Susun ni Uw Rogon ni Ngad Pied e Fulweg ko “Tin ni Ke Fith Be’” Ngodad?

1, 2. (a) Mu weliy ban’en ni ke buch ni be tamilangnag feni ga’ fan ni ngaud gonopiyed rogon e deer ni gad ma fith ko girdi’. (Mu guy e sasing ni bay u tabolngin e re article ney.) (b) Mang fan ndab da rusgad ni ngad weliyed ko girdi’ murung’agen boch e machib nib mo’maw’ ni ngan weliy?

BOCH e duw ni ke yan ma immoy reb e walag nib pin ni i weliy boch e thin nu Bible ko pumoon rok ni gathi ir reb e walag. Kafram e immoy nib m’ing e pumoon rok ko teliw rok. Ere, nap’an ni yow be non me yog e pumoon rok ngak nib mich fare machib ni Trinitas u wan’. Me sana fare pin ngay nde nang fare pumoon rok ko mang fare machib ni Trinitas. Ere fith u fithik’ e sumunguy ni gaar, “Ba mich u wan’um ni Got e Got, ma Jesus e Got, ma gelngin Got nib thothup e Got; ya gathi dalip e Got ya taareb?” Me gin fare pumoon, me gaar, “Danga’, de mich u wan’ug e re n’ir!” Bochan e re n’ey ma aram me yag ni nge weliy fare walag nib pin e bin riyul’ i rarogon Got ngak.

² Re n’ey ni ke buch e be tamilangnag feni ga’ fan ni ngaud gonopiyed rogon e deer nib fel’ ni ngad fithed ngak be’. Ku be tamilangnag ban’en nib ga’ fan ni aram e: Susun ndab da rusgad ni ngad weliyed ko girdi’ murung’agen boch e machib nib mo’maw’ ni ngan weliy ni bod rogon e Trinitas, nge infierno, nge fare machib ndariy be’ ni ke Sunmiy urngin ban’en. Faanra pagan’dad ngak Jehovah nge rogon ni be skulnagdad, ma rayog ni ngad pied e fulweg ko n’en ni ke fith be’ ngodad u reb e kanawo’ nra taw nga gum’irchaen. (Kol. 4:6) Chiney e ngad weliyed murung’agen e pi n’en ni ma rin’ e pi tamachib nib salap u nap’an ni yad be pi’ e fulweg ko n’en ni ke fith be’ u murung’agen e pi machib ney. Gad ra weliy (1) rogon ni ngad fithed e deer nra k’aring facha’ ni nge weliy laniyan’, (2) rogon ni ngad fanayed e thin nu Bible ni ngad tamilangnaged fan e n’en ni gad be weliy, nge (3) rogon ni ngad weliyed boch e fanathin nra tamilangnag fan e n’en ni gad be weliy.

MU FITH E DEER NRA K’ARING FACHA’ NI NGE WELIY LANIYAN’

3, 4. Mang nib ga’ fan ni ngaud fithed e deer ni ngad nanged e n’en ni ke mich u wan’ be’? Mu weliy reb e kanawo’.

³ Ra ud fithed e deer ma ra ayuwegdad ni ngad nanged e n’en ni ke mich u wan’ be’. Mang nib ga’ fan e re n’ey? Be yog e Proverbs 18:13, BT ni gaar: “Mmotoyil u m’on ni ngam non. Ya ra danga’ ma gur be’ ni ga ba pinat ma ga ra reg ku be’.” Ere, u m’on ni ngad weliyed e n’en ni be yog e Bible u murung’agen reb e machib, mab fel’ ni ngad guyed rogon ni ngad nanged ko mang e ke mich u wan’ e en ni gad be non ngak. Ya faanra danga’, ma rayog ni ngad n’aged boor e tayim ni gad be guy rogon ni ngad micheged nde riyul’ reb e machib me yan i tomur riy ma gad nang ni gathi ireram e n’en nib mich u wan’ facha’.​—1 Kor. 9:26.

⁴ Susun ni gad be weliy be’ murung’agen e infierno ara fare machib ni murung’agen e nifiy ndabi math biid. Gathi gubin e girdi’ nib mich u wan’rad ni infierno e aram e gin ni ma yan e girdi’ ngay ni ngan urfiyrad. Boor e girdi’ e yad ma lemnag nra ke yan be’ nga infierno ma be yip’ fan ndariy e tha’ u thilrow Got. Ere, rayog ni nge lungudad: “Ra be’ ma rogon ni ma lemnag fare machib ni murung’agen e infierno, me gur, uw rogon e re machib ney u wan’um?” Tomuren ni ke weliy e n’en ni be lemnag, ma aram e ngiyal’ nrayog ni ngad tamilangnaged ngak e n’en ni be weliy e Bible u murung’agen e re n’ey.

5. Mang fan ni faanra ud fithed e deer ma ra ayuwegdad ni ngad nanged fan ni ke mich ban’en u wan’ be’?

⁵ Gad ra gonopiy rogon e deer ni ngad fithed ngak be’ ma ra ayuwegdad ni ngad nanged fan ni ke mich ban’en u wan’. Bod ni, faanra kad mada’naged be’ u nap’an e machib ni ke yog nde mich Got u wan’, ma mang e gad ra rin’? Sana gad ra lemnag nib mich fare machib ni evolution u wan’ ara fare machib ni ke sum e girdi’ ko gamanman. (Ps. 14:1) Machane, boor e girdi’ ndaki mich Got u wan’rad ni bochan e gafgow ni yad be mada’nag ara gafgow ni yad be guy ni be tay e girdi’. Sana yad be lemnag ni faanra rriyul’ ni bay Be’ ni Ke Sunmiydad ni gad ba t’uf rok, ma dabi pag e girdi’ ni ngaur gafgowgad ni aray rogon. Ere, faanra ke yog be’ ngodad nde mich u wan’ ni bay e Got, ma rayog ni ngad fithed ngak ni nge lungudad, “Kab kafram i yib ni ga ma lem ni aram rogon?” Faanra yog ni danga’, ma rayog ni ngad fithed ngak ko mang e ke buch rok ni ke k’aring ni nge lemnag ndariy e Got. Fulweg nra pi’ e rayog ni nge ayuwegdad ni ngad nanged e bin th’abi fel’ e kanawo’ ni ngad ayuweged riy.​—Mu beeg e Proverbs 20:5.

6. Mang e susun ni ngad rin’ed u tomuren ni kad fithed reb e deer?

⁶ Nap’an ni gad ra fith reb e deer, mab t’uf ni ngad fal’eged e motoyil ko n’en nra yog facha’, ngemu’ ma gad pining e magar ngak. Bod ni, sana ra yog ni bay ban’en ni ke buch rok ni ke k’aring ni nge lemnag ndariy Be’ ni Ke Sunmiydad ni gad ba t’uf rok. Machane, u m’on ni ngad weliyed e mich riy nriyul’ ni bay e Got, ma gad yog ngak ndariy ban’en nib kireb riy ni ngad lemnaged ko mang fan ni gad ma gafgow. (Hab. 1:2, 3) Gad ra gum’an’niged gadad ma gad non ngak u fithik’ e t’ufeg ma ra adag ni ngki fil boch ban’en.a

NGAM FANAY E THIN NU BIBLE NI NGAM TAMILANGNAG FAN E N’EN NI GA BE WELIY

7. Angin e machib ni gad ma tay e be yan u rogon e mang?

⁷ Chiney e ngad weliyed rogon nrayog ni ngad fanayed e thin nu Bible ni ngad tamilangnaged e n’en ni gad be weliy. Riyul’ ni Bible e aram e n’en nib ga’ ni gad ma fanay u nap’an e machib, ya ma ayuwegdad ni nge ‘bung rogodad nrayog ni ngad rin’ed urngin mit e ngongol nib fel’.’ (2 Tim. 3:16, 17) Angin e machib ni gad ma tay e der yan u rogon urngin e thin nu Bible ni kad beeged, machane be yan u rogon ni kad tamilangnaged fare thin nu Bible ni kad beeged nge rogon ni kad weliyed fan. (Mu beeg e Acts 17:2, 3.) Ngad weliyed dalip ban’en nrayog ni nge buch ni be tamilangnag e re n’ey.

8, 9. (a) Mang reb e kanawo’ nrayog ni ngad tamilangnaged fan boch ban’en u wan’ be’ nib mich u wan’ ni Jesus nge Got e taareb rogorow? (b) Ku mang boch e kanawo’ ni kam weliy murung’agen e biney e machib riy ngak boch e girdi’ ni ke yib angin?

⁸ Bin 1: Nap’an ni gad be yan ko machib, ma gad mada’nag be’ nib mich u wan’ ni Jesus nge Got e taareb rogorow. Mang boch e thin nu Bible nrayog ni ngad fanayed ni nge tamilangnag nde puluw e re machib ney? Rayog ni nga dogned ngak facha’ ni nge beeg e n’en ni yog Jesus ni bay ko John 6:38 ni be gaar: “Ku gub u tharmiy nga but’ ni nggu rin’ e tin ni be finey e en ni ke l’ugeg ku gub, machane gathi nggu rin’ e tin ni gu be finey.” Tomuren ni kad beeged e re thin ney, ma rayog ni ngad fithed ni nge lungudad: “Faanra Jesus e ir Got, me ere mini’ e ke l’og ke yib nga fayleng? Gathi susun ni Cha’nem e thingari yan i aw ni be’ ni kab ga’ ngak Jesus? Ya bin riyul’ riy e facha’ ni ke l’og faanem e ra yan i aw ni kab tolang ngak.”

⁹ Maku reb e, rayog ni ngad beeged e Filippi 2:9. U rom e weliy apostal Paul riy e n’en ni rin’ Got u tomuren ni ke yim’ Jesus min faseg ko yam’. Be gaar e re thin nem: “Me fek Got Jesus nge tay ni ir e th’abi tolang u tharmiy, me pi’ fare ngochol ngak ndariy reb e ngochol ni ba ga’ ngay.” Rayog ni ngad ayuweged facha’ ni nge fal’eg i lemnag fan fare thin nu Bible, ni aram e nge lungudad: “Faanra immoy Jesus ni taareb rogorow Got u m’on ni nge yim’, ma tomuren ni ke fas ko yam’ me fek Got nge tay ni ir e th’abi tolang u tharmiy, me ere gathi ra yan i aw ni kab tolang Jesus ngak Got? Machane, uw rogon ni nge tolang be’ ngak Got?” Faanra bay fan e Thin rok Got u wan’ facha’ ma riyul’ ni baadag ni nge nang e tin riyul’, ma rayog ni nge k’aring e re thin ney ni nge fal’eg i lemnag e re machib ney.​—Acts 17:11.

10. (a) Uw rogon ni ngad tamilangnaged fan boch ban’en u wan’ be’ nib mich u wan’ fare machib ni murung’agen e infierno ara nifiy ndabi math biid? (b) Ku mang boch e kanawo’ ni kam weliy murung’agen fare machib ni infierno riy ngak boch e girdi’ ni ke yib angin?

¹⁰ Bin 2: Facha’ e rib m’ing ko teliw rok ma rib mo’maw’ ni nge mich u wan’ ni piin ni yad ba kireb e dab ranod nga infierno ara fithik’ e nifiy ni ngan gafgownagrad u rom ndariy n’umngin nap’an. Sana ba mich e re machib ney u wan’ ni bochan e baadag ni nge guy ni kan gechignag e piin ni yad be rin’ e tin nib kireb. Uw rogon ni ngad ayuweged be’ ni aray rogon e lem rok? Som’on e, rayog ni ngad micheged ngak ni yira gechignag e piin ni yad ba kireb. (2 Thess. 1:9) Ngemu’ ma gad yog ngak ni nge beeg e Genesis 2:16, 17, ni be yog u rom ni denen e ma pi’ puluwoy ni yam’. Rayog ni nga dogned ngak ni bochan ni ke denen Adam ma aram fan ni ke af e denen ngak urngin e girdi’. (Rom. 5:12) Machane, rayog ni ngkud tamilangnaged ngak nde yog Got ngak Adam nra yan nga infierno ara nga fithik’ e nifiy. Ngemu’ ma rayog ni ngad fithed ngak ni nge lungudad, “Faan gomanga yira gafgownag Adam nge Efa ndariy n’umngin nap’an, ma gathi susun ni yira yog ngorow u m’on riy?” Tomuren ni kad fithed e re deer ney, ma rayog ni ngad beeged e Genesis 3:19. U rom e be yog e n’en ni buch rorow ni bochan e kar denengow, machane dariy bang riy ni be weliy murung’agen e infierno ara fithik’ e nifiy. Ya ka nog ngak Adam nra sul ko but’. Ere, rayog ni ngad fithed bayay ni nge lungudad, “Gur, ba mat’aw ni nga nog ngak Adam nra sul ko but’ ni faanra bin riyul’ riy e ra yan nga infierno ara nga fithik’ e nifiy?” Faanra riyul’ ni baadag facha’ ni nge motoyil me fal’eg i lemnag e n’en ni kad weliyed, ma rayog ni nge k’aring e re deer ney ni nge fal’eg i lemnag e n’en ni kad weliyed.

11. (a) Mang reb e kanawo’ nrayog ni ngad tamilangnaged fan boch ban’en u wan’ be’ nib mich u wan’ ni gubin e girdi’ nib fel’ e yad ra yan nga tharmiy? (b) Ku mang reb e kanawo’ ni kam weliy murung’agen e re machib ney riy ni ke yib angin?

¹¹ Bin 3: Nap’an ni gad be yan ko machib, ma gad mada’nag be’ nib mich u wan’ ni gubin e girdi’ nib fel’ nra yan nga tharmiy. Biney e machib e rayog ni nge rin’ ban’en nga rogon ni ke nang facha’ fan e thin nu Bible. Bod ni, susun e kad beeged ngak fare thin ni bay ko Revelation 21:4. (Mu beeg.) Sana ra lemnag facha’ ni fapi tow’ath ni kan weliy murung’agen ko re thin nu Bible ney e tow’ath nra yag ngodad u tharmiy. Ere, uw rogon ni ngad tamilangnaged fan e re thin nu Bible ney u wan’? Rayog ni ngad fanayed e re thin nu Bible ney ko bin ni ngkud fanayed yugu boch e thin nu Bible. Be yog e re thin ney ni “dab ku unim’.” Ere rayog ni ngad fithed ngak ni nge lungudad, ‘Gathi ra nge chuw ban’en, ma som’on e immoy fare n’em?’ Dabisiy nra yog ni arrogon. Ere, rayog ni ngad tamilangnaged ngak ndariy e yam’ u tharmiy; kemus ni yigoo fayleng e ma yim’ e girdi’ riy. Ere, ba mudugil ni fare thin ni bay ko Revelation 21:4 e be weliy murung’agen e tow’ath nra yag ngodad u roy u fayleng.​—Ps. 37:29.

NGAM WELIY BOCH E FANATHIN NRA TAMI

12. Mang fan ni i fanay Jesus e fanathin?

¹² Gathi kemus ni i fith Jesus e deer u nap’an ni i machib, ya ku i weliy boch e fanathin. (Mu beeg e Matthew 13:34, 35.) Pi fanathin rok nem e ki tamilangnag ko rriyul’ ni baadag e piin ni ur motoyilgad ngak ni ngar nanged e tin riyul’ fa danga’. (Matt. 13:10-15) Fanathin ni ki weliy Jesus e ki ayuweg e girdi’ ni ngar adaged ni ngar motoyilgad ngak, ma dab ra paged talin e n’en ni ke weliy. Ere, uw rogon ni ngad fanayed e fanathin u nap’an ni gad be machib?

13. Mang reb e fanathin nrayog ni ngad fanayed ni ngad tamilangnaged ni kab tolang Got ngak Jesus?

¹³ Ba fel’ ni ngad weliyed e fanathin nib mom ni ngan nang fan. Baaray ban’en nrayog ni nga dogned u nap’an ni gad be weliy ni Got e kab tolang ngak Jesus. Rayog ni nga dogned ni ke taarebnag Got nge Jesus e tha’ u thilrow ko tha’ u thilin e girdi’ u lan e tabinaw. Ke yog Got ni Jesus e Fak, me Jesus e yog ni Got e Chitamangin. (Luke 3:21, 22; John 14:28) Ngemu’, ma rayog ni ngad fithed ngak ni nge lungudad: “Faanra ga baadag ni nggu nang ni bay l’agruw ni’ ni taareb rogorow, ma chon mini’ u lan reb e tabinaw e ga ra weliy murung’agen ngog ya nggu nang ni taareb rogon fagali cha’?” Sana ra weliy facha’ murung’agen e walag ara athlog. Faanra ke yog ni aram rogon, ma rayog ni nga dogned ngak nib fel’ e binem e fanathin ni ke fanay. Ngemu’ ma gad fith ngak ni lungudad: “Ere, faanra ba mom ni nge yib e biney e fanathin ngan’dow, me ere dariy e maruwar riy nra fanay Jesus ni ir e Bin Th’abi Fel’ e Sensey e biney e fanathin u nap’an ni be weliy murung’agrow Got. Machane, bin riyul’ riy e yog ni Got e Chitamangin. Ere, re n’ey e be tamilangnag nib ilal Got ngak Jesus ma kab ga’ lungun ngak.”

14. Mang fanathin e ra tamilangnag nde puluw ni nge tay Got Moonyan’ ni ir e nge gechignag e girdi’ u infierno ara fithik’ e nifiy?

¹⁴ Ngkud weliyed reb. Bay boch e girdi’ ni yad ma lemnag ni Satan e ir e “ba milfan” e infierno ngak ara nifiy ndabi math biid. Rayog ni ngad weliyed reb e fanathin ni ngad ayuweged reb e gallabthir ni nge tamilang u wan’ nde puluw ni nge tay Got Moonyan’ ni nga i gafgownag e girdi’ u infierno ara fithik’ e nifiy. Rayog ni nge lungudad: “Susun e dakir fol e bitir rom ma kari yoor ban’en nib kireb ni be rin’. Ere, mang e ga ra rin’?” Dabisiy nra yog fare gallabthir nra guy rogon ni nge llowan’nag fak. Ma sana boor yay nra guy rogon ni nge ayuweg fare tir ya nge dab ki rin’ e kireb. (Prov. 22:15) Ere, rayog ni ngam fith fare gallabthir ko mang e ra rin’ ni faanra ke guy rogon ni nge ayuweg fare tir, machane ka der fol. Yooren e gallabthir e yad ra yog ni n’en ni yad ra rin’ e yad ra gechignag fare tir. Ere, rayog ni ngad fithed ni nge lungudad, “Machane, uw rogon ni faanra kam nang ni bay be’ nib kireb ni ir e be k’aring e bitir rom ni nga i togopuluw ngom?” Dariy e maruwar riy nra damumuw fare gallabthir ngak facha’. Ma tomur riy e rayog ni ngad tamilangnaged fan e re fanathin ney ni aram e nge lungudad, “Faanra kam nang ni bay be’ nib kireb ni ir e be k’aring e bitir rom ni nga i togopuluw ngom, ma ga ra yog ngak ni ir e nge gechignag fare tir?” Ba mudugil ni danga’. Ere, ba tamilang ndabi fanay Got Satan ni nge mang ir e gechignag e girdi’ ni kireb, ya gad manang ni ir e be k’aring e girdi’ ni ngar rin’ed e tin nib kireb!

DAB DA LEMNAGED RAROGODAD NGE PIIN NI GAD BE MACHIBNAG NIB PAG ROGON

15, 16. (a) Mang fan nsusun e dab da lemnaged ni gubin e girdi’ ni gad ra machibnag ma yad ra adag ni ngar motoyilgad ko fare thin nib fel’ ni murung’agen Gil’ilungun Got? (b) Gur, rib ga’ fan ni ngar da salapgad mfini yag ni ngad machibnaged be’ nib fel’ rogon? Mu weliy rogon. (Kum guy e thin ni bay ko fare kahol ni kenggin e “Ban’en Nra Ayuwegdad ni Ngad Pied e Fulweg ko N’en ni Ke Fith Be’ Ngodad.”)

¹⁵ Gad manang ni gathi gubin e girdi’ ni gad ra machibnag e yad ra adag fare thin nib fel’ ni murung’agen Gil’ilungun Got. (Matt. 10:11-14) Mus ni faanra kad fithed boch e deer nib fel’, ma kad tamilangnaged fan e n’en ni gad be weliy nib fel’ rogon, ma kad weliyed boch e fanathin nib tamilang, ma gathi gubin e girdi’ ni yad ra motoyil ngodad. Bin riyul’ riy, e mus ngak Jesus ni ir e bin th’abi fel’ e Sensey, maku de yoor e girdi’ ni motoyil ngak!​—John 6:66; 7:45-48.

¹⁶ Maku reb e, mus ni faanra gad be lemnag ni gathi ri gad ba salap i fil ban’en ngak be’, maku rayog ni nge yib angin e machib ni gad ma tay. (Mu beeg e Acts 4:13.) Be tamilangnag e Thin rok Got fan ni nge mich u wan’dad ni “piin ni ke mel’egrad Got ni nge yog e yafos ndariy n’umngin nap’an ngorad” e yad ra motoyil ko fare thin nib fel’. (Acts 13:48) Ere, dab da lemnaged rarogodad nge piin ni gad be machibnag nib pag rogon. Susun e ngad guyed rogon ni ngad mon’oggad u rogon ni gad ma fil ban’en ko girdi’, machane susun ndabi mulan’dad ni faanra de motoyil e girdi’ ngodad. Manga yugu da folgad u rogon ni be skulnagdad Jehovah, me pagan’dad nra yib angin ngodad nge piin ni yad ra motoyil ngodad. (1 Tim. 4:16) Rayog ni nge ayuwegdad Jehovah u rogon ni ngad “pied e fulweg nib mat’aw ko tin ni ke fith be’” ngodad. Bin migid e article e gad ra weliy riy reb e kanawo’ nra yib angin e machib ni gad ra tay ni faan gad ra rin’ ko girdi’ e n’en ni gad baadag ni ngan rin’ ngodad.