Mu Ayuweg e Girdi’ Nge T’uf Jehovah Rorad
1. Mang e ma k’aring boch e girdi’ ni ngar chugurgad ngak Jehovah?
1 Ka ga manang e yay ni som’on nim rung’ag murung’agen Jehovah? Mang e k’aringem ni ngam chugur ngak? Boor e girdi’ nib yul’yul’ ni yad ra yog ngom ni kar chugurgad ngak e En ni Tasunmiy u tomren ni kar filed murung’agen pi fel’ngin, ni baga’ ni runguy nge t’ufeg rok ko girdi’.—1 John 4:8.
2, 3. Uw rogon ni ngad ayuweged e piin gad be fil e Bible ngorad ni nge gel fene t’uf Jehovah rorad?
2 “Ireray E Got Rodad”: Nap’an ni gad be fil ban’en nib beech ku be’, ma rayog ni ngad fithed e deer nra taw nga gum’erchaey, ni bod e: “Mang e be fil e re n’ey u murung’agen Jehovah?” fa “Uw rogon ni be micheg e re n’ey ni Jehovah e bin th’abi fel’ e Matam nrayog ngak be’?” Faan gad ra skulnag e girdi’ ni aram rogon ma rayog ni ngad ayuweged yad nge fel’ e tha’ u thilrad Jehovah me par ni aram rogon u n’umngin nap’an e yafos rorad.
3 Gad ra ayuweg e piin gad be fil e Bible ngorad ngar nanged ni yad ba tow’ath ya yad be fil murung’agen e bin riyul’ e Got nib fos, ma rayog ni ngar uned i yog fapi thin ni yog Isaiah ni gaar, “ireray e Got rodad.” (Isa. 25:9) Nap’an ni gad be weliy murung’agen e Thin rok Got, mab t’uf ni ngad tamilangnaged rogon ni yira flaabnag e girdi’ u nap’an nra lebug e tin nib m’agan’ Jehovah ngay u daken e am rok u tan pa’ Kristus Jesus.—Isa. 9:6, 7.
4, 5. Ra nge t’uf Jehovah rodad ma mang e be yip’ fan?
4 Ngad Micheged nib T’uf Jehovah Rodad: Gad manang ni gathi kemus ni ngad lemnaged Got ma aram e mich riy nib t’uf Jehovah rodad u polo’ i gum’erchadad nge yafos rodad nge lanin’dad. Thingari taab lanin’dad Got ma gad fol rok. (Ps. 97:10) Gad be dag nib t’uf Got rodad ni faan gad ra fol ko pi motochiyel rok me ‘par pangidad nib thothup mad pied gadad nga pa’ Got,’ ni ki mada’ ko ngiyal’ ni gad be mada’nag e skeng nge togopuluw.—2 Pet. 3:11; 2 John 6.
5 Ba gel e felfelan’ riy ni ngad rin’ed e tin nib m’agan’ Got ngay ni bochan e ba t’uf rodad. (Ps. 40:8) Thingari mich u wan’ e Bible study rodad ni gubin e motochiyel rok Got ma kan ngongliy ni fan e nge ayuweg e pi tapigpig rok ndariy n’umngin nap’an. (Deut. 10:12, 13) Ra fol be’ rok Jehovah ma be dag ni be tay fan urngin ban’en ni Ke ngongliy. Mu ayuweg faen ni ga be fil e Bible ngak nge nang ni faanra fol ko kanawo’ rok Jehovah nib mat’aw ma ra siy i yib e amith laniyan’ nge kireban’ ngak.
6. Mang tow’ath e ra yog ngak be’ ni bochan e ba t’uf Jehovah rok?
6 Tow’ath Nra Yib Ngak e Piin nib T’uf Got Rorad: Ma t’ufeg Jehovah e piin nib sobut’an’rad mab t’uf Got rorad, ma ma dag ngorad e “tin nda nnang ni ke m’ay i lemnag rok Got.” (1 Kor. 2:9, 10) Ba tamilang u wan’rad rarogon e gabul nge langleth ma bay e athap rorad ya yad manang e tin nib m’agan’ Jehovah ngay. (Jer. 29:11) Ma runguy Jehovah e piin ni yad ma dag e t’ufeg ngak. (Ex. 20:6) Rib ga’ fan u wan’rad e athap ko yafos ni manemus ni bochan e yad ba t’uf rok Got.—John 3:16.
7. Uw rogon u wan’um ni ngam ayuweg e girdi’ ngar t’ufeged Jehovah?
7 Ra yoor ban’en nda nanged u murung’agen e Chitamangidad nu tharmiy, ma aram e ra yoor ban’en nda weliyed ngak e girdi’. (Matt. 13:52) Ri gad ba taw’ath nrayog ni ngad filed ko girdi’ nge bitir rodad rogon ni ngan t’ufeg Jehovah! (Deut. 6:5-7) Manga’ da chagilgad e piin gad be fil e Bible ngorad ngad pininged e sorok ngak Got ya kad guyed ‘felngin nrib fel’.’—Ps. 145:7.