KENGGIN E RE KE BABYOR NEY | ROGON NI NGAM ADAG E MARUWEL ROM
MARUWEL NIB GEL—Kab M’ag ko Par e Ngiyal’ Ney Fa Danga’?
Ke yan Alex ni ngki chibiy reb e kahol ni nge tay nga lan e karrow ko re raba’ i maruwel ni baaram ni ma un ngay. Me gaar u wan’, ‘Mang fan ni kug be par ko biney e maruwel nder fel’ rogog riy? Fin wuin e rayog ni nge fel’ rogon e par rog? Sana ra fel’ boch e par rog ni faan gu ra tal ko maruwel!’
Boor e girdi’ e ngiyal’ ney e taareb rogorad ngak Alex ndubrad e maruwel nib gel. I yog be’ ni maruwel rok e ma ngongliy e karrow ni ka nog Aaron ngak ni gaar: “Boor e girdi’ ni yad ma lemnag nde m’ag ngorad ni ngaur uned ko maruwel nib ‘sobut’ puluwon.’ Yooren i yad e ma gaar u wan’: ‘Kemus ni nggu un ko re maruwel ney, ya bayi pat reb e maruwel ngog nib tolang puluwon, mug tal.’”
Mang fan ni boor e girdi’ ni yad ma lemnag nde m’ag ngorad ni ngaur maruwelgad nib gel? Sana rayog ni yad be fol ko pi n’en ni yad ma guy u TV nge ku boch ban’en. Ma pi n’ey e ba ga’ ni yima dag riy ni rogon ni nge “fel’ e par” rok be’ e aram e nge yoor ban’en rok ma dab i maruwel nib gel. I yog Matthew ni maruwel rok e ma fal’eg e yungi n’en ni ke kireb ko naun ni gaar: “Ma lemnag e girdi’ ni faanra ba gel e maruwel ni ma tay be’, ma aram e dabi fel’ rogon e par rok.” Ku ireray e n’en ni yog Shane ni maruwel rok e ma klinnag boch e naun. I yog ni gaar: “Ngiyal’ ney e ba ga’ ndakir ma m’ag rogon e maruwel ni ma tay e girdi’ u reb e rran nga puluwrad ni yad be fek riy.”
Machane, bin riyul’ riy, e boor e girdi’ nib fel’ rogon e par rorad ni yad baadag ni ngaur maruwelgad nib gel. Daniel ni ir be’ ni ma un ko dimow naun ni 25 e duw rok e gaar: “Gu be lemnag nrib ga’ angin e maruwel nib gel. Machane, thingari puluw fan ni ga be rin’ fare maruwel.” Ku aray rogon e lem rok Andre ni 23 e duw rok. I yog ni gaar: “Gu be lemnag nib peth e felfelan’ ko maruwel ni gad ma tay. Faanra dab mu maruwel nib gel, ma dabiyog ni ngam pirieg e felfelan’, ya n’en nra buch e ra chalbam!”
Uw rogon ni ke yag rok boch e girdi’ ni bod rogon Daniel nge Andre ni ngar adaged e maruwel nib gel? Bochan e yad ma fol ko pi kenggin e motochiyel u Bible. Der yog e Bible nib kireb ni ngaun maruwel. Ya bin riyul’ riy e ma pi’ e athamgil nga lanin’dad ni ngaud tedan’dad ko maruwel, ma ngkud maruwelgad nib gel. Machane, gathi kemus ni be yog e Bible ngodad ni ngaud maruwelgad. Ya ku be dag ngodad rogon ni ngad adaged e maruwel ni gad ma rin’.
Mang boch i kenggin e motochiyel u Bible nrayog ni nge ayuwegem ni ngam adag e maruwel ni ga ma rin’? Gamad be pi’ e athamgil nga lanin’um ni ngam yaliy boch e pi kenggin e motochiyel ney ni bay ko bin migid e article.