“Mu Guyed Rogomed Ya Ri Kolmed Be’ Ngam Manged Kalbus Rok”!

1. Uw rogon ni ma guy Satan rogon ni nge pingeg lanin’dad nrogon ni be yog e Kolose 2:4, 8?

BAADAG Satan ni nge k’aringdad ni nge dabki t’uf Jehovah rodad. Aram fan ni ma guy rogon ni nge koldad ngad manged kalbus rok ni aram e ma guy rogon ni nge pingeg lanin’dad me k’aringdad ni ngaud lemgad ni bod rogon ni baadag. Ere ma fanay boch ban’en ni gad baadag ni nge guy rogon ni nge bannagdad me pingeg lanin’dad ya ngad adaged ni ngad folgad rok.​—Mu beeg e Kolose 2:4, 8. 

2-3. (a) Mang fan nib t’uf ni ngad tedan’dad ko fare ginang ni bay ko Kolose 2:8? (b) Mang e gad ra weliy ko re article ney?

² Ere gur, ke gel boch e mom riy ni nge bannagdad Satan e ngiyal’ ney, fa? Arrogon! Dab mu pagtalin nde yoloy Paul fare ginang ni bay ko Kolose 2:8 ni fan ngak e piin nde mich Got u wan’rad. Ya yoloy ni fan ngak e pi Kristiano ni kan dugliyrad nga gelngin Got nib thothup. (Kol. 1:2, 5) Ba mom rok Satan ni nge bannag e pi Kristiano kakrom, machane gadad e ngiyal’ ney e kki gel boch e mom riy ni ngan bannagdad. (1 Kor. 10:12) Mang fan? Ka nin’ Satan e ngaray nga fayleng, ma ke par nri be guy rogon ni nge bannag e pi tapigpig rok Got ni yad ba yul’yul’. (Rev. 12:9, 12, 17) Maku reb e, gad be par u ba ngiyal’ ni girdi’ nib kireb nge piin ni yad be dake girdien Kristus e ke “gel farad kireb.”​—2 Tim. 3:1, 13.

³ Re article ney e gad ra weliy riy rogon ni ma fanay Satan boch e “sabanban ndariy rogon nga bayang” ni nge guy rogon ni nge pingeg lanin’dad. Gad ra weliy dalip mit e “ban” ni ma fanay. (Efe. 6:11) Ma bin migid e article e gad ra weliy riy rogon ni ngad chuweged u lanin’dad wenegan e pi ban rok. Machane, som’on e ngad weliyed e n’en nrayog ni ngad filed u rogon ni bannag Satan piyu Israel u tomuren nra thapgad nga lan fare Nam ni Kan Micheg.

KAN WALIYRAD NI NGAR UNED KO LIYOR NGA BOCH E GOT NI GOOGSUR

4-6. Mang boch ban’en nthingari thilyeg piyu Israel u rogon e woldug ni ur ted u nap’an nranod nga lan fare Nam ni Kan Micheg nrogon ni bay ko Deuteronomy 11:10-15?

⁴ Ba llowan’ Satan u rogon ni bannag piyu Israel ngar uned ko liyor nga boch e got ni googsur. Uw rogon ni rin’ e re n’ey? Manang nib t’uf e ggan rorad, ere fanay e re n’ey ni nge k’aringrad ni ngar rin’ed e n’en ni yad baadag. Nap’an ni yan piyu Israel nga lan fare Nam ni Kan Micheg, ma thingar ra thilyeged rogon e woldug ni yad ma tay. Nap’an ni ur moyed u Egypt, ma ur fanayed e ran u lan fare lul’ ni Nile ni fan ko milay’ rorad. Machane, nap’an nranod nga lan fare Nam ni Kan Micheg, ma dariy e lul’ nib ga’ nrayog ni ngar feked e ran riy ni ngar fanayed ko milay’ rorad, ya thingar ra songad nge taw ko ngiyal’ ni ke aw e n’uw, maku yad ma taga’ ko waangchal ni ke mit u ran’ e woldug ni kakadbul ni ir e ma garbebnag e woldug rorad. (Mu beeg e Deuteronomy 11:10-15; Isa. 18:4, 5) Ere thingari fil piyu Israel rogon e milay’ u boch e kanawo’ nib thil. De mom e re n’ey ni bochan e yooren e piin ni yad ba salap ko milay’ e ra m’ad u nap’an ni ka bay piyu Israel u daken e ted.

⁵ I yog Jehovah ko girdi’ rok ni ke thil rogon e par rorad. Ngemu’ miki pi’ ba ginang ngorad ni faan yira lemnag ma bod ndariy rogon ko milay’ ni yad be tay. I gaar: “Dab mu paged gimed ngan waliymed nga orel rok Somol ni bochan e gimed be tayfan ma gimed be pigpig ngak yugu boch e got.” (Deut. 11:16, 17, BT) Mang fan ni ginang Jehovah piyu Israel ndab ra uned ko liyor nga boch e got ni googsur u nap’an ni be yog ngorad nib t’uf ni ngar thilyeged rogon e woldug ni yad be tay?

⁶ Manang Jehovah nrayog ni nge lemnag piyu Israel ni nga ranod ngak e girdi’ u toobrad ni yad ma liyor nga boch e got ni googsur ngar filed rorad boch e kanawo’ u rogon ni ngar wolduggad riy. Riyul’ nib salap e pi girdi’ nem ngorad ko woldug, maku rayog ni ngar filed boch e salap rorad nrayog ni nge ayuwegrad, machane bay e riya’ ko re n’ey. Piyu Kanaan e yad ma liyor ngak Baal ma kar paged e michan’ rorad ko re got ney ni nge gagiyegnag rogon e lem rorad. Yad ma tay ni Baal e ir e ba milfan lan e lang ngak maku ir e ma pi’ e n’uw. Ere dabun Jehovah ni nge mich e tiney e machib ni googsur u wan’ e girdi’ rok. Yugu aram rogon, ma boor yay ni mel’eg piyu Israel ni ngar liyorgad ngak Baal. (Num. 25:3, 5; Judg. 2:13; 1 Ki. 18:18) Mu tay fanam i yan u rogon ni yag rok Satan ni nge kol piyu Israel ngar manged kalbus rok.

DALIP BAN’EN NI FANAY SATAN NI NGE KOL PIYU ISRAEL NGAR MANGED KALBUS ROK

7. Mang reb e ban’en ni buch rok piyu Israel ni skengnag rogon e michan’ rorad u nap’an nranod nga lan fare Nam ni Kan Micheg?

⁷ N’en nsom’on ni fanay Satan e rogon ni i athapeg e girdi’ ni nge aw e n’uw nge rannag e but’ ko re nam nem. Rib achig e n’uw ni ma aw u lan fare Nam ni Kan Micheg u nap’an e pul ni April nge mada’ ko September u gubin e duw. Faanra nge yag ni par piyu Israel ndab ra m’ad ni bochan e dariy e ran, miki yag ni nge dammal e woldug rorad, ma aram e thingar ra taga’gad ko n’uw nib ga’ ni ma tabab u nap’an e pul ni October. Ere bannag Satan piyu Israel ngar lemnaged ni faanra nge fel’ rogon e par rorad ma thingar ra uned i rin’ boch ban’en ni be rin’ e girdi’ u toobrad ni yad ma liyor nga boch e got ni googsur. Pi girdi’ nem e yad ma lemnag ni faanra nge pi’ e pi got ni yad ma liyor ngorad e n’uw, ma aram e bay boch ban’en nthingar rin’ed ni fan ko pi got nem. Piin ni ke war e michan’ rorad ngak Jehovah e ra lemnaged nthingar ra uned ko pi n’ey ni yima rin’ ya kemus rogon nrayog ni nge ngoch nap’an e yal’. Ere aram fan ni ur uned nga boch e liyor ni googsur ni ma tay e piin ni yad ma liyor ngak Baal.

8. Mang e bin l’agruw e n’en ni fanay Satan ni nge bannag piyu Israel? Mu tamilangnag.

⁸ Bin l’agruw e n’en ni fanay Satan ni nge bannag piyu Israel e aram e pi n’en nib kireb ni ur ar’arnaged. Rogon e liyor ni ma tay e pi nam ni yad ma liyor nga boch e got ni googsur e aram e yad ma un nga boch e ngongol nde yalen. Mit ney e liyor nib golong e ba muun ngay e pumoon nge ppin ni yad ma pigpig u tempel ni ur pied yad ni chuway’. Maku reb e, gathi kemus ni un pag e pumoon nge pumoon nge ppin nge ppin ni ngaur darngalnaged yad maku yibe rin’ yugu boch e ngongol ni puwlag, ya ki par e mit ney e ngongol ni ke mang bang ko par ko girdi’ e ngiyal’ nem. (Deut. 23:17, 18; 1 Ki. 14:24) Piin ni yad ma liyor ko pi got ni googsur e yad ma lemnag ni faan yad ra rin’ e pi n’ey, ma aram e ra n’igin e pi got nem e but’ ni nge yong’ol nge yag ni pi’ e ggan ni boor. Boor piyu Israel nra adaged e pi ngongol nde yalen ni i rin’ e pi girdi’ nem ni ur liyorgad nga boch e got ni googsur, ma bochan e re n’ey ma aram mar mel’eged ni ngar uned ko liyor ni yibe tay ko pi got nem. Ere bin riyul’ riy e, ke kolrad Satan kar manged kalbus rok.

9. Uw rogon ni guy Satan rogon ni nge k’aring piyu Israel ni ngar paged talin ko ri mini’ Jehovah nrogon ni bay ko Hosea 2:16, 17?

⁹ Bin dalip e n’en ni fanay Satan ni nge bannag piyu Israel e aram e guy rogon ni nge k’aringrad ni ngar paged talin ko ri mini’ Jehovah. Nap’an Jeremiah ni profet, ma aram me yog Jehovah ni pi profet ni googsur e kar k’aringed e girdi’ Rok kar paged talin Fithingan ni bochan “Baal.” (Jer. 23:27) Ba tamilang ni ke tal e girdi’ rok Got ndakurur fanayed fithingan Jehovah yad be fanay fithingan Baal ni fan e re ngachal nem e “En nib Milfan Ban’en Ngak” ara “Masta.” Re n’ey e mo’maw’nag ngak piyu Israel ni ngar nanged e n’en nib thil u thilin Jehovah nge Baal, miki momnag ngorad ni ngar athukuyed e liyor ni yad be tay ngak Baal ko liyor ni yad be tay ngak Jehovah.​—Mu beeg e Hosea 2:16, 17.

PI BAN NI MA FANAY SATAN E NGIYAL’ NEY

10. Mang boch e ban ni ma fanay Satan e ngiyal’ ney?

¹⁰ Ku ma fanay Satan e pi ban ney e ngiyal’ ney. Ma kol e girdi’ ngar manged kalbus rok ni aram e ma fanay e pi n’en ni yad ma athapeg ni ngar rin’ed ara nge yag ngorad, nge pi n’en nib kireb ni yad ma ar’arnag, maku ma guy rogon ni nge k’aring e girdi’ ni ngar paged talin ko ri mini’ Jehovah. Som’on e ngad weliyed e bin dalip e ban ni ma fanay Satan.

11. Uw rogon ni ke k’aring Satan e girdi’ ni ngar paged talin ko ri mini’ Jehovah?

¹¹ Ma guy Satan rogon ni nge k’aring e girdi’ ni ngar paged talin ko ri mini’ Jehovah. Tomuren ni yim’ gubin e pi apostal rok Jesus, ma aram me tabab boch e girdi’ ni ur dake yad boch e Kristiano i wereg boch e machib nde riyul’. (Acts 20:29, 30; 2 Thess. 2:3) N’en ni rin’ e pi girdi’ ney e mo’maw’nag ko girdi’ ni ngar nanged ko mini’ e bin riyul’ e Got. Bod nra chuweged fithingan Got u lan e yu ke Bible nra pilyeged mar ted boch e liw nga lon ni bod rogon e “Somol.” Bochan nra chuweged fithingan Got u lan e Bible ngar ted e “Somol” nga lon, ma aram mar mo’maw’naged ko piin ni yad ma beeg e Bible ni ngar nanged rogon nib thil Jehovah nga yugu boch e “somol” ni bay murung’agrad u Bible. (1 Kor. 8:5) Ra fanayed fare bugithin ni “Somol” ni fan ngak Jehovah nge Jesus. Bochan e re n’ey ma aram me mo’maw’ ni nge nang e girdi’ nib thil Jehovah ngak Fak ma kub thil e liw rorow. (John 17:3) Ireray reb e ban’en ni k’aring ni nge sum fare machib ni Trinitas ni aram reb e machib ndariy u lan e Thin rok Got. Wenegan ni ke yib riy e boor e girdi’ ni yad ma lemnag ndabiyog ni ngan nang ko mini’ Got. Rib kireb e biney e ban!​—Acts 17:27.

12. Mang boch e ngongol ni ke garereg e pi yurba’ i teliw ni googsur, ma mang wenegan ni ke yib nrogon ni be tamilangnag e Roma 1:28-31?

¹² Ma fanay Satan e tin nib kireb ni yima ar’arnag. Nap’an piyu Israel kakrom, ma aram me fanay Satan e teliw ni googsur ni nge garereg e ngongol ndarngal ni be rin’ e girdi’. Ku ireray e n’en ni be rin’ e ngiyal’ ney. Pi yurba’ i teliw ni googsur e yad ma pag e girdi’ rorad ni ngar rin’ed boch e ngongol nde yalen, maku yad ma n’igin ni nge m’ug ni mit ney e ngongol e ka bang ko par rodad. Bochan e re n’ey, ma aram fan ni boor e piin ni yad ma dake yad be liyor ngak Got ndakurur folgad ko pi motochiyel rok u murung’agen rogon e ngongol nib puluw ni ngan rin’. I weliy apostal Paul u lan e babyor ni pi’ nge yan ngak piyu Roma wenegan e mit ney e ngongol. (Mu beeg e Roma 1:28-31.) Boch e ngongol ni kub muun ko ‘pi n’en ni susun e dabin ngongliy’ e aram urngin mit e ngongol ndarngal, nib muun ngay e par u thilin e pumoon nge pumoon nge ppin nge ppin. (Rom. 1:24-27, 32; Rev. 2:20) Ere aram fan nrib t’uf ni ngad folgad ko pi machib nib tamilang ni bay u lan e Bible!

13. Ku mang reb e ban ni ma fanay Satan?

¹³ Ma fanay Satan e pi n’en ni gad ma athapeg ni ngad rin’ed ara nge yag ngodad. Ka ban’en ni bay rodad e girdi’ ni gad baadag ni ngad filed boch e salap nra ayuwegdad ni ngad yognaged e tin nib t’uf rodad nge chon e tabinaw rodad. (1 Tim. 5:8) Ba ga’ ni ma yag e pi salap ney ngodad u nap’an ni gad ra un nga skul mad tedan’dad ko tin nib t’uf ni ngad filed u skul. Machane thingar da kol ayuwgad. Pi skul u boor e nam e gathi kemus ni yima fil ko bitir riy boch ban’en nib t’uf ni ngar salapgad riy, ya ku yima fil e gonop ko girdi’ ngorad. Bod ni yima n’igin e bitir ni nge maruwar Got u wan’rad ma dabki ga’ fan e Bible u wan’rad. Yima yog ngorad ni gubin e girdi’ ni llowan’ nib mich u wan’rad ni ke sum e girdi’ ko gamanman. (Rom. 1:21-23) Mit ney e machib e ba togopuluw ko “gonop” rok Got.​—1 Kor. 1:19-21; 3:18-20.

14. Mang e ma k’aring e gonop ko girdi’ be’ ni nge rin’?

¹⁴ Gonop ko girdi’ e ba togopuluw ko pi motochiyel rok Jehovah nib mat’aw maku ma darifannag. Der ma k’aring be’ ni nge guy rogon ni nge m’ug wom’engin gelngin Got nib thothup ko ngongol rok, ya bin riyul’ riy e ma k’aring ni nge ar’arnag e “tin nib kireb” ban’en. (Gal. 5:19-23) Ma k’aring be’ ni nge uf me tolangan’, ma wenegan ni ma yib riy e aram e ra par ni ‘ke mus ni ir e be lemnag ir.’ (2 Tim. 3:2-4) Mit ney e lem e rib thil ko lem nib sobut’ ni be pi’ Got e athamgil nga laniyan’ e pi tapigpig rok ni nge yag ngorad. (2 Sam. 22:28) Bay boch e Kristiano ni kar nameged e skul nib tolang ni kar tababgad ni ngar lemgad ni bod e girdi’ nu fayleng ko bin ni ngar lemgad ni bod Got. Chiney e ngad weliyed ban’en nrayog ni nge buch.

15-16. Mang e kam fil ko n’en ni buch rok reb e walag nib pin?

¹⁵ Reb e walag nib pin ni ke pag 15 e duw ni ke pigpig u polo’ e tayim rok e yog ni gaar: “Gag reb e Pi Mich ni kug un ko taufe. Ere boor ban’en ni kug beeg ma kug rung’ag u murung’agen wenegan nrayog ni nge yib riy ni faan yira nameg e skul nib tolang. Machane da ug tiyan’ug ko pi thin nem. Ug lemnag ni pi fonow nem e gathi fan ngog.” Ere mang boch e magawon ni mada’nag? I yog ni gaar: “Boor e tayim nib t’uf ni nggu tay ni fan ko pi class ni ug fek ma thingar kug athamgil nggu fil e pi n’en ni gu be skulnag. Ere dakuriy e tayim rog ni fan ko meybil ni gu ma tay ngak Jehovah ni bod kafram, miki aw parawog ndabkiyog ni nggu weliyed yugu boch e girdi’ e thin nu Bible u nap’an e machib, ara gu fal’eg rogog nib fel’ rogon ni fan ko muulung. Machane gu be felfelan’ ni bochan e nap’an nug nang ni skul nib tolang ni gu be un ngay e be magawonnag e tha’ u thilmow Jehovah, ma aram mug nang nthingar gu tal. Ma aram e n’en nug rin’.”

¹⁶ Uw rogon ni magawon rogon e lem ko re walag ney ni bochan e skul nib tolang ni un ngay? I yog ni gaar: “Gu be tamra’ ngay ni nggog ni skul nib tolang nug un ngay e k’aringeg ni ngaug par ni gu be yaliy thibngin yugu boch e girdi’, nib ga’ ni pi’ walageg u lan e ulung, mug par ni gu be lemnag ni ngar rin’ed boch ban’en ndabiyog rorad, mu kug palognageg rorad. Ba n’uw nap’an mfini yag ni nggu taleg e mit ney e lem. Re n’ey ni buch rog e ke tamilangnag ngog nrib gel e riya’ riy ni faanra dab da tedan’dad ko pi ginang ni ma pi’ e Chitamangidad ni bay u tharmiy ngodad u daken e ulung rok. Ri manangeg Jehovah nib fel’ rogon nga rogon ni gu manangeg. Faan gomanga gu fol mab fel’!”

17. (a) Mang e susun ni ngad dugliyed u wan’dad? (b) Mang e gad ra weliy ko bin migid e article?

¹⁷ Ngam dugliy u wan’um ndab mu pag e “gonop rok e girdi’ nge sabanban ndariy rogon nga bayang” ko re fayleng rok Satan ney ni nge gagiyegnagem. Mu ulul ngam guy rogon ni ngam ayuwegem ko pi ban rok Satan. (1 Kor. 3:18; 2 Kor. 2:11) Dab mu pag Satan ni nge k’aringem ngam pagtalin ko ri mini’ Jehovah. Mu fol ko pi motochiyel rok Jehovah u murung’agen rogon e ngongol ni ir e thingar ud rin’ed, ma dab mu pag Satan ni nge bannagem ni nge dab kum fol ko pi fonow rok Jehovah. Machane, uw rogon ni faanra kam guy ni ke af e lem ko re fayleng ney ngom? Bin migid e article e ra tamilangnag rogon nrayog ni nge ayuwegdad e Thin rok Got ni ngad kirebnaged e “yungi n’en ni ke fal’eg e moonyan’ rogon ke par riy be cham ngodad,” ma gad gel nga boch e lem nge ngongol ni kad mechamgad ngay.​—2 Kor. 10:4, 5.