Piin Fel’ Yangaren​—“Um Rin’ed e N’en nib Milfan Ngomed Ya Nge Yag e Yafos Ngomed”

1. Mang nib ga’ fan ni ngan un ko taufe? (Mu guy e sasing ni bay u tabolngin e re article ney.)

RA REB e duw ma bokum biyu’ e girdi’ ni be fil e Bible e yad ma un ko taufe. Boor i yad e kab fel’ yangarrad ara ka yad bbitir. Pi fel’ yangaren ney e rayog ni yad boch e bitir ni kan chuguliyrad ko tin riyul’. Gur bagayad e pi cha’ney, fa? Faanra gur bagayad, mab manigil e n’en ni kam rin’. Gubin e Kristiano nthingar ra uned ko taufe ya nge yag nra thapgad ngak Got me yag e yafos ni manemus ngorad.​—Matt. 28:19, 20; 1 Pet. 3:21.

2. Mang fan nsusun e dab mu rus ni ngam ognag e yafos rom ngak Jehovah?

² Yugu aram rogon nnap’an nra un be’ ko taufe ma aram e ke mab e kanawo’ ni nge yag boor e tow’ath ngak, machane ka bay boch ban’en ni ke milfan ngak. Ni uw rogon? Rofen nim un ko taufe e ka mog e arrogon ko fare deer ni be gaar, “Kam kalngan’um ko denen rom nrogon nib puluw ko fare maligach ni pi’ Jesus Kristus, ma kam ognag e yafos rom ngak Jehovah ni ngam rin’ e tin nib m’agan’ ngay, fa?” Taufe ni kam un ngay e aram e pow riy ni kam ognag e yafos rom ngak Got. Ga ra ognag e yafos rom ngak Jehovah ma aram e kam micheg ngak ni ngam t’ufeg mag m’oneg e tin nib m’agan’ ngay u lan e yafos rom. Rib ga’ fan e n’en ni kam micheg. Ere gur, ngam kalngan’um ko n’en ni kam rin’? Danga’, ya dariy ba ngiyal’ ni ram kalngan’um ni kam pag Jehovah ni nge pow’iyem. Piin ndar nanged Jehovah e yad bang ko fayleng rok Satan. Der ma lemnagrad Moonyan’ maku arrogom nder ma lemnagem. Bin riyul’ riy e, ra felfelan’ ni faanra mul e athap ko yafos ni manemus u paam ni bochan e kam mang ngak ma kam togopuluw nga mat’awun e gagiyeg rok Jehovah.

3. Mang boch e tow’ath nra yag ngom ni faan ga ra ognag e yafos rom ngak Jehovah?

³ Am lemnag e pi tow’ath ni bay rom ni bochan e kam ognag e yafos rom ngak Jehovah kam un ko taufe. Chiney ni kam ognag e yafos rom ngak Jehovah e rayog ni ngam non u fithik’ e pagan’ ni nge lungum: “I Somol e ba’ rog, ere dab gu rus; mang e rayog ni nge rin’ e girdi’ ngog?” (Ps. 118:6) Dariy reb e tow’ath nra yag ngom u lan e yafos rom ni kab gel e fel’ riy ko bin ni ngam mang ngak Got mag par ni gab fel’ u wan’.

N’EN NIB MILFAN NGOM NI NGAM RIN’

4, 5. (a) Mang fan nrayog ni nga dogned nnap’an nra ognag be’ ir ngak Got, ma aram e bay ban’en ni ke milfan ngak ni nge rin’? (b) Mang boch e magawon ni ma mada’nag gubin e Kristiano?

⁴ Dab mu lemnag ni tha’ u thilmew Jehovah e bod rogon ni ga be par u tabinaw ko gallabthir rom nib puf mat’awum ni ngam fanay e pi n’en ni bay u tabinaw nde t’uf ni ngam pi’ puluwon. Bin riyul’ riy e, chiney ni kam un ko taufe e aram e gur e ba milfan ngom ni ngam rin’ e tin nib t’uf ni ngam rin’, ya nge yag e yafos ngom ni yugu aram rogon ni ka ga be par u tan pa’ e gallabthir rom. Mang nib ga’ fan ndab mu pagtalin e re n’ey? Bochan e dabiyog ni ngam nang ko ba miti mang magawon e ga ra mada’nag boch nga m’on. Bod ni, faanra kam un ko taufe u m’on ni nge fel’ yangarem, ma dabisiy nra tabab ni nge thil rogon ni ga ma lem mag mada’nag boch e magawon nib thil u nap’an ni ke fel’ yangarem. Baaray e n’en ni yog reb e rugod nib fel’ yangaren: “Yugu dabi dabuy reb e bitir ni ir bagayad e Pi Mich Rok Jehovah nde yag ni nge kay bang e kek ko reb e birthday ni kan tay u skul. Machane ra in e duw nga tomuren u nap’an nra gel e ar’ar rok ko par ko pumoon nge ppin, ma aram e ba t’uf ni ngari mich u wan’ ni faanra fol rok Jehovah, ma aram e n’en nth’abi fel’ nrayog ni nge mel’eg ni nge rin’.”

⁵ Gathi kemus ni yigoo piin fel’ yangaren e yad ma mada’nag e magawon nib thil. Mus ko piin ni kar uned ko taufe ni kar piilalgad boch e ku yad ma mada’nag boch ban’en ndar lemnaged ni yad ra mada’nag nrayog ni nge skengnag e michan’ rorad. Rayog ni nge sum e pi skeng ney u lan e mabgol rorad, ara nap’an ni kar m’argad, ara tabon e maruwel rorad. Riyul’ ni gad gubin ndemtrug ko ka gad bbitir fa kad ilalgad, ma gad ra mada’nag boch e magawon nra skengnag rogon e yul’yul’ rodad ngak Jehovah.​—Jas. 1:12-14.

6. (a) Mang fan nrayog ni nga nog ndabiyog ni ngam thilyeg e n’en ni kam micheg ngak Jehovah? (b) Mang e rayog ni ngam fil ko Filippi 4:11-13?

⁶ Dab mu pagtalin ndabiyog ni ngam thilyeg e n’en ni kam micheg ngak Jehovah. Faanra um lem ni aray rogon, ma aram e rayog ni ngam par ni gab yul’yul’ ni yugu demtrug e magawon ni kam mada’nag. Re n’ey e be yip’ fan ni kam micheg ngak e En Nth’abi Tolang u ga’ngin e palpalth’ib ni mus ni faanra ke tal e pi fager rom ara gallabthir rom ko pigpig ni yad be tay ngak, ma kag ra ulul ngam pigpig ngak. (Ps. 27:10) Demtrug e magawon ni ga ra mada’nag, ma faan ga ra ning e ayuw ngak Jehovah, ma ra pi’ gelngim ni ngam tay u gil’ e n’en ni kam micheg ngak.​—Mu beeg e Filippi 4:11-13a.

7. Mang e be yip’ fan ni ngam rin’ e n’en nib milfan ngom ya nge yag e yafos ngom ‘mu um ngongol ni bay madgun Got u wun’um’?

⁷ Baadag Jehovah ni ngam mang fager rok. Machane thingar mu athamgil nib gel ya nge yag ni par nib fel’ e tha’ u thilmew, mag rin’ e n’en nib milfan ngom ya nge yag e yafos ngom. Bin riyul’ riy e, be gaar e Filippi 2:12, NW: “Um rin’ed e n’en nib milfan ngomed ya nge yag e yafos ngomed, mu um ngongolgad ni bay madgun Got u wun’med.” Be tamilangnag e pi thin ney nib t’uf ni ngam lemnag rogon ni nge par e tha’ u thilmew Jehovah nib fel’ rogon, mag par ni gab yul’yul’ ndemtrug e miti magawon ni kam mada’nag. Dabiyog ni nge pag rogon e pagan’ ni ngam tay. Dab mu pagtalin ni bay boch e girdi’ ni ke n’uw nap’an ni kar pigpiggad ngak Got ni kar maloggad. Ere, mang boch ban’en nrayog ni nge ayuwegem ni ngam rin’ e n’en nib milfan ngom ya nge yag e yafos ngom?

BA GA’ FAN E FOL BIBLE

8. Mang e ba muun ko fol Bible ni gad ma tay ni yigoo gadad? Mang nib ga’ fan e re n’ey?

⁸ Ra nge mang Jehovah e fager rom, mab t’uf ni ngaum motoyil ngak ma ga be non ngak. Fol Bible ni ga ma tay ni yigoo gur e aram e bin th’abi fel’ e kanawo’ ni ga ma motoyil riy ngak Jehovah. Re n’ey e ba muun ngay ni ngaum beeg e Thin rok Got nge boch e babyor rodad nib puluw e thin riy ko Bible ma ga be fal’eg i lemnag. Machane, dab mu pagtalin ni fol Bible ni ga ma tay e gathi kemus ni ga be fil boch ban’en ni nge mit ngom ni bod rogon e n’en ni ga ma rin’ u nap’an ni ga be fal’eg rogom ni fan nga reb e skeng ni yira pi’ u skul. Ya faanra ngam fil e Bible u reb e kanawo’ nra yib angin ngom, ma bod rogon ni ga be milekag nga bang ni ngam gay murung’agen boch ban’en nib beech ngam pirieg. Re n’ey e ra ayuwegem ni ngam gay mag pirieg boch ban’en nib beech u murung’agen Jehovah. Angin nra yib riy e ga ra chugur ngak me chugur ngom.​—Jas. 4:8.

9. Mang boch ban’en ni ke ayuwegem ko fol Bible ni ga ma tay ni yigoo gur?

⁹ Boor ban’en ni ke ngongliy e ulung rok Jehovah nrayog ni nge ayuwegem ko fol Bible ni ga ma tay. Bod ni, fare thin ni kenggin e “Bible Study Activities” ni bay ko fare section ko jw.org ni kenggin e “Teenagers” e rayog ni nge ayuwegem ni ngam fil boch ban’en u boch e chep u lan e Bible. Maku reb e, fapi study guide ni fan ko fare ke babyor ni “Mang e Ri Be Fil e Bible?” e rayog ni nge ayuwegem ni ngari mich u wan’um e pi n’en ni kam fil. Pi study guide nem e rayog ni nge ayuwegem ni ngam nang rogon ni ngam weliy e michan’ rom ngak yugu boch e girdi’. Ku bay boch ban’en nrayog ni nge ayuwegem ko fol Bible u lan Fare Wulyang ko Damit ko January 2017 No. 1 ko page 3 nge mada’ ko 7. Ba ga’ fan e fol Bible ni ga ma tay nge pi n’en ni ga ma fal’eg i lemnag riy, ya rayog ni nge ayuwegem ni ngam rin’ e n’en nib milfan ngom ya nge yag e yafos ngom.​—Mu beeg e Psalm 119:105.

BA GA’ FAN E MEYBIL

10. Mang fan nib t’uf ni nge meybil reb e Kristiano ni ke taufe?

¹⁰ Fol Bible ni gad ma tay ni yigoo gadad e aram rogon ni gad ma motoyil ngak Jehovah, ma meybil e aram rogon ni gad ma non ngak. Susun e dabi lemnag reb e Kristiano ni meybil e kemus ni ban’en ni yima rin’ ni kan mecham ngay ara bod e ‘bonod’ nrayog ni nge ayuwegdad ni nge fel’ gubin ban’en nga puluwdad. Ya meybil ni gad ma tay e aram rogon ni gad ma non ngak e En ni Ke Sunmiydad. Baadag Jehovah ni nge motoyil ko n’en ni nga mog. (Mu beeg e Filippi 4:6.) Nap’an nra magafan’um nga ban’en ma be yog e Bible ni ngam “pi’ e gilab rom ngak Somol.” (Ps. 55:22, BT) Rib mich u wan’um e re n’ey, fa? Bokum milyon e walag nrayog ni ngar micheged ngom ni ke ayuwegrad e re n’ey. Maku arrogom nrayog ni nge ayuwegem!

11. Mang fan nsusun e gubin ngiyal’ ni ngaum pining e magar ngak Jehovah?

¹¹ Gathi kemus ni ngam meybil ni bochan e ngam ning e ayuw ngak Jehovah. Be gaar e Bible: “Um pininged e magar ngak Got u lanin’med.” (Kol. 3:15) Bay yu ngiyal’ ni gad ma par ni kemus ni yigoo magawon rodad e gad be lemnag ma dab da tedan’dad ko pi tow’ath ni be yag ngodad. Ere, mang ndab mu dugliy u wan’um nra reb e rran mag lemnag dalip ban’en nrayog ni ngam pining e magar riy? Ngemu’ mag meybil ngak Jehovah ngam pining e magar ngak ko pi n’em ni ke tow’athnagem riy. Bay reb e fel’ yangaren ni ka nog Abigail ngak nni taufenag u nap’an ni ke gaman 12 e duw rok ni gaar: “Gu ma lemnag ndariy be’ u palpalth’ib ni bay rogon ni ngaud pininged e magar ngak ni gubin ngiyal’ ni bod rogon Jehovah. Susun ni gubin ngiyal’ ni ngaud pininged e magar ngak ko pi tow’ath ni be pi’ ngodad. Bay ba deer ni fith be’ ba ngiyal’ nrib manigil nug ma sul ngaug lemnag. I gaar: Gur, gad be pining e magar ngak Jehovah ni gubin e rran ko pi n’en ni be pi’ ni fan ngodad fa gathi ri gad be dag nib ga’ fan e pi n’em u wan’dad?”b

FENI GA’ FAN E PI N’EN NI MA BUCH RODAD

12, 13. Mang nib ga’ fan ni ngam lemnag rogon ni be dag Jehovah ngom feni manigil?

¹² Boor e gafgow ni i mada’nag David ni Pilung kakrom ni i ayuweg Got riy. Ere, aram fan ni yog e pi thin ni baaray u daken e tang ni gaar: “Mu gay ngam pirieg feni manigil Somol, ba felan’ e cha’ ni be naf nga tan pa’.” (Ps. 34:8, BT) Re thin ney e be dag nib ga’ fan e pi n’en ni ma buch rodad. Nap’an ni ga ra beeg e Bible nge pi babyor rodad, mag un ko muulung, ma ga ma rung’ag murung’agen boch e tapigpig rok Got ni yima weliy nge rogon ni ke ayuwegrad Got ni ngar pared ni yad ba yul’yul’. Machane, nap’an ni ga ra ilal ko tirok Got ban’en, mab t’uf ni ngam guy rogon ni be ayuwegem. Ere, mang boch ban’en ni ke buch u lan e yafos rom ni be dag ngom nriyul’ nrib manigil Jehovah?   

¹³ Bay taab n’en ni ke buch rok urngin e Kristiano ni be m’ug riy nrib manigil Jehovah. Re n’em e aram e ke piningrad ni ngar chugurgad ngorow Fak. I gaar Jesus: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’ugeg ku gub.” (John 6:44) Ga be lemnag ni bay rogon e pi thin ney ngom, fa? Sana rayog ni nge gaar reb e fel’ yangaren u wan’, ‘Ke pow’iy Jehovah e gallabthir rog ngak, ma kemus ni gu be folwok rorow.’ Machane bin riyul’ riy e, nap’an nim ognagem ngak Jehovah ngam un ko taufe, ma aram e ngiyal’ ni ke fel’ e tha’ u thilmew. Chiney e riyul’ ni kari nangem Got. Ke micheg e Bible ni gaar: “En nib t’uf Got rok e manang Got faanem.” (1 Kor. 8:3) Ere, gubin ngiyal’ ni nge ga’ fan u wan’um e n’en nib milfan ngom u lan e ulung rok Jehovah.

14, 15. Uw rogon nrayog ni nge ayuwegem e machib ni ga ma tay ni nge gel e michan’ rom?

¹⁴ Ku reb e kanawo’ nrayog ni ngam guy riy feni manigil Jehovah e aram e ngam guy rogon ni ma ayuwegem u nap’an ni ga be weliy e michan’ rom ngak yugu boch e girdi’. Rayog ni ngam rin’ e re n’ey u nap’an ni yibe machib ngu nap’an ni ga bay u skul. Bay boch e bitir nib mo’maw’ ngorad ni ngar machibnaged e pi taab yangar rorad u skul. Dabisiy ni ga manang ko mang fan. Rayog ni nge magafan’um ko n’en ni yad ra rin’ u nap’an ni ga ra tabab ni ngam machibnagrad. Rayog ni ngam rus ni ngam weliy e michan’ rom u p’eowchen e bitir ni boor ko bin ni ngam weliy ngak taa bagayad. Ere, mang e rayog ni nge ayuwegem?

¹⁵ Som’on e ngam lemnag fan ni ke mich u wan’um e pi n’en ni kam fil. Kan pilyeg fapi study guide ni bay ko jw.org ko thin rom, fa? Faanra dam nang ko kan pilyeg fa dawor, mag tay e tayim ni ngam man ko re website nem ngam yaliy. Pi n’ey e kan ngongliy ni nge ayuwegem ni ngam fal’eg i lemnag e pi n’en ni ke michan’um ngay, nge fan ni ke mich u wan’um, nge rogon ni ngam weliy ngak yugu boch e girdi’. Faanra kari mich e pi n’ey u wan’um, ma kam fal’eg rogom u m’on riy, ma aram e ga ra adag ni ngam machibnag murung’agen Jehovah.​—Jer. 20:8, 9.

16. Mang e rayog ni nge ayuwegem ni nge dab kum magagawon ni ngam weliy murung’agen e michan’ rom?

¹⁶ Machane, yugu aram rogon ni kam fal’eg rogom u m’on riy, maku rayog ni ngam magagawon ni ngam weliy e pi n’en ni ke michan’um ngay. Bay reb e walag nib pin ni 18 e duw rok ni un ko taufe u nap’an ni ke gaman 13 e duw rok ni gaar, “Gu manang e pi n’en ni ke mich u wan’ug. Machane, bay yu ngiyal’ nib mo’maw’ ni nggu weliy e pi n’en ni bay u lanin’ug.” Ere, mang e ma rin’ ko biney e magawon? I yog ni gaar, “Gu ma guy rogon ni nggu uneg u fithik’ e sabethin. Piin ni gamad nga skul e yugu yad ma weliy murung’agen e pi n’en ni yad ma rin’. Susun ni ku aram rogon e n’en ni nggu rin’. Ere, bayi n’en ni gamad be sabethin ma yug gog ban’en ni bod ni nge lungug, ‘Fa binem e rran e ka ug fil e Bible ko girdi’ . . . ’ Ma aram mu kug ulul ni nggu weliy e n’en ni gu be weliy. Yugu aram rogon ni n’en ni kug weliy nga tomuren e gathi murung’agen e Bible, machane ba ga’ ni ma k’aring e re n’ey yugu boch e bitir ni ngar adaged ni ngar nanged ko mang e gu ma rin’ u nap’an ni gu be fil e Bible ko girdi’. Bay yu ngiyal’ ni yad ma fith boch e deer u murung’agen e re n’ey. Faanra ug par ma gu be rin’ e re n’ey, ma ra gel boch e mom riy. Nga tomuren, ma gu ma guy ni kug felfelan’!”

17. Mang reb e ban’en ni ku rayog ni nge ayuwegem ni ngam weliy murung’agen e michan’ rom ngak yugu boch e girdi’?

¹⁷ Faanra um dag ni ga be tayfan yugu boch e girdi’ ma ga be lemnagrad, mab mudugil nra mom ngorad ni ngar ted fam nge pi n’en ni ke mich u wan’um. Olivia ni 17 e duw rok, ma kan taufenag ni kab bitir boch ngay e yog ni gaar: “Ba ga’ ni gu ma magar ni nggu uneg thin e Bible u fithik’ e sabethin ya gu ma lemnag nra lemnag yugu boch e girdi’ ni gag be’ ni yigoo murung’agen e teliw e gu ma lemnag.” Machane, i tabab ni nge thilyeg e lem rok. I guy rogon ni nge dab ki lemnag e pi n’en ni be magarnag, me gaar u wan’: “Boor e piin fel’ yangaren e dariy ban’en ni yad manang u murung’agen e Pi Mich Rok Jehovah. Kemus ni yigoo gamad boch e Pi Mich ni yad manangmad. Ere, ngongol romad e ir e ra dugliy ko yad ra motoyil fa danga’. Uw rogon ni faanra gamad be tamra’, ara gamad be rus, ara ba mo’maw’ ni nggu weliyed murung’agen e michan’ romad? Ma uw rogon ni faanra gamad be tuntun u nap’an ni gamad be non? Faan gamad ra rin’ ni aray rogon, ma aram e rayog ni ngar lemnaged ndag felfelan’gad ngay ni gamad boch e Pi Mich. Ku rayog ni nge k’aringrad e re n’ey ni nga rogned e thin nib gel ngomad ni bochan e gamad be magagawon ni nggu weliyed murung’agen e michan’ romad. Machane, faan gamad ra weliy e pi n’en ni ke mich u wan’mad nib fel’ rogon u fithik’ e pagan’, ma gamad rin’ ni gubin ngiyal’, mab mudugil ni yad ra tay famad.”

UM RIN’ E N’EN NIB MILFAN NGOM YA NGE YAG E YAFOS NGOM

18. Mang e ba muun ngay ni ngam rin’ e n’en nib milfan ngom ya nge yag e yafos ngom?

¹⁸ Ba tamilang ko n’en ni kad weliyed nrib ga’ fan ni ngam rin’ e n’en nib milfan ngom ya nge yag e yafos ngom. Boch ban’en nib muun ko re n’ey e aram e Thin rok Got ni ga ma beeg ma ga be fal’eg i lemnag, nge meybil ni ga ma tay ngak Jehovah, nge rogon ni ga ma lemnag e pi kanawo’ ni ke tow’athnagem Jehovah riy. Faan ga ra rin’ e pi n’ey, ma aram e rayog ni ngari pagan’um ko tha’ u thilmew Jehovah. Re n’ey e ra k’aringem ni ngam adag ni ngam weliy e pi n’en ni ke michan’um ngay.​—Mu beeg e Psalm 73:28.

19. Mang nib ga’ fan e athamgil ni ga ma tay ni ngam rin’ e n’en nib milfan ngom ya nge yag e yafos ngom?

¹⁹ I gaar Jesus: “Faanra ba adag be’ ni nge un ngog, ma thingari pag talin ir nge fek e kuruth [“gek’iy,” NW] rok nge lekeg.” (Matt. 16:24) Arrogon, gubin e Kristiano nthingar ra ognaged e yafos rorad ngak Got ngar uned ko taufe ni faanra ngar manged reb i gachalpen Jesus. Bin riyul’ riy e, faanra rin’ be’ e re n’ey, ma aram e ke mab e kanawo’ ni nge yag boor e tow’ath ngak e chiney, me yag e yafos ni manemus ngak u lan e bin nib beech e fayleng rok Got. Ere, mu athamgil u rogon nrayog rom ni ngaum rin’ e n’en nib milfan ngom ya nge yag e yafos ngom!