Keb Ba Mit e M’ar nib Ubchiya’ Ngom

“Nap’an ni yog e togta ngog ni ke cancer e worrum nge colon ara bang ko gil’iggan rog, mug lemnag ni aram e nggum’. Machane nap’an nug sul nga tabinaw, ma aram me lungug u wan’ug, ‘Gathi aram rogon ni kug lemnag, machane thingar gguy rogon ni nggu athamgil u fithik’ e re magawon ney.’”—Linda, 71 e duw rok.

“I yib ba miti m’ar ngog nrib ubchiya’ ni kirebnag e nguchey ko ba’ ni gilay’ i owcheg. Bochan gelngin e amith ni ma yib ngog, ma ma k’aringeg e re n’ey ni nggu par ni gub mochuch. Boor yay ni gu ma lemnag ni goo gag ni gu bay, ere gu lemnag ni nggu lieg nggum’.”—Elise, 49 e duw rok.

Be’ nib pumoon nib m’ar ni bay u wheelchair e bay e piin nib t’uf rok u tooben

FAANRA keb ba mit e m’ar ngom ara ngak be’ nib t’uf rom ni yira yim’ riy, mab mudugil ni ga manang gelngin e mochuch riy. Gathi kemus ni ngam athamgil u fithik’ e m’ar rom, ya ku rayog ni ngam par nib kireban’um. Faanra kan tay e yar rom ni ngkum sul ko tafalay bayay, ara ba mo’maw’ ni ngan pirieg e falay ko m’ar rom, ara be mo’maw’ rogon ni ngam pi’ puluwon e tafalay rom, ara ga be m’ar ko falay ni ga be fek, ma rayog ni nge gel boch e marus nge magafan’ rom. Rib gel e mochuch nrayog ni nge tay be’ ni bochan ba mit e m’ar nib ubchiya’ ni keb ngak.

Uw e rayog ni ngam pirieg e ayuw riy? Boor e girdi’ ni kar pirieged ni faan yad ra taga’ ngak Got u daken e meybil, ma yad be beeg boch e thin nu Bible ni ma fal’eg lanin’uy, ma rib gel e athamgil ni ma pi’ nga lanin’rad. T’ufeg nge ayuw ni ma yib rok chon e tabinaw nge fager ko pi girdi’ ney e ku aram reb e ban’en nrayog ni nge ayuwegrad.

ROGON NI KE YAG NI NGE ATHAMGIL BOCH E GIRDI’

Baaray e fonow ni pi’ Robert ni 58 e duw rok. I yog ni gaar: “Ga ra par nib mich Got u wan’um, ma ra ayuwegem ni ngam athamgil u fithik’ e m’ar rom. Mmeybil ngak Jehovah mag weliy lanin’um ngak. Mu ning gelngin nib thothup. Mog ngak ni nge pi’ gelngim nge yag nim lem nib fel’ rogon mag pi’ e athamgil nga laniyan’ chon e tabinaw rom, miki ayuwegem nge yag nim par nib paslag lanin’um ya nge yag nim athamgil u fithik’ e m’ar rom.

“Faanra bay chon e tabinaw rom ni yad be pi’ e athamgil nga lanin’um, mab gel e ayuw nra pi’ e re n’ey ngom. Gubin e rran nib ga’ ni ma callnageg be’ ara l’agruw ni’, me lungurow, ‘Ke uw rogom?’ Pi fager rog nib thilthil e gin ni yad ma par riy e yad ma pi’ e athamgil nga lanin’ug. Re n’ey e ma fal’eg lanin’ug me ayuwegeg nge yag nug athamgil.”

Faanra kam man ni ngam guy reb e fager rom nib m’ar, ma ngam tay fanam i yan ko n’en ni yog Linda ni gaar: “Dariy e maruwar riy ni faen nib m’ar e baadag ni nge sul nga rogon ko som’on, ma dabisiy ndabun ni ngan weliy murung’agen e m’ar rok. Ere kab fel’ ni ngam weliyew e n’en nib ga’ ni gimew ma weliy murung’agen.”

Gelngidad ni ma pi’ Got, nge thin nu Bible ni ma fal’eg lanin’uy, nge ayuw ni ma pi’ chon e tabinaw nge fager rodad ngodad e rayog ni nge ayuwegdad ni nge pagan’dad ni ka bay ban’en nrayog ni nge l’agan’dad ngay ni yugu aram rogon ni keb ba mit e m’ar nib ubchiya’ ngodad.

Boch e Thin nu Bible Nrayog ni Nge Ayuwegem

Mu taga’ ngak Got.

“Gu meybil ngak Somol me fulweg taban e meybil rog; i chuweg urngin e marus rog. Piin ndabiyog ni ngar ayuweged yad e yad ra non ngak Somol, me fulweg taban e meybil rorad.”—Psalm 34:4, 6.

Linda ni faan kan weliy e thin rok e yog ni gaar: “Da gur ma meybil ni ma lungug, ‘Mu chuweg e m’ar rog.’ Ya gubin ngiyal’ ni gu ma meybil ni ma lungug, ‘Mu ayuwegeg ni nggu par ni gub gel me yag nug athamgil u fithik’ e m’ar rog.’”

Mu pag e Thin rok Got nge pi’ gelngim.

“Dariy be’ ni be par u lan e nam rodad ni bay ki yog nib m’ar.”—Isaiah 33:24.

Mu fal’eg i lemnag e pi n’en ni ke micheg Got ni fan ngodad boch nga m’on. Re n’ey e rayog ni nge pi’ e l’agan’ ngom me pi’ gelngim nge yag nim athamgil.

Mu ning e ayuw ngak chon e tabinaw nge pi fager rom.

“Pi tafager e gubin ngiyal’ ni yad ma dag e t’ufeg rorad. Mang gam’engin e walag ni faanra dab ra puruy’naged e gafgow rorad?”—Proverbs 17:17, BT.

I yog Elise ni gaar: “Dab mu palognagem ko girdi’ nga orel. Mu pag e pi fager rom ni ngar ayuweged gur. Sana bay yu ngiyal’ nra um lemnag ni yigoo gur ma der motoyil Got ngom, machane dab mu palognagem ko girdi’ nga orel.”