Boch e Article Nra Ayuwegdad ko Machib
1. Mang l’agruw i fan ni yira ngongliy e pi article ney ni “Gimew Be Non e En Buguli Yoror Rom?”
1 Dabki n’uw nap’an ma yira tay boch e article ko Fare Wulyang ko Damit ni kenggin e “Gimew Be Non e En Buguli Yoror Rom.” Bay l’agruw i fan ni yira ngongliy e pi article ney ni aram e bin som’on, e rogon ni ngan fil e Bible ngak be’ nra pug e tafinay rok, maku be dag ngodad rogon ni ngad weliyed fan boch e kenggin e machib u Bible. (1 Pet. 3:15) Uw rogon ni ngad fanayed e pi article ney nib fel’ rogon?
2. Uw rogon nrayog ni ngad fanayed e pi article ney ko machib?
2 Mu Fanay ko Machib: Mu cha’riy boch Fare Wulyang ko Damit nra reb ma bay reb e pi article ney riy. Nap’an nra fith be’ ni ga be machibnag, ara be’ ni baadag e machib, ara be’ ni ga be fil e Bible ngak reb e deer ni bay rogon ko pi article ney, mag pi’ ba ken ngak, ma ga yog ngak ni ngam weliyew murung’agen. Faanra dariy ba ken e re magazine ney rom, ma rayog ni ngam downloadnag ko fare jw.org.
3. Uw rogon ni ngad weliyed e en ni gad be machibnag e pi article ney?
3 Uw rogon ni ngam weliy reb e pi article ney ngak be’? Boch e girdi’ e ka rogned ngak be’ ni nge beeg fare thin ni fan ko e en buguli yoror rok, ma yad e yad ra beeg fare thin ni fan ko En be machib. Kar pirieged ni bay angin e re n’ey, ya be ayuweg be’ ni nge fal’eg i yaliy e machib rodad u kanawo’ ndabi magawonnag laniyan’.—Deut. 32:2.
4. Uw rogon ni ngad fanayed e pi article ney ni nge ayuwegdad?
4 Rogon Nrayog ni Nge Ayuwegem nge Boch e Girdi’: Nap’an ni ga ra beeg e pi article ney, mu tay fanam i yan ko fapi thin nu Bible, nge sasing, nge rogon kan weliy, nge kanawoen ni kan fal’eg. Mag gay rogon ni ngam rin’ e re n’ey u nap’an e machib. (Prov. 1:5; 9:9) Reb e walag ni ppin e ke gaar, “Ra ngan beeg e pi article ney e bod rogon ni kan fil ban’en rok reb e pioneer ni ‘boor ban’en ni manang’, ni ir be’ ni gubin ngiyal’ ma manang ko mang e nge yog!”
5. Uw rogon ni ngad ayuweged e piin ni gad be fil e Bible ngorad ya nge yag ni ngar fal’eged rogorad ni fan ko machib?
5 Ku rayog ni ngam fanay e pi article ney ni ngam ayuweg e piin ni ga be fil e Bible ngorad nge yag ni ngar fal’eged rogorad ko machib. Ngam beegew e pi article ney u taabang, ma nga mog ngak ni ir e ra beeg e thin ni fan ko en be machib. Re n’ey e ra ayuweg e piin ni ga be fil e Bible ngorad nge yag ni ngar weliyed e n’en ni ke michan’rad ngay nib fel’ rogon. (Kol. 4:6) Riyul’ ni pi article ney ereray reb u fithik’ boch e kanawo’ ni ma fanay Jehovah nge ayuwegdad ni ngad rin’ed “urngin e maruwel” ni kan pi’ ngodad.—2 Tim. 4:5.