Ngan Ayuwegrad Ngar Pigpiggad Bayay
1. Chon mini’ u lan e ulung e bay rogon ni ngan ayuwegrad?
1 I lemnag apostal Paul e piin ni kar talgad ko pigpig ku Jehovah. (Rom. 13:11) Gad bod Paul ni ku gad ma lemnag pi walagdad ni pumoon nge ppin ni kar meewargad ko tirok Got ban’en. Uw rogon nrayog ni ngad ayuweged yad ngar pigpiggad bayay?
2. Mang e rayog ni nge rin’ e piin piilal ni ngar ayuweged e piin ni kar talgad ko machib?
2 N’en Nrayog ni Nge Rin’ e Piin Piilal: Yooren e piin ni kar talgad ko machib e ku yad manang e tin nriyul’, ya ba ga’ ni ma tal reb e walag ko machib ni bochan e ke mulan’, ara bay e magawon rok, ara chogowen e chugum, ara ke mochuch. (Luke 21:34-36) Faanra rayog mab fel’ ni ngan ayuwegrad u m’on ni ngar talgad ko machib. Ngan yarmiy ni ngan guyrad min pi’ e athamgil nga lanin’rad. Susun ni nge nang e piin piilal ko mang tapgin e magawon rorad nge rogon nrayog ni ngan ayuwegrad.
3. Uw rogon nrayog ni ngad ayuweged e pi walag ni kar talgad ko machib?
3 Rogon Nrayog ni Nge Pi’ Boch e Girdi’ e Ayuw: Boor i gadad e manang be’ ni ke tal ko machib. Sana be’ ni fager rodad kafram. Uw rogon nrayog ni ngad ayuweged? Ngam man nga tafen ngam guy. Nga mog ngak ni gimed e pi walag u lan e ulung e gimed be lemnag. Ngam non ngak u fithik’ e falfalan’. Dab mog ngak ni ke meewar ko tirok Got ban’en. Ngam weliy boch e experience fa yugu boch ban’en nib fel’ ni be rin’ e ulung. Ra chag ngak e girdi’ u lan e ulung ma rayog ni ngar pied e athamgil nga laniyan’. Mog ngak facha’ ni gimew ra yan ko muulung u taabang. Ma gog ko piin piilal e n’en ni ke yog.
4. Uw rogon ni ngan pi’ e athamgil nga laniyan e piin ni kar sulod kar uned ko muulung bayay?
4 Nap’an nra sul be’ nge un ko muulung, ma dabisiy nra tamra’ u nap’an nra mada’nag e pi walag ni ur chaggad kafaram. Ere dab mu fith ni nge lungum, “Mang e ke rin’ nda kumur un ko muulung?” Ya ngam guy rogon ni ngam pi’ e athamgil nga laniyan’. Ngam pining ngam sabethingow ma gog ngak e piin nde nangrad. Ngam par u charen u nap’an e muulung ma ga pi’ e babyor ko tang ngak nge pi babyor ko muulung. Mu kum pining nge un bayay, ma gog ngak nrayog ni ngam ayuweg ni faanra ba t’uf e ayuw rok.
5. Mang angin nra yib ni faan gad ra ayuweg e girdi’ ngar sulod ko ulung?
5 Gad ra dag e t’ufeg ngak e piin ni kar maloggad, ma ra falfalan’ Jehovah nge Jesus u nap’an ni yad ra sul ko ulung. (Mal. 3:7; Matt. 18:12-14) Rayog ni ngad falfalan’gad ni faan gad ra ayuweg e girdi’ ngar sulod ngar pigpiggad ku Jehovah bayay.