Rogon ni Ngan Pi’ Fare ke Babyor ni Mang e Ri Be Fil e Bible

Gi babyor ney e be tamilangnag boch e kanawo’ ni rayog ni ngan pi’ fare babyor ni Mang e Ri Be Fil e Bible. Ra nge yib angin ma ngam weliy ko thin rom, mag guy rogon ni nge mag ngak e en ni gimew be non. Maku reb e ngam guy rogon ni nge mit ngom boch ban’en ni bay riy nrayog nga ayuwegem u nap’an ni ga be machib. Machane ku rayog ni ngam guy yugu boch e kanawo’ ni ngam pi’ e re ke babyor ney riy nra mag ngak e girdi’ ko gin ni ga be machib riy.

Armageddon

◼ “Ba ga ni boor e girdi’ nra nog fare bugithin ni ‘Armageddon’ ma yad ma lemnag e magothgoth. Uw rogon u wan’um ni faan gu ra yog ngom ni Armageddon e ban’en ni ngan athapeg u fithik’ e felfelan’? [Mu pag ni nge fulweg. Mag beeg e Revelation 16:14, 16.] Mu tay fanam i yan u rarogon e par u tomuren e Armageddon.” Mu pithig ko page 94, mag beeg e par 21.

Bible

◼ “Boor e girdi’ ni ma yog ni Bible e thin rok Got. Ka am lemnag ko uw rogon ni ke mang Bible e thin rok Got, ni faanra girdi’ e yoloy. [Mu pag ni nge fulweg. Mag beeg e 2 Peter 1:21 nge paragraph 5 ko page 21-2.] Re ke babyor ney e be weliy e fulweg ko pi deer ni baaray.” Mu dag ngak fapi deer ni bay ko page 6.

◼ Ngiyal’ ney e kari mom ni nge nang e girdi’ boor ban’en. Machane uw e ga be lemnag ni rayog ni ngan pirieg e fonow riy nra ayuwegdad ni nge mon’og boch e par rodad. [Mu pag ni nge fulweg. Mag beeg e 2 Timothy 3:16, 17 nge paragraph 12 ko page 25.] Re ke babyor ney e be weliy rogon ni ngad pared u reb e kanawo’ nib m’agan’ Got ngay, ma ra fel’ rogodad riy.” Mu dag ngak e chart nge sasing ni bay ko page 140-1.

Yam’/Fas ko Yam’

◼ “Boor e girdi’ e yad ma lemnag ko mang e ma buch u nap’an ni ke yim’ be’. Ga be lemnag ma rayog ni ngad nanged? [Mu pag ni nge fulweg. Mag beeg e Eklesiastes 9:5 nge paragraph 5-6 ko page 64-5.] Re babyor ney e be weliy e n’en ni be micheg e Bible ni fan ko piin kar m’ad.” Mag dag ngak e sasing ni bay ko page 85.

◼ “Nap’an nra yim’ be’ nib t’uf rodad ma gad baadag ni ngkud guyed bayay. Uw rogon ni ga be lemnag? [Mu pag ni nge fulweg.] Boor e girdi’ ni ke fal’eg e re thin ni baaray lanin’rad. [Mu beeg e John 5:28, 29 nge paragraph 16-17 ko page 81-2.] Re guruy ney e ku be pi’ e fulweg ko pi deer ni baaray.” Mag dag ngak fapi deer ni bay u tabolngin e page 74.

Yafas ni Manemus

◼ Boor e girdi’ ni baadag ni nge fel’ fithik’ i dow me n’uw nap’an e yafas rok. Machane, faanra rayog ni ngam par ni manemus, ma ga ra adag? [Mu pag ni nge fulweg. Mag beeg e Revelation 21:3, 4 nge paragraph 17 ko page 59.] Re ke babyor ney e be weliy rogon nrayog ni nge yog e yafas ni manemus ngodad nge rogon nra yan i aw e yafas rodad u nap’an nra riyul’ e re n’ey.”

Tabinaw

◼ “Gad gubin ni gad baadag ni nge yog e felfelan’ nga lan e tabinaw rodad. Uw rogon u wan’um? [Mu pag ni nge fulweg.] Be weliy e Bible murung’agen ban’en nrayog ni nge yibnag e felfelan’ nga lan e tabinaw rodad ni aram e ngaud t’ufeged gadad u lan e tabinaw.” Mu beeg e Efesus 5:1, 2 nge paragraph 4 ko page 155.

Naun

◼ “Boor e nam e chiney ni ke mo’maw’ ni ngan pirieg e naun riy nib sobut’ puluwon ma ba fel’ ni ngan par riy. Ga be lemnag nra taw nga ba ngiyal’ ma rayog ni nge urngin e girdi’ ma bay e naun rok? [Mu pag ni nge fulweg. Mag beeg e Isaiah 65:21, 22 nge paragraph 20 ko page 38.] Re ke babyor ney e be weliy rogon nra lebguy Got e re n’ey ni ke micheg.”

Jehovah Got

◼ “Boor e girdi’ nib mich Got u wan’rad e yad baadag ni ngar chugurgad ngak. Ga manang ni be yog e Bible nrayog ni ngad chugurgad ngak Got? [Mu pag ni nge fulweg. Mag beeg e James 4:8 nge paragraph 20 ko page 18.] Re ke babyor ney e kan fal’eg ni nge ayuweg e girdi’ ni ngar nanged murung’agen Got u lan e Bible rorad.” Mag dag fapi deer ni bay u tabolngin e page 8.

◼ “Boor e girdi’ ni yad ma yibilay ni ngan thothupnag fithingan Got. Ka am lemnag ko mang e re ngachal nem? [Mu pag ni nge fulweg. Mag beeg e Psalm 83:18 nge paragraph 2-3 ko page 225.] Re ke babyor ney e be weliy e n’en ni be fil e Bible u murung’agen Jehovah Got nge n’en nib m’agan’ ngay ni fan ko girdi’.”

Jesus Kristus

◼ “Boor e girdi’ u fayleng ni ke rung’ag boor ban’en u murung’agen Jesus Kristus. Boch e girdi’ e ma yog ni kemus ni ir be’ nib fel’. Ma boch e ma yog ni ir Got ni Gubin Ma Rayog Rok ma ir e ngan liyor ngak. Ga be lemnag mab ga’ fan rogon nib mich Jesus Kristus u wan’dad?” Mu pag ni nge fulweg. Mag beeg e John 17:3 nge paragraph 3 ko page 41-2. Mag dag fapi deer ni bay u tabolngin fare guruy.

Meybil

◼ “Ka am lemnag rogon ni ma fulweg Got taban e meybil? [Mu pag ni nge fulweg. Mag beeg e 1 John 5:14, 15 nge paragraph 16-18 ko page 198-9.] Re guruy ney e be weliy fan nthingar ud meybilgad ngak Got nge n’en nib t’uf ni ngad rin’ed me yog ni nge rung’ag e meybil rodad.”

Teliw

◼ “Boor e girdi’ e yad ma lemnag ni teliw e aram kenggin e magawon ko girdi’. Ga ma lemnag ni teliw e be pow’iy e girdi’ ko bin nib mat’aw e kanawo’? [Mu pag ni nge fulweg. Mag beeg e Matthew 7:13, 14 nge paragraph 5 ko page 168.] Re guruy ney e be weliy nel’ ban’en ni be tamilangnag rogon e pigpig nib m’agan’ Got ngay.” Mag dag fapi thin ni bay ko page 169.

Pi N’en nib Kireb ni Be Buch/ Gafgow

◼ “Nap’an nra buch ban’en nib kireb, ma boor e girdi’ e ma fith ko riyul’ ni ma lemnagdad Got ma manang gelngin e gafgow ni gad be tay, fa? Ka am lemnag e re n’ey? [Mu pag ni nge fulweg. Mag beeg e 1 Peter 5:7 nge paragraph 11 ko page 12-3.] Re ke babyor ney e be weliy rogon nra chuweg Got e girdi’ u fithik’ e gafgow.” Mag dag fapi deer ni bay u tabolngin e page 122.

Mahl/ Gapas

◼ “Gubin e girdi’ e yad baadag e gapas. Ga be lemnag ma re gapas ney ni yibe athapeg e ba lik’ay? [Mu pag ni nge fulweg. Mag beeg e Psalm 46:8, 9.] Re ke babyor ney e be weliy rogon nra lebguy Got e n’en nib m’agan’ ngay nge rogon nra fek e gapas nga fayleng.” Mu dag fare sasing ko page 39, mag guy e paragraph 17-21 ko page 37-8.

[Caption on page 5]

Boch e kanawo’ ni ngan weliy rogon ni yima pi’ e ayuw

“Faanra ga baadag ni ngam pi’ e ayuw ko re maruwel ney ni yibe rin’ u ga’ngin yang e fayleng, ma gamad ra felfelan’ ngay.”

“Yugu aray rogon ni yibe pi’ e pi babyor ney ndariy puluwon, machane gamad ra felfelan’ ngay ni nggu feked e ayuw ni yibe pi’ ko re maruwel ney.”

“Sana ga be lemnag ko uw rogon ma be yog ni ngu rin’ed e re maruwel ney. Re maruwel ney e be yog ni ngan rin’ ni bochan e ayuw ni yibe pi’ ngay. Ere faanra rayog ni ngam pi’ reb e ayuw ma ri gamad ra felfelan’ ngay.”