Mu Filed Ban’en Rok e Pi Profet—Habakkuk
1. Mang fan nrayog ni nge taareb rogon e lem rodad Habakkuk?
1 Bochan ni be gel e kireb i yan ko re fayleng ney, ma dabisiy ni taareb rogon e lem rodad Habakkuk u nap’an ni fith Jehovah ni gaar: “Mang fan ni kam gagiyegnigeg ni ngug guy e gafgow nge kireb ni yibe rin’? Gafgow ni yibe tay ngak e girdi’ nge cham e gu be guy u toobeg i yan?” (Hab. 1:3; 2 Tim. 3:1, 13) Yira fal’eg i lemnag e pi n’en ni yog Habakkuk nge rogon ni par nib yul’yul’ ma rayog ni nge ayuwegdad u nap’an ni gad be sonnag fare rran rok Jehovah ko pufthin.—2 Pet. 3:7.
2. Uw rogon ni ngad daged ko ngongol rodad ni gad be par ni gadad ba yul’yul’ e ngiyal’ ney?
2 Ngan Par ni Yib Yul’yul’: De pag Habakkuk e pi kireb ni guy ni nge magawonnag laniyan’, machane i par ni be tiyan’ ko tirok Got ban’en maku be rin’ e maruwel ni ke yog Jehovah ngak ni nge rin’. (Hab. 2:1) Ke micheg Jehovah ngak Habakkuk ni profet nra lebguy e thin Rok ko ngiyal’ nib m’agan’ ngay, ma “piin ni yad mmat’aw e yad ra fos ni bochan e yad ba yul’yul’ ngak Got.” (Hab. 2:2-4) Mang fan e re n’ey ngak e piin Kristiano ni yad bay e ngiyal’ ney ko tomur? N’en nib ga’ fan ni ngad nanged e riyul’ nra yib e tomur ma gathi wuin e ra yib. Michan’ rodad e ra ayuwegdad ni ngad pared ni gad ba od ma gad mon’eg fare maruwel ni machib.—Heb. 10:38, 39.
3. Mang fan nthingar da athamgilgad ngad pared ni gadad ba felfelan’ u nap’an ni gad be pigpig ngak Jehovah?
3 Ngan Felfelan’ ngak Jehovah: Nap’an nra cham Gog nu Magog ko girdi’ rok Jehovah, ma yira skengnag e michan’ rodad. (Ezek. 38:2, 10-12) Mus ngak e piin nib mudugil ni yad ra gel u reb e mahl u kub gel e gafgow ni yad ma mada’nag. Rayog ni nge dabki gaman e ggan ni ngan kay maku rayog ni nge mul u pa’ be’ e pi n’en nib milfan ngak. Ere, mang e gad ra rin’ u nap’an nra sum boch e magawon? Manang Habakkuk nra mada’nag boor e magawon ma aram me dugliy u wan’ ni nge ulul ko pigpig ngak Jehovah ya nge yag ni nge par nib felfelan’. (Hab. 3:16-19) “Felfelan’ ni ma pi’” Jehovah ngodad e ra ayuwegdad ni ngad athamgilgad u fithik’ e pi magawon ni gad ra mada’nag boch nga m’on.—Neh. 8:10; Heb. 12:2.
4. Uw rogon ni ngad pirieged e felfelan’ e chiney nge boch nga m’on?
4 Piin ni yad ra magey nib yad ba fos u nap’an fare gafgow nib ga’ e yira skulnagrad u rogon ni ngar pared nib m’agan’ Got ngay. (Hab. 2:14) Piin ni yira fasegrad ko yam’ e ku yad ra fil murung’agen Jehovah. Ere, ngiyal’ ney e ngad rin’ed urngin nrayog rodad ni ngad weliyed murung’agen Jehovah nge pi n’en ni ke sunmiy nrib fel’ ngak e girdi’!—Ps. 34:1; 71:17.