Mu Folwok rok Jehovah u Rogon ni Ma Rin’ e Tin nib Mat’aw ma Be Dag e Runguy

1, 2. (a) Uw rogon fare Motochiyel rok Got u wan’ Jesus? (b) Uw rogon ni i thilyeg e pi tamachib ko motochiyel nge pi Farise fan fare Motochiyel?

RIB ga’ fan fare Motochiyel rok Moses u wan’ Jesus. Dariy e maruwar riy nrib ga’ fan u wan’ ni bochan e re Motochiyel nem e yib rok e En nth’abi ga’ fan u lan e yafos rok, ni aram Jehovah ni Chitamangin. Kan weliy u m’on riy rogon feni ga’ fan e motochiyel rok Got u wan’ Jesus ko fare thin ni bay ko Psalm 40:8 ni be gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.” Ere, micheg Jesus u daken e thin nge ngongol rok nrib yal’uw e Motochiyel rok Got, ma ra yib angin ngodad, maku ra lebug e pi n’en ni bay riy.​—Matt. 5:17-19.

² Ere, dariy e maruwar riy nrib gel e kireban’ ni i tay Jesus u nap’an ni i guy e pi tamachib ko motochiyel nge pi Farise ni ur thilyeged fan e Motochiyel ko Chitamangin. Ur folgad u nochi ban’en nrib achig ko re motochiyel nem. Ere, aram fan ni gaar ngorad: “Ra ban’en nragag guruy ma gimed be pi’ taab guruy ri’ ngak Got ni mus ko pi n’en ni ma fal’eg lamen e ggan ni aram e mint, nge dill, nge cummin.” Ere, mang e magawon ni bay? I ulul ngay ni gaar: “Damur folgad ko tin ri ba ga’ fan ni be yog e Motochiyel, ni bod e mat’aw nge runguy nge yul’yul’.” (Matt. 23:23) Rib thil Jesus ngak e pi Farise nri yad baadag ni nge fol e girdi’ u gubin e nochi ban’en ni bay u lan fare Motochiyel, ya Jesus e manang fan ni kan ngongliy e re Motochiyel nem, nge rogon ni i m’ug pi fel’ngin Got u reb nge reb e pi Motochiyel ni bay riy.

3. Mang e yira weliy ko re article ney?

³ Gad e piin Kristiano e da kud moyed u tan fare m’ag ko Motochiyel. (Rom. 7:6) Yugu aram rogon, ma ke tay Jehovah e re Motochiyel nem nga lan e Thin rok ni aram e Bible ni fan ngodad. Gathi ke rin’ e re n’em ni bochan e baadag ni ngaud folgad u gubin e nochi ban’en ni bay riy, ya ke rin’ ni fan e baadag ni ngad nanged ma gad fol ko “tin ri ba ga’ fan” ban’en ni bay riy, ni aram e pi kenggin e motochiyel ni bay rogon ko pi motochiyel riy. Bod ni, faan gad ra lemnag fare yaram nni ngongliy ni bay rogon ko pi binaw ni tagil’ e ayuw, ma mang e pi kenggin e motochiyel ni gad ra guy nib l’ag rogon ko re yaram ney? Fa binem e article ni ke yan e kad weliyed riy boch ban’en nrayog ni ngad filed u murung’agen e n’en nthingari rin’ be’ ni ke mil ke chuw ko binaw rok. Ma biney e article e gad ra weliy riy e n’en nrayog ni ngad filed u murung’agen Jehovah ko fapi binaw ni tagil’ e ayuw, nge rogon nrayog ni nge m’ug pi fel’ngin rodad. Ere, gad ra weliy e fulweg u dalip e deer ni be gaar: Uw rogon ni be m’ug e runguy rok Jehovah ko fapi binaw ni tagil’ e ayuw? Mang e gad be fil riy u murung’agen rogon e yafos u wan’ Got? Ma uw rogon ni be dag e re n’ey ni ir reb e Got nib mat’aw urngin ban’en ni ma rin’? Nap’an ni gad be weliy e fulweg u reb nge reb e pi deer ney, ma aram e ngam fal’eg i lemnag boch e kanawo’ nrayog ni ngam folwok ko Chitamangidad ni bay u tharmiy.​—Mu beeg e Efesus 5:1.

BE M’UG ROGON E RUNGUY ROK GOT KO YUNGI N’EN NI IMMOY E PI BINAW NEM RIY

4, 5. (a) Uw rogon nni momnag ni nge thap e girdi’ ko fapi binaw ni tagil’ e ayuw, ma mang fan? (b) Mang e be fil e re n’ey ngodad u murung’agen Jehovah?

⁴ Fa nel’ i binaw ni tagil’ e ayuw ni yima mil ngay kakrom e rib mom ni nge thap e girdi’ ngay. I tay Jehovah chilen ngak piyu Israel ni ngar kieged e pi binaw nem nib fel’ rogon u barba’ fare Lul’ nu Jordan ngu barba’. Mang fan? Ya nge yag ni mom rogon ngak be’, maku rayog ni nge papey ni nge thap nga lan reb e pi binaw nem ni ke mil ngay. (Num. 35:11-14) Ere, aram fan ni un guy rogon ni nga i par e yu pa’ i kanawo’ nib sor ko pi binaw nem nib fel’. Rogon nib puluw ko pi n’en ni ma rin’ e pi Jew kakrom e ba ga’ ni yima tay yu ley i ban’en ni pow ko pi kanawo’ nem ni bochan e nge pow’iy e piin ni yad be mil ni ngar nanged woerad nga lan e pi binaw nem. Bochan ni immoy e pi binaw ni tagil’ e ayuw nrayog ni ngan mil ngay, ma aram e rayog ni nge ayuweg e re n’ey be’ ni ke li’ be’ ke yim’ ni kal riy ni nge dabi mil nga yugu reb e nam nib thil min waliy ni nge un ko liyor ni googsur.

⁵ Am lemnag e re n’ey: Jehovah e ir e En ni yog ni faanra ke thang be’ e fan rok be’ ni gathi ke kal riy, ma thingar ni li’ nge yim’. Machane ki bing e kanawo’ ni ngan runguy min ayuweg be’ ni ke li’ be’ ke yim’ ni kal riy! I yoloy be’ ni ma yoloy murung’agen e Bible ni gaar: “Gubin ban’en riy nib tamilang, ma kub mom ni ngan nang fan, ma kub mom ni ngan fol riy. Aram rogon ni ma rin’ Got boch ban’en u fithik’ e runguy.” Jehovah e gathi ir reb e tapufthin nder ma runguy e girdi’ ma baadag ni nge gechignag e pi tapigpig rok, ya bin riyul’ riy e, rib ga’ e ‘runguy rok ngodad.’​—Efe. 2:4.

6. Uw rogon nib thil e lem ko pi Farise nga rogon ni ma dag Got e runguy?

⁶ Machane, pi Farise e dubrad ni ngaur daged e runguy ko girdi’. Bod ni, rogon e yalen rorad e dabiyog ni ngar n’aged fan taab kireb ni ke rin’ be’ nge pag e dalip yay. I tamilangnag Jesus rogon nde puluw e lem rorad u nap’an ni weliy ba fanathin ni murung’agen ba Farise ni be meybil ni gaar: “Gu be pining e magar ngom, i gur Got, ni bochan e gathi gag be’ ni gub chogow, fa gu ma ban, ara gu ma darngal, ni bod ni ma rin’ yugu boch e girdi’; gu be pining e magar ngom ni bochan e gathi gu bod e re tamukun tax nem.” Bin riyul’ riy e, be meybil e re tamukun tax nem ngak Got ni nge runguy ko kireb rok. Ere, mang fan ndabun e pi Farise ni ngaur daged e runguy ko girdi’? Be yog e Bible ni bochan e yad ma lemnag ni “tin ni ka bay e girdi’ e dar yal’uwgad.”​—Luke 18:9-14.

7, 8. (a) Uw rogon nrayog ni ngam folwok rok Jehovah u nap’an ni ke kirebnag be’ lanin’um? (b) Mang fan nib t’uf ni nge sobut’an’dad ni faanra ngad n’aged fan e kireb ni ke rin’ be’ ngodad?

⁷ Mu folwok rok Jehovah, ma dab mu folwok rok e pi Farise. Um runguy e girdi’. (Mu beeg e Kolose 3:13.) Reb e kanawo’ ni ngam rin’ e re n’ey riy e aram e ngam momnag ko girdi’ ni ngar weniggad ngom ni ngam n’ag fan e kireb ni kar rin’ed ngom. (Luke 17:3, 4) Ere, ngam fithem ni nge lungum: ‘Ba mom ni nggu n’ag fan e kireb ni ke rin’ be’ ngog, ni yugu aram rogon ni boor yay ni ke kirebnag lanin’ug, fa? Gu ma guy rogon ni nggu awnag e gapas u thilmow be’ ni ke yog ara ke rin’ ban’en ni ke kirebnag lanin’ug, fa?

⁸ Faanra ngad n’aged fan e kireb rok be’, ma thingari sobut’an’dad. Da i yag ni nge rin’ e pi Farise e re n’ey ni bochan e yad ma lemnag ni kab ga’ farad ko tin ni ka bay e girdi’. Machane, gad e piin Kristiano e thingar dab ud lemnaged ni ‘ba sorodad ngak e tin ni ka bay e girdi’,’ ya thingar da sobut’naged lanin’dad me m’agan’dad ngay ni ngad n’aged fan e kireb ni ke rin’ yugu boch e girdi’ ngodad. (Fil. 2:3) Ere, ga ra folwok rok Jehovah ngam dag e sobut’an’, fa? Faanra ba sobut’an’dad, ma ra mom ngak yugu boch e girdi’ ni ngar weniggad ngodad ni ngad n’aged fan e kireb ni kar rin’ed ngodad, maku ra mom ngodad ni ngad n’aged fan e kireb rorad. Mu gur ngam dag e runguy ma dab mu gur ngam damumuw.​—Jas. 1:19.

MU TAYFAN E YAFOS YA NGE DABI AW NIB ‘KIREB E ROM’

9. Uw rogon ni ayuweg Jehovah piyu Israel ni ngar nanged feni ga’ fan e yafos ko girdi’?

⁹ Reb i fan nni tay e pi binaw nem ni tagil’ e ayuw e bochan e nge ayuweg piyu Israel u nap’an ni ke thang bagayad e fan rok be’. (Deut. 19:10) Ba ga’ fan e yafos u wan’ Jehovah, ma ri ma fanenikan e “paef ni ma thang e pogofan rok e girdi’ ndawor ra bucheged ban’en.” (Prov. 6:16, 17) Reb e Got nib yal’uw mab thothup e dabiyog ni nge fek owchen ko mathang pogofan ni kan tay nib muun ngay e pogofan rok be’ ni kan thang nni kal riy. Riyul’ nra runguy be’ ni ke thang e fan rok be’ ni kal riy. Machane, yugu aram rogon ma faen ni ke thang e fan e thingari yan i weliy salpen ngak e pi pumoon ni yad ba piilal ko fare binaw, ma faanra ke dugil ni n’en ni ke buch e kal riy, ma aram e faen ni thang e fan e thingari par u lan fare binaw ni tagil’ e ayuw nge mada’ ko ngiyal’ ni ke yim’ e en nib tolang ko prist. Bin riyul’ riy e, rayog ni thingari par facha’ ko fare binaw u n’umngin nap’an e yafos rok. Re n’ey ni yima rin’ e be tamilangnag ngak piyu Israel feni ga’ fan e yafos ko girdi’. Faanra nge m’ug ni yad be tayfan e en ni Ke Pi’ e Yafos ngodad, ma aram e ba t’uf ni ngar rin’ed e tin nrayog rorad ni nge dab ra ted e yafos rok yugu boch e girdi’ nga thatharen e riya’.

10. Uw rogon ni i dag e pi tamachib ko motochiyel nge pi Farise ndariy fan e yafos u wan’rad nrogon ni yog Jesus?

¹⁰ Machane, pi tamachib ko motochiyel nge pi Farise e yad ba thil ngak Jehovah ni bochan e dariy fan e yafos ko girdi’ u wan’rad. Ni uw rogon? I gaar Jesus ngorad: “Kam mitheged fare kiy ni ir e ma bing e mab u tafen e tamilangan’; dab mmarod nga lan, ma gimed be taleg e piin ni yad be guy rogon ni nga ranod nga lan!” (Luke 11:52) Pi tamachib ko motochiyel nge pi Farise e susun ni yad e piin ni ngar tamilangnaged fan e Thin rok Got ko girdi’ mar ayuweged yad ni ngar leked fare pa’ i kanawo’ ni be sor i yan ko yafos ni manemus. Machane, n’en ni ur rin’ed e ra taleged e girdi’ ndab ra folgad rok Jesus ni ir “tabolngin e yafas,” ara en ni ke bing e kanawo’ ko girdi’ ni nge yag e yafos ngorad. (Acts 3:15) Bochan ni yad ba ufanthin ma yigoo yad e yad ma lemnaged yad, ma aram fan nda ur lemnaged e girdi’ nge pi n’en nra yib angin ko par rorad. Riyul’ nri yad ba kireb ma darur runguyed e girdi’!

11. (a) Uw rogon ni dag apostal Paul ni ma lemnag e yafos ko girdi’ ni bod rogon ni ma lemnag Got? (b) Mang e ra ayuwegdad ni ngaud lemgad ni bod rogon Paul u rogon e machib ni gad ma tay?

¹¹ Uw rogon ni ngad siyeged e lem ni ma tay e pi tamachib ko motochiyel nge pi Farise ma gad folwok rok Jehovah? Thingar ud ted fan e yafos me ga’ fan u wan’dad. Rogon ni rin’ apostal Paul e re n’ey e aram e i machibnag urngin e girdi’ nrayog ni nge machibnagrad. Bochan e n’en ni i rin’, ma aram fan nrayog ni nge gaar: “Faanra malog bigimed, me gag e dariy rogon ngog.” (Mu beeg e Acts 20:26, 27.) Machane, gathi fan ni i machib Paul e bochan ndabun ni nge aw nib kireb e rok ara be lemnag ni ban’en nthingari rin’, ya i machib ni bochan e ba t’uf e girdi’ rok, ma kub ga’ fan e yafos ko girdi’ u wan’. (1 Kor. 9:19-23) Ku arrogodad nthingar ud lemnaged e yafos ko girdi’ ni bod rogon ni ma lemnag Jehovah, ya “ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Pet. 3:9) Aram rogon e lem rom, fa? Faanra ud runguyed e girdi’, ma aram e rayog ni nge k’aringdad ni ngad machibgad u fithik’ e pasig, ma gad felfelan’ ko machib ni gad be tay.

12. Mang nib ga’ fan u wan’ e pi tapigpig rok Got ni ngaun rin’ ban’en u reb e kanawo’ ndab ni maad’ad riy?

¹² Ku ra m’ug ni gad ma lemnag e yafos ko girdi’ ni bod rogon ni ma lemnag Jehovah u rogon ni gad ma ayuweg e yafos rodad nge yafos rok yugu boch e girdi’. Thingar ud kol ayuwgad ko yan u karrow nge rogon e maruwel ni gad ma tay, ya nge dab da maad’adgad ngodad ara be’. Re n’ey e kub muun ngay e ngiyal’ ni gad be toy boch e naun ni tagil’ e liyor rodad, ara gad be ngongliy e yungin ni ke kireb riy, ara u nap’an ni gad be milekag ni nga darod nga bang ni ngan tay e muulung riy. Dab da ted e yafos ko girdi’ nga thatharen e riya’ ni bochan e gad be guy rogon ndab da adbeyed e tayim nge salpiy. Got rodad e ir reb e Got nib yal’uw ma gubin ngiyal’ ni ma rin’ e tin nib mat’aw. Gad baadag ni ngad folwokgad rok. Faanra yibe maruwel u taabang mab ga’ ni piin piilal e yad ma guy rogon ndab ra maad’adgad nge piin ni yad be maruwel. (Prov. 22:3) Ere, faanra ke puguran reb e piilal ngom murung’agen boch ban’en ara boch e motochiyel ni ngan fol riy ya nge dab ni maad’ad u nap’an e maruwel, ma thingar mu fol riy. (Gal. 6:1) Faanra um lemnag e yafos ko girdi’ ni bod rogon ni ma lemnag Jehovah, ma aram e dabi aw ni gur e ba ‘kireb e rom.’

MU “TURGUYED” E N’EN NI NGAN RIN’ NROGON NI MA TURGUY GOT BAN’EN

13, 14. Uw rogon nrayog ni nge folwok e pi pumoon ni yad ba piilal u Israel u rogon ni ma rin’ Jehovah ban’en nib mat’aw?

¹³ I tay Jehovah chilen ngak e pi pumoon ni yad ba piilal u Israel ni ngar folwokgad rok u rogon ni ma rin’ ban’en nib mat’aw. Som’on e, thingar ra gayed e mich ko fare pa’ i oloboch ni ke buch. Ngemu’ mi yad fal’eg i gay ngar nanged fan ni ke cham facha’, nge rogon e lem rok, nge rogon e ngongol rok u m’on ni nge rin’ fare pa’ i oloboch. Tomuren e re n’ey mfin aram e ngiyal’ ni yad ra dugliy ko ngan runguy facha’ fa danga’. Thingar ra fal’eged i gay ngar nanged ko en ni ke cham e be “fanenikay” e en ni ke thang e fan rok me li’ ni lem rok fa danga’. (Mu beeg e Numbers 35:20-24, BT.) Maku reb e, faanra bay e girdi’ ni kan fek ni nge mang mich ma aram e ba t’uf l’agruw ni’ ni ngar michegew nib kireb e rok faen ni ke cham.​—Num. 35:30.

¹⁴ Tomuren ni ke fal’eg fapi piilal i gay murung’agen e n’en ni ke buch, ma aram e thingar ra lemnaged rarogon facha’, ma gathi kemus ni kireb ni ke rin’. Ba t’uf e tamilangan’ rorad. Re n’ey e be yip’ fan ni aram e gathi kemus ni ngar sapgad ko n’en ni ke rin’ facha’, ya ku thingar ra gayed rogon ni ngar nanged fan ni ke buch e re n’em. Bin th’abi ga’ fan riy e, ba t’uf gelngin Jehovah nib thothup rorad, ya aram e n’en nra ayuwegrad ni ngar folwokgad rok u rogon ni ma dag e tamilangan’, nge rogon ni ma runguy e girdi’, nge rogon ni ma rin’ ban’en nib mat’aw.​—Ex. 34:6, 7.

15. Mu weliy e n’en nib thil u rogon ni i sap Jesus ko pi tadenen nge rogon ni i sap e pi Farise ngorad.

¹⁵ Pi Farise e kemus ni yigoo n’en ni ke rin’ reb e tadenen e ir e yad ma sap ngay, ma gathi rarogon facha’. Nap’an nra guyed Jesus ni ke un ko abich u tafen Matthew, ma aram mar fithed ngak pi gachalpen ni lungurad: “Mang fan ni be un e tamachib romed ngak e piin ni yad ma kunuy e tax nge piin ndabun e girdi’ nu lan binaw dakenrad ko abich?” Me fulweg Jesus ni gaar: “Piin ni yad ba gol e dariy fan e togta ngorad, ya ke mus ni piin ni yad mm’ar e ba’ fan e togta ngorad. Marod ngam guyed fan e re bugithin ni baaray u lan e babyor nib thothup ni gaar, ‘Dabug ni ngan pi’ e gamanman ni maligach ngog, ya runguy e gub adag.’ Ya gathi ku gub ni nggu pining e piin ni yad ba yal’uw, ya ku gub ni nggu pining e piin ndabun e girdi’ nu lan binaw dakenrad.” (Matt. 9:9-13) Ere gur, be tawey Jesus nga boch ban’en ni bochan e nge ayuweg e piin ni yad be rin’ e kireb? Danga’, ya bin riyul’ riy e be yog Jesus ngorad ni ngar kalgadngan’rad ko kireb ni yad be rin’. Ma aram reb e ban’en nib ga’ fan ko machib ni i tay. (Matt. 4:17) Machane, i guy Jesus ni bay boch e “piin ni yad ba takunuy e tax nge piin ndabun e girdi’ nu lan binaw dakenrad” ni yad baadag ni ngar thilyeged e ngongol rorad. Gathi ka yugu ra bad nga tafen Matthew ni ngar abichgad, ya kar bad e ngaram ni bochan e yad boch i “gachalpen [Jesus].” (Mark 2:15) Machane, rib gel e kireban’ riy ni bochan e yooren e pi Farise e de yag rorad ni ngar guyed e n’en ni i guy Jesus ko pi girdi’ nem. Ur ted ni gubin e tin ni ka bay e girdi’ e yad bogi tadenen ndakuriy e athap rorad nga bang. Riyul’ nrib thil e ngongol rorad ko fare Got ni yad ma yog ni yad be liyor ngak ni ir reb e Got nib yal’uw ma ma runguyey.

16. Mang e thingari guy fare ulung ni ka nog e judicial committee ngay rogon ni ngar nanged?

¹⁶ Piin piilal e ngiyal’ ney e thingar ra guyed rogon ni ngaur folwokgad rok Jehovah ni “ba t’uf rok e tin nib mat’aw.” (Ps. 37:28) Som’on e ba t’uf ni ngar ‘maruweliyed ngar ra nanged’ ko rriyul’ ni ke denen be’ fa danga’. Faanra kar pirieged ni facha’ e ke denen, ma aram e yad ra guy rogon ni ngar dugliyed e n’en ni ngan rin’ ko fare magawon nrogon nib puluw ko Bible. (Deut. 13:12-14) Faanra bay boch e piilal ni kar uned ko fare ulung ni ka nog e judicial committee ngay, ma aram e thingar ra fal’eged i yaliy ngar nanged ko rriyul’ ni ke kalngan’ reb e Kristiano ni ke rin’ reb e denen nib ubchiya’, fa danga’. Gathi gubin ngiyal’ nib mom ni ngan nang ko ke kal be’ ngan’ fa dawor. Faanra ke kal be’ ngan’ ko kireb ni ke rin’, ma aram e ba muun ngay rogon ni be lemnag e kireb ni ke rin’ nge n’en ni bay u gum’irchaen. (Rev. 3:3) Nap’an nra denen be’ ma thingari kalngan’ ma aram e rayog ni ngan runguy.a

17, 18. Uw rogon ni nge nang e piin piilal nriyul’ ni ke kal be’ ngan’? (Mu guy e sasing ni bay u tabolngin e re article ney.)

¹⁷ Piin piilal e yad ba thil ngak Jehovah nge Jesus ya dabiyog ni ngar guyed e n’en ni bay u gum’irchaen e girdi’. Ere faanra gur reb e piilal, ma uw rogon nrayog ni ngam nang ko riyul’ ni ke kal be’ ngan’ ko kireb ni ke rin’ fa danga’? Som’on e, ngam yibilay e gonop nge tamilangan’. (1 Ki. 3:9) Bin migid e, ngam yaliy e Thin rok Got nge boch e babyor ni ke ngongliy fare tapigpig nib yul’yul’ ni nge ayuwegem u rogon ni ngam nang e n’en nib thil u thilin e “bin nu fayleng e kireban’” nge ‘kireban’ ni be maruwel Got ngay’ ni be yip’ fan nriyul’ ni ke kal be’ ngan’. (2 Kor. 7:10, 11) Mu guy rogon ni be weliy e Bible rarogon e piin nriyul’ ni kar kalgadngan’rad nge piin ndawor ra kalgadngan’rad. Uw rogon ni be weliy e Bible murung’agen lanin’rad nge ngongol rorad?

¹⁸ Bin tomur e, aram e ngam lemnag rarogon facha’. Mu lemnag rarogon e pi n’en ni ma rin’, nge fan ni ke rin’ fare kireb, nge pi n’en ndabiyog rok. I yiiynag e Bible murung’agen Jesus ni ir lolugen e ulung ni Kristiano ni gaar: “Dabiyog ni turguy e n’en ni ngan rin’ ngak be’ ni bochan usun faanem ara tin ni ke rung’ag ni murung’agen; ra pithig e oloboch rok e piin ni gafgow nrogon, me ayuweg mat’awun e piin nib sobut’an’rad.” (Isa. 11:3, 4) Gimed e piin piilal e gimed be maruwel u tan pa’ Jesus ni gimed be ayuweg e ulung, ma ra ayuwegmed ni ngam dugliyed e n’en ni ngan rin’ nga reb e magawon ni ke sum ni bod rogon ni ma rin’. (Matt. 18:18-20) Ere, gathi gad ba felfelan’ ni bay e piin piilal u lan e ulung ni yad ma athamgil ni ngar ngongolgad ni aray rogon? Ri gad be pining e magar ko piin piilal ni yad ma maruwel nib gel ni ngar ayuweged e ulung rodad ni nga i par ni bay e runguy nge tin nib mat’aw riy!

19. Mang e kad filed u murung’agen fapi binaw ni tagil’ e ayuw ni ga baadag ni ngam fol riy?

¹⁹ Fare Motochiyel rok Moses e bay riy ‘urngin e llowan’ nge tin riyul’’ u murung’agen Jehovah nge pi kenggin e motochiyel rok nib mat’aw. (Rom. 2:20) Bod ni, fapi binaw ni tagil’ e ayuw e be fil ngak e piin piilal rogon ni ngar dugliyed e n’en ni ngan rin’ ko magawon ni ke sum u rogon kanawoen “nib mat’aw,” maku be fil ngodad rogon ni nge ‘m’ug e t’ufeg nge wurngan’ ni bay u thildad ngodad.’ (Zek. 7:9, BT) Chiney e da kud moyed u tan fare Motochiyel. Yugu aram rogon, ma gad manang ni Jehovah e dabi thil, ma kab ga’ fan u wan’ fa gal fel’ngin ni mat’aw nge runguy. Ere, ri gad ba tow’ath ni gad be liyor ngak Got ni kan sunmiydad ni gad bod yaan, ni aram e be yip’ fan nrayog ni nga i m’ug pi fel’ngin rodad, ma gad nab nga tan pa’!