Uw Rogon ni Ngam Fulweg?
1. Mang fan ni nguud folwokgad rok Jesus u nap’an nra fith be’ e deer ngodad?
1 Ke mada’ ko chiney, ma ke gin e girdi’ nga rogon ni i fulweg Jesus fapi deer ni kan fith ngak. Faan yira fith boch e deer ngodad ko ngiyal’ ni nga darod ko machib u mit e tabinaw, mab fel’ ni nguud folwokgad ko n’en ni i rin’ Jesus.—1 Pet. 2:21.
2. Mang e ra ayuwegdad ni ngad pied e fulweg u reb e deer me yib angin?
2 Som’on e Ngam Motoyil: Ke fal’eg Jesus i lemnag ko mang fan ni be fith be’ e deer. Yu ngiyal’ mab t’uf ni ngad fithed boch e deer ya nge tamilang u wan’dad ko mang e be lemnag facha’. Faanra fith be’, “Mmich Jesus u wan’um fa?” ma sana ba adag ni nge nang ko mang fan ni da mur madnomnag e Baynag. Faanra ba tamilang ko mang fan ni be fith facha’ e deer, ma rayog ni nge yib angin ma ga weliy fan ngak.—Luke 10:25-37.
3. Mang ban’en ni bay rodad nra ayuwegdad ngad pied e fulweg nu Bible?
3 Ngam Fanay e Thin Rok Got: Manigil ni ngam fanay e Bible nge pi’ e fulweg ko fare deer. (2 Tim. 3:16, 17; Heb. 4:12) Fare babyor ni Reasoning nge “Bible Topics for Discussion” u lan e New World Translation of the Holy Scriptures e ke ayuweg e girdi’ ni ngar pied e fulweg nib tamilang. Yugu aram rogon ni bay boch e girdi’ ni de mich e Bible u wan’rad, rayog ni ngam dag ngorad ko mang e be fil e Thin nu Bible. Ngam pi’ e athamgil nga laniyan’ be’ nge tamilang u wan’ ni rayog ni nge pagan’ ko Bible. Faan ga ra folwok rok Jesus, ma fulweg rom e ra bod e “gol ni ka ni ngongliy nib fel’ yaan ka ni ayliy nga daken e silber”—nib mudugil, mab puluw, mab tamilang.—Prov. 25:11.
4. Mangiyal’ e fel’ ni dabda pied e fulweg ko urngin e deer?
4 Susun ni Ngad Fulweged Urngin e Deer? Faanra da mu nang e fulweg u reb e deer, dab mu tamra ni ngam gaar: “Da gu nang, machane rayog ni nggu fal’eg i gay e fulweg riy mu gu sul nga gog ngom.” Sana ra piningem facha’ ngam sul bayay ni faan ga ra dag ni gab sobut’an’ ma ga baadag ni ngam ayuweg. Faanra ga be lemnag ni ke fith facha’ fare deer ni bochan e ba adag ni nge tugthin, ma ga folwok ko n’en ni rin’ Jesus ni de pi’ e fulweg ko girdi’ ni baadag ni nge togopuluw. (Luke 20:1-8) Maku faanra bay be’ ndariy fan e thin nriyul’ u wan’ ma be guy rogon ni nge tugthin, fel’ ni nga mog e thin nib manigil ngak ma ga chuw ngam gay be’ ni baadag ni nge nang e thin riyul’.—Matt. 7:6.
5. Uw rogon ni ke dag Jesus ngodad rogon ni ngad pied e fulweg ko deer?
5 Manang Jesus ni ba ga’ fan ni nge pagan’ ngak Jehovah me rin’ e maruwel ni ke pi’ ngak ni nge “weliy murung’agen e thin riyul’,” ni aram e nge ayuweg e girdi’ ni yad baadag ni nge tamilang e thin rok Got u wan’rad. (John 18:37) Gadad ba tow’ath ya rayog ni ngad folwokgad rok Jesus nguuda pied e fulweg ngak e piin ni “ke mel’egrad Got ni nge yog e yafos ndariy n’umngin nap’an ngorad”!—Acts 13:48.