Gimed e Piin Fel’ Yangaren​—Mu Pasiggad i ‘Rin’ e Tin nib Fel’’

U lan fare babyor rok Titus me yog apostal Paul ngak e piin fel’ yangaren nib muun Titus ngay nsusun ni ngar daged e ngongol nib fel’ ngak e girdi’ nrayog ni ngar ‘folwokgad ko ngongol nib fel’ ni yad be rin’.’ (Tit 2:6, 7) Boch nga tomuren miki weliy u lan e re guruy ney ni fan ni kan machalbognag e girdi’ rok Jehovah e bochan ni ngar pasiggad ni ngar “rin’ed e tin nib fel’.” (Tit 2:14) Reb ko pi maruwel nib fel’ ney ni yad ra rin’ e aram e ngar machibnaged mar filed murung’agen Gil’ilungun Got ko girdi’. Ere faanra gur reb e fel’ yangaren, ma gur, ga ra fanay gelngim ni ngam un ko pioneer ni ayuw ara regular pioneer, fa?​—Pr 20:29.

Faanra ga baadag ni ngam mang reb e regular pioneer, mab t’uf ni ngam tanonmag boch ban’en u lan e yafos rom nib fel’ rogon ya nge yag ni ngam rin’ e re n’ey. (Lu 14:28-30) Gur, uw rogon ni ngam yognag e salpiy ni fan ko tin nib t’uf rom u nap’an ni ga ra un ko machib u polo’ e tayim rom? Ma uw rogon ni ngam thognag e awa nsusun e nge thognag e piin ni yad ma un ko machib u polo’ e tayim rorad? Mu yibilay murung’agen e re n’ey ngak Jehovah ni nge ayuwegem. (Ps 37:5) Mu weliy murung’agen ngak e gallabthir rom nge piin ni ke yag ni ngar uned ko pioneer. Ngemu’ mag rin’ e pi n’en nib t’uf ni ngam rin’ ya nge yag e n’en ni ga be nameg. Ya faan ga ra rin’, mab mudugil nra tow’athnagem Jehovah ko athamgil ni ga be tay ni fan ko pigpig rom ngak!

NGAN YALIY FARE VIDEO NI KENGGIN E YOUTHS HONORING JEHOVAH, NGEMU’ MIN PI’ E FULWEG KO PI DEER NI BAARAY:

• Mang boch e magawon ni i mada’nag boch e pioneer, ma uw rogon ni kar gelgad ko pi n’ey?

• Uw rogon ni nge ayuweg e piin gallabthir pi fakrad ni ngar manged regular pioneer?

• Mang nib ga’ fan ni ngad fal’eged e schedule ni ngad uned ko machib?

• Uw rogon nrayog ni nge pi’ e pi walag u lan e ulung e athamgil nga laniyan’ e piin pioneer mar ayuweged yad?

• Mang tow’ath e ma yag ngak e piin ni yad ma pigpig ni yad e pioneer?