Ngam Dag ni Ba T’uf Be’ Rom​—Ngam Fith e Deer Ngak ma Ngam Motoyil

¹ Baga’ ni ba adag e girdi’ ni ngar weliyed e lem rorad machane dubrad ni ngan fonownagrad ara ngan fith boor e deer ngorad ni ngan guy rogon ni ngan thiliyeg e lem rorad. Bochan ni gadad e pi Kristiano ma ba t’uf ni ngad filed rogon ni ngan pug e tafinay ko girdi’ u daken boch e deer.​—Prov. 20:5.

² Pi deer rodad e susun ni nge pining e girdi’ ngar weliyed e lem rorad ma gathi ngan n’igin ni ngan tugthin. Nap’an ni be yan reb e walag ko machib u mit e tabinaw iyan ma ma fith ni gaar: “Ga be lemnag ni ra taw ko ngiyal’ ni ra bagadad ma ra tay fan bagadad?” Ma faanra ba puluw ko fulweg ni pi’ ma ra gaar: “Mang e thingari buch ma rayog e re n’ey?” ara “Mang fan ni ga be lemnag ni aram rogon?” Nap’an ni be machibnag e girdi’ u fithik’ e sabethin ara yu gin ni fene yoor, ma ma fith reb e walag ko piin ni bay e bitir rorad ni gaar: “Mang fan ni gab falfalan’ ya bay e bitir rom?” Ma aram ma ma fith, “Mang e be magafan’um ngay?” Mu tiyan’um ngay ni pi deer ney e ra n’igin nge weliy e girdi’ e lem rorad ma dabra tamra’gad ngay. Bochan ni ba thilthil salpen e girdi’ ma thingar da thiliyeged e n’en ni gad ra weliy nge pi deer ni gad ra fith nge puluw ko girdien e binaw.

³ Ngan Pug e Tafinay ko Girdi’: Faanra ba adag be’ ni nge weliy e lem rok ma ngam motoyil ngak ma dabmu taleg. (Jas. 1:19) Ngam pag ngar weliyed boch ban’en. (Kol. 4:6) Rayog ni ngam gaar: “Kammagar kam weliy e re n’en nem ngog.” Ngam pining e sorok ngorad ni faanra rayog ni ngam rin’ u fithik’ e yul’yul’. Ngam fith boch e deer ni ngam nang e n’en ni yad be lemnag nge mang fan. Ngam guy rogon ni ngam weliy ban’en nra taab lanin’mew ngay. Nap’an ni ga ba adag ni ngam tamilangnag e thin ko Bible ma ngam gaar, “Kaamu lemnag e re n’ey?” Ma dabmu non rogon nra n’igin e tugthin.​—2 Tim. 2:24, 25.

⁴ Rogon nra fulweg e girdi’ e pi deer ni gad ra fith e ra tor ko uw fene fel’ rogon ni gad ra motoyil ngorad. Manang e girdi’ ni faan gad be motoyil u gum’ercha’dad. Ke weliy reb e piilal ni ma lekag e ulung ni gaar: “Nap’an ni ga ma dag ko girdi’ ni ga ba adag ni ngam motoyil ngorad ma ra k’aringrad ni ngar adaged.” Ngan motoyil ko girdi’ ma aram e yibe tay farad ma rayog ni nge k’aringrad ni ngar motoyilgad ko fare thin nib fel’ ni gad be wereg ko girdi’.​—Rom. 12:10.