Babyor Ni Yib Rok Girdien E Governing Body

“I GOT ni Chitamangidad nge Somol Jesus Kristus e nguur ayuwegew gimed ma yow be pi’ e gapas nga lanin’med.” Ireram e pi thin ni i yoloy Paul ngak e pi ulung kakrom. Taareb lanin’mad ya ku aram e thin ni gamad be yog ngomed ni gubin.​—Efe. 1:2.

Uw fene fel’ ni gad be tay fan e runguy rok Jehovah ko biyul’ ni i tay u daken Jesus Kristus! Bochan e biyul’ ni tay Kristus, ma gad be par ni be felan’ Got ngodad. Dabiyog ngodad ko pi n’en ni ngad ngongliyed, ndemtrug ko fol Bible, ara machib u mit e tabinaw, ara yugu reb e maruwel ni gad ra tay. Ya ke n’ag e denen rodad ma ra pi’ e yafos ni manemus ngodad ni gathi puluwon e maruwel ni ngad ngongliyed, machane aram e tow’ath ni yib rok Jehovah ni be dag e runguy rok u daken Jesus Kristus.​—Rom. 11:6.

Yoloy Paul e pi thin ngak e piin nib mich Got u wan’rad ni gaar: “Gamad be wenig ngomed . . . ke yog ngomed e tow’ath ni pi’ Got, ere thingar dab mpaged nge maadab. Mu telmed ko n’en ni be yog Got: ‘Kug motoyil ngom ko fare awa nib m’agan’ ngay, kug ayuwegnem ko fare rran ni ngam thap ngak Got.’ Mmotoyil! Ereray e re awa ni nge ayuwegey Got, daba’ e erera’ e re rran ni ngan thap ngak Got!” Immoy reb e “awa nib m’agan’ ngay” u m’on ko ngiyal’ ni kan gothey Jerusalem ko fa bin som’on e chibog. Piin nib yul’yul’ gum’ercha’rad ma ba t’uf Jehovah rorad e kar thapgad ko tirok Got ban’en. Angin ni yib ngak e piin nib yul’yul’ ni kar milgad u Jerusalem u m’on ni kan gothey ko duw ni 70 C.E. e dan thang e fan rorad.​—2 Kor. 6:1, 2.

Ngiyal’ ney, ma ku gad be par u ba ngiyal’ ni aram e “awa nib m’agan’ ngay” nge reb e “rran ni ngan thap ngak Got.” Pi tapigpig rok Jehovah ni yad ffel’ u wan’ ni kan ayuwegrad ko tirok Got ban’en e rayog ngorad ni ngar thapgad ngak ndabni thang e fan rorad u nap’an “fare rran rok Jehovah” ni rib chugur.​—Zef. 1:14.

Bay ban’en ni baga’ ni be mil fan ngodad ni bochan e rran rok Jehovah ni be chugur iyib. Mmil fan ngodad ni ngad ginangnaged e girdi’ ma ngad ayuweged e piin nib yul’yul’ gum’ercha’rad nge fel’ rogorad ko runguy rok Jehovah ngar thapgad ngak. Ri ke tay Paul fan re n’ey ni mmil fan ngak. I yol ni gaar: “Faan mang e da gu machibnag ngak e girdi’ e Thin nib Fel’ ni yib rok Got ma ri gu ra gafgow!” Maku i yoloy e tafinay rok ni ke gaar: “Thingar gu ayuweg e girdi’ ko pi nam, ni piin ni kar mon’oggad nge piin ndawor, nge piin ni yad ba skul nge piin ndar skulgad. Aram fan ni gub adag ni ngku gu machibnag e Thin nib Fel’ ni yib rok Got ngomed.”​—1 Kor. 9:16; Rom. 1:14, 15.

Thingar da dum’gad ku Jehovah nfaanra dabda fl’eged e maruwel ni baga’fan ni ngan ginang e girdi’. Gad manang ni yog Jehovah ngak Ezekiel ni gaar: “Fak e girdi’, nggu tiyem ni gur e ngam damit ni fan ngak girdien e nam nu Israel, ni gur e nggog ngom ni ngar ayuwgad ma ga weliy ngorad. Faanra gog ni ba’ be’ nib kireb ni bay yim’, ma da mman mog ngak nge nang nge thiliyeg pangin nge par nib fos, ma bay yim’ u fithik’ e denen rok, ma yam’ ni ke tay e gu ra tiyem ni gur e kireb rom.”​—Ezek. 3:17, 18.

Ba mo’maw’ ni ngan par nrogon ko tin tomren e rran ney. Gathi ba mom ni ngan par nib thebthebal min fl’eg e maruwel ko tabinaw, maruwel, ulung, nge machib. Maku boor e girdi’ e thingari k’adan’rad ko m’ar, kireban’, pillibthir iyan, nge togopuluw. Baga’ ni gimed be par nib “tomal lanin’med.” Ere gamad baadag ni nggu weliyed e tafinay romad ngomed u rogon ni ba puluw ko thin yog Jesus ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed.” (Matt. 11:28) Gamad be pining e magar ngomed ni kam athamgilgad ni nguum pigpiggad ku Jehovah, ma gimed par nib yul’yul’ ni yugu aram rogon ni bay e magawon romed.

Bochan ni kam machibgad u rogon nib pasig ma bay e flaab rok Jehovah, kan taufenag 4,762 e girdi’ u gubin e wik u fayleng iyan. Nap’an fa binem e duw ma kan fl’eg 1,375 e ulung nib biech. Gamad be athapeg i meybil ni fare babyor ni What Does the Bible Really Teach?, ni kan ngongliy ko 120 e thin e ra ayuweg bokum i million e girdi’ ko runguy nge gapas ni be yib rok Jehovah u nap’an biney e “rran ni ngan thap ngak Got.”

Rayog ni ngam pired nib mich u wan’med ni gimed ba t’uf rok girdien fare Governing Body ma gamad ma meybil ni fan ngomed. Maku kam magargad kam meybilgad ku Got ni fan ngomad.

Pi walagmed,

Governing Body of Jehovah’s Witnesses