Babyor ni ke Yib Rok Fare Governing Body

Ngak e Pi Mich Rok Jehovah ni Walagmad:

Ri gad ba tow’ath ni gad be weliy fithingan e En Nth’abi Tolang u Ga’ngin e Palpalth’ib ni aram Jehovah! Re ngachal ney e ra par ni manemus, ma dariy yugu reb e ngachal ni taareb rogon ngay. Jehovah e ir e ke pi’ mat’awdad ni ngad weliyed murung’agen fithingan. Ma kan nangdad ni ka nap’an e duw ni 1931 ni bochan e re ngachal nem. (Isa. 43:10) Ere aram fan ni gad ba felfelan’ ngay ni yima yog e Pi Mich Rok Jehovah ngodad.

Kab kafram i yib ni be guy Moonyan’ rogon ni nge kirebnag fithingan Got. Be fanay e pi nam ni ngar darifannaged ma yad be togopuluw nga fithingan Jehovah. Fare Babylon nib Gilbuguwan, ni aram e pi yurba’ i teliw ni googsur u fayleng, e yad ba fanenikan e re ngachal nib thothup nem, ma boor ken e Bible ni kar chuweged riy. Machane, Jesus e i tayfan e ngachal rok e Chitamangin, me mon’eg u lan fare kenggin e meybil ni fil ngak pi gachalpen. I gaar: “Baara’ rogon ni ngam meybilgad ni nge lungumed: ‘Chitamangimad ni ga bay u tharmiy: Ngan tay fan fithingam nib thothup.’” (Matt. 6:9) Ma boch nga tomuren u nap’an ni be meybil ngak e Chitamangin miki yog ni gaar: “Kug weliy murung’agen fithingam ngak e piin ni kam pi’rad ngog u fayleng.” (John 17:6, NW) Ere ku arrogodad ni gad be folwok rok Jesus, ma kad dugliyed u wan’dad ni ngad weliyed fithingan Jehovah u ga’ngin yang e fayleng nib mus rogodad riy.

Fare thin nu Bible ni fan ko duw ni 2009 ni kenggin e “Ngan weliy fare thin nib fel’ ngak urngin mit e girdi’” e ke pi’ e athamgil nga lanin’dad ni ngad rin’ed fare maruwel ni machib nib fel’ rogon. (Acts 20:24) Dariy e maruwar riy ni ke tow’athnagdad Jehovah ko fare duw ni baaray ni ke yan. Kan wereg e machib u ga’ngin yang e fayleng ma kan pining e sorok nga fithingan Jehovah. Chiney e ke yan i taw urngin e tamachib ko 7,313,173, ma yad be machibnag fare thin nib fel’ ma yad be ayuweg e piin ni yad baadag e tin riyul’ ni ngar nanged rogon ni ngar pithiged e pi magawon ni yad ma mada’nag u gubin e rran. Urngin e girdi’ nra uned ko Puguran ko Yam’ ni Tay Kristus fa binem e duw e 18,168,323. Re n’ey e be dag ni dabisiy ni ka bay bokum milyon e girdi’ ni yad ra pining fithingan Jehovah ni nge ayuwegrad u m’on ni nge thang e re m’ag nib kireb ney.

Gad ra ulul i machibnag fare thin nib fel’ u murung’agen Gil’ilungun Got ngak e girdi’ u fithik’ e pasig nge taw ko ngiyal’ ni ke taleg Jehovah e re maruwel ney. (Matt. 24:14; Mark 13:10) Gad be athamgil ni ngad weliyed fithingan Jehovah nge n’en nib m’agan’ ngay ngak urngin e girdi’ nrayog rodad u mit e tabinaw, ara u kanawo’, ara babyor, ara telephone, ara u fithik’ e sabethin.

Ba mich u wan’dad nra rin’ Jehovah ban’en ni nge gagiyelnag feni thothup fithingan. (Ezek. 36:23) Ri dabki n’uw nap’an ma bayi math lungun e piin ni yad ma gathibthibnag fithingan Jehovah. Ra taw ko ngiyal’ nem ma rra felfelan’ e pi tapigpig rok ni yad ba yul’yul’ ni kar weliyed fithingan ma kar ted fan mat’awun ko gagiyeg!

Nap’an fare District nge International Convention ni kenggin e “Mu Tedan’med ko Matanag!” ni kan tay u ga’ngin yang e fayleng u nap’an e duw ni 2009, ma ke m’ug gelngin feni ri ma t’ufeg Jehovah e girdi’ rok. Ba ga’ fan e re convention nem ya ke ayuwegdad ni ngad tedan’dad ko matanag u nap’an ni be chugur i yib fare rran rok Jehovah.​—Mark 13:37; 1 Thess. 5:1, 2, 4.

Rriyul’ ni ma rin’ Jehovah e tin nib fel’ ngodad; ya ma felfelan’nagdad ma ma pi’ e toffan ngodad u daken e ted nib galunglung e pan riy ma ma pow’iydad nga yungi ran nib machalbog ma ba mocha’ ni be yip’ fan ban’en.​—Ps. 23:1, 2; 100:2, 5.

Faan gimed ra pigpig ngak Jehovah u fithik’ e pasig ko tin ni bayi yib e pul nga m’on, ma rayog ni nge pagan’med nra flaabnagmed!

Gamad be pi’ e t’ufeg romad ngomed,

Pi walagmed,

Governing Body ko Pi Mich Rok Jehovah