Mu Yuluy Owchem ko fare Tow’ath

Gu be mil nib k’iy kanawoeg i yan ko n’en ni gu be nameg ni bochan e nge yog puluwon ngog.”​—PHIL. 3:14.

1. Mang puluwon ni rayog ngak Paul?

SAUL nu Tarsus ni aram apostal Paul e yib u ba tabinaw ni goo yimanang murung’agen. Gamaliel ni ba sensey ko Motochiyel e ke skulnag Paul u murung’agen e teliw ko pi chitamangin ni ke kakrom. (Acts 22:3) Rib fel’ rogon Paul ya rayog e maruwel nib fel’ ngak machane ke siyeg e teliw rok ma ke mang reb e Kristiano. Ma aram e ke yip’ owchen nga m’on ko yafas ni manemus ni aram puluwon ni rayog ngak ni nge un ko gagiyeg u Gil’ilungun Got u tharmiy. Ma re Gil’ilungun nem e ra gagiyegnag e fayleng.​—Matt. 6:10; Rev. 7:4; 20:6.

2, 3. Uw feni ga’ fan e yafas u tharmiy u wan’ Paul?

² Ke dag Paul rogon ni yog puluwon ngak, ya gaar: “Urngin ban’en ma kug matheeg ngay ni kari yan i aw ni lus ni bochan e bin ni ka ba ga’ fan e nggu nang Kristus Jesus ni ir e Somol rog. Bochan Kristus ma aram fan ni kug n’ag urngin ban’en; ya kug finey ni goo chubung, ni fan e nge yog Kristus ngog.” (Fil. 3:7, 8) Ma lemnag e girdi’ ni ri ba ga’ fan e maruwel, liw, fel’ rogon, nge gilbuguwan machane nap’an ni fil Paul e tin riyul’ me yog ni pi n’ey ni gubin e bod e chubung.

³ Ma ke par ni tin ni ba ga’ fan u wan’ Paul e aram e thin rok Jehovah nge Kristus, ni aram e n’en ni yog Jesus ngak Got ko meybil rok ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Ri baadag Paul ni nge yog e yafas ni manemus ngak e re yog u Filippi 3:14 ni gaar: “Gu be nameg ni bochan e nge yog puluwon ngog, ni aram e pong ni ke ta’ Got ngodad u daken Kristus Jesus.” Arrogon, ya ke yiluy owchen ni nge yog puluwon ngak u tharmiy ni aram e yafas ni manemus u Gil’ilungun Got.

Yafas ni Manemus u Fayleng

4, 5. Mang tow’ath e bay ni fan ngak bokum milyon e girdi’ ni yad be rin’ e tin nib mat’aw?

⁴ Boor e girdi’ ni yad be mel’eg ni ngar rin’ed e tin nib m’agan’ Got ngay ya nge yog e tow’ath ngorad ko maruwel ni ba gel ni yad be tay ni aram e yafas ni manemus u fayleng. (Ps. 37:11, 29) Ke micheg Jesus ni dabi thil e pi n’en ni yibe athapeg. Ya gaar: “Nge felan’ e piin nib fel’ lanin’rad, ya rayog ngorad e tin ni ke yog Got nra pi’.” (Matt. 5:5) Jesus e ra gagiyegnag e fayleng ni be yog e Psalm 2:8 maku ra un fare 144,000 e girdi’ ngak ngar gagiyeggad u tharmiy. (Dan. 7:13, 14, 22, 27) Piin ni yad bod e saf e yad ra ‘par’ u fayleng ni be gagiyegnagrad Gil’ilungun Got, ya ke m’ay i ‘lemnag rogon rok Got ke tay.’ (Matt. 25:34, 46) Ba mich u wan’dad ni ra riyul’ e pi thin ni ke micheg Got, ya “der ma ban.” (Titus 1:2) Maku ra pagan’dad ni bod rogon Joshua ni pagan’ ko thin ni micheg Got ngak me yog ni gaar: “Urngin e tin ni micheg e goo ke rin’ ni rogon; dariy reb ni pag.”​—Josh. 23:14.

⁵ Yafas u tan Gil’ilungun Got e ba thil ko ngiyal’ ney. Chiney e bay e mahl, bugel, gafgow, ngongol ni de mat’aw, m’ar, nge yam’. Machane ra fel’ rogon e yafas ko girdi’ ni yad ra par u daken e fayleng ni ke paradis. Ri ba gel e felfelan’ ni yira tay ko yafas ni aray rogon u gubin e rran. Ireray ba tow’ath ni ri ba fel’.

6, 7. (a) Uw rogon ni ke dag Jesus ko mang e gad ra athapeg u tan e am rok Got? (b) Uw rogon ni ra tabab bayay e yafas ko piin ni kar m’ad?

⁶ Nap’an ni immoy Jesus u fayleng, me pi’ Got gelngin ngak me i dag rogon e pi n’en ni ri ba fel’ ni ra rin’ boch nga m’on u fayleng. Bod rogon ni yog ngak be’ ni ba moon ni ke yaf ni 38 e duw ni nge sak’iy nge yan. Ma be dag e Bible ni buch e re n’ey. (Mu beeg e John 5:5-9.) Ma ku reb e golnag be’ ni ba moon ni ba “malmit.” Ma aram me yog fare moon ngak e pi tayugang’ ko teliw ni ni gaar: “Dawor nrung’ag ni kaa ngongliy be’ owchen be’ nni gargeleg ma mmalmit ke guy ban’en; faanra de yib e re moon ney rok Got, ma dariy taa ban’en nrayog ni nge rin’.” (John 9:1, 6, 7, 32, 33) Ke yog rok Jesus ni nge “golnag” e m’ar u gubin yang ni yan riy ni bochan e ke pi’ Got gelngin.​—Luke 9:11.

⁷ Gathi kemus ni golnag e m’ar ya ki faseg e yam’. Ba’ bayay ni faseg bochi buliyel ni 12 e duw rok ni ke yim’ ma kari kireban’ e gallabthir rok. I gaar Jesus: “Fachi pin! Be lungug ngom, mu suwon!” Ma aram me sak’iy! Rayog ni ngam guy ni kari felfelan’ e gallabthir rok. (Mu beeg e Mark 5:38-42.) U tan e am rok Got e yira faseg bokum bilyon e girdi’, ma ‘ri ba gel e felfelan’’ ni yira tay ma “bayi faseg urngin e girdi’ ko yam’” ni tin ni ba mat’aw nge tin ni de mat’aw. (Acts 24:15; John 5:28, 29) Ireray tabolngin e yafas ko pi girdi’ ney ni kar m’ad ma kan fasegrad ko yam’ ma yad ra athapeg e yafas ni manemus boch nga m’on.

8, 9. (a) Mang e ra buch ko denen rok Adam ni af ngodad u nap’an fare Biyu’ i Duw ko Gagiyeg rok Kristus? (b) Uw rogon ni yira pufthinnag e piin ni kar m’ad?

⁸ Girdi’ ni yira fasegrad e rayog ni nge yog e yafas ngorad. Dab ni pufthinnagrad ko denen ni ur rin’ed u m’on ni kar m’ad. (Rom. 6:7) U nap’an fare Biyu’ i Duw ni be gagiyeg Kristus ma ra yib angin fare biyul. Ma piin ni yad ba yul’yul’ ko am rok Got e yad ra flont i yan, ma aram e ra tabab ni nge chuw e girdi’ ko denen ni af rok Adam. (Rom. 8:21) Ma Jehovah e bayi “kirebnag gelngin e yam’ ni manemus ma bayi flay e lu’ u owchen gubin e girdi’.” (Isa. 25:8, BT) Be gaar e thin rok Got “min pithig e babyor” ni be yip’ fan ni piin ni be par e ngiyal’ nem e bay ni pi’ boch e thin ni beech ngorad. (Rev. 20:12) Nap’an ni ra thil e fayleng nge paradis ma yad gubin e “bay fin ra nanged ko mang e ba mat’aw.”​—Isa. 26:9, BT.

⁹ Yira pufthinnag e piin ni kan fasegrad u rogon e pi n’en ni kar dugliyed ni ngar rin’ed, ma gathi bochan e denen ni af rok Adam ngorad. Be gaar e Revelation 20:12: “Ma piin kar m’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy nga lan fa yu ke babyor” ni aram e pi n’en ni ur rin’ed u tomren ni kan fasegrad ko yam’. Ri ba fel’ e kanawo’ ni ke dag Jehovah ya ba mat’aw ma be dag e t’ufeg ma ku be dag e runguy! Pi n’en ni ke gafgownagrad ko re fayleng ney e bayi chuw “ma tin kakrom e ri bay ni pag talin.” (Isa. 65:17) Bochan ni bay e thin ni ra ayuwegrad nge yafas nib fel’ ma aram e dabki magafan’rad ko pin’en ni ba kireb ni ke chuw. Pi n’en ni buch kakrom e dabki yib ngan’rad bayay. (Rev. 21:4) Ma girdien fare ulung ni ba ga’ ni ra magey nib fas u nap’an Armageddon e ku ra buch e pi n’ey ngorad.​—Rev. 7:9, 10, 14.

10. (a) Uw rogon e yafas u tan e am rok Got? (b) Mang e ra ayuwegem ni ngam yiluy owchem ko pi tow’ath?

¹⁰ Nap’an ni ra gagiyeg e am rok Got ma dakuriy e m’ar ma dabki yim’ e girdi’ bayay. “Dariy be’ ni be par u lan e nam rodad ni bay ki yog nib m’ar.” (Isa. 33:24) Girdi’ ni ra par u tan e am rok Got u fayleng e yad ra od gubin e kadbul ma be mon’og e yafas rorad. Ma ra felfelan’ gum’ircharad ko maruwel ni yad be tay u taabang ko piin ni taareb e michan’ rorad. Yafas ni aray rogon e reb e tow’ath! A mu pithig e Bible rom ko Isaiah 33:24 nge 35:5-7. Mu fal’eg i lemnag e pi thin ney ya rayog ni nge ayuwegem ni ngam yiluy owchem.

Chuweg Owchey ko Tow’ath

11. Mu weliy rogon ni gagiyeg Solomon ko som’on.

¹¹ Tomren ni kada filed murung’agen e tow’ath ma thingar da maruwelgad ni ba gel ya nge yog ni nge dabi chuw owchedad riy. Bod rogon Solomon u nap’an ni mang pilung nu Israel i meybil u fithik’ e sobut’an’ ngak Got ni be ning e gonop ya nge pufthinnag e girdi’ rok nib fel’ rogon. (Mu beeg e 1 Kings 3:6-12.) Be gaar e Bible: “Got e pi’ ngak Solomon e gonop nge tamilangan’ ni kay gi pag rogon.” Ma aram e ‘kab gonop Solomon ngak e pumoon ni ba gonop u lan e ngek nge pumoon ni ba gonop nu Egypt.’​—1 Ki. 4:29-32.

12. Mang thin e yog Jehovah ni be ginang e piin ni ra mang pilung u Israel?

¹² I ginang Jehovah e piin ni ra mang pilung ni gaar: “En ni ra pilung e dabi lemnag ni nge yoornag e os rok” ma “Fare pilung e dabi yoor leengin, ya ireray e n’en ni ra k’aring nge pi keru’ ngak Somol.” (Deut. 17:14-17) Nge yoor e os rok e be dag ni fare pilung e be yoornag e salthaw rok ya nge ayuweg e nam ko bin nge pagan’ ngak Jehovah ni ra ayuweg. Ra nge yoor e ppin rok ma ku bay e magawon riy ya kar bad u boch e nam ni yad ma liyor ngak boch e got ni googsur, ma pi ppin nem e rayog ni ngar waliyed e pilung nge dabki liyor ngak Jehovah.

13. Uw rogon daki fol Solomon ko thin rok Got?

¹³ De fol Solomon ko thin ni yog Jehovah ni nge fol e pilung riy. Ya ke yoornag e os nge salthaw rok. (1 Ki. 4:26) Ma ki gaman 700 e ppin rok ma 300 e ppin ni dawor ra mabgolgad ni yad ma par rok, boor e pi ppin ney e kar bad ko nam u toobrad. Ma aram e ‘kar pingeged gum’irchaen ni nge tayfan yugu boch e got ma dabki fol rok Jehovah.’ Ke un ko fapi ppin rok ko liyor ni googsur. Ma aram me yog Jehovah ngak Solomon ni gaar, “ma aram e gu be micheg ni bay gu chuweg e gagiyeg ko pilung u paam.”​—1 Ki. 11:1-6, 11.

14. Mang e buch ni bochan e daki fol Solomon nge nam nu Israel?

¹⁴ Daki lemnag Solomon ni Pilung fare tow’ath ni ir e be yog e thin ko fa bin riyul’ e Got, ma aram me ulul ko liyor ni googsur. Munmun, me digey fare nam nu Israel e tin riyul’ ma aram e ka ni gotheyrad ni gonap’an 2600 e duw ni ke yan. Yugu aram rogon ni ke sul piyu Jew ngar liyorgad ngak Got. Ma aram me yog Jesus ni gaar: “gagiyeg rok Got e bay ni chuweg romed ngan pi’ ngak girdien reb e nam ni yad e bay yib wom’engirad nib fel’.” Ma aram e n’en ni buch. Ki yog Jesus ni gaar: “Ere chiney e bay nn’ag e tabinaw rom.” (Matt. 21:43; 23:37, 38) Bochan ni daki yul’yul’ e nam nu Israel ma aram kar n’aged e tow’ath rorad ni aram e ur moyed ni ke mel’egrad e bin riyul’ e Got. Ere ke yan gonap’an 1930 e duw me yib e salthaw nu Roma ngar kirebniged yu Jerusalem nge tempel riy. Ma boor piyu Jew ni kan fekrad kar manged sib.

15. Mu weliy e n’en ni buch rok l’agruw e pumoon ni kar pagew e tin ni ba ga’ fan.

¹⁵ Judas Iskariot e ir reb fa 12 i apostal rok Jesus. Manang rogon e machib nib fel’ nge maang’ang ni i ngongliy Jesus ni bochan gelngin Got. Machane de par ni ba yul’yul’. “Bochan e ir be’ nib moro’ro’; ya ir e ma fek tafen e salpiy rorad ma ma iring boch e salpiy riy.” (John 12:6) Kari gel e chogow rok ma aram me yognag Jesus ngak e pi tayugang’ ko teliw nu Israel ni bochan 30 yang e salpiy ni silber. (Matt. 26:14-16) Demas ni ur maruwelgow apostal Paul e be’ ni daki tiyan’ ko maruwel rok. De ayuweg gum’irchaen. Ma aram me yog Paul ni gaar: “Demas e ke t’uf rok e ngongol nu roy u fayleng.”​—2 Tim. 4:10; mu beeg e Proverbs 4:23.

Mu Fil Ban’en Riy

16, 17. (a) Uw gelngin e togopuluw ni be yib ngodad? (b) Mang e ra ayuwegdad ko togopuluw ni be yib rok Satan ngodad?

¹⁶ Gubin e tapigpig rok Got ma thingar ra fal’eged i lemnag fapi thin ni bay u Bible, ya ke yog Paul ngodad ni gaar: “Urngin e pi n’ey ni yib ngorad ni fan e nge fil e tin ni ka ba’ e girdi’ ban’en riy, ma kan yoloy nga babyor ni nge mang ba ning chilen ngodad. Ya gadad be par u ba ngiyal’ ni ke chugur ni nge taw ko tungun.” (1 Kor. 10:11) Chiney e gad be par ko tin tomren e rran ko re fayleng ney nib sug ko kireb.​—2 Tim. 3:1, 13.

¹⁷ Satan ni Moonyan, “fare kan nib kireb nu roy u fayleng” e manang “ndaki n’uw nap’an ni nge par.” (2 Kor. 4:4; Rev. 12:12) Ra guy rogon ni nge kirebnag e michan’ rok e pi Kristiano nge dabkur yul’yul’gad ngak Jehovah. Ere be fanay boor ban’en u roy u fayleng ni nge bannag e girdi’ ngay me wawliy e girdi’ ko kireb. Machane bay e ayuw nib gel ni ma pi’ Jehovah ko girdi’ rok, “re gelngin nem ni ir e ba th’abi gel e yib rok Got.” (2 Kor. 4:7) Rayog ni nge pagan’dad nga gelngin Got ni ra ayuwegdad ngada gelgad ko pi togopuluw rok Satan. Ere ri ba ga’ fan ni nguud meybilgad ni gubin ngiyal’ ma nge pagan’dad ngak Jehovah ya ra ‘pi’ gelngin ngak e piin ni yad ra ning ngak.’​—Luke 11:13.

18. Uw rogon ni gad ra lemnag e re fayleng ney e chiney?

¹⁸ Ke tamilangan’dad ma gad be par ni gad ba gel ni bochan e gad manang ni dabki n’uw nap’an ma ra thang Got Satan nge girdi’ rok nib kireb. “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:17) De gonop reb e tapigpig rok Jehovah ni faanra lemnag ni bay ban’en ko re fayleng ney ni ri ba ga’ fan ko bin ni nge fal’eg e tha’ u thilrow Jehovah! Re fayleng ney ni ba mil fan ngak Satan e bayi chuw ni bod ba barkow ni be yan nga ar. Machane bay e ulung rok Jehovah ni rayog ni nge ayuweg e girdi’ ngar pired ni yad ba yul’yul’ me yog e yafos ngorad. Rayog ni nge pagan’rad ko thin nu Bible ni be gaar: “Piin nib pagan’rad ngak Somol e bay ur pired u daken e nam u fithik’ e gapas, machane piin ni yad ba kireb e bay ni tulufrad ngar chuwgad u daken e nam.” (Ps. 37:9) Ere ngar mu yuluyed owchemed ko re taw’ath ney ni rib manigil!

Ka Ga Manang?

• Uw rogon ni ke lemnag Paul e taw’ath ni kan ognag ngak?

• Uw rogon ni ni yira pufthinnag e piin ni ra par u fayleng ni manemus?

• Mang e fel’ ni ngam rin’ e chuiney?

[Picture on page 14, 15]

Ga be guy e tow’ath u nap’an ni ga be beeg e Bible?