August e Aram Reb e Pul Ndab ni Pagtalin!

1. Mang reb e campaign ni gad ra tay u ga’ngin yang e fayleng u nap’an nra chugur ko ngiyal’ nra gaman 100 e duw ni ke tabab Gil’ilungun Got ko gagiyeg?

¹ Ke chugur ko ngiyal’ nra gaman 100 e duw ni ke tabab Gil’ilungun Got ko gagiyeg. Ere, ba fel’ ni ngad pininged e sorok ngak Jehovah u daken reb e campaign ni gad ra tay! Nap’an e pul ni August ma gad ra wereg reb e tract ni kab beech ni kenggin e Uw e Rayog ni Ngad Pirieged e Fulweg Riy u Boch e Deer nib Ga’ Fan? Re tract ney e be pi’ e athamgil nga laniyan’ e girdi’ ni ngar gayed e fulweg ko pi deer rorad u lan e Bible, maku be weliy rogon nrayog ni nge ayuwegrad fare website ni jw.org.

2. Uw rogon ni ngad uned i “pining e sorok” ngak Jehovah u nap’an e pul ni August?

² Ngan Pining e Sorok: Kan yarmiy boch ban’en ni fan ko piin ni yad baadag ni ngar uned ko auxiliary pioneer ara pioneer ni ayuw u nap’an e pul ni August, ya nge yag ni yoornag e pi walag e tayim rorad ko machib. Ra taw ko re pul nem ma rayog ni nge un e pi walag ko pioneer ni ayuw ni ngar thognaged 30 e awa. Bochan ni lal e Biyernes, nge Sabado, nge Madnom ko pul ni August, ma boor e walag ni yad ma un ko maruwel ara skul u lan e wik e rayog ni ngar uned ko pioneer ni ayuw. Faanra bay be’ ni ga be fil e Bible ngak ni be mon’og ko tirok Got ban’en fa bay e bitir rom ni baadag ni nge un ko publisher, ma rayog ni nga mog ngak e en ma yarmiy e piin piilal ni ka chiney. Rib gel e felfelan’ ni gad ra tay ni nge un e pi girdi’ ney ngodad ko machib u nap’an e re pul nem! Yugu aram rogon ni boor e regular pioneer ni yad ma fek e matal rorad u nap’an e pul ni August u tomuren ni ke gaman urngin e awa ni ngar machibgad riy u lan reb e duw, ma rayog ni ngar thilyeged boch ban’en ko schedule rorad ya nge yag nra uned ko re campaign ney. Ireray e ngiyal’ ni nge weliy chon e tabinaw rogon nrayog ni ngar uned i “pining e sorok” ngak Jehovah u nap’an e pul ni August.​—Ezra 3:11; Prov. 15:22.

3. Mang e yibe athapeg ni nge buch ko biney e campaign ni gad ra tay?

³ Yugu aram rogon ni ke yoor yay ni gad ma tay boch e campaign ni aray rogon, machane yibe athapeg ni biney e campaign ni gad ra tay e dab ni pagtalin. Gur, rayog ni nge yoor e awa ni ngad uned riy ko machib, fa yoor e girdi’ nra uned ko publisher, ara pioneer ni ayuw u nap’an e pul ni August, fa? Nap’an nra m’ay e service year ni 2014, ma gad be athapeg ni manga yigi tow’athnag Jehovah e girdi’ rok u ga’ngin yang e fayleng ni bochan e athamgil ni kar ted ni ngar machibgad nib mus rogorad riy u nap’an e pul ni August!​—Matt. 24:14.