Fa Bin nib Biech e Circuit Assembly

Baadag e fayleng ni nge mich u wan’dad nra par e re m’ag ney ndabi m’ay. Machane ba thil e Thin Rok Got.(1 John 2:15-17) Bayi ayuwegdad nge tamilang u wan’dad nra m’ay fan ni ngan ‘ulunguy e flaab u roy u fayleng’. Ra ngan gelnag e girdi’ rok Got, ma fare circuit assembly ko duw ni 2007 e ra tamilangnag fan kenggin e muulung ni “Ngam Ulunguyed e Flaab Romed u Tharmiy.”​—Matt. 6:19, 20.

Lem nib chogow e ba muun ngay ko fapi thin u Efesus 2:2 ni “fare kan ni ir e chiney e be gagiyegnag” e nifeng, ma ir e “be gagiyegnag e piin ndarir folgad rok Got.” Bod rogon e nifeng ni bay u gubin yang ko pogofan, ma aram rogon ni bay e “lem nu roy u fayleng” u gubin yang ko re m’ag ney. (1 Kor. 2:12) Bochan e ba gel gelngin, ma ar fan ni kan nog ni “be gagiyegnag.” Fa bin nib biech e circuit assembly e ra ayuwegdad ngad siyeged e lem nib chogow ni bay ko fayleng ma ra ayuwegdad ngad tedan’dad ko tin nib ga’ fan ni ngad ted ni som’on. (Matt. 6:33) Maku, pi welthin riy e ra ayuwegdad ngad pagedan’dad ku Jehovah ko ngiyal’ ni gad be wereg e machib nge yib e magawon nge skeng ngodad.

Mu turguy ni ngam un ko fagali ran ma ga “chichiiy pa’am ko fapi thin nib riyul’ ni kam rung’ag.” (Heb. 2:1) Mu yoloy boch e thin nga but’ ni ngam fol riy ko par rom nge machib u mit e tabinaw. Faan ga ra un ngay ni ka nap’an tobolngin nge mada’ ko ngiyal’ ni tomur ko re muulung ney, ma ra pi’ e athamgil nga lanin’um ma ra gelnagem nguum ‘ulunguy e flaab romed u tharmiy’!