Machib ni Gad Ma Tay e Be Dag nib T’uf Got Rodad
1. Mang e rin’ Jesus ni bochan e ba t’uf Got rok?
1 T’ufeg e aram e n’en ni k’aring Jesus ni ngi i machib. Gubin ban’en ni i rin’ u nap’an e machib ni i tay e be micheg nrib t’uf Jehovah rok. I gaar: “Machane girdi’ nu fayleng e thingar ra nanged nib t’uf rog e en ni Chitamangiy; aram fan ni kug rin’ urngin ban’en ni bod rogon ni ke yog ngog.” (John 14:31) Gadad e piin ni gad be folwok rok Jesus e gadad ba tow’ath ya rayog ni nge m’ug gelngin nib t’uf Got rodad ko machib ni gad ma tay.—Matthew 22:37; Efesus 5:1, 2.
2. Mang rogon e t’ufeg rodad ngak Jehovah ko machib ni gad ma tay?
2 “Ngan Tayfan Fithingam nib Thothup”: Ra m’ug nib t’uf Got rodad ni faan gad ra gay rogon ni ngad machibnaged e girdi’ u murung’agen Jehovah nge Gil’ilungun ko ngiyal’ ni ke mab e kanawo’ ngodad ni ngad rin’ed. Maku aram rogon ni gad ma tay fan fithingan Got nib thothup. (Psalms 83:18; Ezekiel 36:23; Matthew 6:9) Machib ni i tay Jesus e ke m’ug riy nrib adag ni nge tayfan fithingan Got nib thothup me lebug e tin nib m’agan’ ngay, ere ku er rogodad.—Matthew 26:39.
3. Uw rogon nra ayuwegdad e t’ufeg rodad ngak Jehovah ni nga darod u fithik’ e pi magawon rodad?
3 T’ufeg Rodad e Ra Ayuwegdad ni Ngada Gelgad ko Pi Magawon ni Ma Yib Ngodad: Faanra ba t’uf Jehovah rodad ma dariy ban’en nra talegdad. (1 Korinth 13:4, 7) Boor e magawon ni yib ngak Jesus nrayog ni nge tal’eg ndab ki machib. Machane i athamgil ni bochan e rib t’uf Jehovah rok. (Mark 3:21; 1 Peter 2:18-23) Ku er rogodad ni boor e magawon ni gad ma mada’nag, machane t’ufeg rodad ngak Got e rayog ni nge ayuwegdad ni nga darod u fithik’ e pi magawon ney. Faan gad ra folwok ko n’en ni i rin’ Kristus, ma dariy ban’en nrayog ni nge talegdad ndab kud rin’ed e maruwel rodad ni machib. Yugu aram rogon ni ma sum e magawon u lan e tabinaw, ma gad ma m’ar, ma gad ma pilibthir, maku boor e girdi’ ndariy fan e machib u wan’rad, ma pi magawon ney e dabi warnag e t’ufeg rodad ngak Jehovah maku dabi talegdad ndab kud machibgad.
4. Mang tow’ath e bay rodad ni bochan e ba t’uf Got rodad?
4 T’ufeg e ba gel gelngin. Ma gad ba tow’ath ya rayog ni ngad daged ngak Got gelngin nib t’uf rodad ko machib ni gad ma tay. (1 Korinth 13:13) Manga yigi gel ‘feni t’uf Got nge girdi’ rodad’ u nap’an ni gad be chugur i yan ko ngiyal’ nra gagiyel feni thothup fithingan Jehovah.—Filippi 1:9; Matthew 22:36-38.