ROGON NI NGE TAL E FANENIKAN

3 | Mu Chuweg E Fanenikan U Lanin’um

Be Gaar e Bible:

“Mpied gimed ngak Got nge piliyegmed, ni aram e kari piliyeg lanin’med ni polo’. Ma aram e rayog ni ngam nanged e tin nib m’agan’ Got ngay—ni tin nib fel’, nib fel’ u wan’ Got ma rib yal’uw.”—ROMA 12:2.

N’en Be Yip’ Fan:

Ba ga’ fan u wan’ Got e pi n’en gad ma lemnag. (Jeremiah 17:10) Gathi kemus nib t’uf ni ngad siyeged e thin nge ngongol u fithik’ e fanenikan, ya ku bay ban’en nib t’uf ni ngad rin’ed. Fanenikan e ma sum u lanin’dad nge gum’ircha’dad. Ere ba t’uf ni ngad gurgad ngad talgad ndab kud lemnaged boch ban’en nra sunumeg e fanenikan u lanin’dad. Kemus rogon me yag nda ‘piliyeged gadad’ ma gad tal ndab kud fanenikayed e girdi’.

N’en Nrayog ni Ngam Rin’:

Mu fal’eg i yaliy rogon ni ga ma lemnag yugu boch e girdi’, nib ga’ ni piin nib thil ramaen dowrad ara nam rorad. Mu fithem ni nge lungum: ‘Uw rogon e pi girdi’ nem u wan’ug? Gu ma lemnagrad ni be yan u rogon e n’en gu manang u murung’agrad? Fa be yan u rogon e laniyan’ ni be tay e girdi’ ngorad?’ Dab um yaliy ara um beeg boch ban’en u online ni be tay tanggin e fanenikan nge cham.

Thin rok Got e rayog ni nge ayuwegdad ni ngad chuweged e fanenikan u lanin’dad nge gum’ircha’dad

Gathi gubin ngiyal’ nib mom ni ngad fal’eged i yaliy rogon e n’en bay u lanin’dad u reb e kanawo’ nib mat’aw. Machane rayog ni nge ayuwegdad e Thin rok Got ni ngad ‘pufthinnaged e n’en ni gad ma yim’ ni bochan nge tin ni gad ma lemnag.’ (Hebrews 4:12) Ere mu ulul i fil e n’en bay u lan e Bible. Mu taarebrogonnag e n’en be yog ko n’en bay u lanin’um, mag athamgil u rogon nrayog rom ni nge puluw e lem rom ko n’en be fil e Bible. Thin rok Got e rayog ni nge ayuwegdad ni ngad chuweged e fanenikan ni ke par u lanin’dad nge gum’ircha’dad nib mo’maw’ ni nge chuw.—2 Korinth 10:4, 5.

Murung’agen Be’—STEPHEN

e Thilyeg Rogon e Lem Rok

Stephen nge chon e tabinaw rok e i fanenikayrad e girdi’ nib wechwech dowrad. Bochan e re n’ey, ma aram mi i pag ba ulung i girdi’ ni yad ma guy rogon ni ngan tayfan mat’awun e girdi’ ni ngar gagiyegnaged rogon e lem nge ngongol rok. Munmun ma aram mi i un i rin’ yu pa’ e oloboch ni bochan e be fanenikay ba ulung e girdi’. I gaar: “Bay yu ngiyal’ ni gamad ma yan e pi fager rog nga tagil’ e kachido ni nggu yaliyed boch e kachido ni yaan e gafgow ni un tay ko pi sib nni fekrad u Africa nga Meriken. Ri gamad ma damumuw ko re n’ey, ma aram ma gamad chel nggu lied boch e fel’ yangaren nib wechwech dowrad ni yad bay u rom u tagil’ e kachido. Tomuren ma gamad yan ko gin ma par boch e girdi’ nib wechwech riy ni gamad be magow cham.”

Ri thil e lem rok Stephen u nap’an nra tababgad e Pi Mich Rok Jehovah ko fol Bible. I gaar: “Bochan nib gel e laniyan’ ni ug guy ni i tay e girdi’ ni bochan ramaen dowey, ma aram e bay boch ban’en nug guy u rarogon e Pi Mich nug ngat ngay. Bod nnap’an ni t’uf ni nge milekag reb e Pi Mich nib wechwech dow nga bang, ma aram me tay pi fak rok ba tabinaw nib talumor girdien. Ku bay ba tabinaw nib wechwech girdien nra feked ba pagel nib talumor ni ke t’uf bang ni nge par riy ni nge par rorad.” Ri mich u wan’ Stephen ni Pi Mich Rok Jehovah e bay fare t’ufeg u thilrad ni yiiynag Jesus nra m’ug u thilin e tin riyul’ e Kristiano.—John 13:35.

Mang e ayuweg Stephen ni nge taleg e cham ma dabki fanenikay e girdi’? I ayuweg fare thin ni bay ko Roma 12:2. I gaar: “Gu tabab ni nggu nang nib t’uf ni nggu thilyeg rogon e lem rog. Ba t’uf ni nggu taleg e cham mu kug fil ni bin th’abi fel’ kanawoen e yafos e aram e nggu par u fithik’ e gapas.” Chiney e ke pag 40 e duw ni ke par Stephen nib felfelan’ ndakuriy e fanenikan u gum’irchaen.