Nge Folwok e Piin Figirngiy ko T’ufeg Rok Kristus!

NAP’AN e bin tomur e nep’ ko yafas rok Jesus u fayleng, me yog ngak e pi apostal rok ni gaar: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) Ere thingari dag e tin riyul’ e Kristiano e t’ufeg ngorad.

Ke yog apostal Paul ngak e piin figirngiy ni gaar: “Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efe. 5:25) Uw rogon ni rayog ni nge fanay e en figirngiy e re thin nu Bible ney ni nge ayuweg e mabgol rok ni faanra leengin e reb e tapigpig rok Jehovah?

Ke Ayuweg Kristus e Ulung

Be gaar e Bible: “Re moon nib t’uf leengin rok e aram e be t’ufeg ir. Ya dariy be’ ni kaa fanenikay e birok e dowef. Ya ma duruw’iy ma ma ayuweg, ni bod rogon e n’en ni ma rin’ Kristus ngak girdien e galesiya.” (Efe. 5:28, 29) I t’ufeg Jesus pi gachalpen ma i ayuwegrad. Yugu aram rogon ni dar flontgad, ma i gol ngorad u gubin ngiyal’. Ma baadag ni nge par e ulung “nrib gamog,” ya baadag ni nge par pi gachalpen nib fel’ pangirad.​—Efe. 5:27.

Bod rogon ni ke t’ufeg Kristus e ulung, ere ku arrogon e en ni figirngiy ni nge t’ufeg e pin rok u rogon e thin nge ngongol rok. Ra felfelan’ e en leengiy ni faanra ma yog e en figirngiy ngak nib t’uf rok ma ma ayuweg. Machane dabiyog ni nge felfelan’ e en leengiy ko pi’ n’en ni ke pi’ figirngin ngak ni faanra pag ni dabki non ngak ma dabkur par u taabang ni bod e mabgol.

Uw rogon ni ma dag e en ni figirngiy ni ma ayuweg e ppin rok? Ma yog ko mini’ e pin rok ma ma pining e magar ko ayuw ni ma pi’ e pin rok ngak. Rayog ni nge yog e en ni figirngiy ngak e girdi’ ni yad be sabathin boch ban’en ni ke rin’ e pin rok nib fel’. Maku rayog ni nge dag ni be tayfan e pin rok u ba ngiyal’ ni goo yow. Ra kol pa’, me siminmin, me gumuchmuch ngak, me yog ban’en nib fel’ ni ke rin’ e pin rok. Sana pi n’en ney e yima lemnag ni gathi rib ga’ fan machane ba ga’ fan u laniyan’ e pin.

‘De Tamra’ ni Nge Yog ni Yad Pi ‘Walagen’’

De tamra’ Jesus Kristus ni nge yog ni “yad pi ‘walagen.’” (Heb. 2:11, 12, 17) Ere faanra gur reb e figirngiy ni Kristiano ma dab mu pagtalin ni pin rom e ir reb e Kristiano ni walagem. Rogon ni ke ognag ir ngak Jehovah e ba ga’ fan ko mabgol ni demtrug ko ke taufe u m’on fa tomren ni kam mabgolgow. Ma tay e girdi’ u lan e ulung e pin rom ni bod walagrad nib pin. Ere ba ga’ fan ni ngam gol mag sumunguy ngak e pin rom u tabinaw nge lan e Kingdom Hall.

Faanra ku bay boch e maruwel nib mil fan ngom u lan e ulung ma yu ngiyal’ ma ra mo’maw’ ni ngam yarmiy e ulung nge maruwel nib mil fan ngom u tabinaw. Rayog ni nge puruy’ e piin ni piilal nge ministerial servant ni ngan ayuwegem ngan pi’ boch e maruwel nib milfan ngom ngak boch e walag ni pumoon ya nge yog ni ngam ayuweg e pin rom ni gowa walagem. Dab mu pagtalin ni bay boor e walag ni pumoon ni rayog ni ngar ayuweged gur ko maruwel rom, machane ke mus ni goo gur e rayog ni ngam ayuweg e pin rom ya gimew e ni m’ag pa’mew.

Ere gur lolugen e pin rom. Be gaar e Bible: “Kristus e ir e lolugen urngin e pumoon, ma pumoon e ir lolugen leengin.” (1 Kor. 11:3) Uw rogon ni ngam dag ni gur lolugen leengim? Thingar mu dag e t’ufeg ngak, gathi nguum sul nga daken fare thin u Bible, ma ga be yog ni ngan tayfam. Kanawo’ ni ga ra dag ni gur lolugen leengim e ngam fol ko kanawo’ ni ke dag Jesus Kristus ni ngam ayuweg e pin rom.​—1 Pet. 2:21.

“Gimed e Fager Rog”

Yog Jesus ngak pi gachalpen ni yad e fager rok. Gaar ngorad: “Aram e dab ku gog ni gimed e tapigpig rog, ya be’ nib tapigpig e de nang e n’en ni be ngongliy e en ni masta rok. Machane nggog ni gimed e tafager rog, ni bochan e kug weliy ngomed urngin e tin ni kug rung’ag rok e Chitamag.” (John 15:14, 15) Fel’ e numon u thilin Jesus nge pi gachalpen. Ur maruwelgad u taabang. “Jesus nge piin ni gachalpen” e kar uned ko madenom ko mabgol u Kana. (John 2:2) Boor yay ni u ranod ko fare milay’ nu Gethsemane. Be gaar e Bible: “Ya ke yoor yay ni muulung Jesus nge pi gachalpen ngay.”​—John 18:2.

Be’ ni leengiy e ba t’uf rok ni nge dag figirngin ni ba fel’ thilrow. Rib ga’ fan ni nge felfelan’ e mabgol u taabang! Rayog ni ngar pigpiggow ngak Got ma ra filew e Bible u taabang. Ku rayog ni nga u ranow u taabang ma yow be sabathin ma yow be abich u taabang. Gathi kemus ni kar mabgolgow machane bod l’agruw e fager nib fel’ thilrow.

Ke ‘T’ufegrad nge Mada’ ko Tomur’

Ke t’ufegrad Jesus nge “yan i mada’ ko tomur.” (John 13:1) Boch e pi figirngiy e darur folwokgad ko t’ufeg ni dag Jesus. Yad ma pag e ‘pin ni kar leengiyed ni ka yad ba pagel,’ ya sana yad badag ni ngar leengiyed e pin ni kab rugod.​—Mal. 2:14, 15.

Boch e girdi’ e kar folwokgad rok Kristus ni bod Willi. Rib gel e m’ar ko pin rok Willi ere boor e duw ni i par nib t’uf e ayuw rok. Uw rogon ni lemnag Willi e re n’ey? Ke gaar: “Gubin e rran ni gu ma lemnag ni pin rog e ba tow’ath ni ke pi’ Got ngog ere gu ma tay ni ba ga’ fan. Ke pag 60 e duw ni gu micheg ni nggu ayuweg u gubin ngiyal’ ni demtrug e magawon nra yib ngak. Dabiyog ni nggu pag talin e thin ni kug micheg ngak.”

Piin figirngiy ni Kristiano e yad ma folwok ko t’ufeg ni dag Kristus. Mu ayuweg leengim nib t’uf Got rok ya bod walagem nib pin maku ir e fager rom.

[Picture on page 19]

Ba fel’ thilmew e pin rom fa?

[Picture on page 19]

‘Ngaum t’ufeg e pin rom’