Rogon ni Ngan Fil e Bible ngak Be’ ni Yibe Fanay fare Ke Babyor ni ‘T’ufeg rok Got’
1. Mang fan ni kan ngongliy fare ke babyor ni ‘T’ufeg rok Got’?
1 Kar da felfelan’gad u nap’an ni ke taw fare ke babyor ni “Um Pired ni Gimed Ba T’uf rok Got”! Kan ngongliy e re ke babyor ney ni nge ayuwegdad ni ngad nanged me t’uf rodad e pi motochiyel rok Jehovah ni murung’agen rogon ni ngaud ngongolgad. Re ke babyor ney e gathi kan ngongliy ni nge fil ngodad e tin nib mom e machib ni kan fek u Bible. Ere, dab ni pi’ e re ke babyor ney u nap’an e machib u mit e tabinaw.
2. Uw rogon ni ngan fanay e re ke babyor ney, ma mini’ e ngan fil e re ke babyor ney ngak?
2 Ireray e ken ni migid e babyor ni yira fil ngak be’ u tomuren ni ke mu’nag fare ke babyor ni Mang e Ri Be Fil e Bible? Gimew e en ni gimew be fil e Bible e gimew ra dugliy ko ngam filew e appendix fa danga’, ni bod rogon fare babyor ni Mang e Ri Be Fil e Bible? Dab mu pagtalin nib thilthil rogon e mon’og ni be tay be’ nge be’ ko tirok Got ban’en. Ere, ra be’ ma ngan fil e Bible ngak ni be yan u rogon urngin e tin ni be yag ni nge mit ngak u bayay e fol Bible. Ngad guyed rogon ni ngari mit e pi n’en ni kad filed ngak be’ nib fel’ rogon. Ba ga’ ndanir fanay e re ke babyor ney ni ngkun tabab i fil e Bible ngak be’ ni ke yoor ken e babyor ni ke fil, machane der un ko muulung maku der fol ko tin ni ke fil u lan e Bible.
3. Mang e susun ni ngad rin’ed ni faanra ke un faen ni gad be fil e Bible ngak ko taufe u m’on ni nge mu’nag fa gal ke babyor ni Mang e Ri Be Fil e Bible? nge ‘T’ufeg rok Got’?
3 Faanra ke un faen ni ga be fil e Bible ngak ko taufe ndawor mmu’nagew e gal ke babyor ney, ma thingar mu ululgow ko fol Bible nge taw ko ngiyal’ ni kam mu’nagew fare ke babyor ni ‘T’ufeg rok Got.’ Yugu aram rogon ni ke un facha’ ko taufe, machane ka ga ra yoloy nga but’ urngin e awa ni gimew ma fil e Bible riy, nge urngin yay ni kam filew e Bible u reb e pul, maku ga ra tay ko report rom ni ir reb e study rom. Faanra ke un reb e walag ngom kam filew e Bible ngak facha’, maku ra yoloy fare walag e awa rok.
4. Uw rogon ni ngan fanay fare ke babyor ni ‘T’ufeg rok Got’ ni ngan ayuweg boch e walag ni ke n’uw nap’an ndakurur uned ko machib?
4 Faanra ke yog e Congregation Service Committee ngom ni ngam fil e Bible ngak reb e walag ndakir un ko machib, ma sana yad ra yog ngom ni ngam filew boch e guruy ko fare ke babyor ni ‘T’ufeg rok Got.’ Faanra ngam filew be’ e Bible ni aray rogon, ma de t’uf ni ngam rin’ew nib n’uw nap’an. Ere, riyul’ nre ke babyor ney ni kan ngongliy e aram reb i talin e maruwel nrib fel’ ya ra ayuwegdad ni ngaud pared ni ‘gad ba t’uf rok Got’!—Jude 21.