T’uf Rodad rok Jehovah

¹ Mark nge Louise e yow e Mich Rok Jehovah. U fithik’ e t’ufeg mar filew e thin ko Bible ko bitir rorow ni bod ni be yog e Bible ko pi gallabthir ni Kristiano. (Prov. 22:6; 2 Tim. 3:15) Bay e kireban’ riy ya gathi urngin e bitir rorow ni kar pigpiggad ku Jehovah u nap’an ni kar ilalgad. Ke gaar Louise: “Ba amith gum’irchaeg ko pi bitir rog ni kar sorgad nga bayang. Uw rogon ni nggu dag ni gowa dariy fan u wan’ug u gubin e rran? Nap’an nra weliy e girdi’ murung’agen pi fakrad ma thingar gu athamgil ni dab gu yor.”

² Arrogon, nap’an nra turguy be’ ni nge chuw rok Jehovah ma dabki fol ko thin ko Bible ma ra gel e kireban’ ko girdien e tabinaw rok. Ke gaar Irene: “Ri ba t’uf rog walageg ni ppin. Gu ra rin’ urngin ban’en ni fan ni nge sul ngak Jehovah!” Walagen Maria e ke pi’ keru’ ku Jehovah me un ko ngongol ndarngal me gaar Maria: “Ke mo’maw rog ya ma ayuwegeg walageg. Ma gu ma tawrengnag u nap’an ni ma muulung e tabinaw romad nga taabang.”

³ Mang Fan Nib Mo’maw’? Mang fan nib gel e kireban’ ko pi Kristiano ni ke mul reb e girdi’ rorad ko tirok Got ban’en? Ya goo yad manang ni be micheg e Bible ni piin nib yul’yul’ ku Jehovah e ra par u paradis u fayleng ndariy n’umngin nap’an. (Ps. 37:29; 2 Pet. 3:13; Rev. 21:3-5) Ke l’agan’rad ngay ni ngar uned ko pi flaab ney u taabang ko pi mabgol rorad nge pi bitir rorad nge gallabthir rorad nge pi walagrad nge pi fak pi fakrad. Nap’an ra dabki pigpig be’ nib t’uf rorad ku Jehovah ma ri yad ma kireban’! Manang e pi Kristiano ni pi motochiyel rok Jehovah e ma yibnag angin ngorad ko ngiyal’ ney. Ere ma kireban’ e pi Kristiano ni ngar guyed e piin nib t’uf rorad ni ngar uned nga ban’en mi yad t’ar wom’engin nib mooy.​—Isa. 48:17, 18; Gal. 6:7, 8.

⁴ Sana ba mo’maw’ rok boch e girdi’ ni ngar nanged fan e re n’em ya dawori buch rorad ni aram rogon. Ya re n’em e ba l’ag ko urngin ban’en ko par. Ke gaar Louise: “Ba mo’maw’ rog ni nggu par ko pi muulung ko Kristiano ma gu be guy e pi gallabthir ni yad be minmin ma yad be non ko bitir rorad. Demtrug e n’en ni bay e falfalan’ riy ni gu ra un ngay ma ma kireban’ug ya de un e bitir rog ngog.” Bay reb e piilal ko Kristiano ni ke lemnag fa aningeg e duw ni kan tharbog e bitir ko ppin rok ko ulung. Ke gaar: “Mus ko ‘ngiyal’’ nib falfalan’ ma ke mo’maw’. Faanra kug pi’ e tow’ath ko ppin rog fa kug warow nga bang ko milekag, ma ra yor ya ke lemnag ni de un e bitir rok ngomow ko falfalan’ u taabang.”

⁵ Arrogon, ra mul be’ nib t’uf rorad ma aram ba gafgow nth’abi gel ko tin riyul’ e Kristiano. (Acts 14:22) Yog Jesus ni ra ruw raba’ girdien e tabinaw nbochan nra un e girdi’ ko thin nriyul’. (Matt. 10:34-38) Ma gathi thin ko Bible e ra n’igin nge ruw raba’ girdien e tabinaw. Ya piin nde mich u wan’rad ara dar yul’yul’gad e yad ma n’igin nge ruw raba’ e tabinaw rorad ya kar digeyed fa kar togopuluwgad ko kanawo’ ko Kristiano. Rayog ni ngad pininged e magar ku Jehovah ya ma ayuweg e piin nib yul’yul’ ngak ko gafgow rorad. Faanra ke kireban’um ya ke mul be’ nib t’uf rom ko tirok Got ban’en ma mang boch e thin ko Bible nra ayuwegem ngam k’adan’um nge fl’eg lanin’um?

⁶ Ngan Gum’an’: “Nguum gelniged gimed. . .um pired ni gimed ba t’uf rok Got.” (Jude 20, 21) Rogon salpem e sana dariy ba’nen nrayog ni ngam rin’ ngam ayuweg reb e girdi’ ko tabinaw rom ni ke tal ko pigpig ku Jehovah. Machane rayog ni ngam gelnigem nge girdien e tabinaw rom ni kar yul’yul’gad. L’agruw ko dalip e pagal ni fak Veronica e kar digeyew e thin nriyul’ me gaar: “Kan puguran ngomow e pumoon rog ni faanra gamow ra par nib gel ko tirok Got ban’en ma rayog ni nggu ayuwegew fagali bitir romow u nap’an ni yow ra sul. Ya mang e ra buch ko fare pagal ni yan nga bang ni faan gomanga de par fare chitamangin nib gel ko tirok Got ban’en nrayog ni nge ayuweg nap’an ni ke sul?”

⁷ Ngam un ko tirok Got ban’en ma ngam par nib mudugilan’um. Kab muun ngay e schedule ko fol Bible nge pi muulung ko Kristiano. Ngam ayuweg e girdi’ ko ulung rogon nrayog rom. Rriyul’ nra som’on ma ba mo’maw’ ni ngam rin’. Ke gaar Veronica: “Som’on ma gu ba adag ni nggu palog ko girdi’ ni bod ba gamanman ni ke maad’ad. Machane pumoon rog e ke guy rogon ni nguug unew ko tirok Got ban’en. Ke guy rogon ni nggu unew ko pi muulung. Nap’an nra taw ko ngiyal’ ni bay e convention ma ba t’uf ni nggu k’adan’ug ni nggu un ngay nguug guy e girdi’. Ma pi welthin e ke ayuwegmow nggu chugurgow ku Jehovah. Re convention nem e ke pi’ e athamgil nga laniyan’ fakmow nib yul’yul’.”

⁸ Maria ni fak fare pin ni kan weliy murung’agen faram e yog ni ma yib angin ngak ni nge un ko machib nge mus rogon ma be fil e Bible ngak aningeg e girdi’. Ku aram rogon Laura ni ke gaar: “Gu ma yor ni gubin e rran machane gu ma pining e magar ku Jehovah ya mus ni de yib angin ngog e chugul bitir machane bay rog e thin ko Bible nib flont nra ayuweg e pi tabinaw ko ngiyal’ ney ni tin tomren e rran.”

⁹ Dab mu pag ni dabki l’agan’um. “Be’ nib t’uf rok Got nge girdi’ e dabiyog ni nge pag ir ndabki l’agan’.” (1 Kor. 13:7) Ke gaar Ken: “Nap’an ni digey e bitir romow e kanawo’ ko thin nriyul’ ma kug lemnag ni bod rogon ni kar m’ad. Machane ke thil e lem rog u tomren ni yim’ walageg. Gu be pining e magar riy ni dawori yim’ e bitir rog ma ka be pag Jehovah ni nge bing e kanawo’ nrayog ni ngar sulod ngak.” Arrogon, boor e girdi’ ni kar chuwgad ko thin nriyul’ ma munmun mar sulod.​—Luke 15:11-24.

¹⁰ Dab mu lemnag ni aram e kireb rom. Boor e gallabthir ni yad ma sap nga tomur me kireban’rad ni dar rin’ed ban’en nib thil. Machane be yog ko Ezekiel 18:20 ni ma tay Jehovah ni fa en ni ke denen me ir e kireb rok ma gathi gallabthir rok. Fare babyor ko Proverb e boor e thin riy ko pi gallabthir nib mil fan ngorad ni ngar chuguliyed e bitir rorad ko kanawo’ nib mat’aw machane kab boor yay ni be pi’ e fonow ko pi bitir ni ngar motoyilgad mar folgad ko gallabthir rorad. Arrogon, mil fan ngak e bitir ni ngar folgad ko thin ko Bible ni fil e gallabthir ndar flontgad ngorad. Mus ni ga be lemnag ni kam oloboch ma aram e kireb rom, machane gathi aram fan ni ke digey be’ nib t’uf rom e thin nriyul’. Ma dariy fan ni ngam par ni ga be lemnag ni “faan gomanga.” Ngam fil ban’en ko pi n’en ni kam rin’ nib oloboch, ma nge mudugilan’um ni dabkum rin’ biyay, ma ga meybil ku Jehovah ni nge n’ag fan. (Ps. 103:8-14; Isa. 55:7) Ma ngam sap nga m’on gathi tomur.

¹¹ Ngam tay fan e n’en ni yarmiy Jehovah ko gechig. Faanra pi’ e ulung e gechig ko girdi’ rom ma dab mu pag talin ni aram e yaram rok Jehovah ma fan ni ngan ayuweg urngin e girdi’ nib muun ngay facha’ ni ke denen. (Heb. 12:11) Ere ngam athamgil ni dab mog e kireb ko pi piilal ni kar turguyed e n’en ni kan rin’. Dab mu pag talin ni ra yib angin ni ngan fol ko kanawo’ rok Jehovah, ma faan ngan togopuluw ko yaram rok Jehovah ma ra gel e magawon.

¹² Tomren ni yib piyu Israel u Egypt, ma Moses e ke mang tapufthin rorad. (Ex. 18:13-16) Dabisiy ni de felan’ boch e girdi’ ko n’en ni turguy Moses ya thingari pithig e magawon u thilin l’agruw ni’ me turguy ko er kireb e rok. Sana kan dabuy boch ban’en ni turguy Moses ma aram fan ni kan togopuluw ko liw rok. Machane be fanay Jehovah Moses ni nge ayuweg e girdi’ Rok, ma gathi Moses ni kan gechignag ya piin ni kar togopuluwgad ngak nge girdi’ rorad. (Num. 16:31-35) Rayog ni ngad filed ban’en ko re n’ey ma ngad athamgilgad ni ngad ted fan ma ngad folgad ko n’en ni turguy e piin ni ma yog e thin ko ulung ko ngiyal’ ney.

¹³ Ke lemnag Delores e ngiyal’ ni pi’ e ulung e gechig ko bitir rok ni ppin, ma mo’maw’ rok ni nge tay fan. Ke gaar: “N’en ni ayuwegneg e kug beeg e pi thin u murung’agen rogon e yaram rok Jehovah nib thabthabel. Kug fl’eg e babyor ni bay e thin riy ko boch e welthin nge babyor nra ayuwegeg nguug athamgil.” Aram e be tamilangnag yugu reb e n’en ni ngan rin’ ni ngan athamgil.

¹⁴ Mu weliy ko uw rogon u wan’um. Sana ra yib angin ngom ni ngam non ngak reb ara l’agruw ni’ ni fager rom. Ngam mel’eg e fager nra ayuwegem ngam par nib fel’ lanin’um. Ma ra yib angin ngom ni ngam “puog e n’en ni bay u gum’irchaem” ku Jehovah u fithik’ e meybil. (Ps. 62:7, 8) Mang fan? Ya manang feni gel ni ke kireban’um. Susun, sana ga be lemnag ni de fel’ ya thingar mu par nib kankanan’um. Ya gathi gur e kam chuw rok Jehovah. Ngam weliy e lem rom ku Jehovah ma ngam ning e ayuw ni nge yal’uweg e lem rom ma ra lich e amith u gum’irchaem.​—Ps. 37:5.

¹⁵ Dabisiy ni munmun ma ra fel’ iyan e lem rom. Ere nguum athamgil ni ngam felan’nag e Chitamangim nu tharmiy, ma dabmu lemnag nib m’ay fan. (Gal. 6:9) Dab mu pag talin ni faanra ga ra chuw rok Jehovah ma kag ra par nib magawon. Ma faanra gad ra par nib yul’yul’ ngak ma ra ayuwegdad ko pi magawon rodad. Ere nge mich u wan’um ni manang Jehovah salpem ma ra pi’ gelngim ko ngiyal’ nib t’uf.​—2 Kor. 4:7; Fil. 4:13; Heb. 4:16.

[Kahol ko page 4]

Rogon ni Ngam Athamgil

◆ “Nguum gelninged gimed. . . , um pired ni gimed ba t’uf rok Got.”​—Jude 20, 21.

◆ Dab mu pag ni dabki l’agan’um.​—1 Kor. 13:7.

◆ Dab mu lemnag ni aram e kireb rom.​—Ezek. 18:20.

◆ Ngam tay fan e n’en ni yarmiy Jehovah ko gechig.​—Heb. 12:11.

◆ Mu weliy ko uw rogon u wan’um.​—Ps. 62:7, 8.