Kam Dugliy Ba Ngiyal’ ni Fan ko Fol Bible?

FA BINEM e duw e thilyeg fare Governing Body ara fare Ulung ni Ma Pow’iyey rogon e muulung ni gad ma tay ko yu wik ya nge yoor e tayim ni fan ko fol Bible u tabinaw. Faanra gur lolugen reb e tabinaw, ma ngam gay rogon ni ngaum fol Bible gad e ppin rom nge bitir rom u taabang ni gubin ngiyal’. Piin mabgol ndariy e bitir rorad e ku rayog ni ngar fanayed e re tayim ney ni fan ko fol Bible u taabang. Ma pi walag ni pumoon nge ppin ndawor ra uned ko mabgol e ku rayog ni ngar dugliyed ba ngiyal’ ni fan ko fol Bible ni goo yad.

Boor e girdi’ ni kar felfelan’gad ko biney e yaram nib beech ni fan ko Fol Bible u Tabinaw. Bod rogon Kevin nreb e piilal e yoloy ni gaar: “Gamad e biney e ulung e ri gamad be pining e magar ko biney e yaram nrib fel’. Gamad e piilal e kug weliyed rogon ni gamad be fol ko n’en ni ke yog fare Ulung ni Ma Pow’iyey ni nggu rin’ed, ni aram e nguug filed chon e tabinaw romad e Bible u taabang.”

Jodi ni ppin rok reb e piilal u lan ulung e yoloy ni gaar: “Dalip e bitir romow ni ppin ni bagayad e 15 e duw rok, ma bagayad e 11, ma bagayad e 2. Dawori n’uw nap’an ni kug uned nga reb e ulung ni yima non u paey riy. Ba t’uf e tayim nge athamgil ni ngan fal’eg rogoy ko gubin e muulung. Machane chiney ni kafin ni fal’eg e biney e yaram nib beech e ke yog ni nggu ted reb nep’ ni nggu fol Bible gad u taabang!”

John nge JoAnn nib wu’ i mabgol ni yow ma pioneer e lungurow: “Kafram e de mudugil ngal’an e fol Bible ni gamad ma tay u tabinaw ni bochan e boor ban’en ni nggu fal’eged rogomad riy ni fan ko muulung. Machane biney e yaram nib beech e reb e tow’ath ni ke pi’ Jehovah nrayog ni nge ayuwegdad ko tirok ban’en ni faan gad ra fol riy.”

Tony nreb e walag ni pumoon ni ke pag 20 e duw rok e ke turguy ni l’agruw fen e maruwel ni blayal’ e nga i fol Bible. Ma tin ka bay e rran e ma fanay ni nge fal’eg rogon ni fan ko muulung. I yog ni gaar, “Gu ma athapeg ni nge taw ko l’agruw fen e maruwel.” Mang fan? “Binem e nep’ e kug tay ni fan ngak Jehovah.” Ki yog ni gaar: “Gonap’an l’agruw e awa ni gu ma tay ni fan e nggu fil boch ban’en nrayog ni nge gelnag e tha’ u thilmow Jehovah. Bochan ni ke yoor e tayim ni gu be fanay ni fan ko fol Bible, ma ke yog ni nggu fal’eg i lemnag e pi thin nu Bible ni gu ma beeg.” Ere mang angin ni ke yib? “Kari taw nga gum’irchaeg e fonow rok Jehovah, ni ke thil ko kafram.” Ni uw rogon? “Kug beeg murung’agen e fager rok Jonathan nge David u lan fare ke Babyor ni Insight. Boor ban’en ni kug fil u rogon ni ke pag Jonathan fan ni nge ayuweg e fager rok. N’en ni rin’ e ke ayuwegneg ni ngari tamilang u wan’ug rarogon e tin riyul’ e fager. Ri gu be sonnag e l’agruw fen e maruwel nnep’ ni ngkug fil boch e pi n’ey nrib fel’!”

Dariy e maruwar riy ni ungin e tapigpig rok Jehovah nra yib angin e biney e tayim ngorad ni kan tay ni fan ko fol Bible u tabinaw.