Guruy ni 3

Mini’ Jesus Kristus?

Mang fan ni kan pining ngak Jesus ni “bin nganni’ ” i Fak Got? (1)

Mang fan ni ku yima pining “fare Thin” ngak? (1)

Mang fan ni yib Jesus nga fayleng nib girdi’? (2-4)

Mang fan ni i ngongliy boch e maangang? (5)

Mang e bayi rin’ Jesus boch nga m’on? (6)

1. I par Jesus u tharmiy ni reb e kan u m’on ni nge yib nga fayleng. Ir e som’on ko tini sunumiy Got, me ere kan nog e “bin nganni’” i Fak Got ngak. (Kolose 1:15; Revelation 3:14) Kari mus ni goo Jesus Fak Got ni ir rok e sunumiy. I fanay Jehovah pa’ Jesus nge mang “an salap nta maruwel” rok nge sunumiy urngin ban’en u tharmiy ngu fayleng. (Proverbs 8:22-31; Kolose 1:16, 17) Ki ta’ Got ni nge mang mit e thin Rok. Ar fan ni kan pining “fare Thin” ngak.—John 1:1-3; Revelation 19:13.

2. Rogon ni l’og Got Fak nga falyeng e nga l’ueg e yafas rok nga yin Maria. Ere dariy e chitamangin Jesus nib girdi’. Ar fan ni de af e denen ngak fa kirebun ban’en. Dalip fan ni ke l’og Got Jesus nga fayleng: (1) Nge fil ngodad e tin riyul’ u morngaagen Got (John 18:37), (2) ma nge par nib yul’yul’ ni fan ni nga uda folwokgad rok nga uda leked (1 Peter 2:21), ma (3) nge pi’ e yafas rok ni nge biyuliydad me pithigdad ko denen nge yam’. Mang fan nib t’uf e re n’ey?—Matthew 20:28.

3. Adam ni bin som’on e girdi’ e de fol ko n’en ni ke ta’ Got chilen me rin’ ban’en ni kan nog e “denen” ngay u Bible. Me ere ke turguy Got ni ra yim’. (Genesis 3:17-19) Ma daki taw ko fare dodou ni ta’ Got ni nge par riy, ma daki flont. Mi pillibthir iyan nib sowath me munmun me yim’. Ma urngin i pi fak Adam e goo ke af e denen rok ngorad. Ma ar fan ni gad ma pillibthir ma gad ma m’ar, ma gad ma yim’. Ra diin min thapeg e girdi’ ku Got?—Roma 3:23; 5:12.

4. Jesus e ir be’ nib flont ni bod Adam. Machane de bod Adam ko ngiyal’ ni i mada’nag e pi skeng nib ga’, ya rib flont rogon ni i fol rok Got. Ere rayog rok ni pi’ e yafas rok nib flont ni maligach ni puluwon e denen ku Adam. Aram e n’en ni ka nog u Bible ni “biyul’.” Aram e n’en ra pithig pi fak Adam ko yam’. Urngin e girdi’ nra mich Jesus u wan’rad e yira n’ag fan e denen rorad ma rayog e yafas ni manemus ngorad.—1 Timothy 2:5, 6; John 3:16; Roma 5:18, 19.

5. Nap’an ni immoy Jesus u fayleng ma i golnag e liliy, me duruw’iy e piin ke yib e bilig ngorad, ma i mocha’nag e nifeng nib gel. Miki faseg e yam’. Mang fan ni i ngongoliy boch e maangang? (1) Ke kireban’ ko girdi’ ni yad be gafgow, ma ba m’agan’ ngay ni nge ayuwegrad. (2) Ma pi’ maangang nem ni i ngongliy e be micheg ni ir Fak Got. (3) Ma be micheg e tin ra rin’ boch ngaram ni fan ko piin ma fol rok u nap’an nra mang Pilung ni nge gagiyegnag e fayleng.—Matthew 14:14; Mark 2:10-12; John 5:28, 29.

6. Yim’ Jesus me faseg Got nib kan, me sul nga tharmiy. (1 Peter 3:18) Ka aram nap’an me ta’ Got ni nge Pilung. Ma dabki n’uw nap’an ma ra chuweg Jesus urngin e kireb nge gafgow ko re fayleng ney.—Psalm 37:9-11; Proverbs 2:21, 22.

[Sasing ko page 7]

Maruwel ni i tay Jesus e ba muun ngay e machib, ma i fl’eg e maangang, miki ognag e yafas rok ni fan ngodad