Mu Fal’eg Rogom u M’on ko Muulung Ya nge Yog Nim Felfelan’
1. Mang e ra ayuwegdad ni nge felfelan’dad ko pi muulung ni gad ma un ngay me yib angin ngodad?
1 Susun e ngaud ted e tayim ni fan e ngaud fal’eged rogodad ko pi muulung. Sana boch e girdi’ e rayog ni ngar ted boor e tayim ni fan e ngar fal’eged rogorad ko pi muulung. Machane, yugu demtrug feni yoor pa’ u puluwdad ma ba fel’ ni ngaud fal’eged rogodad ni fan ko pi muulung ni gad ma un ngay.—1 Tim. 4:15, 16.
2-5. Uw rogon ni ngad fal’eged rogodad ni fan ko: (a) Fol Bible ko Ulung? (b) Theocratic Ministry Skul? (c) Service Meeting? (d) Fol Wulyang Ntagil’ e Damit?
2 Fol Bible ko Ulung: Som’on e ngam fal’eg i yaliy e thin riy; mag lemnag kenggin e guruy nge pi subheading riy. Ma nap’an ni ga be beeg e thin riy, mag fal’eg i lemnag e pi n’en nib ga’ fan riy. Mu gay rogon ni ngam pi’ e fulweg ko thin rom. Ma tomuren ni kam mu’ i fil fapi n’en ni yira fil, mag sul nga daken u lanin’um. Mag gay rogon ni nge dab mu pagtalin e pi n’en nib ga’ fan riy nge rogon ni ngam weliy.—2 Tim. 2:15.
3 Theocratic Ministry Skul: Mu gay rogon ngaum beeg e Bible rom ni gubin e rran. (Josh. 1:8) Mu sul nga daken e pi n’en ni yira fil, mag fek e pi babyor nib t’uf ni ngam fek ya nge yog ni ngam fanay u nap’an e muulung. Mag lemnag rogon nrayog ni ngam fanay e pi thin nem u nap’an e machib.
4 Service Meeting: Mu yaliy fa gi babyor ni Machib Ko Gil’ilungun. Mag beeg e pi n’en ni yira weliy murung’agen. Faan yira weliy ban’en u lan ba ken e Wulyang Ntagil’e Damit ara yugu reb e babyor, mag gay ngam beeg u m’on riy. Ma faanra yira dag rogon reb i kanawoen e machib u mit e tabinaw, mag yan u daken u m’on riy ya nge yog nim fanay u nap’an e machib.
5 Fol Wulyang Ntagil’ E Damit: Mu beeg e babyor rom u m’on riy mag gay e fulweg ko pi deer riy. Ga ra beeg e pi thin nu Bible riy ma ra ayuwegem ni nge tamilang fare thin u wan’um. Maku faan ga ra fal’eg i lemnag rogon nib m’ag e thin riy ko tin ni ga manang ma aram e rayog ni nge gel e tamilangan’ rom ko tirok Got ban’en. Mu fal’eg rogon taareb ara l’agruw e paragraph ni ngam pi’ e fulweg riy u nap’an e re muulung nem, ya aray reb e kanawo’ nrayog ni ngam weliy murung’agen e ‘n’en ni ir e ke l’agan’um ngay.’—Heb. 10:23.
6. Mang e ku ra ayuwegdad ni nge felfelan’dad ko pi muulung ni gad ma un ngay?
6 Nge Felfelan’um ko Pi Muulung ni Yima Tay: Ra nge felfelan’um ko pi muulung ni gad ma tay ma rib ga’ fan ni nga mub nib tayim, ya nge yog nim un ko meybil ni yima tay u tabolngin e muulung ni yibe ning gelngin Jehovah nib thothup ni nge pow’iy e muulung ni ngan tay. Ku ra yib angin ngom e pi tang ni yima yin’ u nap’an e muulung. Kub ga’ fan ni ngam yaliy e pi thin nu Bible ni yima beeg u nap’an e muulung. Ya faan ga ra rin’ ni aram rogon ma aram e ra ayuwegem ni nge dab mu pagtalin e n’en ni kan weliy u nap’an e muulung. Faan ga ra weliy e tin ni kam fil ngak chon e tabinaw rom nge pi tafager rom ma ra ayuwegem ni nge mit ngom e tin ni kam fil. Faan gad ra fol ko pi thin ney ma ra ayuwegdad ni nga i felfelan’dad ko pi muulung ni gad ma un ngay me yog ni ‘nge bagadad me lemnag bagadad, me bagadad me ayuweg bagadad ma be dag ngak nib t’uf rok ma be rin’ e tin nib fel’ ngak.’—Heb. 10:24, 25.