Reb e Article ni Ngan Tabab i Fil e Bible Riy ko Girdi’
1. Mang article e kan tabab i piliyeg ko Fare Wulyang ko Damit ko February 1, ma uw rogon ni ngan fanay?
1 Bay reb e article ni kab beech ni kan tabab i piliyeg ko Fare Wulyang ko Damit ko February 1, 2012. Re article ney e kan ngongliy ni nge ayuwegdad u rogon ni ngad tababgad i fil e Bible ko girdi’. Kenggin e re article nem e, “Mu Fil Ban’en ko Thin rok Got.” Yugu aram rogon ni bay boch e girdi’ ko gin ni gad ma machib riy ni kemus ni yad baadag ni ngar beeged e re article ney, machane kan ngongliy ni ngan weliy u taabang.
2. Mang boch ban’en ni bay ko pi article ney?
2 Pi N’en ni Bay Riy: Kenggin e re article ney nge pi subheading riy e kan yoloy nib deer ni bochan e ngan fith ko en ni yibe non ngak. Bay boch e thin nu Bible riy ni dan tay nga lan e paragraph ya nge mang facha’ e beeg u Bible rok. Ba ngoch e paragraph riy ya nge yog nni weliy u nap’an ni kan mada’nag be’. Gubin e article riy ni bay fare ke babyor ni Mang e Ri Be Fil e Bible riy ya nge yog ni ngam tababgow i fil u nap’an ni kam mu’gow i weliy e thin ko re article ney.
3. Uw rogon ni ngam fanay e re article ney ni ngam tabab i fil e Bible ngak be’ u nap’an e machib u mit e tabinaw?
3 Rogon ni Ngan Fanay: Nap’an ni ga be pi’ Fare Wulyang ko Damit ngak be’ ma rayog ni ngam fith reb e deer ni bay ko fare article nrayog ni nge pug e tafinay rok. Bod ni fare article ko February 1 e be weliy murung’agen e n’en ni gad ra fil ko pi yiiy u Bible. Ere rayog ni ngam fith ni nge lungum: “Ga be lemnag ni be lebug e pi yiiy u Bible e ngiyal’ ney, fa? [Mmotoyil ko n’en nra yog.] Kug beeg ban’en u murung’agen e re n’ey ni gu baadag.” Mu dag e bin dalip e deer ngak, ma ga beeg e paragraph nge thin nu Bible ni bay riy. Mu sul ngkum beeg fare deer bayay, ma gog ngak ni nge pi’ e fulweg riy. Mu weliyew ni be yan u rogon urngin nrayog rok facha’ ni ga be fanay e pi deer riy ni kan tay e namba ngay. U m’on ni ngam chuw, ma ga dag ngak e bin migid e deer mi gimew puruy’nag e rofen ni ngam sul ngkum weliyew e fulweg riy. Mu sul ngak u gubin e wik ngam weliyew gubin ban’en ni bay ko fare article nge mada’ ko ngiyal’ ni ke yib e bin migid e babyor mu kum pi’ ba ken ngak. Ku reb e ban’en nrayog ni ngam rin’ e ngam ognag e fol Bible ngak facha’. Ngemu’ ma ga fanay e re article ney ni ngam tababgow i fil e Bible riy.
4. Uw rogon ni ngad fanayed e pi article ney u nap’an ni kad sulod ngak be’?
4 Ku rayog ni ngam weliy e thin ni bay ko re article ney ngak e girdi’ ni ga ma pi’ e babyor ngak ni gubin ngiyal’ nge boch e girdi’ ni kam sul ni ngam guyrad. Rayog ni nge lungum: “Bay ban’en ni kan tay ko Fare Wulyang ko Damit nib beech. Son nggu dag ngom rogon ni ngan fil.” Gad be athapeg nre article ney e ra ayuweg boor e girdi’ ni “ngar nanged e tin nib riyul’.”—1 Tim. 2:4.