Ngaum Lemnag e Piin Yad Ma Pigpig u Polo’ e Tayim Rorad

1. Uw rogon u wan’ Paul e piin ni ur maruwelgad nib gel ni yad be machibnag fare thin nib fel’?

DA I pag apostal Paul talin e piin ni ur maruwelgad nib gel ni yad be machibnag fare thin nib fel’. I yoloy ni gaar: “Der m’ay u wun’mad u p’eowchen e Got rodad ni ir e Chitamangidad u rogon ni kam maruwelgad ko michan’ romed, nge rogon ni ke ngongliymed rogon nib t’uf Got romed nge girdi’ kam maruwelgad nrib gel, nge rogon ni kari l’agan’med ngak e Somol rodad i Jesus Kristus.” (1 Thess. 1:3) Der ma pag Jehovah talin e maruwel ni ma rin’ e piin ni yad ma pigpig ngak u fithik’ e yul’yul’, ndemtrug ko boor fa buchuuw.​—Heb. 6:10.

2. Mang e gad ra weliy ko re article ney?

² Boor e tapigpig rok Got kakrom nge chiney ni kar paged fan boch ban’en ya nge yag nra pigpiggad ngak Jehovah u polo’ e tayim rorad. Chiney e ngad weliyed rogon e pigpig ni i tay boch e Kristiano ko bin som’on e chibog. Ku gad ra weliy murung’agen boch e maruwel ni ma rin’ e piin ni yad ma pigpig u polo’ e tayim rorad e ngiyal’ ney, nge rogon nrayog ni nge m’ug ni gad be lemnag e pi girdi’ ney ni kar ognaged yad ni ngar pigpiggad u polo’ e tayim rorad.

PI KRISTIANO KO BIN SOM’ON E CHIBOG

3, 4. (a) Uw rogon e pigpig ni i tay boch e walag ko bin som’on e chibog? (b) Uw rogon ni ur yognaged e tin nib t’uf ko par rorad?

³ De n’uw nap’an nga tomuren nni taufenag Jesus, ma aram me tababnag ba maruwel nra yan i taw nga ga’ngin yang e fayleng. (Luke 3:21-23; 4:14, 15, 43) Tomuren ni yim’, ma aram me ulul e pi apostal rok i rin’ e re maruwel nem ni machib, mar guyed rogon ni nge garer e re thin nem nga yugu boch e nam. (Acts 5:42; 6:7) Immoy boch e Kristiano ni bod rogon Filip nra manged missionary ara tamachib u Palestine. (Acts 8:5, 40; 21:8) Paul nge ku boch e walag e ur milekaggad i yan nga yugu boch e binaw nib thilthil. (Acts 13:2-4; 14:26; 2 Kor. 1:19) Maku immoy boch e Kristiano ni bod rogon Silvanus (Silas), nge Mark, nge Luke ni ur yoloyed boch e babyor ko Bible ara ur manged tayol rok boch e girdi’ ni ur yoloyed e Bible. (1 Pet. 5:12) Ku immoy boch e walag nib pin ni Kristiano ni ur maruwelgad e pi walag ni pumoon ney u taabang. (Acts 18:26; Rom. 16:1, 2) Bochan e pi n’en ni i rin’ e pi Kristiano ney nge pi n’en ni i buch rorad ma aram fan nri gad baadag ni ngaud beeged e Pi Babyor ko Bible nni Yoloy Nsom’on ni Thin ni Greek. Maku reb e, pi n’ey e be dag nder ma pag Jehovah talin e maruwel ni ma rin’ e pi tapigpig rok ma ma lemnag e tin nib t’uf rorad.

⁴ Uw rogon ni i yag e tin nib t’uf ko piin ni ur pigpiggad u polo’ e tayim rorad ko bin som’on e chibog ni fan ko par rorad? Bay yu ngiyal’ ni i ayuwegrad boch e Kristiano ko tin nib t’uf rorad. Machane, pi ayuw nem ni un pi’ ngorad e gathi bogi ban’en ni ur ninged fa ur lemnaged nthingar ni pi’ ngorad. (1 Kor. 9:11-15) Immoy boch e walag nge boch e ulung ni ur pied e ayuw nib m’agan’rad ngay. (Mu beeg e Acts 16:14, 15; Filippi 4:15-18.) Ku i un Paul nge piin ni ur milekaggad u taabang nga boch e maruwel ni ma yag e salpiy riy ya nge yag nra chuw’iyed e tin nib t’uf rorad.

PIIN NI YAD MA PIGPIG U POLO’ E TAYIM RORAD E NGIYAL’ NEY

5. Mang e ke weliy ba wu’ e mabgol u murung’agen e maruwel ni yow ma rin’ u polo’ e tayim rorow?

⁵ Ngiyal’ ney e boor e walag ni yad ma un nga boch e maruwel ni yima rin’ ni fan ngak Jehovah u polo’ e tayim rorad, mab gel e maruwel ni yad ma tay. (Mu guy fare kahol ni kenggin e “Boch e Kanawo’ Nrayog ni Ngan Pigpig Riy u Polo’ e Tayim.”) Uw rogon u wan’rad e maruwel ni yad ma rin’? Rayog ni ngam fith ngorad, ma dabisiy nra yib e athamgil nga lanin’um u nap’an ni ga ra rin’ e re n’ey. Reb e walag ni i un ko regular pioneer kafram, ngemu’ me mang reb e special pioneer, ma boch nga tomuren me mang reb e missionary, ma chiney e bay u reb e nam ni gathi nam rok ni ma maruwel u Bethel e yog ni gaar: “Gu be lemnag ni pigpig u polo’ e tayim ni kug un ngay e aram e n’en nth’abi fel’ ni kug mel’eg ni nggu rin’ ko yafas rog. Nap’an ni gaman 18 e duw rog, ma dan gu nang ko nggu un ko skul nib tolang, fa nggu un ko maruwel ni ma yag e salpiy riy u polo’ e tayim rog, fa nggu un ko pioneer. Pi n’en ni ke buch rog e be dag nder ma pag Jehovah talin e pi n’en ni gad ma pag fan ni fan e nge yag nda pigpiggad ngak u polo’ e tayim rodad. Boor e salap ni ke pi’ Jehovah ngog ni ke yag ni nggu maruwel ngay u boch e kanawo’ ni faan gomanga gu nameg reb e maruwel u fayleng, ma dabiyog ni nggu rin’.” Miki yog leengin ni gaar: “Gubin e maruwel ni kug rin’ew ni fan ngak Jehovah e ke ayuwegeg ni nggu ilal ko tirok Got ban’en. Boor yay ni kug guyew rogon e ayuw ni ke pi’ Jehovah ngomow nge rogon ni ke pow’iymow. Faan gomanga dag namegew ni nggu pigpiggow ngak u polo’ e tayim romow ma gamow nameg e tin nu fayleng ban’en, ma dabi rin’ e pi n’ey ni fan ngomow. Gubin e rran ni gu ma pining e magar ngak Jehovah ko biney e maruwel ni ke pi’ ngomow ni nggu rin’ew ni fan ngak u polo’ e tayim romow.” Ga baadag ni nge par e yafas rom ni bod e gali cha’ney, fa?

6. Susun ni nge uw rogon u wan’dad rogon ni ma lemnag Jehovah e pigpig ni gad ma tay ngak?

⁶ Riyul’ ni bay boch e walag ndabiyog ni ngar pigpiggad ngak Jehovah u polo’ e tayim rorad e chiney ni bochan boch e magawon. Machane, gad manang ni ma lemnag Jehovah e athamgil ni yad ma tay. Am lemnag e piin ni weliy Paul murung’agrad ko Filemon 1-3, ni kub muun ngay e piin ni yad ma un ko ulung nu Kolose. (Mu beeg.) Rib ga’ fan u wan’ Paul e maruwel ni ur rin’ed, maku er rogon Jehovah. Ku er rogon gur ni kub ga’ fan u wan’ Jehovah e n’en ni ga ma rin’ ni fan ngak. Ere, uw rogon nrayog ni ngam ayuweg e piin ni yad ma pigpig ngak Jehovah u polo’ e tayim rorad?

ROGON NI NGAN AYUWEG E PIIN PIONEER

7, 8. Mang e ba muun ko maruwel ni ma rin’ e piin pioneer, ma uw rogon nrayog ni nge pi’ boch e walag u lan e ulung e ayuw ngorad?

⁷ Piin pioneer ni yad ba pasig ko machib e taareb rogorad ko pi tamachib ko bin som’on e chibog ya yad ma pi’ e athamgil nga laniyan’ e pi walag u lan e ulung. Boor i yad e ma machib u lan 70 e awa u gubin e pul. Ere, uw rogon nrayog ni ngam ayuwegrad?

⁸ Reb e walag nib pin ni ma pioneer ni ka nog Shari ngak e yog ni gaar: “Yira guy e piin pioneer, ma bod ni gubin ngiyal’ ni yad ma par ni yad ba gel ko tirok Got ban’en ni bochan e gubin e rran ni yad ma yan ko machib. Machane, bin riyul’ riy e ku bay yu ngiyal’ ni ma t’uf ni ngan pi’ e athamgil nga lanin’rad.” (Rom. 1:11, 12) Ku immoy reb e walag nib pin ni i pioneer u lan boor e duw ni weliy murung’agen e piin pioneer ko ulung rok ni gaar: “Ba gel e maruwel ni yad ma tay, maku reb e gubin ngiyal’ ni yad ma maruwel. Yad ma felfelan’ u nap’an nra yog boch e walag ni nge mang yad e ni fanay e karrow rorad u nap’an e machib, ara nni piningrad nga tafen reb e walag ko abich, ara ni pi’ bochi reb e salpiy ngorad ni fan ko pensin ara ku boch ban’en. Yira rin’ e pi n’ey ma aram e yibe dag ngorad ni yibe lemnagrad.”

9, 10. Mang e ke rin’ boch e walag ya nge yag nra ayuweged e piin pioneer ko ulung rorad?

⁹ Ga baadag ni ngam ayuweg e piin pioneer u nap’an e machib, fa? I yog reb e pioneer ni Bobbi fithingan ni gaar: “Ba t’uf boch e walag ni nge ayuwegmad ko machib u lan e wik.” Ku bay reb e pioneer ko ulung rok ni gaar: “Ba ga’ ni mithigyal’ e ba mo’maw’ ni nggu pirieg be’ ni nggu warow ko machib u taabang.” Reb e walag nib pin ni ma pigpig u Brooklyn Bethel e chiney e weliy murung’agen e ngiyal’ ni baaram ni i pioneer ni gaar: “Bay reb e walag nib pin ni bay e karrow rok ni gaar ngog, ‘Ra ngiyal’ ndariy be’ ni ngam marow ko machib u taabang, ma ga callnigeg, nga darow.’ Ireray e cha’ ni ayuwegeg nge yag ni gu pioneer nib fel’ rogon.” Reb e walag ni Shari fithingan e ki yog ni gaar: “Piin pioneer ndawor ra uned ko mabgol e ba ga’ ni yad ra mu’ ko machib nranod nga tabinaw rorad ma yigoo yad ni yad ma par. Ere, rayog ni nge ba ngiyal’ mag pining e pi walag ni pumoon nge ppin ndawor ra uned ko mabgol nga tabinaw rom ni fan ko fol Bible ni tabinaw. Maku reb e, faanra un unegrad ko pi n’en ni yima rin’ ma rayog ni nge ayuwegrad ni ngar pared ni yad ba gel ko tirok Got ban’en.”

¹⁰ Ku bay reb e walag nib pin ni ke chugur ni nge gaman 50 e duw ni ke machib u polo’ e tayim rok ni weliy murung’agen e pioneer ni ur ted boch e walag nib pin u taabang ni yad ba muchugbil ni gaar: “Ba dake yu lal’agruw e pul ni ma yan e piin piilal ko ulung romad i guy e piin pioneer. Nap’an ni yad ra yib ra guyed gamad mab ga’ ni yad ma fith ko ke uw rogomad ko m’ar nge rogon e maruwel romad, maku yad ma fith ko bay ban’en ni gamad baadag ni nggu weliyed fa dariy. Pi n’ey ni yad ma rin’ ma yad ma yog e ke yib u gum’ircha’rad. Ba ga’ ni yad ma yib ko gin ni gamad ma par riy ni bochan e ngar guyed ko bay ban’en nib t’uf ni ngar ayuweged gamad riy fa dariy.” Re n’ey e sana ra yibnag ngan’um e n’en ni rin’ be’ nib moon u Efesus ni bay e tabinaw rok ni fan ngak Paul.​—2 Tim. 1:18.

11. Mang e ba muun ko maruwel ni ma rin’ e piin ni yad ma un ko special pioneer?

¹¹ Bay boch e ulung ni yad ba tow’ath ni bochan e bay boch e walag ko ulung rorad ni yad ma pigpig ni yad e special pioneer. Boor ko pi walag ney ni pumoon nge ppin e yad ma machib u lan 130 e awa u gubin e pul. Bochan nib ga’ ni yad ma un ko machib, ma aram fan ni yooren i yad e buchuuw e tayim ni ma un ko maruwel ni ma yag e salpiy riy ngorad ma boch i yad e der ma un ko maruwel. Ere, ba ga’ ni ma pi’ e branch ofis buchuuw e salpiy ngorad u gubin e pul ya nge yag nra feked e tin nib t’uf rorad riy u nap’an ni yad be machib.

12. Uw rogon nrayog ni nge ayuweg e piin piilal nge ku boch e walag e pi special pioneer?

¹² Uw rogon nrayog ni ngad ayuweged e pi special pioneer? Reb e piilal ni ma maruwel u reb e branch ofis ni boor e special pioneer ni yad ma non e yog ni gaar: “Ba t’uf ni nga i non e piin piilal ngorad, ya nge yag nra nanged rarogorad, mar dugliyed ko uw rogon nrayog ni ngar ayuweged yad. Bay boch e walag ni yad ma lemnag ni piin ni yad ma un ko special pioneer e ba fel’ rogorad ni bochan e ma pi’ e ulung e salpiy ni ayuw ngorad, machane, bin riyul’ riy e boor e kanawo’ nrayog ni nge ayuwegrad e pi walag riy.” Piin ni yad ma un ko special pioneer e ku yad bod e pi regular pioneer ni bochan e yad baadag ni nga i un boch e walag ngorad ko machib. Ere gur, rayog ni ngam pi’ e ayuw ko re n’ey?

ROGON NI NGAN AYUWEG E PIIN NI YAD MA LEKAG E ULUNG

13, 14. (a) Mang e susun ndab da paged talin u murung’agen e piin ni yad ma lekag e ulung? (b) Mang e ga be lemnag nrayog ni ngam rin’ ni ngam ayuweg e piin ni yad ma lekag e ulung?

¹³ Ba ga’ ni yima lemnag ni pi walag ni yad ma lekag e ulung nge ppin rorad e yad ba gel ko tirok Got ban’en. Riyul’ e re n’ey, machane ku er rogorad nib t’uf ni ngaun pi’ e athamgil nga lanin’rad, min un ngorad ko machib, min unegrad nga boch ban’en ni yima rin’ ni ngan felfelan’ ngay. Machane, uw rogon ni faanra ka nin’rad nga aspital, ara ba t’uf ni ngan ayuwegrad ni bochan e ke yib ba mit e m’ar ngorad? Rayog ni nga i yan e pi walag u lan e ulung ngan guyrad min ayuwegrad ko tin nib t’uf rorad. Luke ni ir e yoloy fare babyor ni Acts, maku ir reb e “togta,” e ki ayuweg Paul nge ku boch e walag ni ur uned ngak ko milekag kakrom.​—Kol. 4:14; Acts 20:5–21:18.

¹⁴ Pi walag ni yad ma lekag e ulung nge ppin rorad e ba t’uf ni nga i t’ufegrad e pi walag u lan e ulung ma yad be pi’ e athamgil nga lanin’rad. I yoloy reb e walag ni ma lekag e ulung ni gaar: “Pi fager rog e ba ga’ ni yad manang e ngiyal’ nib t’uf ni ngan pi’ e athamgil nga lanin’ug. Ba ga’ ni yad ma fith salpeg, ma re n’ey e ma ayuwegeg ni nggu weliy lanin’ug ngorad. Ma bochan ni yad ma motoyil ngog nib fel’ rogon ma aram fan nrib gel e ayuw ni yad ma pi’ ngog.” Ri ma felfelan’ e pi walag ni yad ma lekag e ulung nge ppin rorad ni faanra i dag e pi walag u lan e ulung ngorad nriyul’ ni yad ma lemnaged yad.

NGAN AYUWEG E PIIN NI YAD MA MARUWEL U BETHEL

15, 16. Mang boch e maruwel ni ma rin’ e piin ni yad ma pigpig u Bethel nge Assembly Hall, ma uw rogon nrayog ni ngad ayuweged yad?

¹⁵ Piin ni yad ma pigpig ko pi Bethel nge Assembly Hall u fayleng i yan e ba ga’ e ayuw ni yad ma pi’ ko fare maruwel ni machib ni yima tay ko pi binaw ni bay u tan e branch ofis rorad. Faanra bay boch e Bethelite ko ulung rom, ma uw rogon nrayog ni ngam dag ni ga ma lemnagrad?

¹⁶ Som’on nra taw e pi walag ney nga Bethel, ma yad ma tawrengnag chon e tabinaw rorad nge pi fager rorad. Ere, yad ma felfelan’ u nap’an ni yad ra pirieg boch e fager nib beech u Bethel ngu lan e pi ulung ni yad ma un ngay! (Mark 10:29, 30) Ba ga’ nrayog ni ngar uned ko muulung nge machib u gubin e wik ni yugu aram rogon ni bay e maruwel ni yad ma rin’ u Bethel. Machane, bay yu ngiyal’ ni ku yima pi’ yugu boch e maruwel ni ngar rin’ed. Ere, ba fel’ ni nga i lemnag e pi walag u lan e ulung e re n’ey mar daged nib ga’ fan e pi walag ney u wan’rad nge maruwel ni yad ma rin’. Faan yad ra rin’ ni aray rogon ma urngin e girdi’ nra yib angin ngorad.​—Mu beeg e 1 Thessalonika 2:9.

NGAN AYUWEG E PIIN NI YAD MA MACHIB U POLO’ E TAYIM RORAD U BOCH E NAM NI GATHI NAM RORAD

17, 18. Mang e ma rin’ e pi walag ni yima pi’rad nga boch e nam ni ngar pigpiggad u polo’ e tayim rorad?

¹⁷ Piin ni yima pi’rad nga boch e nam ni ngar machibgad u polo’ e tayim rorad e rayog ni ngar pirieged boch e magawon. Sana thingar ra ked ba mit e ggan ndar mechamgad ngay, ara ngar filed yugu reb e thin nib thil, ara ngar filed e yalen ko fare nam ni ka ranod ngay, ara ngar thilyeged rogon e par rorad nge m’ag ko par ko fare nam. Mang fan ni yad ma mel’eg ni ngar rin’ed e pi n’ey?

¹⁸ Boch e pi walag ney e yad e missionary, ma ba ga’ ni yad ma fanay e tayim rorad ni fan ko machib, ya aram rogon nrayog ni nge yib angin e pi n’en ni kar filed ko girdi’. Ba ga’ ni ma gay e branch ofis bang nrayog ni nge par e pi missionary riy, maku yad ma pi’ buchuuw e salpiy ngorad nrayog ni ngar feked e tin nib t’uf rorad riy. Ku bay boch e walag ni yima pi’rad nga boch e nam ni ngar maruwelgad ko pi branch ofis, ara ngar uned i toy boch e branch ofis, ara pi ofis ni ma maruwel e piin ni yad ma pilyeg e babyor riy, ara Assembly Hall, ara boch e Kingdom Hall. Pi walag ney e yima pi’ e tin nib t’uf rorad ni bod rogon e ggan, nge naun ni ngar pared riy, nge ku boch ban’en. Pi walag ney e yad bod e piin ni yad ma maruwel u Bethel ya ku yad ma un ko muulung nge machib ni gubin ngiyal’. Ere rib ga’ angin e pi n’en ni yad ma rin’.

19. Mang e susun ndab da paged talin u murung’agen e piin ni kan pi’rad nga yugu reb e nam ni ngar pigpiggad u polo’ e tayim rorad?

¹⁹ Uw rogon ni nge m’ug ni ga ma lemnag e pi walag ney? Dab mu pagtalin ni som’on ni yad ra yan nga reb e nam ma dar mechamgad ko ggan riy. Ere, dab mu pagtalin e re n’ey u nap’an ni ga ra pining bagayad nga tabinaw rom ko abich. U m’on ni ngam pining ma rayog ni ngam fith ngak ko ba miti mang ggan e baadag ni nge kay fa baadag ni nge ri’ lamen. Mu gum’an’nigem u nap’an ni fini yad be fil e thin nge yalen ko nam rom. Sana ba n’uw nap’an mfin ra nanged fan e n’en ni ga be yog, machane rayog ni ngam ayuwegrad u rogon ni nga rogned bbug nge bbug e thin nib fel’ rogon. Pi walag ney e yad baadag ni ngar filed ban’en!

20. Mang reb e kanawo’ nrayog ni nge m’ug riy ni gad ma lemnag e pi walag ni yad ma pigpig u polo’ e tayim rorad nge gallabthir rorad?

²⁰ Ra munmun ma sana ra t’uf ni nge sul e pi walag ney nga taferad ni ngar ayuweged e gallabthir rorad ni ke pilibthir. Faanra gallabthir rorad e yad boch e Pi Mich, ma dabisiy ni yad baadag ni nge par pi fakrad ko gin ni kan pi’rad ngay ya nge yag ni ngkur ululgad ko maruwel ni kan pi’ ngorad. (3 John 4) Riyul’ nra athamgil e pi walag ney ni ngar ayuweged e gallabthir rorad ko tin nib t’uf rorad ma ra u ranod ni ngar guyed yad. Yugu aram rogon ma rayog ni nge pi’ e piin ni yad ba chugur ko pi gallabthir ney e ayuw ko pi walag ney ni aram e ngaur ayuweged yad ko tin nib t’uf rorad. Dab mu pagtalin ni piin ni yad ma pigpig u polo’ e tayim rorad e ri boor e maruwel ni yad ma rin’ ni fan ko fare maruwel ni machib ni aram e re maruwel nth’abi ga’ fan ni yibe rin’ u fayleng e chiney. (Matt. 28:19, 20) Rayog ni ngam ayuweg ara ayuweg e ulung rom e gallabthir ko pi walag ney ko ngiyal’ ni ke t’uf e ayuw rorad, fa?

21. Uw rogon u wan’ e piin ni yad ma pigpig u polo’ e tayim rorad e ayuw nge athamgil ni ma pi’ boch e walag nga lanin’rad?

²¹ Piin ni yad ma un ko machib u polo’ e tayim rorad a gathi yad ma rin’ e re maruwel ney ni bochan e nge yag salpiy ngorad, ya fan ni yad ma rin’ e re maruwel ney e bochan ni yad baadag ni ngar pied e tin th’abi fel’ rorad ngak Jehovah mar ayuweged e girdi’. Ere, ri yad ma felfelan’ ko ayuw ni ma pi’ boch e walag ngorad. Reb e walag nib pin ni kan pi’ nga yugu reb e nam ni nge pigpig u polo’ e tayim rok e yog ni gaar: “Mus ni faanra ke pi’ be’ boch yang i babyor ngom ni nge pining e magar ngom ko maruwel ni ga be rin’ ma ra m’ug riy ni yima lemnagem ma gubin e girdi’ nib felfelan’ ko n’en ni ga be rin’.”

22. Uw rogon u wan’um e pigpig ni yima tay ngak Jehovah u polo’ e tayim?

²² Piin ni yad ma pigpig ngak Jehovah u polo’ e tayim rorad e kar mel’eged e n’en th’abi fel’ ni ngar rin’ed ko yafas rorad. Re maruwel ney e ba mo’maw’, ma boor ban’en ni yira fil riy, maku yira pirieg e felfelan’ riy. Ma piin ni yad ra un ngay e rayog ni ngar filed boor ban’en riy nra ayuwegrad e chiney ngu nap’an ni ka darod nga tan e gagiyeg nra tay Gil’ilungun Got. Ere, ngad guyed rogon ‘dabi m’ay u wun’dad’ e maruwel nib gel ni ma tay e piin ni yad ma pigpig u polo’ e tayim rorad.​—1 Thess. 1:3.