Ngan Lemnag e Girdi’—ni Ngan Machibnagrad ni Gathi Ba’ Laniyan’uy
1 I guy apostal John reb e engel ni be changeg u fithik’ e nifeng ni be wereg e thin nib fel’ ngak e girdi’ nu “urngin e pi nam nge ganong nge thin nge gubin mit e girdi’.” (Rev. 14:6) Gad ma folwok rok fare engel ni be machib ni gathi ba’ laniyan’? Sana dada lemnaged ni aram rogon, machane rayog ni ngad pired ni gad ba’ laniyan’. Ya tafinay rodad ko girdi’ e rayog ni nge thiliyeg rogon ni gad ma machibnag e thin nib fel’ ngorad. Ere, thingar da daged nriyul’ ni gad be lemnag e girdi’ ko ngiyal’ ni ngad machibnaged e girdi’ nib thil e nam rorad.
2 Mu Lemnag e Territory Rom: Bay e girdi’ nu yugu ba nam ni ke yib me par u lan e territory rom fa? Ba mom ni ngam pagrad. Nga mu tiyan’um ni ngam gay e pi cha’nem, ma ga guy rogon ni nge fel’ thilmed. Mang e ba t’uf rorad, nge tin ni yad baadag nge tin ni dubrad, nge tin ni mmarus rorad? Nga mu thiliyeg e machib ko Gil’ilungun Got nge puluw ngorad. (1 Kor. 9:19-23) Susun ni ngad lemnaged ni bod rogon e apostal Paul ma ngad lemnaged ni mmil fan ngodad ni ngad wereged fare thin nib fel’ ngak urngin e girdi’ u lan e territory rodad, nib muun ngay e girdi’ nu yugu ba nam, nge girdi’ nib thil yalen rorad, nge piin nib thil e thin rorad, nge piin ni boor e salpiy rorad.—Rom. 1:14, ftn.
3 Machane, uw rogon ni ngam machibnag be’ nib thil e thin rok? Nga mu fanay e booklet ni Good News for People of All Nations. Maku rayog ni ngam fek boch e tract ara brochure ko thin ni ma non e girdi’ u lan e territory rom. (Mu guy e July 2003 Machib Rodad ni Fan ko Gil’ilungun Got, p. 4, par. 2-3.) Boch e publisher e kar athamgilgad ngar filed rogon ni ngar rogned boch e thin ara machib ko thin rorad. Baga’ ni yima pug e tafinay rok e girdi’ ni ngar rung’aged be’ ni be guy rogon ni nge non ko thin rorad, yugu aram rogon ni buchuw, machane sana rayog ni ngan k’aringrad ngar motoyilgad ko fare thin nib fel’.
4 Mu Folwok Rok Jehovah: Ra ngad athamgilgad ngad machibnaged e girdi’ nib thil e nam rorad, ma gad be folwok rok Got ni gathi ba’ laniyan’, ni Jehovah, “ni ir e ba adag urngin e girdi’ ni ngar thapgad ngak ma ngar nanged e tin nib riyul’.”—1 Tim. 2:3, 4.