“Um Rin’ed e Re N’ey”
Fare Puguran ni Yira Madnomnag ko April 5
1. Mang nib ga’ fan fare Puguran ko yam’ ni tay Jesus?
1 “Um rin’ed e re n’ey ngi i pugurag ngomed.” (Luke 22:19) Ke tay Jesus chilen ngak pi gachalpen ni ngaur madnomnaged e yam’ ni tay. Fare biyul e rib ga’ angin ko girdi’, ere aram fan ni fare Puguran ni ma tay e pi Kristiano u gubin e duw e aram e re Madnom ni th’abi ga’ fan. Chiney ni be chugur ko April 5, e uw rogon ni ngad daged ni gad be pining e magar ngak Jehovah?—Kol. 3:15.
2. Uw rogon ni nge m’ug nib ga’ fan fare Puguran ko yam’ ni tay Jesus u wan’dad u daken e fol Bible ni gad ma tay nge pi n’en ni kad filed ni gad ma fal’eg i lemnag?
2 Ngan Fal’eg Rogoy: Faanra ba ga’ fan ban’en u wan’dad ma gad ma fal’eg rogodad ni fan ngay. Ere rayog ni ngad fal’eged rogodad ni fan ko fare Puguran ni faan gad ra weliy chon e tabinaw rodad e n’en ni buch rok Jesus u nap’an ni ke chugur ni ngan li’ ngem’, ma gad fal’eg i lemnag. (Ezra 7:10) Fapi Thin nu Bible ni ngan beeg u nap’an ni ke chugur fare Puguran e bay ko page 6 ko Machib Ko Gil’ilungun ko November 2011.
3. Faan gad ra yoornag e tayim rodad ni fan ko machib ma uw rogon nra m’ug riy nib ga’ fan fare Puguran u wan’dad?
3 Ngan Machib: Ku rayog ni ngad daged nib ga’ fan fare Puguran u wan’dad ni faan gad ra yoornag e awa ni ngad machibgad riy. (Luke 6:45) Yira tabab i pining e girdi’ ko re Madnom nem ko Sabado, March 17. Rayog ni ngam yarmiy e pi n’en ni ga ma rin’ ya nge yog ni yoor e tayim rom ni fan ko machib ara ngam un ko pioneer ni ayuw, fa? Mang ndab mu weliyed chon e tabinaw rom e re n’ey ko bin migid e Fol Bible ni Tabinaw ni gimed ra tay?
4. Mang angin nra yib ngodad ni faan gad ra un ko fare Puguran?
4 Faan gad ra un ko fare Puguran ni yima tay ni gubin e duw ma riyul’ nra fel’ rogodad riy! Ra gel e felfelan’ nge t’ufeg rodad ngak Got u nap’an ni gad ra fal’eg i lemnag feni gol Jehovah ya ke pi’ Fak ni kari maagirag rok ni nge biyuliydad. (John 3:16; 1 John 4:9, 10) Re n’ey e ra k’aringdad ni nge dab ku ud ngongolgad ni gad be yan nga tabon lanin’dad. (2 Kor. 5:14, 15) Maku ra k’aringdad ni ngad pininged e sorok ngak Jehovah. (Ps. 102:19-21) Pi tapigpig rok Jehovah e ri yad be sonnag fare Puguran ni yira madnomnag ko April 5, ya aram e ngiyal’ ni ‘yira weliy murung’agen e yam’ ni tay Somol.’—1 Kor. 11:26.