Babyor Rok E Governing Body

Gad ma folwok rok Jesus, ni ngad yibilayed ku Got: “Ngan tay fan fithingam nib thothup.” Ngongol ni gad ma tay u gubin e rran ni gad e Pi Mich Rok Jehovah e be micheg ni gad ba adag ni ngad folgad ko pi thin nem. Machane, gathi yigoo fithingan Got e ba t’uf ni ngad nanged. Ya gubin ngiyal’ ma thingar da n’ufed e re ngochol nem. Bin th’abi ga’ e flaab nrayog ngodad e ngan pining e Pi Mich Rok Jehovah ngodad.​—Matt. 6:9; Isa. 43:10.

Manang e girdi’ rok Jehovah e thin ko Psalm 110:3, me ere yad ma un ko maruwel nthingar ni rin’. Mang fan urngin mit e girdi’ nib thil e duw rorad nge nam rorad e yad be pag farad ni ngar uned ko re maruwel ko machib ney? Ba ga’ ni bochan e ba t’uf Got rorad ma yad ba yul’yul’. Be tay Deuteronomy 6:5, 6 chilen ngodad ni ngad t’ufeged Jehovah u ‘polo’ i gum’ircha’dad ngu polo’ i lanin’dad, ngu polo’ i gelngidad.’ Re t’ufeg ney ni bay u gum’ercha’dad e ma k’aringdad ngad fanayed e tayim rodad, gelngidad, nge tirodad ni ngad m’oneged Gil’ilungun Got, nib muun ngay ni ngad uned ko machib u rogon nrayog rodad.

Bochan e ba t’uf e girdi’ rok Got ma ar fan ni i tay ni nge machibnag fare thin nib fel’ ko Gil’ilungun Got nga gubin yang u fayleng. Dabun ni ngan thang e fan rok be’, ya ba adag ni nge urngin e girdi’ ma yad pi’ keru’rad ko kireb rorad mar sulod ngak Fa En ni Sunmiyrad nge yog e yafos ngorad. (2 Pet. 3:9) I gaar Jehovah, “Da gu adag ni ngug guy reb e tadenen ni nge yim’. Ku gub adag ni ngug guy ni ke tal ndakir denen nge par nib fos.” (Ezek. 33:11) Nap’an ni ngad uned ko machib u mit e tabinaw, ma gad be micheg ni ba t’uf e girdi’ Got. Ar fan nra yog e felfelan’ ngodad ko ngiyal’ ni ngad uned ko re maruwel nib ga’ fan ney.

Gad ra dag nib t’uf Jehovah rodad u rogon ni gad ma tay fan e Thin rok ni i thagthagnag, ni aram e Thin nib Thothup. Faanra da immoy e Bible, ma dab da nanged Got ma dabiyog ni ngad chugurgad ngak u rogon ni be piningdad James 4:8 ni ngad rin’ed. Maku dab da nanged ko mang fan ni gad be par ni gad ba fos ma mang e ra buch nga m’on. (Roma 5:12) Maku dab da nanged e t’ufeg rok Got ni i pi’ Fak ni maagirag ni fan ni nge biyuliydad. Ku be pi’ Jehovah e tamilangan’ nge gonop ngodad. Uw fene fel’ e tow’ath ni ke pi’ ngodad, ni aram e Thin rok ni i thagthagnag! Bochan e gad be tay fan e re tow’ath ney ma gad ma bieg, fil, nge fl’eg i lemnag e pi thin rok u gubin ngiyal’ nra mab e kanawo’ ngodad. (Eph. 5:15, 16; Ps. 1:1-3) Susun ndab da lemnaged ni ba magawon ni ngad ted e tayim ni fan ni ngad bieged e Thin rok Got u reb e rran nge reb. Bochan e ba t’uf Got rodad ma ra k’aringdad ngad adaged ni ngad bieged e Thin rok, ma ra ga’ i yan e tamilangan’ nge t’ufeg rok Got u wan’dad.

Kad filed ko Bible ni ngiyal’ ni i denen Adam ku Jehovah, ma ke af ngak urngin e bitir rok, nib muun gadad, e yafos ni dariy e athap riy mab kireb. Machane, ke pithig Got e kanawo’ ko girdi’ nge fel’ e par rorad, me dugliy ni nge riyul’ e tin nib m’agan ngay.​—Gen. 3:15.

Dariy e maruwar riy ni gad gubin e gad ba adag ni ngad ted fan e ngochol rok Got. Faani yoor e tamilangan’ u wan’dad ko uw fene fel’ Jehovah Got, ma ra k’aringdad ngad folgad rok, nge ulung rok ni be wereg fithingan nge tin nib m’agan’ ngay. Ba mudugil ni ke felfalan’ Got ngodad ma be flaabnagdad e ngiyal’ ney ma ra pi’ e yafos ndariy n’umngin nap’an ngodad u lan e bin nib biech e fayleng.

Gamad girdien e Governing Body e gamad ba adag ni nggu micheged e t’ufeg romad ngomed e pi walag ni pumoon nge ppin. Maku gamad be pining e magar ngomed kam athamgilgad ngam fanayed e tayim ni ka bay u m’on ko “fare gafgow ni baga’” ni ngam gayed urngin e girdi’ nrayog romed ngam machibnaged fare thin nib fel’ ngorad. (Rev. 7:14) Bochan e kam rin’ed ma rayog ngorad e tamilangan’ rok Got nge Kristus nra pow’iyrad ko yafos ndariy n’umngin nap’an.​—John 17:3.

Pi walagmed,

Governing Body of Jehovah’s Witnesses