Ba Magawon ko Fayleng nge Rogon nra Puf

GUBIN yang ma bay e gafgow riy, ma boor e girdi’ ni yad be gay rogon ni ngar ayuweged e girdi’ ni be gafgow. Piin ma maruwel u aspital e yad ma maruwel nib n’uw nap’an ni ngar ayuweged e piin ni ke m’ar nge piin ni ke maad’ad. Ma girdien e mathang nifiy, nge police, nge piin ma ngongliy e motochiyel, nge piin ni ma pi’ e ayuw u nap’an ni ke yib e magawon nib tomgin e yad ma gay rogon ni ngar achignaged ara ngar chuweged e girdi’ u fithik’ e gafgow. Pi n’ey e be yib angin ngak boch e girdi’ machane dabiyog ni nge chuweg e gafgow u fayleng ya yigoo Got e rayog rok ni nge pithig e re magawon ney ma dab ki n’uw nap’an me rin’.

Rayog ni nge pagan’dad ko n’en ni be yog e bin tomur e babyor u Bible ni gaar: “Bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Revelation 21:4) Mu lemnag urngin e girdi’ nra yib angin e re n’ey ngorad. Be micheg ni n’en nib m’agan’ Got ngay e aram e nge chuw e gafgow. Rogon nra rin’, e aram e nge taleg e mahl, uyungol, m’ar, nge ngongol nde mat’aw ni be rin’ e girdi’ nib muun e piin kireb ngay.

N’en Nra Rin’ Gil’ilungun Got

Ra lebguy Got e n’en ni ke micheg u daken Jesus Kristus ni ir e ba migid ngak Got nth’abi gel gelngin u ga’ngin e palpalth’ib. Dab ki n’uw ma bayi gagiyegnag Jesus e fayleng ni ga’ngin. Ma aram e dab ki gagiyeg e pi pilung ara girdien e am ko fayleng ya ra yan i par e fayleng ni taareb e am ni be gagiyegnag ni aram Gil’ilungun Got, ma taabe’ e Pilung riy.

Re Am nem e ra chuweg e pi am ko girdi’. Kab kakrom ni yiiynag e Bible ni gaar: “Bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” (Daniel 2:44) Gubin e girdi’ nu fayleng e yad ra par u tan Gil’ilungun Got ni kar taarebgad.

Nap’an ni immoy Jesus u fayleng ma boor yay ni i weliy murung’agen Gil’ilungun Got. U lan fare kenggin e meybil ni fil ngak pi gachalpen e gaar: “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:10) Mu tay fanam i yan riy ni tamilangnag Jesus nre Am nem e bay rogon ko n’en nib m’agan’ Got ngay ni ngan rin’ u roy u fayleng, ni aram e nge chuw e gafgow.

Am rok Got e ra fek e flaab i yib ngak e girdi’ ndariy reb e am ko girdi’ nrayog rok. Dab mu pagtalin ni pi’ Jehovah Fak ni biyul ya ngki yog e yafas ni manemus ko girdi’ bayay. Girdi’ nra par u tan e gagiyeg ko Gil’ilungun Got e bay ur flontgad i yan. Ere mang angin nra yib? Jehovah e “bayi kirebnag gelngin e yam’ ni manemus! Bayi faley e lu’ u owchen gubin e girdi’.”​—Isaiah 25:8, BT.

Machane, sana ra fith boch e girdi’ nra gaargad: ‘Mang fan ni kab kafram ma de chuweg Got e gafgow? Gur, mang e be sonnag?’ Rayog ni nge chuweg Got e gafgow kafram. Machane, ke pag ka be ulul ni gathi bochan e ir reb e Got nib kireb, ya bochan e fan ngak pi fak nu fayleng. Faanra ba t’uf fak be’ rok ma ra digey ni nge gafgow ni faanra manang nra yib angin nib fel’ ngak ko tomur. Ere ku arrogon Jehovah ni bay fan ni ke pag e girdi’ yad be gafgow e chiney, ma aram e n’en ni be tamilangnag e Bible. Pi n’em e ba muun ngay e puf rogon, nge denen, nge togopuluw nni tay nga mat’awun e gagiyeg rok Jehovah. Ku be weliy e Bible murung’agen reb e kan nib kireb ni ke pag Got ni nge gagiyeg u taaboch i ngiyal’.a

Yugu aram rogon ndabiyog ni ngad weliyed gubin e pi n’ey, machane bay l’agruw ban’en nib riyul’ nrayog ni nge l’agan’dad ngay me pi’ e athamgil nga lanin’dad. Bin som’on e: Flaab nra pi’ Jehovah ngodad boch nga m’on e dabiyog ni ngan taarebrogonnag ko gafgow ni gad bay u fithik’ e ngiyal’ ney. Ki micheg Got ni gaar: “Tin kakrom e ri bay ni pag talin.” (Isaiah 65:17) Ere gafgow nge kireban’ ni ma yib ngodad e ngiyal’ ney e ra chuw ni manemus.

Bin migid e: Bay e ngiyal’ ni ke dugliy Got ni nge chuweg e gafgow, ma dabi thil. Dab mu pagtalin ni fith Habakkuk ni profet ko wuin e ra taleg Jehovah e cham ni be tay e girdi’, me fulweg ni gaar: “N’en ni ku gog ngom e bay yib i m’ug . . . ko ngiyal’ ni kug dugliy, ma dabi sowath.” (Habakkuk 2:3, BT) Bin migid e thin e be tamilangnag nre ‘ngiyal’’ i n’em ni kan dugliy e ke chugur.

[Footnote]

[Picture on page 7]

Thin nu Bible ni Be Weliy Murung’agen e Flaab Boch Nga M’on

RA M’AY E MAHL:

“Mired, ngam guyed e tin ni ke rin’ Somol! Mu guyed e pi n’en ni yira ngat ngay ni ke ngongliy u daken e fayleng! Be taleg e pi mahl ni yibe tay u fayleng i yan.”​—Psalm 46:8, 9.

GAD RA MADA’ E PIIN NIB T’UF RODAD BAYAY:

“Bayi faseg urngin e girdi’ ko yam’, ni tin nib [“mat’aw,” NW] nge tin [“de mat’aw,” NW].”​—Acts 24:15.

RA YOOR E GGAN:

“Me par e nam nib sug ko grain; me sug daken yungi ted ko woldug.”​—Psalm 72:16.

RA CHUW E M’AR :

“Dariy be’ ni be par u lan e nam rodad ni bay ki yog nib m’ar.”​—Isaiah 33:24.

YIRA THANG E PIIN NIB KIREB:

“Bayi buk’liy e piin kireb ko fare nam me pug e pi tadenen nge chuweg riy ni bod e pan ni ka ni pug u but’.”​—Proverbs 2:22, BT.

RA PAR E TIN NIB MAT’AW:

“Ba’ reb e rran ni bay yib ba pilung nib mat’aw [Jesus Kristus], nge piin ni bay urogned e thin ko nam ma ba yal’uw e gagiyeg ni bay ur tiyed.”​—Isaiah 32:1.

[Picture on page 7]

Gil’ilungun Got e ra chuweg gubin e gafgow ni ma yib ngodad