Pi Tang ni Fan ko Muulung e Ma Pi’ Gelngidad

Nap’an ni immoy Paul nge Silas u kalbus ma ur ron’ew boch e tang ni yow be pining e sorok ngak Got. (Ac 16:25) Mus ko ngiyal’ ney ma bay boch e Kristiano ni ur moyed u Sachsenhausen concentration camp u Nazi Germany nge boch ni kan kalbusnagrad u Siberia ni u ron’ed boch e tang ko muulung. Pi n’ey ni ke buch e be tamilangnag ni faan gad ra yon’ e pi tang rodad u nap’an nra yib e magawon ngodad ma ra pi’ gelngidad.

Dab ki n’uw nap’an ma yira ngongliy fare songbook nib beech ni kenggin e “Sing Out Joyfully” to Jehovah (Ngad “Tanggad” u Fithik’ e Felfelan’ ni Fan ngak Jehovah) u boch e thin. Ere nap’an nra yag ba ken ngom, mag gay rogon ni nge mit e thin ko pi tang ney ngom ni aram e rayog ni ngam practicenag u nap’an ni gimed ra tay chon e tabinaw rom e fol Bible ni tabinaw. (Ef 5:19) Ya faan ga ra rin’ ni aray rogon, ma ra taw ko tayim ni kam mada’nag e magawon, ma ra ayuwegem gelngin Got nib thothup ni nge yib ngan’um e thin ko pi tang ney. Rayog ni nge ayuwegdad e pi tang rodad ni ngad tedan’dad ko athap rodad. Ku rayog ni nge pi’ e athamgil nga lanin’dad u nap’an ni ke yib e magawon ngodad. Ma mus nga nap’an e ngiyal’ ndariy e magawon ni gad be yan u fithik’ ma rayog ni nge pi’ e thin ko pi tang ney e athamgil nga lanin’dad nrayog ni ngad “tanggad” u fithik’ e felfelan’. (1Kr 15:16, BT; Ps 33:1-3) Ere ngad athamgilgad ni ngad fanayed e pi tang rodad nib fel’ rogon!

NGAN YALIY FARE VIDEO NI KENGGIN E A SONG THAT INSPIRED LABORERS, NGEMU’ MIN PI’ E FULWEG KO PI DEER NI BAARAY:

• Mang e n’en ni buch rok Brother Frost ni k’aring ni nge tunguy reb e tang?

• Uw rogon ni pi’ e re tang ney e athamgil nga laniyan’ e pi walag ni ur med u Sachsenhausen concentration camp?

• Mang boch ban’en ni ga ma rin’ nrayog ni nge pi’ e pi tang rodad e athamgil riy nga lanin’um?

• Bin ngan ko pi tang rodad e ga baadag ni nge mit ngom?