Rogon Nra Ayuwegem E Yam’ Ni Tay Jesus

SOGONAP’AN 2,000 e duw ni ke yan, u nap’an e madnom ko Paluk’af rok piyu Jew ko duw ni 33 C.E., me yim’ be’ nib moon ndariy ban’en ni ke bucheg ni fan e nge yog e yafas ngak boch e girdi’. Mini’ e re moon nem? Aram Jesus nu Nazareth. Ma mini’ e rayog nib angin e n’en ni rin’ ngak? Gubin e girdi’. Reb e thin nri yimanang u Bible e be weliy murung’agen e re maligach nem ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

Yugu aram rogon ni boor e girdi’ ni manang e re thin nu Bible nem, ma buchuuw e girdi’ nri manang fan. Yad ma lemnag: ‘Mang fan nib t’uf e biyul rok Kristus rodad? Uw rogon ma yam’ ni tay taabe’ e rayog ni ayuweg e girdi’ ko yam’ ndariy n’umngin nap’an?’ Bible e be pi’ e fulweg nib tamilang ko pi deer ney.

Rogon ni Ke Gafgow e Girdi’ ni Bochan e Yam’

Boch e girdi’ e ba mich u wan’rad ni kan sunmiy e girdi’ ni ngar pired bochi tayim u fayleng, ngar mada’naged e magawon, mar felfelan’gad boch, ngemu’ mar m’ad nga ranod nga bang ni kab fel’ boch. Biney e lem, e be dag ni yam’ e aram bang ko n’en nib m’agan’ Got ngay ni fan ko girdi’. Machane, Bible, e be dag nib thil fan ni ma gafgow e girdi’ ni bochan e yam’. Ke gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Roma 5:12) Biney e thin nu Bible e be dag ni girdi’ e ma yim’ ni bochan e denen. Ere, mini’, fare ‘moon’ ni ke yib wenegan e denen ni tay ngak gubin e girdi’?

Ke guy fare The World Book Encyclopedia ni boor e scientist ni ke mich u wan’rad ni gubin e girdi’ e kar bad rok taabe’, ma be yog e Bible e cha’nem ni​—‘fare moon.’ Kad beeged u Genesis 1:27, ni gaar: “Ara’ rogon ni sunumeg Got e girdi’; girdi’ e ni ngongliy ni bod yaan Got. I sunumeg be’ nib moon nge be’ ni ppin.” Ere be yog e Bible ni fagal nsom’on e girdi’ nsunumeg e aram e n’en nsom’on nrayog ni nga nog e sorok riy ngak fare Got ni Gubin Ma Rayog Rok.

Fare thin u Genesis e be weliy boch u rogon e yafas ko girdi’ u tomren ni sunmiy Jehovah Got e bin nsom’on e girdi’. De weliy Got murung’agen e yam’ u ga’ngin e re thin nu Bible nem, kemus ni yog ni yira yim’ ni faanra dabin fol. (Genesis 2:16, 17) Baadag ni nge par e girdi’ u paradis u fayleng, ni yad ba felfelan’ mab fel’ fithik’ i dowrad ni manemus. De adag ni ngar gafgowgad ni bochan wenegan e pilibthir me munmun mar m’ad. Ere, uw rogon ni suwey e yam’ e girdi’?

Genesis guruy ni 3 e be dag rogon ni mel’eg fagal nsom’on e girdi’ ni nge dab ra folgow rok e En ni Ke Pi’ e Yafas, ni aram Jehovah Got. Wenegan riy, e rin’ Got e n’en ni yog u m’on riy nra rin’ ngorow nfaanra dab ra folgow. I yog ngak fare moon ni gaar: “Ni ngongliyem ko but’, ere bay kum ngal’ ni but’ bayay.” (Genesis 3:19) Riyul’ e thin rok Got, ya fagal nsom’on e girdi’ ndar folgow e munmun mar m’ow.

Wenegan ni yib riy e gathi kemus ni fagal nsom’on e girdi’ e gafgownagrow. Bochan ndar folgow ma aram mar kirebnigew fare athap ko yafas nib flont nrayog ni nge yog ngak pi fakrow. I uneg Jehovah e piin dawor ni gargelegrad ko n’en nib m’agan’ ngay u nap’an ni gaar ku Adam nge Efa: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey. Nggu ta’mew ni gimew e ngam suweyew e nig, nge arche’, nge urngin e gamanman ni maloboch, ni tin ni ba ga’ nge tin ni ba achig.” (Genesis 1:28) Ra taw nga nap’an, ma fare tabinaw ko girdi’ e yad ra suguy e fayleng mar felfelan’gad ko yafas ndariy e yam’ riy. Machane bin nsom’on e chitamangirad ni Adam​—ni fare “moon”—​e pi’rad nchuway’ ko denen, ni wenegan riy e yam’. Paul ni apostal, ni yib rok fa bin nsom’on e girdi’, e yoloy ni gaar: “Gag e gub girdi’, . . . ni kan pieg ni chuway’ ngak e denen.”​—Roma 7:14.

Bod e piin ni ur kirebniged yaan bogi ban’en ndabiyog i yon’ lon, ma denen ni tay Adam, e ri kirebnag e n’en ke sunmiy Got​—ni aram e girdi’. Pi fak Adam e ki yib pi fakrad, nge pi fak pi fakrad, i yan ngaram. Gubin e pi mfen ney ni kan gargeleg e girdi’ riy, kar ilalgad, mar diyengad, me munmun mar m’ad. Mang fan ni kar m’ad ni yad gubin? Bochan ni yad gubin ni kar bad rok Adam. Be gaar e Bible: “Boor e girdi’ ni kar m’ad ni bochan e denen ni ngongliy e taab nem e girdi’.” (Roma 5:15) M’ar, pilibthir, nge ngan rin’ e tin nde mat’aw, nge yam’ e wenegan ni ke yib ni bochan nde fol Adam. Gad gubin ni gad ba muun ko re tabinaw nem.

U lan e babyor ni yoloy apostal Paul ngak e pi Kristiano nu Roma, e weliy murung’agen riy rarogon e girdi’ nde flont, nib muun ngay, nge magawon ni bochan angin e denen. I gaar: “Ere kar gu gafgow! I mini’ e ra chuwegeg u pa’ e re dowef ney ni ir e be fekeg i yan ko yam’?” Gathi ba fel’ e re deer nem, fa? Mini’ e ra ayuweg Paul nge piin ni yad be yim’ ni bochan ni ngan ayuwegrad ngan chuwegrad ko denen nge yam’? I pi’ Paul e fulweg riy ni gaar: “Ke magar Got u daken e Somol rodad i Jesus Kristus!” (Roma 7:14-25) Arrogon, En Tasunmiy e ke yarmiy ni ngan ayuwegdad u daken Fak, ni Jesus Kristus.

N’en nib Milfan Ngak Jesus ko Ayuw ni Ke Pi’ Got ngak e Girdi’

Ke weliy Jesus e n’en nib milfan ngak u nap’an ni yira chuweg e girdi’ ni gubin ko sib ko denen. I gaar: “I yib e en ni Fak e girdi’ . . . ni nge pi’ e pogofan rok ni nge biyuliy boor e girdi’ ngay.” (Matthew 20:28, King James Version) Uw rogon ni ke mang Jesus bbiyul? Uw rogon ni keb angin e yam’ ni tay ngodad?

Ke weliy e Bible murung’agen Jesus ni “de denen” ma “ke fal Got nga bayang ni gathi ir reb e pi tadenen.” I par Jesus ni be fol ko motochiyel rok Got u n’umngin nap’an e yafas rok. (Hebrews 4:15; 7:26) Ere, yam’ ni tay Jesus e de bod e yam’ ni tay Adam ni angin e denen nge togopuluw ni tay. (Ezekiel 18:4) Ya, m’agan’ Jesus ngay ni nge yim’ ndariy ban’en ni ke bucheg ni fan e nge rin’ e n’en nib m’agan’ e Chitamangin ngay ni aram e nge chuweg e girdi’ ko denen nge yam’. Rogon ni kan dag er nga lang, e m’agan’ Jesus ngay ni nge yib nge “pi’ e pogofan rok nge biyuliy boor e girdi’ ngay.” Bochan e dag Jesus e t’ufeg ndawori dag be’ biid, me ‘yim’ ni fan ngak gubin e girdi’.’​—Hebrews 2:9.

Yafas rok Jesus ni pi’ ni maligach e ri taareb rogon ko fare yafas ni mul e pa’ Adam u nap’an ni denen. Mang angin e yam’ ni tay Jesus? I fel’ u wan’ Jehovah e re maligach nem ni nge “biyuliy urngin e girdi’.” (1 Timothy 2:6) Angin riy, e fanay Got e yafas rok Jesus ni nge chuw’iy bayay e girdi’ ko sib ko denen nge yam’.

Yugu be sul e Bible u daken e re ngongol ney u fithik’ e t’ufeg ni dag e En ni Sunmiy e girdi’. I puguran Paul ngak e pi Kristiano ni ‘kan chuw’iyrad nib tolang puluwrad ni kan pi’.’ (1 Korinth 6:20; 7:23) I yoloy Peter nde fanay Got e, gol ara silber, ya racha’ rok Fak ni nge chuweg e Kristiano ko yafas ni ma fekey iyan ko yam’. (1 Peter 1:18, 19) I yarmiy Jehovah ni nge ayuweg e girdi’ ko yam’ u daken fare maligach ni biyul ni pi’ Kristus.

Ra Yib Angin fare Biyul rok Kristus Ngom, Fa?

I yoloy apostal John murung’agen rogon feni ga’ angin fare biyul rok Kristus ni gaar: “Daken Kristus e ir e be n’ag Got fan e denen rodad riy, ni gathi ke mus ni denen rodad, ya ku er rogon e denen rok urngin e girdi’.” (1 John 2:2) Arrogon, biyul ni pi’ Jesus e fan ngak gubin e girdi’. Ere, be yip’ e re n’ey fan ni gubin e girdi’ nra yib angin e re biyul ney ngorad, fa? Danga’. Piin ni yad baadag ni nge yib angin e biyul rok Kristus ngorad e dabiyog ni kemus ni nga yugu ra sonnaged e tow’ath rok Got ni ngeb ngorad. Ba t’uf ni ngar rin’ed ban’en.

Mang e n’en ni baadag Got ni ngan rin’? John 3:36 e be yog ngodad ni: “En nra mich u wan’ e en ni Fak Got e aram e ke yog e yafos ndariy n’umngin nap’an ngak; ma en ndabi fol rok e en ni Fak Got e dabiyog e yafos ngak, machane be par e damumuw rok Got u daken ndariy n’umngin nap’an.” Baadag Got ni nge michan’dad ko fare biyul ni pi’ Kristus. Ma ku bay boch ban’en nib t’uf. “Faan gadad ra fol ko tin ke yog Got ngodad ni ngad rin’ed, ma aram e ke mudugil u wun’dad ni kad nanged ir [Jesus].” (1 John 2:3) Ere, ba tamilang ni n’en nib ga’ fan ni ngad rin’ed min ayuwegdad ko denen nge yam’, e nge yog e michan’ ngodad ko fare biyul ni ke pi’ Kristus ma gad fol ko pi motochiyel rok.

Reb e kanawo’ nrayog ni ngad daged e michan’ rodad ko biyul ni ke pi’ Jesus e ngad daged nib ga’ fan u wan’dad e yam’ ni tay ni aram e ngad madnomnaged, nrogon ni ke motochiyelnag ni ngan rin’. U m’on ni nge yim’ Jesus, me ngongliy reb e abich ni fan ngorad e pi apostal rok ni be yip’ fan ban’en, ma aram me gaar ngorad: “Um rin’ed e re n’ey ngi i pugurag ngomed.” (Luke 22:19) Rib ga’ fan u wan’ e Pi Mich Rok Jehovah e tha’ u thilrad Fak Got, ma yad ma fol ko re motochiyel nem. Biney e duw, e fare Puguran ko yam’ ni tay Jesus Kristus e yira madnomnag ko Sabado, March 22, u tomren ni ke aw e yal’. Ri gamad be piningem ni ngam un ko re muulung nem ni yugu ba thil ni fan e ngam fol ko n’en ni ke motochiyelnag Jesus ni ngan rin’. Pi Mich Rok Jehovah ko gin ni ga ma par riy e rayog ni nga rogned ngom e tayim nge gin ni ngan tay e re madnom nem riy. Nap’an e re Puguran nem ma ga ra fil boch murung’agen e n’en nib t’uf ni ngam rin’ me yog ni chuwegem fare biyul ko denen ni ke af rok Adam ngodad.

Buchuuw e girdi’ e ngiyal’ ney nib fel’ u wan’rad fare maligach nrib ga’ ni ke pi’ e En Tasunmiy nge Fak ni fan e nge ayuwegey ko magothgoth. Piin yad ra maruweliy e michan’ rorad ni fan ngay e ra yib e felfelan’ ngorad. I yoloy apostal Peter murung’agen e pi Kristiano ni yad ni gaar: “Mmich u wan’med, ni yugu ara’ rogon ndamur guyed e chiney; ma aram fan ni ba ga’ e felfelan’ ni gimed be tay, nib felfelan’ ndabiyog ni ngan weliy ko thin, ya gam’engin e michan’ romed ngak Got e ke yog ngomed, ni aram e kam thapgad ngak Got.” (1 Peter 1:8, 9) Ga ra maruweliy e t’ufeg rom ngak Jesus Kristus me michan’um ko fare biyul ni ke pi’, ma rayog ni ngam suguy e yafas rom ko felfelan’ e chiney mag sap nga m’on ko ngiyal’ ni yira chuwegem ko denen nge yam’.

[Picture on page 4]

I pi’ Jesus e yafas rok ni nge yan nga puluwon e denen ni ke tay Adam

[Picture on page 6]

Fare Puguran ko yam’ ni tay Jesus Kristus e yira madnomnag ko Sabado, March 22, 2008, u tomren ni ke aw e yal’